¿Tleka noneki tomachtiskej Biblia?
Nion se amoxtli xkeman ijkon yonoxelo ken Biblia. ¿Yotikitak tlen kijtoua? Melak miyekej tlaltikpakchanejkej maski san kanon machantikan, yokinextijkej yolseuilistli niman tlamachialistli itech tlen kijtoua niman yokiminpaleui ipan iminemilis. San ika, nemij miyekej akin xkimatij tlen kijtoua, niman sekimej —maski tla kineltokaj toTajtsin noso ka— kuelitaskiaj kuajli kixmatiskej tlen kijtoua. Tla tejua noijki tikneki tikixmatis, yejuin amatlajkuilojli mitspaleuis xpeua xkixmati.
NONEKI xkixmati achijtsin yejuin amoxtli niman kuakon kema tipeuas tikitas tlen kijtoua. Biblia noijki kixmatij kentla iTlajtol toTajtsin, kipiya 66 amoxtin. Peua ika Génesis niman ontlami ika Revelación, noso Apocalipsis.
¿Akinon itlanemililuan tlen ikuiliujtok ipan Biblia? Kuajli akin notlajtoltiaj yejuin. Opanok kanaj mil seiscientos xiujtin niman kanaj cuarenta tlakamej okikuilojkej. Melak kuajli ika nion se xokijto tla yejua itlanemilil tlen okijkuilo. Se okijto: ‘Nochi Yektlajkuilojli itech Dios ualeujtikajʼ (2 Timoteo 3:16). Niman okse okijto: “Iespíritu [santo] toTajtsin otlajto nopampa, niman itlajtol onkatka ipan nonenepil” (2 Samuel 23:2). Ken tikitaj, akin okikuilojkej okijtokej ika tlen ikuiliujtok ipan Biblia itlanemililuan Jehová akin Ueyixtika. Ompa techijlia ika yejua otechmakak niman ijkon matikixmatikan.
Noijki noneki xkixmati tlen noteneua itech nochi Biblia: toTajtsin kitlalis iluikak se tekiuajyotl niman ijkon makimatikan ika san yejua kinamiki makinyekana tlaltikpakchanejkej. Ipan yejuin amatlajkuilojli tikitas ika yejuin noteneua ipan nochi Biblia, peua ipan Génesis niman ontlami ipan Apocalipsis.
Timitsyoleuaj maka xkilkaua yejuin ijkuak tipeuas tikasikamatis tlen kijtoua Biblia, se amoxtli tlen melak miyekej kixmatstokej ipan nochi tlaltikpaktli.
a Miyek onka kenon noijtouaj fechas. Ipan yejuin amatlajkuilojli tiktlaliskej i.x.x. 1 ijkuak xpeuaya xiuitl 1 niman ijkuak yopeujka xiuitl 1 san tiktlaliskej xiuitl. Tlatsintlan ipan yejuin páginas, san tiknextis i.x.x. 1, noso xiuitl.
Puede que también le interese
TOTECHKOPA
¿Tleka noneki timomachtis Biblia? (nochi video)
Ipan nochi tlaltikpaktli, yokinpaleui miyekej tlaltikpakchanejkej makimatikan tlen notlajtoltiaj ipan innemilis. ¿Tikuelitaskia noijki mamitspaleui?
