Historia 93

Jesús miyekej kintlakualtia

KEMACH opanok itlaj tlen melak xkuajli. Okimiktijkej Juan akin teapolaktia noso Bautizante. Herodías, isiuauj tekiuaj, melak kitlauelitaya. Niman okichiuj matlanauati tekiuaj makikechtsontekikan.

Ijkuak Jesús okikak yejuin, melak noyolkokoua. Yauj san iselti kampa xtlaj onka. San ika, tlaltikpakchanejkej yauej konitaj. Ijkuak Jesús kimita, kimiknelia. Ika yejon, kinnojnotsa itech itekiuajyo toTajtsin, niman kinpajtia kokoxkej.

Yejon teotlak inomachtijkauan yauej kampa yejua nemi niman kijliaj: ‘Iteotlak, niman xakaj chanti. Xkinnauati tlaltikpakchanejkej, niman ijkon mauiyan makikouatij tlen kikuaskej kampa chantilo’.

‘Xnoneki mauiyan’, kijtoua Jesús. ‘Nemejuamej xkinmakakan tlen kikuaskej.’ Aman Jesús kitlajtoltia Felipe: ‘¿Kanon uelis tijkouaskej tlakuajli niman ijkon tikintlakualtiskej nochimej?’

‘Tla nochimej tikintlakualtiskej melak miyek nonekis tomin niman san aajchijtsin tikinmakaskej’, kinankilia Felipe. Andrés kijtoua: ‘Yejuin telpochtsintli, kipiya makuijli pan niman ome michin. Xkinmaxilis nochi kech nikan nemij’.

‘Xkimijlikan nochimej manotlalikan ipan xiujtli’, kijtoua Jesús. Kuakon kichiuilia se teoyotl toTajtsin niman peua kixexeloua. Inomachtijkauan kinmakaj nochimej tlaltikpakchanejkej pan niman michin. Ompa nemij makuijli mil tlakamej, niman melak miyekej siuamej iuan kokonej. Nochimej tlakuaj niman kuajli ixuij. ¡Niman ijkuak inomachtijkauan kinechikouaj tlen onokauj, okitemiltijkej 12 chikijtin!

Aman Jesús kimijlia inomachtijkauan matlejkokan ipan se barco niman mauiyan Galilea. Ika yeuajli opeuj chikauak ajakakiyaui, koxoni atl niman kolinia barco. Inomachtijkauan melak nomojtiaj. Kuakon, kanaj tlajkoyeuajli, kitaj yakaj akin nejnemi ixko atl. Melak mojkatsajtsij, pampa xkimatij akinon.

‘Maka xmomojtikan. ¡Nejua niJesús!’, kimijlia. Yejuamej xueli kineltokaj. Pedro kijtoua: ‘Tla tejua, noTeko, xnechijli maniuiya kampa tejua tinemi’. Jesús kinankilia: ‘¡Xuajla!’ ¡Niman Pedro peua nejnemi ipan atl! Kuakon melak nomojtia niman peua apolaki, san ika, Jesús kajsi.

Okse tonajli, Jesús oksejpa kintlakualtia melak miyekej tlaltikpakchanejkej. Aman kichiua ika chikome pan niman ika seki michimej. Niman oksejpa nochimej tlakuaj. ¡Melak kuajli pampa tikitaj ika Jesús kinmaka tlaltikpakchanejkej tlen kinpoloua! ¡Ijkuak tekiuajtis, xok itlaj techajmanas!

Mateo 14:​1-​32; 15:​29-​38; Juan 6:​1-​21.