Luka 10:1-42
10 Simanle weereya ichu seiha, Apwiya yaahaathanla oohuserya akina makhumi mathanu napiili,* ni yaahaarumiha eeli-eeli wi ehoole mu ipooma soothene ni mapuro yaawo Apwiya yaahaalaaya oyawo.
2 Voocharela, Yesu aaloca ni yaawo: “Muteko wa ohaca wootepa waaca, nyenya anamuteko ene ari avakhaani. Mwawiihiiha, mumveke Mwaneene a ohaca wi aarumihe anamuteko mmuteko awe wa ohaca.
3 Haweni! Miyaano kinnoorumihaani ntoko ipucepuche veeri va miici.
4 Muhikuxeke murupa wa ikhorowa naari wa yoolya, naari asantaalya nave mphironi, muhimuloceleke muchu.*
5 Vaate muneeraanyu mphiyekevo, mpaceryeke oloca muriki: ‘Murecele okhale mu echoko yeela.’
6 Akhalavo nthamwene a murecele, murecele anyu onamukhala mwa yoowo. Nto aahikhalavo, murecele anyu onamookookelaani.
7 Hiihaa, mukhale vaate vaavale, mulyeeke ni owurya yeeyo aneeraaya yoovahekeeni, woona wi namalapa onnaphwanela waakhela nlivelo nawe. Muhithaameke empa ni empa.
8 “Nave tho, epooma muneeraanyu mvolowekemo nave mwaakheliwa phaama, mulyeeke yeeyo aneeraaya yoovahekeeni,
9 mwaapenuxeke awiiceliwa a epooma yeeyo, nave mwaaleelaka achu muriki: ‘Omwene wa Muluku ori vakhiviru vanyu.’
10 Nto, epooma muneeraanyu mvolowe nave achu ehiwaakhelaani phaama, muye muramphani mwaya nave muloce muriki:
11 ‘Ninnootathelaani nchupi na epooma anyu, nenlo nipante mu inaani sahu. Naari hiiha, musuwele wi Omwene wa Muluku wohaacamela.’
12 Kinnooleelaani wi, mu nihiku nenlo,* olakiwa wa epooma ene yeeyo onamukhala otokweene opwaha wa o Sotoma.
13 “Otakhaliwa ti wa epooma yo Korasini! Otakhaliwa ti wa epooma yo Petisaita! Ntakhara wi, waakhanle wi miteko sootikhiniha seeriwe wa nyuwo, seeren’ye o Tiru ni Sitoni, achu a weiwo yii eniiha echarunwe, ekiranthe, yiikhunenle ni isakhwi nave yiihenle ecuurwa.
14 Nihiku na othoriha, olakiwa wanyu onahaala okhala otokweene opwaha wa ipooma sa o Tiru ni Sitoni.
15 Nave weyo tho epooma yo Kafarnawu, onuupuwela wi onamwinnuwihiwa ophiyerya wirimu? Onamukerihiwa Mmahiyeni!*
16 “Yoole onoowiriyanaani nyuwo onakiwiriyana miyo. Nave yoole onookhoocaani nyuwo onakikhooca tho miyo. Opwaha yeeyo, yoole onakikhooca miyo, onamukhooca tho Yoole okirumme.”
17 Voocharela, oohuserya makhumi mathanu napiili* yaakooka moohakalala, eriki: “Pwiya, ophiyerya tho masololo yaananiiwelela moorweela wa opharihela nsina nanyu.”
18 Mwawiihiiha, Yesu aahi wa yaawo: “Koomoona Satana amonre wirimu ntoko overunya.
19 Wiriyanani, kihoovahaani owerya wa onyikala inowa ni awalisi,* ni owerya wa ovootha ikuru sa mwiicani, nave hiyaavoru eni eweereleeni yoonanara.
20 Naari hiiha, muhihakalale nthowa na wiiweleliwa ni minepa soonanara, nto muhakalale woona wi masina anyu aarempwa wirimu.”
21 Mu elukuluku ene yeele, Yesu aasareya ohakalala moorweela wa munepa waweela, nave aloca ariki: “Tiithi, kinnoovuwihaani variyari va achu oothene, nyuwo Pwiya awirimu ni a veelaponi yavathi, woona wi moovitha phaama ichu iha wa achu amiruku ni oosuwelaxa, nave muupulula wa anamwane akhaani. Aa, Tiithi, woona wi ti hiihaa nyuwo mwaachunnaanyu weerano.
