¿KENON kimatiskiaj akinon Mesías? ToTajtsin kichiuaskia makixmatikan. Ijkuak otlan kijkuilouaj Tlajkuiloltin Hebreas, opanok kanaj cuatrocientos xiujtin niman se iluikaktekitketl itoka Gabriel onoteititi itech María, se ichpochtli akin chantiya Nazaret tlen onkatka ika tlakpak ipan Galilea. Gabriel okijli María ika kipiyaskia ikonetsin. Maski yejua ichpochtli katka, toTajtsin kichiuaskia ika ichikaualis noso iespíritu santo, makipiya ikonetsin. Yejuin telpokatsin akin yonoijtoka uajlas yeskia Tekiuaj niman nochipa tlanauatiskia. ToTajtsin kitlaliskia ijtik María, inemilis iKoneuj akin iuan chantiya iluikak.

María okiseli ika yolyemanilistli tlen toTajtsin okitlatkiti. José akin kojxinketl katka ononamikti iuan María ijkuak toTajtsin okuajtitlanili se iluikaktekitketl niman okitomili nochi tlen panotoya. Aman matikilnamikikan ika yonoijtoka ika Mesías tlakatiskia Belén, xtlakatiskia Nazaret (Miqueas 5:2). Pampa Belén uejka nokauaya kanaj 150 kilómetros, ¿kenon nochiuaskia tlen yonoijtoka?

Xopanok miyek tonaltin, se tekiuaj ipan Roma otlanauati nochimej manoijkuilokan kampa otlakatikoj niman ijkon manopouakan kechmej katkaj. Nesi ika ichanejkauan José niman María otlakatkej Belén, kuakon omemej oyajkej ompa ijkuak sa achijtsin poliuiya niman tlakatiskia Jesús (Lucas 2:3). Jesús otlakat kampa kintsakuayaj yolkamej, niman okitekakej san ipan se kuexomatl. Xuejka kampa otlakatiko Jesús, miyekej iluikaktekitkej onoteititijkej itech sekimej tlajpixkej niman okimijlikej ika yotlakatiko Mesías noso Cristo, akin yonoijtoka uajlaskia.

Noijki nemiskiaj sekimej tlaltikpakchanejkej akin kijtoskiaj ika Jesús katka Mesías akin yonoijtoka uajlas. Teotlajtoketl Isaías okijto ika yakaj kiyektlaliskia ojtli itech tekitl tlen melak ueyi kichiuaskia Cristo (Isaías 40:3). Yejon tlakatl yeskia Juan akin teapolaktiaya noso Bautizante. Se tonajli ijkuak okitak Jesús okijto: ‘Xkitakan iborreguito Dios, akin kintlapopoluilis intlajtlakoluan nochimej on tlaltikpaktlakamejʼ. Nimantsin miyekej akin kitokayaj Juan opeuj kitokaj Jesús. Semej yejuamej okijto: “Yotiknechtijkej on Mesías” (Juan 1:29, 36, 41).

Aman okse tlen poliuiya nochiuaskia. Ijkuak Jesús oyaj itech Juan pampa kinekiya makiapolakti, Jehová ika iespíritu santo okitokayoti Mesías niman okijto: “Yejua in [...] notlajsojkaKonetsin yejuan itech nipaktikaj” (Mateo 3:16, 17). ¡Mesías akin yonoijtoka uajlas oyejkok!

¿Kemanon opanok yejuin? Ipan xiuitl 29 ijkuak otlan cuatrocientos ochenta y tres xiujtin tlen yokijtoka Daniel. Yejuin san seki tlen kiteititia ika Jesús yejua katka Mesías noso Cristo. Aman, ¿tlenon tlajtoltin teijliskia Jesús ijkuak nemiskia ipan tlaltikpaktli?

(Onokixti itech Mateo itlaxeloluan uejueyimej 1 ontlami 3, Marcos 1, Lucas 2 niman Juan 1.)