Luka 8:1-56
-
Athiyana annamuhoola Yesu (1-3)
-
Niphwanaphwaniho na mulipa oomisa (4-8)
-
Mathowa anamweeriha Yesu opharihela maphwanaphwaniho (9, 10)
-
Otharihiwa wa niphwanaphwaniho na mulipa oomisa (11-15)
-
Epanthi henakhuneeliwa (16-18)
-
Amamaawe Yesu vamoha ni asinnawe (19-21)
-
Yesu onnamaaliha echeku yawuupa (22-25)
-
Yesu onniikarela masololo mu ikupa (26-39)
-
Mwaana amwaamuthiyana a Xairo; muthiyana onnatannya niveru na yoowara ya Yesu (40-56)
8 Evinrevo elukuluku vakhaani, Yesu aaneeceeca epooma ti epooma, muceche ti muceche, alaleeryaka ni alokohaka michaka saphaama sa Omwene wa Muluku. Nave oohuserya Khumi Napiili yaari vamoha ni yoowo,
2 ophitaanyerya athiyana akina yaapenuxiwe mwa minepa soonanara ni ireca sikina: Mariya iichaniwa Matalena, mwa yoowo yaakhummemo masololo mathanu napiili;
3 Xowana mwaara a Kusa, mutokweene a anamalapa a Heroti; Susana; ni athiyana akina ancipale, yaawo yaamukhaviherya ni sookhalano saya.
4 Vaavaa muloko mutokweene wa achu waathukumannaaya ni yaawo yaarwiile mu epooma ti epooma, owo aaloca moorweela wa niphwanaphwaniho:
5 “Mulipa oomisa aavinya anamisa mmiso awe. Arikimmisa hiihale, mmiso mukina waamorela muxerexere mwa mphiro, onyikaliwa, nave saarwa ipalame sa wirimu ithupamo.
6 Mukina waamorenle vamalukuni, nave waamenlaaya, waahuuma, woona wi hiyaarivo maahi.
7 Mukina waamorenle vamiiwani, nave miiwa sinnuwaka vamoha ni mmiso saahiiphelela.
8 Nyenya mukina waamorela va echaya yaphaama, waamenlaaya, waanavaha sawiima, opwaha ikwaha nsana.” Amanle oloca ichu seiha, aaloca moovuwa ariki: “Yoowo orino maaru awiiwano, iiwe.”
9 Nto oohuserya awe yaamukoha yootaphulela ya niphwanaphwaniho.
10 Owo aawaakhula: “Nyuwo moovahiwa osuwela soovitheya saweela sa Omwene wa Muluku, nyenya akina analeeliwa soothene mmaphwanaphwaniho, wi naamwi ewehaka, eweheke siiyo ene, naamwi yiiwaka, yiiweke mahaleene.”
11 Yootaphulela ya niphwanaphwaniho tiila: Mmiso ti masu a Muluku.
12 Mmiso yoole waamorenle muxerexere mwa mphiro, ti yaale aniiwa masu, ohoolo waya Musaserya onnarwa aviihavo masu yaawo amisiwe mmurimani mwaya wi ehiroromele naari ehivuluxiwe.
13 Yoole waamorenle vamalukuni, ti yaale eni yiiwa masu, yeemererya moohakalala, nyenya haano mitathaari. Annaroromela elukuluku vakhaani, nto mu elukuluku ya makacamiho, awo annapheruwa.
14 Yoole waamorenle vamiiwani, onaaxiphela yaale yiiwale masu, nyenya nthowa na ovoloweliwa ni sawuukhula, muhakhu ni opuha wa okumi yoola, awo anniipheleleya moomalela, sawiima saya ihiniichwa.
15 Nto yoole waamorenle va echaya yaphaama, ti yaale eni yiiwa masu ni murima waphaama, ekhapelela nave enavaha sawiima ni ovilela.
16 “Haavo oni apariha epanthi akhuneela ni epiya naari akuha vathi va ekaama, nyenya onnakuha vanipuroni nawooneya wi yaale anavolowa yooneke ekamaama.
17 Tiwi hiyaavo echu eri yoovitheya eni ehuupululiwe, naari hiyaavo echu eri yookhuweya eni ehisuweliwe naari eni ehooniwe.
