Mateyu 25:1-46
25 “Omwene wa wirimu onanwerya olikanyihiwa ni asimwali khumi yaawo yaakunxe ipanthi saya wi emuthikirerye mulipa oothela.
2 Athanu a yaawo yaari oolosowa, nave athanu yaari amiruku.*
3 Asimwali oolosowa yaakuxa ipanthi saya, nyenya hiyaakunxe makhurwa* makina,
4 nto asimwali amiruku yaakuxa ipanthi saya, vamoha ni makhurwa makina mmapotoroni mwaya.
5 Woona wi mulipa oothela aanalekela, asimwali oothene yaapacerya otuthela nave erupa.
6 Ohiyu eriyari, waahiiweya okhuwela: ‘Mulipa oothela oophiya! Khumani mmuthikirerye.’
7 Asimwali oothene yaavinya erehererya ipanthi saya.
8 Ale oolosowa yaahi wa ale amiruku: ‘Munivahe makhurwa anyu, woona wi ipanthi sahu ihanle vakhaani oxipha.’
9 Asimwali amiruku yaahaakhula: ‘Akhweya hanaakhwana wa hiyo ni nyuwaano. Haweni wa alipa ootumiha wi mwathume awinyu.’
10 Eyaaka othuma makhurwa, mulipa oothela aaphiya. Asimwali yaawo yaari ooreheryeya yaavolowa ni yoowo ntakhara efesta ya othela, nave mulako waawaliwa.
11 Voocharela, asimwali akina yaaphiya, enaloca eriki: ‘Pwiya, Pwiya, munihulele!’
12 Owo aawaakhula ariki: ‘Chiri kinnooleelaani eparipari, miyo nkinoosuwelaani.’
13 “Mwawiihiiha, titelelani olipelela, woona wi hamunasuwela nihiku nene naari mano elukuluku.
14 “Nave tho, Omwene wa wirimu onalikana ni muchu mmoha, yoowo ahaakumve ocimula ayaaka elapo ekina, aawiichanne anamuteko awe, aakawela muhakhu awe.
15 Oopacerya aamwinnyale italento* thanu, anaawiili italento piili, nave aneeraru etalento emoha, mwawiiwanana ni mavyakelo a mmoha ti mmoha, voocharela owo aacimula.
16 Mwawaakuveya, yoole aakhenle italento thanu aalapano aphwanyeravo tho ikina thanu.
17 Moolikana tho, yoole aakhenle piili aaphwanyeravo tho ikina piili.
18 Nyenya yoole aakhenle etalento emoha, aakacela nlici, avithavo ekhorowa* ya pwiya awe.
19 “Evinrevo elukuluku, pwiya ole aakooka, aalakhanyerya muhakhu ni akapuro awe.
20 Hiihaa, ole aakhenle italento thanu aarwa, aruuha ikina thanu, aloca ariki: ‘Pwiya, mwaakinnyale italento thanu; vano nkoonani, koophwanyeravo ikina thanu.’
21 Pwiya awe aalocano ariki: ‘Woheerano phaama, kapuro oororomeleya ni aphaama! Waari oororomeleya ni ichu vakhaani. Kinanwinnyererya ichu sincipale. Volowa mu ohakalala wa pwiyaa.’
22 Voocharela aarwa ole aakhenle italento piili, nave aloca: ‘Pwiya, mwaakinnyale italento piili; vano nkoonani, koophwanyeravo ikina piili.’
23 Pwiya awe aalocano ariki: ‘Woheerano phaama, kapuro oororomeleya ni aphaama! Waari oororomeleya ni ichu vakhaani. Kinanwinnyererya ichu sincipale. Volowa mu ohakalala wa pwiyaa.’
24 “Wookuchulani, aarwa kapuro yoole aakhenle etalento emoha, aloca: ‘Pwiya, kaanasuwela wi nyuwo mwa muchu ookacamiha, munahepha mummo muhanlaanyumo nave munathukumanya mummo muhiminsaanyumo.
25 Mwawiihiiha, koovelelaka kaakacela nlici etalento anyu. Ela, mukuxe eri yawinyu.’
26 Pwiya awe aamwaakhula: ‘Kapuro oonanara murima ni ooporora, olonce wi waanasuwela wi kinahepha mummo kihanlaakamo nave kinathukumanya mummo kihiminsaakamo?
27 Yaari hiiha, waaphwanela okeriha ekhorowa* aka o nipuro inakhapeleliwaayawo, nave kirwaaka, kaahaala waakhela ekhorowa aka ni yawaaceereryavo aya.
