Yupu 33:1-33
33 “Vano khwoo nyuwo Yupu, mwiiwe masu aka;Nwiriyane ichu soothene kineeraka kiloce.
2 Nwiriyane phaama! Kinamuhula eyano aka,Nlumi naka* nnamuloca.
3 Masu aka annalokoha wookololowa wa murima aka,Nave iyano saka sinnaloca mweeparipari yeeyo kisuwenlaaka.
4 Munepa wa Muluku tokipanke,Nave nwiya wa Aikuru Soothene tokivanhe okumi.
5 Mukaakhule, mwawerya;Mooniherye sooloca sanyu vamiithoni vaka, mwiirehererye.
6 Onani! Vamiithoni va Muluku eeparipari, kiri ntoko nyuwaano;Miyo tho kuupiwe ni oloko.
7 Mwawiihiiha, muhikhale awoopopiheya wa nthowa na okoova,Nave okhinyererya vyakala onarwa wa miyo ohoonyaanyeeni.
8 Nto miyo koowiiwaani mulocaka,Aa, kohiiwa ikwaha sincipale masu ala:
9 ‘Kiri aweela murima, nkaano yoocheka;Kiri aphaama ene, nkaano yoohesa.
10 Nto Muluku oophwanya mathowa a okiica;Owo onakeera mwiicani awe.
11 Owo onnamaka inaani saka va ikhukulu;Owo onnahocahoca iphiro saka soothene.’
12 Nto mwaalocaka yeela himwaano rasawu, mwawiihiiha kinahaala owaakhulaani:
Muluku mutokotokoxa ompwaha muchu.
13 Ntakhara heeni munavaanyihanaanyu ni Yoowo?
Apwanne ti nthowa nawi hanaakhula masu anyu oothene?
14 Muluku onaloca ekwaha emoha ni ikwaha piili,Nto haavo onanwiriyana phaama.
15 Owo onnaloca moolohani, mu yawoona ohiyu,Vaavaa ikhove sawiixeela inaacocaaya achu,Elukuluku anakonaaya vakaamani vaya.
16 Mwawiihiiha, owo onnakhunula iwaru sayaNave onnaweeyerya eneneeryo ya mahusiheryo awe,
17 Wi muchu ahiye saweera soonanaraNi omukhapelela yoowo wi ahiirumiheke.
18 Muluku onnamoopola yoowo wa nlici,*Okumi awe wi ohirimeele ni nlema.
19 Muchu tho onnookololiwa ni wiicela onooneiye ari vakaamani vaweNi moorweela wa wuukhuwa woohimala mmakhuvani mwawe,
20 Ophiyerya wi omuchu* awe onnathanya epaau,Nave owo onnakhooca ni yoolya ene yaphaama.
21 Mwiili awe onnooca,Nave makhuva awe, yaawo yahooneya, vano ari vasiiyoni vene.*
22 Okumi awe onnaacamela onlicini;*Okumi awe onnawaacamela yaale anatannya okhwa.
23 Wakhala wi ookhalavo namichaka* wa yoowo,Mulipa awaakiha mmoha variyari va alipa awaakiha ncikhwi nimoha,Wi amuleele muchu yeeyo eri yawookololowa,
24 Hiihaa, Muluku onammooniherya oreera murima nave onamuloca:‘Mmoopole wi ahimorele onlicini!*
Koophwanya yoolivela ya omoopolano!
25 Mwiili awe okhale wawi cheecheeche* opwaha mwiili wa mmiravo;Owo akookele mahiku a omiravo awe.’
26 Owo onahaala ovekela ni murima woothene wa Muluku, yoowo onahaala omweemererya,Owo onamoona ethoi Awe akhuwelaka moohakalala;Nave wanaawiili Owo onammweera muchu okhala awookololowa murima.
27 Muchu owo onamuloca* wa achu:‘Kaacheka nave kaakhoromanyiha yeeyo eri yawookololowa,Nto nkaakhenle yeeyo yaakiphwanela.*
28 Owo ookoopola wi kihikhuruwele onlicini,*Nave kinamutitelela woona* omwaleela.’
29 Mweeparipari, Muluku onnapaka ichu soothene seiha wa muchu,Ikwaha piili, ikwaha raru,
30 Wi amukookihe yoowo* onlicini,*Wi amwaleeliwe ni omwaleela wa okumi.
31 Muwiriyane phaama, Yupu! Mukiwiriyane!
Mmaale, nave miyo kinahaala otitelela oloca.
32 Mwaarino echu ya oloca, mukaakhule.
Muloce, tiwi kinachuna woona waakhanle wi himwaano nthowa.
33 Mwahaarino echu ya oloca, mukiwiriyane;Mmaale, nave kinamoohusihaani miruku.”
Inoota
^ Mu Ehepiri, “Nlumi naka ni waalakutha waka.”
^ Naari: “mahiye.”
^ Mu Ehepiri, “okumi.”
^ Naari: “ari vanlakani vene.”
^ Naari: “o mahiye.”
^ Naari: “munkeelo.”
^ Naari: “o mahiye.”
^ Naari: “waphaama.”
^ Mu Ehepiri, “onamwiipa.”
^ Naari akhweya: “Nave ela hekiphurinhe echu.”
^ Naari: “o mahiye.”
^ Mu Ehepiri, “okumi aka onamoona.”
^ Naari: “akookihe okumi awe.”
^ Naari: “o mahiye.”
