Salmu 4:1-8
Wa muhooleli a macipo; wi ncharihiweke ni ikaruma sa mikoyi. Salmu a Tavite.
4 Khwoo Muluku aka awookololowa, mukaakhule vaavaa kineeraaka kiwiichaneeni.
Mukikhaviherye* vaava kinahooxeyaaka.
Mukooniherye mahala nave mwiiwe nivekelo naka.
2 Nyuwo anamwane a achu, ophiyerya liini muneeraanyu mweerihe ncicimiho naka okhala munyemu?
Ophiyerya liini muneeraanyu musiveleke yeeyo ehirino mphurelo ni waavya yeeyo eri yatheru? (Selaha)
3 Suwelani wi Yehova onarwa amukhaliha mmukhalelo wavameekhaaya yoole ori oororomeleya wa yoowo;*Yehova onarwa iiwa vaavaa kineeraaka kimwiichane.
4 Munanariweke, nto muhicheke.
Muloceke mmurimani mwanyu, vakaamani vanyu, nave mukhale oomaaleleya. (Selaha)
5 Mvaheke mikucho mwawookololowa,Nave mmuroromeleke Yehova.
6 Aakhalavo ancipale analoca eriki: “Taani oni anoonihe yeeyo eri yaphaama?”
Khwoo Yehova, omwaleela wa ethoi anyu onaaryele hiyo.
7 Moosareiha murima aka ni ohakalala otokweeneOpwaha ohakalala wa yaale arino soolya sincipale ni eviinyu evyaani yawaaca.
8 Kinamukona nave kinamurupa mmureceleni,Woona wi pahiru nyuwo, khwoo Yehova, munnakeeriha okhala mookhapeleleya.
Inoota
^ Mu Ehepiri, “Muhule ephaka etokweene.”
^ Naari: “onarwa amusuwela oororomeleya awe; onammuvalaanya oororomeleya awe wa yoowo mwaneene.”
