Salmu 97:1-12
97 Yehova ookhala mwene!
Elapo yavathi ehakalale.
Ivilivili sincipale ihakalale.
2 Mahuruku ni epiiphi iri voorukurerya vawe;Wookololowa ni ekhaikhai mathipelo a munyukhu awe.
3 Mooro onnaya ohoolo waweNave onnaweeyela amwiicani awe mmakupa oothene.
4 Overunya wawe onnamwaleela mweelaponi;Elapo ennoona yeeyo nave ennathukumela.
5 Miyaako sinnatothowa ntoko epothi vamiithoni va Yehova,Vamiithoni va Pwiya a elapo yoothene yavathi.
6 Erimu ennalaleya wookololowa wawe,Nave achu oothene annoona ovuwa wawe.
7 Yuulihiwe muru oothene yaawo analapela yoophwaniherya,Yaawo aniirumiha vooloca sa amiluku aya atheru.
Mukokhore vamiithoni vawe,* nyuwo amiluku oothene.
8 Siyoni onniiwa nave onnahakalala;Ipooma so Yuta sinnahakalala*Wa nthowa na othoriha wanyu, khwoo Yehova.
9 Ntakhara nyuwo, khwoo Yehova, mwa Awiirimurimu veelaponi yoothene yavathi;Nyuwo muri vasuluxa wa amiluku oothene akina.
10 Nyuwo munamusivela Yehova, mwiiceke yeeyo eri yoonanara.
Owo onnakhapelela okumi wa yaale ari oororomeleya wa yoowo;Owo onnawaakiha mmatani mwa* amutakhali.
11 Omwaleela onnamwaaryela awookololowa,Nave ohakalala onnawaaryela yaale ari awookololowa mmurimani.
12 Muhakalale mwa Yehova, nyuwo awookololowa,Nave muthamalele nsina nawe naweela.*
Inoota
^ Naari: “Mmulapeleke yoowo.”
^ Mu Ehepiri, “Anamwane aasithiyana o Yuta annahakalala.”
^ Naari: “wa owerya wa.”
^ Mu Ehepiri, “wuupuweleliwa wa weela wawe.”
