Yohani 1:1-51
1 Woopaceryani naari Nsu, nave Nsu naari ni Muluku, nave Nsu naari muluku.*
2 Nla naari ni Muluku woopaceryani.
3 Ichu soothene sikhanle moorweela mwa yoowo, nave voohikhala mwa yoowo, hiyaavo echu emoharu mano ekhanle.
Yeeyo ekhanle
4 moorweela mwa yoowo, waari okumi, nave okumi yaari ekamaama ya achu.
5 Nave ekamaama ennamwaleela mweepiiphini, nto epiiphi henawerya oxipiha.
6 Aarwa muchu aarummwe ti Muluku, nsina nawe Yohani.
7 Mulopwana ola aarwa ntoko namoona, wi eerele onamoona sa ekamaama, wi achu a mukhalelo woothene yeemererye moorweela wa yoowo.
8 Owo haari ekamaama, nto aarwa wi eerele onamoona sa ekamaama yeeyo.
9 Ekamaama yeeparipari yeeyo enavaha omwaleela wa achu a mukhalelo woothene, yaahanle vakhaani orwa mweelaponi.
10 Owo aari mweelaponi, nave elapo yaakhanle moorweela mwa yoowo, nto elapo hiyaamusuwenle yoowo.
11 Owo aarwa wa achu awe, nyenya awo hiyaamweemerenrye.
12 Nto, oothene yaawo yaamwaakhenle, owo aahaavaha owerya wi ekhale anamwane a Muluku, nthowa nawi yaaroromela nsina nawe.
13 Nave awo hayariwe orweela wa nikhami, naari wa mwiili, naari wa yookhwela ya achu, nto ayariwe wa Muluku.
14 Mwawiihiiha, Nsu naahikhala muchu nave nikhala ni hiyaano. Hiyaano naahoona ncicimiho nawe, ncicimiho ntoko na mwaana ooyariwa meekheiye a atiithi; nave owo aasareya mahala matokweene a Muluku ni eparipari.
15 (Yohani aaheerela onamoona sa yoowo, chiryene, owo aanakhuwela ariki: “Ola ti yoowo kaamulocaaka kiriki: ‘Yoowo onarwa oculi waka tookipwaha, woona wi aakhala miyo kihikhanle.’”)
16 Vawi oothene hiyo nohaakhela mu waacano wawe, aa, mahala matokweene vasulu va mahala matokweene.
17 Nthowa nawi Malamulo yaavahiwe orweela wa Mose, nto mahala matokweene ni eparipari arweenle mwa Yesu Kristu.
18 Haavo muchu otonko omoona Muluku; muluku ooyariwa meekheiye, yoowo ori mmakupa a Atiithi,* ti yoowo owuupulunle Yaawo.
19 Ola onamoona Yohani aavanheiye vaavaa Ayuta yaaruminhaaya alipa a mukucho ni Alevi oovinyerya o Yerusalemu wi yamukohe eriki: “Weyaano waani?”
20 Nave owo haawoovelenle owaakhula, nto aaloca ariki: “Kristu tahi yoomi.”
21 Awo yaamukoha: “Vano waani? Wa Eliya?” Owo aahi: “Tahi yoomi.” “Wa Mulipa a Miririmu?” Owo aahaakhula: “Hooye!”
22 Hiihaa, awo yaamutitelela eriki: “Vano waani? Onleele wi nawaakhule yaale anrumme. Tiheeni waahaalaawe oloca sa weyo mwaneene?”
23 Owo aahi: “Miyaano ka nsu na yoole onakhuwela otakhwani ariki: ‘Mookolole ephiro ya Yehova,’ hiiha ntoko mulipa a miririmu Yesaya aalonceiye.”
24 Yaale yaarumihiwe yaari a nikhuuru na Afarisi.
25 Mwawiihiiha, awo yaamukoha eriki: “Vano, ntakhara heeni onapatisaawe ohiri Kristu naari Eliya naari mano Mulipa a Miririmu?”
26 Yohani aawaakhula ii: “Miyaano kinapatisa ni maahi. Mwa nyuwo ookhalavo muchu yoowo muhimusuwenlaanyu,
27 yoowo onarwa oculi waka, nkaano ophwanelela wa otaphula mikoi sa asantaalya* awe.”
28 Ichu seiha seereya o Petaniya okhopela wa Yortano weiwo Yohani aapatiseiyewo.
29 Nihiku noocharela, Yohani aamoona Yesu arwaaka wa yoowo, nave aaloca ariki: “Moone Epucepuche ya Muluku, yeeyo enaviihavo yoocheka ya mweelaponi!
