Luka 6:1-49
-
Yesu, “Pwiya a Sapata” (1-5)
-
Mulopwana oorakala ntata onnapenuxiwa (6-11)
-
Oohuserya khumi napiili (12-16)
-
Yesu onnahusiha ni openuxa (17-19)
-
Ohakalala ni otakhaliwa (20-26)
-
Waasivela amwiicani (27-36)
-
Muhiye othoriha (37-42)
-
Osuweliwa moorweela wa sawiima saya (43-45)
-
Empa etekiwe phaama; empa ehirino mathipelo awiixeela (46-49)
6 Mu nihiku na Sapata, Yesu aviraka mmacani mwa tiriku, oohuserya awe yaapacerya omvurula tiriku, nave enamucikicha mmatani, emukhuuraka.
2 Mwawiihiiha, Afarisi akina yaaloca: “Ntakhara heeni muneeraanyu yeeyo ehineemeereryiwa nihiku na Sapata?”
3 Nto Yesu aawaakhula ariki: “Hamwintonko waalakhanya yeeyo Tavite vamoha ni alopwana awe yeenraaya evoliwe?
4 Wi aavolowa mu empa ya Muluku, aakhela ipaau sa sooveleela* akhuura nave tho aavaha alopwana yaawo aareiyeno, naamwi yaheemereryiwa muchu pure okhuura, voohikhala alipa a mukucho pahi?”
5 Voocharela owo aahi wa yaawo: “Mwaana a muchu ti Pwiya a Sapata.”
6 Mu nihiku nikina na Sapata, owo aavolowa mu nipuro na malapelo* apacerya ohusiha. Nave mwemmo aakhalamo mulopwana oorakala* ntata noolopwana.
7 Alipa oorepa ni Afarisi yaanamvarerya Yesu wi emoone waakhanle wi aahaala ompenuxa muchu mu nihiku na Sapata, wi emphwanyerye mathowa.
8 Owo aasuwela muupuwelo aya; mwawiihiiha aaloca ni mulopwana ole oorakala* ntata, ariki: “Vinya, weemele veeri va.” Owo aavinya eemela.
9 Voocharela Yesu aahi wa yaawo: “Achu kinnookohaani, apwanne onneemereryeya, opaka yaphaama naari yoonanara, ovuluxa okumi* naari wiipha mu nihiku na Sapata?”
10 Amanle waaweha oothene yaari vaavale, Yesu aaloca wa mulopwana: “Okola ntata naa.” Owo aahookola, nave ntata nawe naapenuwa.
11 Nto awo yaanyeenyeya, ekhala ntoko anaanepa, nave enavaanela echu yaaphwanelaaya omweerela Yesu.
12 Mmahiku yaale, owo aaya omwaako wi avekele, nave aamaliha ohiyu woothene avekelaka wa Muluku.
13 Waaxilaayavo, owo aawiichana oohuserya awe, mwa yaawo aahaathanlavo khumi napiili, nave aavaha nsina nawi arummwa:
14 Simoni, yoowo tho aamuchunweiye nsina nawi Petru, munnawe awiichaniwa Antreya, Tiyaku, Yohani, Filipi, Partolomewu,
15 Mateyu, Tomasi, Tiyaku mwaana a Alfewu, Simoni aweeriwa “museloti,”
16 Yutasi mwaana a Tiyaku, ni Yutasi Iskariyoti, yoowo ohoolo waya aamutuminhe Yesu.
17 Owo aakhuruwa vamoha ni oohuserya awe yeemela va mureyareya, yaakhalavo oohuserya awe ancipale, vamoha ni muloko mutokweene wa achu, woorweela o Yuteya ni o Yerusalemu ni oxerexere wa ephareya makupa o Tiru ni o Sitoni, yaawo yaarwenle onwiriyana Yesu ni openuxiwa masooso aya.
18 Ophiyerya tho yaale yaahooxiwa ni minepa soonanara yaanapenuxiwa.
19 Muloko woothene wa achu waanakhwela omutannya, nthowa nawi mwa yoowo saakhalamo ikuru sa openuxa nave saanaapenuxa oothene.
20 Nave owo aahaaweha oohuserya awe apacerya oloca ariki:
“Oohakalala ti nyuwo oohaawa, ntakhara ti wawinyu Omwene wa Muluku.
21 “Oohakalala ti nyuwo muri oovoliwa hiihaano, ntakhara munarwa mvona.
“Oohakalala ti nyuwo muninla hiihaano, ntakhara munarwa mutheya.
22 “Oohakalala ti nyuwo vaavaa achu anawiicaayaani, woothanyaani, wooruwanaani ni wuulumela nsina nanyu* nthowa na Mwaana a muchu.
23 Yeereya hiihaa, hakalalani nave chapani, woona wi nchuwelo nanyu ntokweene wirimu, tiwi makholo aya yaaweerela alipa a miririmu ichu imohamoha seiho.
24 “Nyenya, ootakhaliwa ti nyuwo alipa amuhakhu, ntakhara mohaakhela ya woohakararyaani mwawaakhwanela.
25 “Ootakhaliwa ti nyuwo mvonne hiihaano, ntakhara munarwa mvoliwa etala.
“Ootakhaliwa ti nyuwo munatheya hiihaano, ntakhara munarwa muthanana ni wunla.
26 “Ootakhaliwa ti nyuwo, munacicimihiwa ni achu oothene, ntakhara ti yeela makholo aya yaaweerenlaaya alipa miririmu oowoka.
