MIYEK xiujtin ijkuak Israel xkalakiya Canaán, Jehová yokijlika Abrahán ika kiminmakaskia ikoneuan yejon tlajli. Niman aman ika kinyekantoya Josué, sa achijtsin poliuiya ijkuak kalakiskiaj ipan Tlajli kampa toTajtsin yokijtoka kiminmakas.

ToTajtsin okijto ika nonekiya makiminmiktikan cananeos, pampa melak xkuakualtin katkaj niman xkuajli kipiayaj intlanemilil. Kuakon okimijli israelitas kenon kinchiuiliskiaj kalpamej tlen onkatkaj itech Canaán ijkuak kimpopoloskiaj.

Ijkuak xikalakiyaj ipan yejon país, Josué okititlan omemej tlakamej maichtakatlachiatij. Yejuamej okalajkej Jericó niman oajsikej ichan se siuatl itoka katka Rahab. Maski yejua kimatstoya ika israelitas katkaj, okinkauili ompa maniyanakan. ¿Tleka? Pampa yokitekakilijka tlen Jehová okichiuj ijkuak okimakixti ikalpan niman aman itech tlaneltokaya. Rahab okinchiualti yejon tlakamej makijlikan ika yejua niman ichanejkauan xkinmiktiskiaj ijkuak kixoxotoniskiaj yejon ueyikalpan.

Sakin, israelitas okalajkej Canaán niman opeujkej ika Jericó. Jehová okichiuj maxoxotonikan itepanuan niman soldados otlankej kiminmiktiaj akin ompa chantiyaj, san ika, Rahab niman ichanejkauan omakiskej. Ijkon ipan chikuasen xiujtin Josué niman isoldados ouelkej miyek tlaltin, okinotlatkitijkej itech Tlajli tlen toTajtsin yokijtoka kiminmakaskia. Sakin, uejueyimej familias israelitas okinxexelouilijkej tlaltin tlen okinotlatkitijkej.

Se tonajli ijkuak achijtsin poliuiya ika mikis Josué, okinsentlali nochimej israelitas. Okimintlalnamikti tlen toTajtsin yokichiujka inpampa inuejkachanejkauan niman okiminyoleuj maka makikauakan Jehová. San ika, ijkuak omik Josué niman akin imiuan kistinemiyaj, israelitas okikaujkej Jehová niman opeujkej kinueyichiuaj tajtsitsintin. Ijkuak opanokej okseki trescientos xiujtin, miyekpa xokitlakamatkej itlanauatiluan toTajtsin. Niman ijkuak yejon kichiuayaj, Jehová kinkauiliaya filisteos niman oksekimej akin kintlauelitayaj, matetlanikan. Niman nochipa ijkuak kitlajtlaniliayaj Jehová makinpaleui kiminmakaya se temakixtijketl. Onenkej majtlaktli iuan ome temakixtijkej akin kimixmatiyaj kentla jueces.

Amoxtli Jueces tlen onka ipan Biblia kijtoua nochi yejuin tlen opanok, peua technojnotsa itech juez Otniel niman ontlami ika se juez akin xakaj uajnemi okse ijkon makojtik ken yejua: Sansón. Nochi tlen onoijkuilo ipan amoxtli Jueces techmachtia tlen noneki maka matikilkauakan: tla tiktlakamatij Jehová, kuajli tinemiskej ipan tonemilis; tla ka, titlajyouiskej.

(Onokixti itech Josué, Jueces niman Levítico 18:24, 25.)