30 Ola ti yoole kaamuloncaaka kiriki: ‘Oculi waka onnarwawo muchu yoowo okipwanhe, woona wi aakhala miyo kihikhanle.’
31 Ophiyerya tho miyo nkaamusuwenle, nyenya mathowa akeerinhe orwa kinapatisa ni maahi yaari wi owo asuweliwe o Isarayeli.”
32 Yohani tho aaheerela onamoona, ariki: “Kaahoona munepa okhuruwaka wirimu ntoko ekakaiya,* nave ekaya va yoowo.
33 Ophiyerya tho miyo nkaamusuwenle, nyenya Yoole okirumme opatisa ni maahi aakileela ariki: ‘Yoowo oneeraawe omoone munepa omukhuruwelaka ni olekelaka mwa yoowo, ti yoowo onapatisa ni munepa waweela.’
34 Nave kaahoona yeeyo, keerela onamoona wi ola Mwaana a Muluku.”
35 Nihiku noocharela tho, Yohani aari vamoha ni oohuserya awe eeli,
36 nave vaavaa aamoonneiye Yesu eecaka, aaloca: “Moone, Epucepuche ya Muluku!”
37 Vaavaa oohuserya ale eeli yiiwalaaya yeeyo aalonceiye, yaamuchara Yesu.
38 Yesu aarukunuwa, nave aawoonneiye wi yaanamuchara, aahi wa yaawo: “Munaavyani?” Awo yaamwaakhula yii: “Rapi (nsina nenlo nnataphulela, “Muhusiha”), munakhala woowi?”
39 Owo aalocano: “Rwaani, wi moonewo.” Mwawiihiiha, awo yaayawo yoona weiwo aakhaleiyewo, nave ekhala ni yoowo nihiku noothene; eyo yaari echu ya ewora ya neekhumi.*
40 Antreya, munna a Simoni Petru, aari mmoha a yaale eeli yiiwale yeeyo Yohani aalonceiye nave emuchara Yesu.
41 Antreya aapacenrye omphwanya munnawe awiichaniwa Simoni, alocano ariki: “Noomphwanya Mesiya” (nsina nenlo nnataphulela, “Kristu”),
42 nave aamukeriha wa Yesu. Vaavaa Yesu aamonneiye, aahi wa yoowo: “Weyo wa Simoni mwaana a Yohani; oni oniichaniwa Kefa” (nsina nenlo nnataphulela “Petru”).
43 Nihiku noocharela, Yesu aanachuna ocimula ayaaka o Kalileya. Aamphwannyeiye Filipi, aalocano ariki: “Okhale oohuserya aka.”
44 Filipi aari o Petisaita, epooma ya Antreya ni Petru.
45 Filipi aamphwanya Nataniyeli alocano ariki: “Nomphwanya yoole orempwe ni Mose Mmalamulo, yoole alipa a miririmu yaarempaaya tho: Yesu mwaana a Yosefe, o Nasareti.”
46 Nto Nataniyeli aaloca ariki: “Apwanne o Nasareti enanwerya okhumawo echu yaphaama?” Filipi aahi wa yoowo: “Orwe nave woone.”
47 Yesu aamonneiye Nataniyeli amwaacamelaka, aaloca wa yoowo ariki: “Mmoone Muisarayeli eeparipari, mwa yoowo hiwaamo owoka.”
48 Nataniyeli aamukoha ariki: “Mukisuwenle hai?” Yesu aamwaakhula: “Filipi ahaakumve owiichana, ori vathi va mwiri wa mukuukhu, miyaano kaawoona.”
49 Nataniyeli aamwaakhula ii: “Rapi, nyuwo mwa Mwaana a Muluku, nyuwo mwa Mwene a Isarayeli.”
50 Yesu aamwaakhula ariki: “Weyaano oneemererya pahiru nthowa nawi kihooleela wi kaawoona ori vathi va mwiri wa mukuukhu? Onarwa woona ichu itokweenexa opwaha seiha.”
51 Aaloca tho ariki: “Chiri, eparipari, kinnooleelaani wi munarwa moona erimu ehulen’ye, nave ankeelo a Muluku ewelaka ni ekhuruwelaka wa Mwaana a muchu.”
Inoota
^ Naari: “ntoko Muluku.”
^ Naari: “yoowo ori va naakhoopeni va Atiithi.” Ela enaahiwa mukhalelo wa weemereryiwa wa vameekhaaya.
^ Naari: “atamanku.”
^ Naari: “epompa.”
^ Ela tiwi, variyari va ewora ya 16.