18 Mwawiihiiha, nwiriyane phaama yeeyo muniiwaanyu, woona wi yoowo orinono onamwaaceereryiwa, nto yoowo ohirino, ophiyerya tho yeele onaanyiheryeiye wi ookhalano onarwa aakhiwa.”
19 Nave amama awe ni asinnawe yaahiphiya, nto hiyaawenrye omwaacamela owo nthowa na muloko wa achu.
20 Mwawiihiiha, aaleeliwa: “Amamaa ni asinnaa ari vaate, anakhwela owoona.”
21 Owo aawaakhula ii: “Amamaaka ni asinnaka ti yaala anawiriyana masu a Muluku nave eneerano.”
22 Nihiku nimoha, owo ni oohuserya awe yaanwela mwaaceya, nave owo aahi wa oohuserya awe: “Hankooni nlapuwele okhopela wa ephareya.” Mwawiihiiha, awo yaacimula.
23 Nyenya, elapuwaka Yesu aarupa. Yaahoopa echeku etokweene mu ephareya, maahi epacerya osareya mmwaaceyani, nave yaari va yawoopiha.
24 Mwawiihiiha, oohuserya awe yaamwaacamela, emviiha eriki: “Muhusiha, Muhusiha, nihanle vakhaani orimeela!” Vahilekenle, Yesu aavinya asamela echeku vamoha ni ikuru sa maahi, iho saamaala, ikhala cuu.
25 Vaavaa, aahaakoha, ii: “Nroromelo nanyu nri woowi?” Nyenya awo yaasareya woova ni otikhina, enakohana eriki: “Taani yoola? Ophiyerya tho wi onnawerya olamulela echeku ni maahi, nave sinnamwiiwelela.”
26 Yaalapuwela okhopela elapo ya Axeresane, yeeyo yaawehana ni o Kalileya.
27 Vaavaa Yesu aakhurunweiye mmwaaceyani, aathikireryiwa ni mulopwana mmoha a elapo yeele aaphariwe ti masololo. Yaaviravo elukuluku yincipale ahiwaraka echu, nave haakhala owaani nto omahiye.*
28 Aamonneiye Yesu, aakokhora vamiithoni vawe akhuwelaka ni masu oovuwa ariki: “Tiheeni onachunaawe ni miyo, Yesu, Mwaana a Muluku Aikuru Soothene? Kinnooveka wi ohikihooxe.”
29 (Tiwi Yesu eera alamulenle munepa woonanara wi okhumemo wa mulopwana yoole. Ikwaha sincipale* owo aanaphariwa ti munepa woonanara, nave aanamakiwa ni mithipo matata ni manaani, analipeleliwa, nyenya owo aanathikila mithipo, anakerihiwa otakhwani ti munepa yoole.)
30 Yesu aamukoha: “Nsina naa taani?” Owo aahaakhula: “Lexiyawu,” woona wi masololo mancipale yaavolowa mwa yoowo.
31 Awo yaatitelela omveka wi ehivonyeryiwe onlicini nawiixa.*
32 Makupa yaale o mwaako, naakhalawo nikhuuru na ikupa naalyihiwa; hiihaa, awo yaaveka wi aweemererye ovolowa mu ikupa ihe, nave owo aaheemererya.
33 Mwawiihiiha, masololo yaakhuma mwa mulopwana, evolowa mu ikupa, nave ikupa soothene saahiivonyerya mphareya, imoraka va nikumukumu,* nave sikhwa ni maahi.
34 Nyenya, alipa oolyiha ikupa yoonnaaya yeeyo yeeren’ye, awo yaachawa elokoha yeela mmicecheni ni mmawaani.
35 Nave achu yaarwa wi yoone echu yeeyo yeeren’ye. Hiihaa, awo yaamwaacamela Yesu, emphwanya mulopwana yoole aarino masololo, awanre ni iisuwelaka, akiraanthe vakhiviru va manaani a Yesu; nave achu yaale yaatepa woova.
36 Yaale yoonne ichu iha seereyaka, yaalokoha wa achu yaaruule vooloca sa openuxiwa wa mulopwana aarino masololo.
37 Achu ancipale a makupa yaale a Axeresane, yaamveka Yesu wi avinyewo wa yaawo, vawi yaatepa woova. Hiiha Yesu anwela mwaaceya, apwahawo.
