Yupu 1:1-22
1 Mu elapo yo Usi, aakhalawo mulopwana iichaniwa Yupu.* Owo aari muchu awookololowa murima ni eekhaikhai;* owo aanamoova Muluku nave aanathanya yeeyo eri yoonanara.
2 Owo aahaayara anamwane athanu neeli aasilopwana ni anamwane araru aasithiyana.
3 Waaca wa muhuwo awe waari: Ipucepuche macikhwi mathanu napiili,* akamelo macikhwi mararu,* imope ncikhwi nimoha** ni apuuru* masana mathanu.* Owo tho aakhalano anamuteko ancipale. Hiihaa, owo aari oovuwa wa achu oothene a makupa onakhumawo nsuwa.
4 Mmoha ti mmoha a anamwane awe aasilopwana, aanapaka efesta vaate vawe, mu nihiku aathanleliweiye.* Awo yaanaawopa arokora aya araru wi elye ni owurya vamoha.
5 Emanle ovira mahiku a ifesta, Yupu aanawiichana wi aweelihe yaawo. Vanonto, owo aanavinya wooxiixelo kwee nave aanavaha mukucho woopahiwa ntakhara mmoha ti mmoha a yaawo. Woona wi Yupu aanaloca: “Akhweya anamwene aka aacheka ni omuruwana* Muluku mmurimani mwaya.” Ti yeela Yupu eereiye ikwaha soothene.
6 Naaphiya nihiku nenlo anamwane a Muluku* eeparipari yiiperenkhaaya vamiithoni va Yehova, nave Satana tho aari veeri vaya.
7 Vanonto, Yehova aamukoha Satana: “Onarwa woowi?” Satana aamwaakhula Yehova: “Kaamviravira ni weeceeca veelaponi yavathi.”
8 Yehova aahi wa Satana: “Woomvarerya* mulapeli aka Yupu? Haavo muchu onalikana ni yoowo veelaponi. Owo muchu awookololowa murima ni eekhaikhai,* onamoova Muluku nave onathanya yeeyo eri yoonanara.”
9 Voocharela, Satana aamwaakhula Yehova: “Apwanne Yupu onamoova Muluku mahala ene?
10 Hamurukurerinhe mukuso wi mmwaakihe yoowo, vaate vawe ni soothene oreiyeno? Mooreeliha miteko sa matata awe nave muhuwo awe woosareya veelaponi.
11 Nyenya vano, mviihe ntata nanyu nave munanarihe soothene owo oreiyeno, nave mweeparipari owo onamooruwanaani* vamiithoni vanyu.”
12 Voocharela, Yehova aahi wa Satana: “Phaameene, soothene owo oreiyeno siri mmatatani mwaa.* Nyenya ohiviihe ntata naa ntakhara yene!” Vanonto, Satana aapwahavo vamiithoni va Yehova.
13 Vanonto nihiku nenlo anamwane aasilopwana ni aasithiyana a Yupu yaalyaaya ni owurya eviinyu vaate va munnaya mutokweene,
14 aarwa namichaka mmoha amuleela Yupu: “Imope saamulima, nave apuuru yaamulya vakhiviru vaya,
15 mootutuxa achu o Xepa yaanihiphela ni waakuxa axinama, nave tho aawiipha anamuteko ni nlema. Ti miyaano pahiru kikophonle wi kooleeleeni.”
16 Nlelo owo arikimuloca, aarwa mukina nave aloca: “Mooro wa Muluku* woorweela wirimu, woheeyela ipucepuche ni waapaha anamuteko! Ti miyaano pahiru kikophonle wi kooleeleeni.”
17 Nlelo owo arikimuloca, aarwa mukina nave aloca: “Achu o Kalteya yaawo yaari makhuuru mararu a ampava, ahaahiphela ni waakuxa akamelu nave tho aawiipha anamuteko ni nlema. Ti miyaano pahiru kikophonle wi kooleeleeni.”
18 Nlelo owo arikimuloca, aarwa mukina nave aloca: “Anamwane anyu aasilopwana ni aasithiyana yaamulya ni owurya eviinyu vaate va munnaya mutokweene.
19 Mootutuxa, yaarwa echeku etokweene otakhwani nave ekumula ikwantu xexe sa empa, eyo yaahaamorela anamwane nave ewiipha. Ti miyaano pahiru kikophonle wi kooleeleeni.
20 Mwa yeela, Yupu aavinya, aahula soowara sawe nave acema mphati; voocharela, owo aahuuwela vacheyani, nave akokhora vamiithoni va Muluku
21 aloca ariki:
“Kikhumme mmirimani mwa amama aka kiri epwitikiri ene,Nave tho kini kikookelewo epwitikiri ene.
Yehova taakivanhe, nave tho Yehova tokunxe.
Nsina na Yehova ntitelele ocicimihiwa.”
22 Mwa soothene seiha, Yupu haachenke, naari omukhupanya Muluku wi oheera echu yoonanara.
Inoota
^ Akhweya nnataphulela “Muchu Yoowo Oniiciwa.”
^ Naari: “oohikhalano nthowa ni awookololowa murima.”
^ 500.
^ Mu Ehepiri, “apuuru aasiithiyana.”
^ 1.000.
^ Mu Ehepiri, “makhuuru masana mathanu a imope.”
^ 3.000.
^ 7.000.
^ Naari: “mmoha ti mmoha ekwaha awe.”
^ Naari: “omuulumela.”
^ Masu oosiphela Eehepiri yaawo anaphulela ankeelo a Muluku.
^ Mu Ehepiri, “Wootikitherya murimaa wa.”
^ Naari: “oohikhalano nthowa ni awookololowa murima.”
^ Naari: “onanwuulumelaani.”
^ Naari: “koowunnyererya.”
^ Naari akhweya: “Etari.”
