Luka 2:1-52
2 Mmahiku yaale, naakhuma nlamulo wa Kaisara Akustu wi achu oothene* erepeliwe.
2 (Orepeliwa ola woopacerya weeren’ye elukuluku Kirinu aareiye mulamuleli o Siriya.)
3 Nave achu oothene yaaya orepeliwa, muchu ti muchu mu elapo awe.
4 Mwawiihiiha, Yosefe tho aavinya o Kalileya epooma yo Nasareti ayaaka o Yuteya epooma ya Tavite, yawiichaniwa Petelehemu, woona wi aari a emusi ya nihimo na Tavite.
5 Owo aaya wi arepeliwe vamoha ni Mariya, mwaariye* yoowo aahanle vakhaani oyara.
6 Eri weiwo, yaaphiyerya elukuluku awe ya oyara.
7 Nave owo aamuyara mwanawe oopacerya a mwaamulopwana. Aamuhuruwela ni ikuwo nave amwaatalela va nipuro onalyihiwaayavo muhuwo, woona wi hinaarivo nipuro mu ipa sa aleco.
8 Nave mmuceche mmohamoha yoole, yaakhalawo akukhula yaawo yaalipelela muhuwo aya eri vanlakani vene ohiyu.
9 Mootutuxa munkeelo a Yehova aahooneya wa yaawo, nave ncicimiho na Yehova naahaarya variyari vaya, mwawiihiiha awo yaatepa woova.
10 Nyenya munkeelo aahi wa yaawo: “Muhoove! Kiri vaava wi kooleeleni michaka saphaama sinahaala waahakalaliha vancipale achu oothene.
11 Woona wi olelo, mooyareliwa mvuluxa mu epooma ya Tavite, yoowo ori Kristu, Apwiya.
12 Nave ela eneneeryo wa nyuwo: Munamphwanya nikwiya* nihuruweliwe ni ikuwo nave naateleliwe va nipuro onalyihiwaayavo muhuwo.”
13 Moohilekela, waaphiya muloko wa anakhoco a wirimu okhala ni munkeelo yoole, onamuthamala Muluku oriki:
14 “Acicimihiwe Muluku awiirimurimu, nave murecele veelaponi ya vathi wa achu yaawo owo onaweemereryeiye.”*
15 Hiihaa, vaavaa ankeelo yaapwanhaayavo ekookelaka wirimu, akukhula yaanaloca mukina ni mukhwaawe eriki: “Hankooni niye o Petelehemu wi noone yeeyo yeeren’ye, Yehova onisuwelinheiye.”
16 Nave awo yaayawo mwawaakuveya emphwanya Mariya, Yosefe, vamoha nnikwiya naateleliwe va nipuro onalyihiwaayavo muhuwo.
17 Yoonnaaya yeela, yaalokoha yeeyo yaaleeliwaaya sa mwaana yoole.
18 Oothene yaawo yiiwale, yaatepa otikhiniheya ni ichu seiho yaaleeliwaaya ni akukhula,
19 nto Mariya aanakhapelela masu oothene yaala, anuupuwelela mmurimani mwawe.
20 Akukhula yaarowa, emucicimihaka ni omuthamala Muluku, wa nthowa na soothene seiho yiiwalaaya ni yoonnaaya, hiiha ntoko yaaleeliwaaya.
21 Evinre mahiku mathanu namararu, vaavaa yaaphiyalaaya elukuluku ya omuthikila, yaamuchuwa nsina nawi Yesu, nsina nenlo aavahiweiye ti munkeelo ahaakumve orupaliwa.
22 Nave tho, yaakhwannaaya mahiku a weelihiwa waya, mwawiiwanana ni Nlamulo na Mose, awo yaamukeriha o Yerusalemu wi emveleele wa Yehova,
23 ntoko erempwaaya Mmalamulo a Yehova: “Mwaana oopacerya oyariwa* akhala amwaamulopwana, onaphwanela weeriwa aweela a wa Yehova.”
24 Awo yaaveleela mukucho mwawiiwanana ni yeeyo Malamulo a Yehova yaalocaaya: “Masiya meeli naari asaana apiili a ikakaiya.”
25 O Yerusalemu aakhalawo mulopwana awiichaniwa Simiyone. Ola aari awookololowa ni oomucicimiha Muluku, aanawehererya nihakararyo na Aisarayeli nave munepa waweela waari mwa yoowo.