22 Ichu soothene koovahiwa ni Atiithi aka, nave haavo omusuwenle Mwaana, pahiru Atiithi; nave tho haavo aasuwenle Atiithi, pahiru Mwaana ni muchu yoole Mwaana onachuneiye omuupululela.”
23 Aarukununweiye wa oohuserya awe, aalocano yaaworu ariki: “Oohakalala ti miitho anoona ichu seiho munoonaanyu.
24 Miyo kinnooleelaani wi, alipa a miririmu ancipale ni mamwene yaanachuna woona ichu seiho munoonaanyu, nto hoonne, ni wiiwa ichu seiho muniiwaanyu, nto hiiwale.”
25 Vano, muhusiha mmoha a Malamulo aaheemela wi amweehe Yesu, aloca ariki: “Muhusiha, echu taani kinaphwanelaaka weera wi kaakhele ekumi yoohimala?”
26 Owo aamukoha ariki: “Tiheeni erempwe Mmalamulo? Onaalakhanya hai?”
27 Aamwaakhula ariki: “‘Omusiveleke Yehova Muluku aa ni murimaa woothene, ni okumi* aa woothene, ni ikuru saa soothene vamoha ni muupuwelo aa woothene’ nave ‘omusiveleke mwaacamani aa ntoko oniisivelaawe weyo mwaneene.’”
28 Owo aahi: “Wohaakhula phaama; weerekeno yeeyo nave onamwaakhela ekumi yoohimala.”
29 Nto achunaka wiiseera okhala eekhaikhai, aamukoha Yesu ii: “Taani chiryene ori mwaacamani aka?”
30 Yesu aamwaakhula ariki: “Mulopwana mmoha akhuruwaka o Yerusalemu ayaaka o Yeriko, aaphariwa ni ampava, emwaakha soothene aareiyeno, emmana, epwaha, emuhiya ahanle vakhaani okhwa.
31 Aanavira tho mphiro ene yoole mulipa a mukucho mmoha, nto aamonneiye mulopwana ole aamurapela, avira okhwipi apwaha.
32 Moolikana, Muleevi mmoha, aavira nipuro nenle, aamonneiye aamurapela tho, apwaha.
33 Nyenya Musamariya mmoha ari vamukwahani vawe, aamphwanya mulopwana yoole; nave aamonneiye aamoriwano ikharari.
34 Mwawiihiiha, owo aamwaacamela, ahela mmakhwacani mwawe makhurwa ni eviinyu nave amaka. Anweliha va mwaaxinama awe, amukeriha empa ya aleco, nave amukhapelela.
35 Mmeeloni mwaya, aakumiha itenaariyu piili amunnya mwaneene a empa, alocano ariki: ‘Mmukhapelele mulopwana ola, nave soothene muneeraanyu mpharihele opwaha ikhorowa iha, kaakookaka kinamoolivaani.’
36 Mwa yaale araru, taani onamoonaawe okhala mwaacamani a mulopwana yoole aaphariwe ti ampava?”
37 Owo aamwaakhula: “Ti yoole aamoriweno ikharari.” Voocharela, Yesu aalocano: “Hawe nave weereno emohamoha.”
38 Erikimweeca hiihale mphironi, Yesu aavolowa muceche mmoha. Weiwo muthiyana mmoha nsina nawe Marta, aamwaakhela ntoko muleco vaate vawe.
39 Yoola, aakhalano tho murokora awe awiichaniwa Mariya, yoowo aakiranthe va manaani a Apwiya, awiriyanaka yeeyo awo yaalocaaya.*
40 Nto Marta aari ooweiwa, apharaka miteko mincipale. Mwawiihiiha, aamwaacamela Yesu alocano ariki: “Pwiya, hamunoona wi murokoraka ola ookihiyerya miteko meekhaaka? Nkamuleeleeni wi arwe akikhaviheryeke.”
41 Apwiya yaamwaakhula eriki: “Marta, Marta, weyo ori ooteteiwa ni awuukhuwa ni ichu sincipale.
42 Nto ichu vakhaani ti soochuneya naari emoharu pahi. Nyenya Mariya oothanla makupa aphaama,* nave herwa eviihiwavo wa yoola.”
Inoota
^ 70
^ Naari: “muhimaliheke elukuluku mukohaka muxelo.”
^ Ela tiwi, Nihiku na Othoriha.
^ Naari: “o Hati,” ela tiwi, nipuro achu oothene anavithiwaayawo. Moone Masu Atharihiwe.
^ 70
^ Naari: “awenye.”
^ Moone Masu Atharihiwe.
^ Mu Ekriki, “masu aya.”
^ Naari: “nipatuxo naphaama.”
