Saweeriwa ti Arummwa 27:1-44
27 Woona wi yaalakeleliwa wi niye o Italiya, Paulo ni oophariwa akina yaaveleeliwe mmatani wa muhooleli aanakhoco iichaniwa Xuliyu, a nikhuuru na Akustu.
2 Naanwela pophoro a wa Atramitiyu yoowo aaya ovira mmapuro yeemelamo apophoro, oxerexere wa eprovinsiya yo Asiya nave naapacerya mukwaha; Aristarku o Maketoniya oorweela o Tesalonika, aari ni hiyo.
3 Mmeeloni mwaya naaphiya o Sitoni, nave Xuliyu aahimukhaliha Paulo mooreera murima,* amweemererya owo wi aaxekurye asinthamwene awe ni waakhela nikhaviheryo naya.
4 Naacimunlaahu vaavale, naaxerema ni evilivili yo Xipre, nthowa na echeku yaanikakha.
5 Naalapuwa ephareya niviraka makupa o Silisiya ni o Panfiliya, nave niphiya o Mira, o Lisiya.
6 Weiwo, muhooleli aanakhoco amphwanya pophoro o Alexantriya yoowo aaya o Italiya, nave aaniweliha mwemmo.
7 Nimanle weeca vakhaani-vakhaani mu mahiku mancipale, naaphiya o Kinitu ni makacamiho. Woona wi echeku hiyaaneemererya otitelela mukwaha, naaxerema ni evilivili yo Kereti owehana ni Salmona.
8 Nave neecalaahu ni makacamiho niviraka oxerexere, naaphiya nipuro nniichaniwa Weemelavo Phaama Apophoro, nenlo nnakhala waacamela epooma yo Laseya.
9 Yaaviravo elukuluku yincipale nave vano waari wawoopiha ovira mphareya, woona wi ophiyerya tho nihiku na wiinanela olya wa Nihiku na Oleveleliwa Soocheka* naahivira. Mwawiihiiha, Paulo aahaalopola
10 yaawo ariki: “Alopwana, kinoona wi mukwaha oni okhale wookacamiha nave nnamuyeleela ichu sincipale, ohiya pahiru micholo* ni pophoro ene, nyenya tho ikumi sahu.”
11 Nto, muhooleli aanakhoco ohiya owiriyana yeeyo Paulo aaloceiye, anwiriyanne mulipa omweeciha ni mwaneene a pophoro.
12 Woona wi nipuro neemelavo apophoro hinaari noophwanelela wi ekhale weiwe elukuluku ya nakhutu, ancipale yaavaha moonelo wi ecimule vaavale wi yoone yaariki ewerye ophiya o Foinike, nipuro no Kereti naweemelavo apophoro, makupa a weiwo onayawo nsuwa; weiwo yaahaalaaya okhalawo elukuluku ya nakhutu.
13 Yaapacenryaaya woopa echeku ya murupi yaphaama, awo yaanuupuwela wi yoolakelela aya yohaakhwanela; voocharela yaamutaphula pophoro nave epacerya oxerema ni evilivili yo Kereti.
14 Nto evinre elukuluku vakhaani, yaahoopa echeku yoowali yaasuweliwe ntoko Eurakilawu.
15 Woona wi pophoro aanakakhiwa ni echeku yeele yoowali, nihinawerya omukeriha weiwo yaarwaayawo, naahihiya wi echeku enikeriheke weiwo yaayaayawo.
16 Voocharela, naavira oxerexere wa evilivili ekhaani yiichaniwa Kawuta; naamwi hiiha, waari woovila omvareryela mwaaceya mukhaani* aari oculi wa pophoro.
17 Nto emanle onweliha mwaaceya mukhaani, yaakuxa mikoi emmaka, emulipiha pophoro; yoovaka wi oni aake veehaavani yo Sirti,* yaakwasula ikaruma sa omweecihano, nave emuhiya wi pophoro akakhiweke ti echeku.
18 Woona wi naanamaniwa vatokotoko ni echeku yeele yoowali, mu nihiku noocharela awo yaapacerya orihela mphareya micholo.*
19 Nave mu nihiku naneeraru, awo yaarihela mphareya ikaruma sa pophoro.
20 Yaavira mahiku mancipale nsuwa ni itheneeri ihoonen’ye, nave echeku yoowali* yaananimana. Mwawiihiiha, ewehereryo ahu yoothene ya woopowa yaapacerya omala.
21 Evinre elukuluku yincipale ehilyile echu, Paulo aaheemela veeri vaya, aloca ariki: “Alopwana, chiri mwaaphwanela owiriyana ekano aka ni ohicimula o Kereti, hiihaa, hinaahaala ohooxeya ni oyeleela ichu.
22 Naamwi hiiha, kinnooceenyeryaani wi mulipe murima, woona wi haavo mmoha a nyuwo oni arimeele,* pahiru pophoro toni arimeele.
