Mateyu 14:1-36
14 Mu elukuluku yeele, Heroti yoowo aalamulela o Kalileya, iiwaleiye sa ovuwa wa Yesu,
2 aaloca ni anamuteko awe ariki: “Chiryene ola Yohani Mpatisi oviihiwe mookhwani. Ti nthowa nene onapakeiye sootikhiniha* seiha.”
3 Heroti* aalamulela wi Yohani aphariwe, amakiwe nave awaleliwe mukariposo, nthowa na Herotiya, mwaara a munnawe awiichaniwa Filipi.
4 Woona wi Yohani aanaloca wa Heroti ariki: “Honeemereryiwa wa nyuwo omuthela yoowo.”
5 Nyenya, naamwi Heroti achuna omwiipha Yohani, aanoova muloko* wa achu, woona wi waanamoona okhala mulipa a miririmu.
6 Nyenya, nihiku na wuupuxerya oyariwa wa Heroti, yaapakiwa efesta, nave mwaana amwaamuthiyana a Herotiya aahiina ohoolo wa oowompwa, mmukhalelo waamuhakalalinhe Heroti.
7 Mwawiihiiha, Heroti aalipela omvaha yeeyo eereiye aveke.
8 Nave, ntoko aalamuleliweiye ni amama awe, owo aahi: “Mukivahe mparathoni muru wa Yohani Mpatisi.”
9 Mwene aathanana, nto vanthowa na olipela wawe ni wa achu aawompeiye,* owo aalamulela wi avahiwe.
10 Mwawiihiiha, owo aalamulela wi Yohani ahitiwe mukariposo.
11 Muru wa Yohani waaruhiwa mparathoni avahiwa mwali, owo aaveleela wa amama awe.
12 Nave oohuserya a Yohani yaarwa ekuxa muruchu ene, eya yavitha; voocharela yaamuleela Yesu yeeyo yeeren’ye.
13 Yesu iiwaleiye yeela, aapwahavo, anwela mwaaceya aya nipuro nikina wi akhalewo meekheiye. Nto muloko wa achu waasuwenlaaya yeela, waavinya mu ipooma saya ni meco omuchara.
14 Akhuruwaka mmwaaceyani, owo aahoona muloko wa achu; nto aamoriwano ikharari nave apacerya waapenuxa oothene yiiceliwa.
15 Nyenya oxekuwakavo, oohuserya yaamwaacamela Yesu elocano eriki: “Wenno homakiwewo nave onniila; mwaarowihe achu ala wi yathume yoolya aya mmawaani.”
16 Nto Yesu aalocano: “Awo hanaphwanela orowa; yeenyu ene mwaavahe echu ya olya.”
17 Awo yaamuleela eriki: “Hinaano echu voohikhala ipaau thanu ni ihopa piili.”
18 Owo aahi: “Mukiruuhele va.”
19 Mwawiihiiha, aahaaruma achu okiraathi vamanaxini. Voocharela aakuxa ipaau ihe thanu ni ihopa piili, nave awehaka wirimu aavekela, areeliha. Amanle okawanya ipaau aahaakawela oohuserya awe, nave oohuserya awe yaahaakawela achu.
20 Mwawiihiiha, oothene awo yaalya evona, nave yaathukumanya ipaau saahalenle isareya micanka khumi napiili.
21 Yaale yaalyile yaari echu ya, alopwana macikhwi mathanu, ehaalakhanyeryiwe athiyana ni anamwane.
22 Moohilekela, Yesu aahaaruma oohuserya awe onwela mwaaceya wi ehoole elapuwelaka okhopela wa ephareya, nto owo aahala alaanyaka muloko wa achu.
23 Aalannyeiye, owo aawela meekheiye omwaako wi avekele. Wiilakavo, nlelo aariwo meekheiye.
24 Mwaaceya aarakamela vancipale* echaya yawuuma, nave aanakakhiwa nthowa na macumuxa ni echeku yawuupa yeeyo yaakhuma weiwo awo yaayaayawo.
25 Nyenya oyaaka nuuxa,* Yesu aaya wa yaawo eecaka vasulu va maahi.
26 Yaamonnaaya eecaka vasulu va ephareya, oohuserya yaatuthuwa, eloca eriki: “Malavi!” Nave yaanakhuwela nthowa na woova.
27 Mwawaakuveya Yesu aahi wa yaawo: “Mulipe murima! Ti miyaano; muhoove.”
28 Petru aahaakhula: “Pwiya, mwaari nyuwaano, mukirume wi kirwe wa nyuwo keecaka vasulu va maahi.”
29 Nto Yesu aahi: “Orweeke!” Mwawiihiiha, Petru aakhuruwa mmwaaceyani nave apacerya weeca vasulu va maahi ayaaka weiwo aariwo Yesu.
30 Nyenya oonneiye echeku, owo aahoova. Nave aapacenryeiye oneela, owo aakhuwela ariki: “Pwiya mukivuluxe!”
31 Mwawaakuveya, Yesu ahookola ntata nawe amphara, alocano ariki: “Weyo a nroromelo tonto, ntakhara heeni okhwilaawe minikwa?”
32 Emanle owela mmwaaceyani, echeku yaamaala.
33 Voocharela, oohuserya yaari mmwaaceyani yaamucicimiha* yoowo, elocaka: “Chiryene, nyuwaano mwa Mwaana a Muluku.”
34 Yaalapunwaaya, yaaphiya o Xenesareti.
35 Achu a elapo yeele yaamusuwenlaaya Yesu, yaalokoha mmuceche yoole, nave yaanamukerihela areca aya oothene.
36 Awo yaanamveka wi etannye mano niveru na yoowara awe, nave oothene yaawo yaatannya, yaanapenuwa moomalela.
Inoota
^ Naari: “miteko sakuru.”
^ Ela tiwi, Heroti Antipa. Moone Masu Atharihiwe.
^ Naari: “mucici.”
^ Naari: “yaalya ni yoowo vameesa.”
^ Mu Ekriki, “mastatiya mancipale.” Estatiya emoha ti ya ameetru 185.
^ Ela tiwi, ovinyerya 3h ophiyerya 6h, nsuwa nikhumme.
^ Naari: “yaamukokhorela.”