28 “‘Vano mmwaakhe etalento oreiyeno nave mumvahe ole orino italento khumi.
29 Mwawiihiiha, oothene yoole orinono, onamwaaceereryiwa, nave onamukhalano mwawaaca. Nto yoowo ohirino, ophiyerya tho yeeyo oreiyeno, onarwa aakhiwa.
30 Wa kapuro oohiphuriha echu, mmurihele vaate wiipiphini. Weiwo toni okhalewo winla ni okhuuriha miino awe.’
31 “Vaavaa Mwaana a muchu oneereiye arwe mu ncicimiho nawe, vamoha ni ankeelo oothene, onamukiraathi vamunyukhuni vawe wa ncicimiho.
32 Maloko oothene enarwa ethukumanyiwa vamiithoni vawe, nave owo onarwa aavalaanya achu mukina ni mukhwaawe, hiiha ntoko mukukhula onavalaanyeiye ipucepuche ni ipuri.
33 Owo onarwa akuha ipucepuche omoono awe woolopwana, nyenya ipuri omoono awe woothiyana.
34 “Voocharela, Mwene onarwa aloca wa yaale ari omoono awe woolopwana ariki: ‘Murwe, nyuwo ooreelihiwa ni Atiithi aka, mvolowe mu Omwene yoowo oreheryiwe wa nyuwo ovinyerya opatuxiwa wa elapo.
35 Ntakhara wi, kaavoliwa etala nave nyuwo mwaakivaha yoolya; kaakhala ni nthanana nave nyuwo mwaakivaha echu ya owurya. Kaari muleco nave mwaakaakhela phaama;
36 kaathaaleliwa* nave nyuwo mwaakiwariha. Kaahiiceliwa nave nyuwo mwaarwa mukixekurya. Kaawaleliwa mukariposo nave nyuwo mwaarwa mukoona.’
37 Voocharela, awookololowa murima enarwa emwaakhula yoowo ni masu ala: ‘Pwiya, naawoonneeni liini mvoliwe etala nave noovahaani yoolya, naari mukhanle ni nthanana, noovahaani echu ya owurya?
38 Naawoonneeni liini muri muleco nave niwaakhelaani phaama, naari muthaaleliwe nave noowarihaani?
39 Naawoonneeni liini mwiiceliwaka naari muri mukariposo, nave hiyo nooxekuryaani?’
40 Mwene onarwa awaakhula ariki: ‘Chiri kinnooleelaani wi yeeyo mmweerenlaanyu mmoha a asinnaka ala akhaani, mukeerenle miyo.’
41 “Voocharela, owo onarwa aloca wa yaale ari omoono awe woothiyana ariki: ‘Mukivinyeryevo, nyuwo awuulumeliwa; muye omooroni woohimala yoowo opakeliwe Musaserya vamoha ni ankeelo awe.
42 Woona wi kaavoliwa etala, nto nyuwo himwaakivanhe yoolya; nave kaakhala ni nthanana, nto nyuwo himwaakivanhe echu ya owurya.
43 Kaari muleco, nto nyuwo himwaakaakhenle phaama; kaathaaleliwa, nto nyuwo himwaakiwarinhe; kaahiiceliwa nave kaawaleliwa mukariposo, nto nyuwo himwaakixekunrye.’
44 Voocharela, awo tho enarwa emwaakhula ni masu ala: ‘Pwiya, naawoonneeni liini mvoliwe etala, naari nthanana naari muri muleco, naari muthaaleliwe, naari mwiiceliwaka, naari muri mukariposo nave nihookhaviheryaani?’
45 Owo onarwa awaakhula, ariki: ‘Chiri kinnooleelaani wi yeeyo muhimweerenlaanyu mmoha a akhaani yaala, mmanle ohikeerela miyo.’
46 Yaala anamutoloxiwa* moomalela, nto awookololowa murima anamwaakhela ekumi yoohimala.”
Inoota
^ Naari: “oovyaka; awiisuwela.”
^ Makhurwa a asitona yaaphariheliwa mpanthini mmahiku a khalai.
^ Etalento emoha ya Ekiriki enahokola 20.4 kg.
^ Mu Ekriki, “eparata.”
^ Mu Ekriki, “eparata.”
^ Naari: “nkaarino soowara sawaakhwanela.”
^ Ela tiwi, omalihiwa ekumi aya. Mu Ekriki, “okwasiwa moomalela.”