38 Mwawiihiiha, mulopwana yoole aarino masololo aatitelela omveka Yesu wi amuchare, nyenya Yesu aamulaanya, ariki:
39 “Hawe owannyaa, nave otitelele olokoha yeeyo Muluku oweerenleiye.” Hiihaa, owo aarowa, analokoha mu epooma yoothene, yeeyo Yesu aamweerenleiye.
40 Yesu aakonkeiye, muloko wa achu waamwaakhela phaama, woona wi yaananweherya.
41 Nyenya aaphiya mulopwana mmoha nsina nawe Xairu; owo aari mutokweene a mu nipuro na malapelo.* Nave aakokhora va inaani sa Yesu apacerya omveka wi aye owannyawe,
42 woona wi mwanawe mmoharu* amwaamuthiyana, aarino iyaakha khumi napiili, aahanle vakhaani okhwa.
Yesu apwahaka, muloko wa achu waananwomaanya yoowo.
43 Aakhalavo muthiyana aahooxeya ni ereca ya okhuma nikhami* mu iyaakha khumi napiili, nave haavo aawenrye ompenuxa.
44 Muthiyana aamwaacamela Yesu oculi wawe nave atannya niveru na yoowara awe, nave moohilekela aamaala okhuma nikhami.
45 Mwawiihiiha, Yesu aahaakoha: “Taani okitannyile?” Woona wi achu yaanaruna, Petru aahi: “Muhusiha, moone wi muloko wohooricaani nave onnoowomaanyaani.”
46 Nto Yesu aahi: “Ookhala muchu okitannyile, kohoona* wi ikuru sookhuma mwa miyo.”
47 Vaavaa muthiyana oonneiye wi hawenrye wiisiipithiha, aarwa athukumelaka nave akokhora vamiithoni va Yesu, aloca wa achu oothene mathowa yaamweerinhe omutannya, ni mukhalelo aapenunweiye mwawaakuveya.
48 Yesu aahi wa yoowo: “Mwanaka, nroromelo naa nohoopenuxa. Hawe mmureceleni.”
49 Arikimuloca hiihale, aaphiya mulopwana oorweela vaate va mutokweene a nipuro na malapelo,* aloca: “Mwaninyu amwaamuthiyana ookhwa; muhimuukhule Muhusiha.”
50 Iiwaleiye yeela, Yesu aamwaakhula: “Ohoove, pahiru okhaleno nroromelo, nave mwanaa onamvuluxiwa.”
51 Aaphiyaleiye vaate va Xairu, owo heemerenrye wi muchu mukina avolowe ni yoowo mpa, omuhiya Petru, Yohani, Tiyaku vamoha ni apapa awe nahano ni amama awe.
52 Nyenya achu oothene yaananla, yiimanaka vanaakhoopeni nthowa na okhwa wa mwaana. Hiihaa owo aahi: “Mmaale winla, woona wi mwaana hakhwile nto onamurupa.”
53 Mwa yeeyo, awo yaapacerya omutheya mwa munyemu, woona wi yaasuwela wi mwaana aahikhwa.
54 Nto, Yesu aapharela ntata na nahano, amwiichana ariki: “Nahano, vinya!”
55 Owo aakookela okhala mukumi,* avinya elukuluku ene yeeyo, nave Yesu aalamulela wi avahiwe yoolya.
56 Asitiithi awe yaatikhiniheya, nto Yesu aahaalamulela wi ehimuleele muchu yeeyo yeeren’ye.
Inoota
^ Naari: “mahiye anuupuweliwa.”
^ Naari akhweya: “Munepa woonanara waahimphara mu ilukuluku sincipale.”
^ Mu Ekriki, “Apismu.” Moone Masu Atharihiwe.
^ Naari: “voothitimanavo; nipuro noocukhuwa.”
^ Mu Ekriki, “mu sinakooka.”
^ Mu Ekriki, “ooyariwa meekheiye.”
^ Naari: “okonamo; okhala vamweerini.”
^ Naari: “koosuwela.”
^ Mu Ekriki, “a mu sinakooka.”
^ Mu Ekriki, “munepa awe waamukookela.” Moone Masu Atharihiwe, “Munepa.”
