Yohani 8:12-59
8 12 Voocharela, Yesu aaya oloca ni yaawo wanaawiili, ariki: “Miyaano ka ekamaama ya elapo. Yoowo onakichara harwa eeca mu epiiphi, nto onarwa akhalano ekamaama ya ekumi.”
13 Mwawiihiiha, Afarisi yaaloca ni yoowo eriki: “Weyaano oniiseerela onamoona meekhaa; onamoonaa tahi weeparipari.”
14 Yesu aawaakhula ariki: “Naamwi kiiseerelaka onamoona meekhaaka, onamoona aka ti weeparipari, nthowa nawi koosuwela weiwo kirwiilaakawo ni weiwo kinayaakawo. Nyenya nyuwo hamusuwenle weiwo kirwiilaakawo naari kinayaakawo.
15 Nyuwaano munathoriha mwawiiwanana ni moonelo wa achu;* nto miyo nkinamuthoriha muchu.
16 Nyenya naamwi kithorihaka, othoriha waka ti weeparipari, woona wi nkiri meekhaaka, nto Atiithi yaawo akirumme ari ni miyo.
17 Nave tho Mmalamulo anyu woorempwamo: ‘Onamoona wa achu eeli ti weeparipari.’
18 Miyo kinniiseerela onamoona, nave Atiithi yaawo akirumme annakeerela tho onamoona.”
19 Hiihaa, awo yaamukoha eriki: “Atiithi aa ari woowi?” Yesu aawaakhula: “Nyuwaano himukisuwenle, naari mano himwaasuwenle Atiithi. Waakhanle wi mookisuwela, nyuwaano mwaahaala waasuwela tho Atiithi.”
20 Owo aalonce ichu seiha ari nipuro saakhalamo ikaaxa sa okhapelelamo sooveleela vaavaa aahusiheiye mu empa ya Muluku. Nyenya haavo aamphanre, woona wi elukuluku awe hiyaaphiyale.
21 Mwawiihiiha, owo aaloca ni yaawo wanaawiili ariki: “Kinampwahavo, nave nyuwo munamukaavya, nto munamukhwa mu soocheka sanyu. Weiwo kinayaakawo, nyuwo hamunawerya oyawo.”
22 Ayuta yaapacerya oloca eriki: “Apwanne onaya wiisiipha? Woona wi onnaloca ariki: ‘Weiwo kinayaakawo nyuwo hamunawerya oyawo.’”
23 Owo aahaaceererya oloca ariki: “Nyuwo muri a vathi vaava; nto miyo kiri oosulu. Nyuwo muri a veelaponi yavathi; nto miyo nkiri a veelaponi yavathi.
24 Ti nthowa nene kaaloncaaka kiriki: “Munamukhwa mu soocheka sanyu. Wakhala wi hamunaroromela wi ti yoomi ene, munamukhwa mu soocheka sanyu ”
25 Voocharela awo yaamukoha: “Weyaano waani?” Yesu aawaakhula: “Ntakhara heeni kinalocaaka ni nyuwo?
26 Kookhalano ichu sincipale sa oloca vooloca sa nyuwo ni miyaha sincipale sa othoriha. Chiryene, yoowo okirumme teeparipari nave ichu soothene kiniiwaaka wa yoowo kinnaloca wa elapo.”*
27 Awo hiyiiwexexa wi owo aaloca wa yaawo vooloca sa Atiithi.
28 Voocharela Yesu aahi: “Mwamuthomeya Mwaana a muchu, munamusuwela wi miyo ka yoowo nave wi hiyaavo kineeraaka mwa miyo meekhaaka; hiihaa ntoko Atiithi akihusinhaaya, kinnaloca ichu soothene iha.
29 Nave yoowo okirumme ori ni miyo; owo hakihin’yeru meekhaaka, woona wi mahiku oothene kinneerano soothene inamuhakalaliha.”
30 Vaavaa aalonceiye ichu seiha, ancipale yaamuroromela.
31 Voocharela Yesu aaloca ni Ayuta yaawo yaamuroromenle ariki: “Wakhala wi mootitelela okhala mmasu aka, chiryene munamukhala oohuserya aka,
32 munarwa musuwela eparipari nave eparipari enarwa yootaphulaani.”
33 Awo yaamukoha eriki: “Hiyaano na anamwane* a Aparahamu nave hinintonko okhala akapuro a muchu. Vano onawerya hai oloca oriki: ‘Nyuwo munarwa mutaphuliwa’?”
34 Yesu aawaakhula ariki: “Mweeparipari kinnooleelaani wi, oothene yoole onacheka, kapuro a yoocheka.
35 Ohiya yeeyoru, kapuro hanakhala vaate va pwiyawe mahiku oothene; nto mwaana onnakhalavo mahiku oothene.
36 Mwawiihiiha, Mwaana ootaphulaani, munamukhala ootaphuwa chiryene.
37 Koosuwela wi mwa anamwane* a Aparahamu. Nyenya munnaavya okiipha, woona wi hamuneemererya masu aka.*
38 Miyaano kinaloca ichu koonnaaka vaavaa kaaryaaka ni Atiithi aka, nto nyuwo muneera ichu mwiiwalaanyu wa atiithi anyu.”