27 “Nto miyo kinnooleelaani nyuwo munawiriyana: Mutitelele waasivela amwiicani anyu, oweerela saphaama yaale anawiicaani,
28 waareeliha yaale anawuulumelaani, ni waavekelela yaale anooruwanaani.
29 Yoole oni oomane nrama, omurukunuxele nikina; nave yoole oni awaakhe yoowara aa, omuhiyerye tho ekina.
30 Omvahe oothene yoole onooveka, nave yoole onawaakha ichu saa, ohiveke seiho wi okookiheryiwe.
31 “Nave tho, yeeyo munachunaanyu wi achu eweerelekeeni, nyuwo tho muweereleke yaawo emohamoha.
32 “Wakhala wi munaasivela pahi yaale anoosivelaani, tiheeni munaphuraanyuvo? Ophiyerya tho alipa oocheka anaasivela yaawo anaasivela.
33 Wakhala wi munaweerela saphaama pahiru yaale anaweerelaani saphaama, tiheeni munaphuraanyuvo? Ophiyerya tho alipa oocheka anneerano emohamoha.
34 Nave tho, wakhala wi munaapoleiha* yaaworu munaweheryaanyu wookookiheryaani, tiheeni munaphuraanyuvo? Ophiyerya tho alipa oocheka annaapoleiha akhwaaya eweheryaka okookiheryiwa.
35 Moohiyana, mutitelele waasivela amwiicani anyu, nweerelaka saphaama nave mwaapoleihaka muhiweheryaka okookiheryiwa echu; nchuwelo nanyu nnarwa nikhala ntokweene, nave munarwa mweeriwa anamwane a Muluku Aikuru Soothene woona wi owo taikharari wa oohithamalela ni wa oonanara murima.
36 Mutitelele okhala aikharari, hiihaa ntoko Atiithinyu aryaaya aikharari.
37 “Opwaha yeeyo, muhiye othoriha, wi muhirwe muthorihiwe; muhivaheke nthowa wi muhirwe mvahiwe nthowa. Mutitelele olevelela,* nave munarwa muleveleliwa.*
38 Mvaheke nave achu enarwa yoovahaani. Awo enarwa esareiha va niveru na yoowara anyu mphimo waphaama, wookhiceleya, wootukutheryeya, osaren’ye onayeeheya. Tiwi, mphimo muneeraanyu mphimeno, munarwa mphimeliwano mu okookiheryiwa.”
39 Voocharela aaloca tho niphwanaphwaniho: “Apwanne muchu eevaasi onanwerya omweeciha muchu mukina eevaasi? Oopiili hemorela munlicini?”
40 Oohuserya* hanampwaha muhusiha awe, nto oothene yoole ohusihiwe mwawaakhwanela onarwa alikana ni muhusiha awe.
41 Ntakhara heeni onavareryaawe ekokhola eri mmiithoni mwa mukhwaa, nave ohinawerya woona wi wookhalano ekhukulu mmiithoni mwaa?
42 Vano onawerya hai oloca wa mukhwaa: ‘Mukhwaaka, haya kiviihemo ekokhola mmiithoni mwaa,’ nto weyo orinono ekhukulu mmiithoni mwaa? Nawiisootherye we! Opacerye oviihamo ekhukulu eri mmiithoni mwaa, hiihaanto, toneeraawe wooneke phaama mukhalelo wa oviihamo ekokhola eri mmiithoni mwa mukhwaa.
43 “Vawi, hiwaavo mwiri waphaama onavaha sawiima soonanara, naari tho hiwaavo mwiri woonanara onavaha sawiima saphaama.
44 Tiwi, mwiri ori woothene onasuweliwa moorweela wa sawiima saya. Ntoko yootakiherya, achu hanarukula sawiima sa mukuukhu mmwiri wa miiwa, naari omurukula uuva* mmwiri wa miiwa.
45 Muchu aphaama, onnakumiha ichu saphaama seiho okhapelenleiye mmurimani mwawe, nto muchu oonanara murima, onnakumiha ichu soonanara seiho okhapelenleiye mmurimani mwawe; tiwi, eyano awe enaloca ichu seiho isaren’ye mmurimani.
46 “Vano, ntakhara heeni munakiichanaanyu ‘Pwiya! Pwiya!’ nto muheerakano ichu kinalocaaka?
47 Oothene yoole onarwa wa miyo, nave aniiwa masu aka ni weerano, kinanwoonihaani muchu onalikaneiyeno:
48 Owo onalikana ni mulopwana yoowo achunaka oteka empa, onapacerya othipavo iixihavo, nave atikitherya mathipelo a empa va mwala. Nto, maahi yaarweenlaaya, muhice osareya onamana empa yeele, eyo hiyaacikinyen’ye woona wi yaatekiwa phaama.
49 Nyenya, yoole onawiriyana nave ahinachariha, onalikana ni mulopwana yoowo aatenke empa vacheyani ahithimpevo. Muhice waarweela, onamana empa yeele, nave eyo yaakumuwa. Okumuwa waya waari otokotoko.”
Inoota
^ Naari: “epaau ya omvaha Yehova.”
^ Mu Ekriki, “sinakooka.”
^ Naari: “oophoororowa.”
^ Naari: “oophoororowa.”
^ Naari: “omvuluxa muchu.”
^ Mu Ekriki, “eriha nsina nanyu ntoko noonanara.”
^ Ela tiwi, ohirivo okookiheryiwa mwawaaceererya.
^ Naari: “otaphula.”
^ Naari: “mutaphuliwa.”
^ Naari: “naxikola.”
^ Naari: “orukula mpesa.”