26 Ohiya yeeyoru, aaleeliwa ni Muluku, moorweela wa munepa waweela wi haahaala okhwa ahimoonne Kristu a Yehova.
27 Ahooleliwaka ni ikuru sa munepa waweela, Simiyone aaya mu empa ya Muluku; nave vaavaa asitiithi a Yesu, yaavolonwaaya wi mwaana eereliwe yeeyo yaari yookhovelela mwawiiwanana ni Malamulo,
28 Simiyone aamukuxa mwaana, amuupaara nave amuthamala Muluku ariki:
29 “Pwiya Ooweryaxa, vano kapuro anyu onamukhwa mmureceleni, woona wi mohaakhwaniherya yoororomeliha anyu,
30 vawi miitho aka ahoona ephiro anyu ya ovuluxa
31 yeeyo mureherenryaanyu vamiithoni va achu oothene,
32 ola oni akhale omwaleela wi aviihevo ekuwo ya epiiphi wa maloko nave ola ncicimiho wa achu a Isarayeli.”
33 Nave apapa ni amama awe mwaana yaanatikhiniheya ni ichu seiho saalociwa vooloca sa yoowo.
34 Simiyone tho aahaareeliha, nave aloca ni Mariya, amama awe mwaana ariki: “Wiriyana ela! Mwaana ola orummwale wi awuuwihe ni waaviiha ancipale mwa Aisarayeli, nave wi akhale eneneeryo yoovaanyihana.
35 (Vano weyo, nlema noorekama nnarwa noothorola*), wi sawuupuwela sa mirima sa achu ancipale suupululeye.”
36 Aakhalawo tho mulipa a miririmu amwaamuthiyana, nsina nawe eeriwa Ana, mwaana a Fanuweli a nihimo na Aseri. Muthiyana ola aahaacano iyaakha, nave amanle otheliwa,* aakhanle pahi ni aiyawe mu iyaakha thanu napiili.
37 Owo aari naamukhwele nave aarino iyaakha makhumi mathanu namararu ni iyaakha xexe. Owo haacompela oya mu empa ya Muluku, apharaka muteko waweela othana ni ohiyu, iinanelaka olya, ni avekelaka orweela vathi va murima.
38 Elukuluku ene yeele, owo aaphiya, anamuthamala Muluku, nave analoca sa mwaana wa oothene yaawo yaawehererya woopoliwa wa Yerusalemu.
39 Hiihaa, emanle waakhwaniha ichu soothene mwawiiwanana ni Malamulo a Yehova, Yosefe ni Mariya yaakookela o Kalileya, epooma aya, o Nasareti.
40 Mwaana aaninnuwa, akhalakano ikuru ni osareya masuwelelo; nave mahala a Muluku yaatitelela okhala mwa yoowo.
41 Eyaakha ti eyaakha, yaari yookhovelela ya asitiithi awe oya o Yerusalemu mmahiku a efesta ya Paska.
42 Nave vaavaa aareiyeno iyaakha khumi napiili, awo yaaya o efesta ntoko yaakhovelenlaaya.
43 Mahiku a efesta yaamanlaaya, awo ekookelaka owaani, mmiravo Yesu aahanle o Yerusalemu, nto asitiithi awe hiyaasuwela yeela.
44 Yuupuwelaka wi akhweya aari ni akhweiye mmukwahani, awo yaaheeca mukwaha wa nihiku nimoha; nto awo yaapacerya omwaavya mwa ahima ni asuweli.
45 Nyenya yahaamonnaaya, yaakookela o Yerusalemu emwaavyaka.
46 Nto evinre mahiku mararu, yaamphwanya mu empa ya Muluku, akiranthe veeri va ahusiha, aawiriyanaka ni aakohaka.
47 Nave oothene yaawo yaamuwiriyana, yaanatikhina ni osuwela wawe vamoha ni maakhulo awe.
48 Vaavaa makholo awe yaamonnaaya, yaahaleela yaweera, nto amama awe yaalocano eriki: “Mwanaka, tiheeni yeela oneerenlaawe? Miyaano ni apapaa naatepa wuukhuwa niwaavyaka.”
49 Nyenya Yesu aahi wa yaawo: “Ntakhara heeni mwaakaavyaanyu? Apwanne himwaasuwela wi kaaphwanela okhala mu empa ya Atiithi aka?”
50 Nto awo hiyiiwexexa yeeyo aaleeleiye.
51 Yesu aacimula vamoha ni yaawo ayaaka o Nasareti, nave aanawiiwelela* yaawo. Nto amama awe yaanakhapelela ichu soothene iha mmurimani mwaya.
52 Yesu aanatitelela winnuwa mmirukuni ni omwiilini nave tho aaneemereryiwa ni Muluku vamoha ni achu.
Inoota
^ Mu Ekriki, “a elapo yoothene.”
^ Naari: “yoowo aatheliwe ni Yosefe wi yaakhwanihe malakano aya.”
^ Naari: “mwaana onaamuyariwaru.”
^ Naari: “onaakhweleiye.”
^ Mu Ekriki, “Mwaana oothene amwaamulopwana onahula erukulu.”
^ Naari: “nthorola okumi aa.”
^ Mu Ekriki, “ovinya woomwali awe.”
^ Naari: “aanatitelela owiiwelela.”