39 Awo yaamwaakhula yii: “Atiithi ahu ti Aparahamu.” Yesu aahi wa yaawo: “Waakhanle wi mwa anamwane a Aparahamu, mwaamweerakano miteko sa Aparahamu.
40 Nyenya vano munaavya okiipha, muchu yoowo oolenleeni eparipari iiwaleiye wa Muluku. Aparahamu heenreno yeela.
41 Nyuwo muneera miteko sa tiithi anyu.” Awo yaahi wa yoowo: “Hiyaano hanri anamwane ooraruwiwa;* nrino Tiithi mmoha, Muluku.”
42 Yesu aahi wa yaawo: “Waakhanle wi Muluku Tiithi anyu, mwaahaala okisivelaka, ntakhara kirwiile wa Muluku kikhala vaava. Nkirwiile mwa miyo meekhaaka, nto Yoowo tokirumme.
43 Ntakhara heeni muhiniiwexexaanyu yeeyo kinalocaaka? Ntakhara wi hamunawerya owiriyana masu aka.
44 Nyuwo mwa anamwane a Tiithi anyu, Musaserya, nave munakhwela weerano soochuna sa tiithi anyu. Owo aari mulipa awiipha ovinyerya woopaceryani,* nave haatitelenle okhala mu eparipari, woona wi eparipari heri mwa yoowo. Vaavaa onaloceiye sawootha, onaloca sa yoowo meekheiye, nthowa nawi nawoothe ni tiithi a sawootha.
45 Moohiyana, woona wi kinooleelaani eparipari, nyuwo hamunakeemererya.
46 Taani mwa nyuwo oni akeere mulipa oocheka? Yaarimwi kilocaka yeeparipari, ntakhara heeni muhinakeemereryaanyu?
47 Yoowo onarwa wa Muluku onnawiriyana Masu a Muluku. Nyuwo hamunawiriyana nthowa nawi hamunarweela wa Muluku.”
48 Ayuta yaamwaakhula yii: Hiyaano hanlonce eparipari nriki: ‘Weyo wa Musamariya nave wi wookhalano nsololo’?”
49 Yesu awaakhula: “Miyaano nkaano nsololo, nyenya kinaacicimiha Atiithi, nave nyuwo munamukinyemula.
50 Nto nkinaavya ncicimiho wa miyo meekhaaka; ookhalavo Yoowo onakaavyerya nave onathoriha.
51 Mweeparipari kinnooleelaani wi, oothene yoole oniiwelela masu aka, harwaru oona okhwa.”
52 Ayuta yaaloca ni yoowo eriki: “Vano noosuwela wi wookhalano nsololo. Aparahamu ookhwa, alipa a miririmu tho aakhwa, nto weyo oni: ‘Oothene yoole oniiwelela masu aka harwaru alawiha okhwa.’
53 Apwanne weyo wa mutokweene waapwaha atiithi ahu Aparahamu yaawo akhwile? Alipa a miririmu tho aakhwa. Onuupuwela wi weyaano waani?”
54 Yesu aahaakhula: “Waakhanle wi kiniicicimiha meekhaaka, ncicimiho naka ti na siiyo. Anakicicimiha miyo ti Atiithi aka, yaawo muniiseeraanyu okhala Muluku anyu.
55 Nyuwo himwasuwenle yaawo, nto miyo kihaasuwela. Kaalonce wi nkaasuwenle, kaahaala olikanaka ni nyuwo, alipa awootha. Nto miyo kihaasuwela nave kinniiwelela masu aya.
56 Atiithi anyu Aparahamu yaahakalala vatokovene eweheryaka woona nihiku naka, nave yaahoona ni ehakalala.”
57 Voocharela Ayuta yaaloca ni Yesu eriki: “Hiwaano naari mano iyaakha makhumi mathanu,* vano woomoona Aparahamu?”
58 Yesu aawaakhula ariki: “Mweeparipari kinnooleelaani wi, Aparahamu ahaakumve okhala, miyo kaakhala.”
59 Mwawiihiiha, awo yaacoca maluku wi emvonye, nto Yesu aahiipitha nave akhumamo mu empa ya Muluku.
Inoota
^ Mu Ekiriki: “mwa mwiili.”
^ Naari: “wa achu.”
^ Naari: “muyareriwo wa.”
^ Naari: “muyareriwo wa.”
^ Naari: “wi masu aka hanaakheliwa mwa nyuwo.”
^ Naari: “anamwane oorweela mu ocapaheya.” Mu Ekiriki porneiya. Moone Masu Atharihiwe.
^ Naari: “opacerya woopacerya.”
^ 50.
