Salmu 101:1-8
Salmu a Tavite.
101 Kinahaala wiipa vooloca sa osivela woororomeleya ni wookololowa.
Wa nyuwo, khwoo Yehova, kinanwiipelaani macipo.*
2 Kinamweerano ichu mwa miruku ni moohikhalano nthowa.*
Ti liini muneeraanyu murwe wi mukikhaviherye?
Kinamweeca ni murima woororomeleya mpa mwaka.
3 Nkirwa kivarerya echu vyakala yoohiphwanelela.*
Kinniica saweera sa achu yaawo ahinapaka yeeyo eri yaphaama;Nkirwa kipaka echu ni yaawo.*
4 Murima wooturuwa ori ocai wa miyo;Nkeemererya* yeeyo eri yoonanara.
5 Yoole onamwaapa mwaacamani awe moovitheya,Kinammukwasa.*
Yoole orino miitho awiikhoma ni murima wa wiirumiha,Nkirwa kimutumerya.
6 Kinamwaavarerya oororomeleya a veelaponi ya vathi,Wi awo ekhaleke ni miyaano.
Yoole oneeca moororomeleya* onamukirumeela.
7 Haavo muchu oowoka oni akhaleke mpa mwaka,Nave haavo muchu awootha oni eemele vamiithoni vaka.
8 Wooxiixelo ori woothene kinanwiiphaka* aweera soonanara oothene a veelaponi,Kinamwaatoloxa amutakhali oothene mu epooma ya Yehova.
Inoota
^ Naari: “kinamoopakelaani ncipo.”
^ Naari: “moororomeleya.”
^ Naari: “yoohiphuriha echu.”
^ Naari: “Nkinapaka makupa mu saweera saya.”
^ Mu Ehepiri, “Nkisuwela.”
^ Naari: “Kinammumaaliha.”
^ Naari: “moohikhalano nthowa.”
^ Naari: “kinamwaamaalihaka.”
