Historia 59

David choloua

SAKIN, ijkuak David kimiktia Goliat, Abner akin kinyekana soldados israelitas, kuika kampa nemi Saúl. Saúl kichiua David makinyekana soldados niman machanti ichan.

Ijkuak uajnokuepaj soldados kampa okimixnamikitoj filisteos, siuamej nokuikatiaj: ‘Saúl miyekej yokinmikti, san ika, David melak miyekej yokinmikti’. Saúl peua kinexikolita, pampa David melak kiueyiteneuaj maka ken yejua. San ika, Jonatán ikoneuj Saúl xkinexikolita. Kitlasojtla David, niman David noijki melak kitlasojtla yejua. Ika yejon, noijliaj ika nochipa kuajli nouikaskej.

David melak kuajli tlatsotsona ika arpa, niman Saúl kuelkaki tlakuikajli tlen yejua kitsotsona. Pampa kinexikolita, ipan se tonajli Saúl kichiuilia David itlaj tlen melak xkuajli. Ijkuak David kitsotsonilia arpa, Saúl kontilana se lanza niman kuakon kimotla, ijkuak ijkon kichiujtika kijtoua: ‘¡Nikmiktis David!’ San ika, David nejkuania. Sakin, Saúl kimotla David ika lanza niman oksejpa xkaxilia. Aman yejua kasikamati ika melak noneki nochipa notlajpiyas.

¿Tikilnamiki tlen okijtoka Saúl temakas? Yejua okijto ika akin kimiktiskia Goliat, kimakaskia ichpoch iuan manonamikti. Kuakon Saúl kijlia David ika kimakas ichpoch Mical, san ika, kachtopa kipiya ika kimiktis 100 filisteos. ¡Xkonnemili! Saúl kineki filisteos makimiktikan David. Pampa xijkon nochiua, Saúl kimaka ichpoch iuan manonamikti David.

Se tonajli, Saúl kijlia Jonatán iuan nochimej itlakeualuan, ika kineki kimiktis David. Jonatán kijlia: ‘Maka itlaj tikchiuilis David. Yejua xkeman itlaj mitschiuilia. Yejua yomitspaleui. Okimikti Goliat maski ueliskia kipolos inemilis, niman ijkuak tejua otikitak, melak otipak’.

Saúl kikaki ikoneuj, kijlia ika xtlaj kichiuilis David. Kuajuikaj David oksejpa, niman kitekichiuilia Saúl ken kichiuaya. San ika, se tonajli ijkuak David kitsotsoniliaya se tlakuikajli, Saúl oksejpa kimotla ika ilanza. David nejkuania niman lanza kalaki ipan tepantli. ¡Yejuin ika yexpa! ¡Aman David kasikamati ika noneki macholo!

Yejon yeuajli David yauj ichan, san ika, Saúl kinnauatia sekimej tlakamej makimiktitij. Mical kimati tlen itaj kineki kichiuas. Kijlia David: ‘Xcholo yejuin yeuajli, pampa tla xtikchiuas mitsmiktiskej’. Kuakon, ika yeuajli Mical kipaleuiya David makisa ipan ventana. Kanaj chikome xiuitl okicholouilijtinen Saúl.

1 Samuel 17:55-58; 18:1-30; 19:1-18.