23 Ohiyu yoola ovirale, munkeelo a Muluku yoowo kiryaaka awawe nave kinamulapaaka aahooneya wa miyo
24 nave aloca ariki: ‘Ohoove Paulo. Weyo onnaphwanela ophiya vamiithoni va Kaisara, nave ohiya yeeyoru, Muluku oowinnyererya ikumi sa achu oothene oryaaweno mpophoroni.’
25 Mwawiihiiha, alopwana, mulipe murima, woona wi kinnamuroromela Muluku wi inamweereya hiihaa ntoko kileeliwaaka.
26 Nto hiyo nnamuriheliwa mu evilivili emoha.”
27 Vano waari ohiyu wa nihiku naneekhumi naxexe nave naanakakheliwa wu ni wu mu ephareya yo Atriya, ohiyu eriyari, alipa oomweeciha pophoro yaapacerya waanyiherya wi naanaacamela elapo.
28 Awo yaaphima wiixa waya nave yoona wi yaari echu ya ameeturu makhumi mararu ni thanu nammoha.* Mwawiihiiha, yeecalaaya vakhaani, yaaphima wanaawiili nave yoona wi yaari echu ya ameeturu makhumi meeli thanu napiili.*
29 Yoovaka wi nahaala waaka mmiyalani, yaahaarihela mmaahini a ankora axexe ooculi wa pophoro, eninlela waaxilevo.
30 Nyenya, alipa oomweeciha pophoro yeereryaka ochawamo, yaamukuruxela mmaahini mwaaceya mukhaani, ntoko wi anachuna waarihela mmaahini a ankora makupa oohoolo,
31 Paulo aaloca wa muhooleli aanakhoco ni wa anakhoco: “Yaahikhala wi alopwana ala aatitelela okhala mpophoroni, nyuwo hanwerya woopowa.”
32 Voocharela, anakhoco yaakwasa mikoyi sa mwaaceya mukhaani nave emmorihela mmaahini.
33 Vano oyaaka nuuxa, Paulo aahaaceenyerya oothene wi elye, aloca ariki: “Olelo nihiku naneekhumi naxexe nyuwo nweheryaka nave hamulyile echu.
34 Vano kinnooceenyeryaani wi mulye; tiwi ela enamookhaviheryaani, woona wi haavo mmoha oni ayeleele niihi nawe nimoha mano.”
35 Amanle oloca yeela, owo aakuxa epaau, amuthamala Muluku variyari va achu oothene, akawanya epaau nave apacerya olya.
36 Mwawiihiiha, yaalipixeryiwaaya oothene, yaapacerya tho olya.
37 Mpophoroni, oothene naari achu awaakhwana masana meeli ni makhumi mathanu nameeli ni thanu nammoha.*
38 Yaalyilaaya evona, yaarihela mmaahini isaakhu sa tiriku wi pophoro aveyeke.
39 Waaxilaayavo, awo hiyaasuwela elapo taani yeele, nto yaahoona muulo waarino ehaava, nave elakelela wi wakhala wooweryeya yaahaala omweemesa pophoro vaavale.
40 Mwawiihiiha, yaakwasa mikoyi sa a ankora erihela mphareya, mu elukuluku emohamoha, yaataphula mikoyi yaamankaayano miri soomweecihano, eweliha ekuwo ya pophoro wi echeku emukakhe, yeereryaka opwaherya oxerexere wa ephareya.
41 Nto, pophoro aaphiya waakumanavo maahi, aaka makupa oohoolo, ahineeca naari oya ohoolo naari oculi. Makupa ooculi aananyaanyeya wa nthowa na macumuxa yaammana.
42 Mwa yeela, anakhoco yaalakelela owiipha alipa oophariwa wi ahikhale oni achawe eekhaka.
43 Muhooleli aanakhoco aari oolakelela omoopola Paulo nave aahaahiiha wi eheereno. Owo aalamulela wi yaale anawerya weekha ekhale oopacerya ocuphela mphareya wi yaphiye omokoni,
44 nave oohalela yaachareke: Akina mmapawani nave akina epharenle miri sa pophoro. Mwawiihiiha, oothene yaaphiya omokoni eri akumi.
Inoota
^ Naari: “mweepewe.”
^ Nihiku na Oleveleliwa Soocheka, weereya mweeri wa tisiri, omapacereryo wa elukuluku ya epwila ni otannyeya otokotoko wa macumuxa.
^ Naari: “maphuta.”
^ Mwaaceya mukhaani aalapa ntoko mwaaceya onavuluxa ikumi.
^ Moone Masu Atharihiwe.
^ Naari: “maphuta.”
^ Mu Ekriki, “ohiya echeku ekhaani.”
^ Naari: “ayeleele ekumi awe.”
^ 36 m.
^ 27 m.
^ 276.
