JESÚS kuikaya yeyi iuan tlajko xiuitl ika tenojnotstinemiya niman kimatstoya ika sa achijtsin poliuiya ijkuak kimiktiskiaj. Tlamachtijkej ipan tlanauatijli kitejtemouiliayaj kenon kimiktiskej, maski kimakasiyaj tlenon uelis kichiuaskiaj judíos akin kineltokayaj ika Jesús katka se teotlajtoketl. Kuakon, Satanás okitlanemililti Judas —semej itech majtlaktli uan ome itlatitlankauan Jesús — makinemaka ikoneuj toTajtsin. Tlamachtijkej ipan tlanauatijli okimakakej Judas treinta platajtomin.

Se yeuajli Jesús onosentlali iuan itlatitlankauan pampa kipanoltiskiaj Pascua. Sakin ijkuak okijli Judas makisa, Jesús okipeualti tlen okinek manoilnamiki: iTlakualis toTeko. Okasik tlajkotsin pan, okichiuj se teoyotl niman okimpanoltili itlatitlankauan. Kuakon okimijli: “In pan kixneskayotia notlalnakayo yejuan nouentlalis nemopampa. In xkuakan para ika xnechelnamikikan”. Noijki ijkon okichiuj ijkuak okimpanoltili copa ika vino, okijto: “In copa kixneskayotia on yenkuik pacto [tlajtolkaualistli] yejuan notsimpeualtis ika noyesyo” (Lucas 22:19, 20).

Jesús miyek okiminmachti itlatitlankauan ipan yejon yeuajli. Okiminmakak se tlanauatijli yenkuik: manotlasojtlakan nochipa maski san tlenon mapano. Okijto: “Tla nemotlajsojtlaj semej iuan oksekimej [...] nochi tlakatl kitas ika nennotemachtijkauan” (Juan 13:34, 35). Itech tlen ipan nochiuaskia okimijli ika maka manotekipachokan, sakin opeuj kichiua teoyotl inpampa. Onokuikatijkej tlakuikaltin tlen kiueyichiuayaj toTajtsin niman okiskej ika yeuajli, oyajkej Getsemaní.

Ijkuak nemiya Getsemaní Jesús onotlakuankets niman opeuj kinotsa toTajtsin ika nochi iyojlo. Nimantsin oajsikej soldados, tlamachtijkej ipan tlanauatijli niman oksekimej akin kinekiyaj kasiskej. Ijkuak ononisiui Judas niman okitenkua noso okipipitso okiteititi akinon katka Jesús. Soldados okasikej Jesús, niman itlatitlankauan ocholojkej.

Ixpan uejueyixtokej jueces judíos Jesús okiteijli ika yejua katka iKoneuj toTajtsin. Jueces okijtokej ika Jesús kiuijuikaltijtoya toTajtsin, se tlajtlakojli tlen ika ueliskiaj kimiktiskiaj. Sakin okuikakej kampa Poncio Pilato se tlanauatijketl romano. Maski okitak ika Jesús xtlaj tlajtlakojli yokichiujka, okichiuj tlen judíos kitlajtlanilijtoyaj, makimiktikan Jesús.

Jesús okuikakej kampa noixmati kentla Gólgota, ompa soldados romanos okipilojkej ipan se kojtli melaktik. Maski kuajli tlanestoya, otlayouatik. Yejon teotlak ijkuak omik Jesús melak chikauak otlalolin. Okitokakej ijtik se teostotl. Uajmostla, tlamachtijkej ipan tlanauatijli, kuajli okitsajke teostotl niman otlanauatijkej makitlajpiyakan. ¿Nokauaskia Jesús nochipa ijtik teostotl? Ka, poliuiya nochiuas se milagro tlen melak ueyi itech nochi milagros.

(Onokixti itech Mateo itlaxeloluan uejueyimej 26 niman 27, Marcos 14 niman 15, Lucas 22 niman 23, niman Juan 12 ontlami 19.)