Luka 1:1-80
-
Masu wa Teyofilu (1-4)
-
Oyariwa wa Yohani Mpatisi onnalociwa mwa miririmu ni Kapriyele (5-25)
-
Oyariwa wa Yesu onnalociwa mwa miririmu ni Kapriyele (5-25)
-
Mariya onnamuxekurya Elisapeti (26-38)
-
Mariya onnamucicimiha Yehova (46-56)
-
Oyariwa ni ochuwiwa wa Yohani (57-66)
-
Sakariya onnaloca mwa miririmu (67-80)
1 Ancipale ahiilipixerya otholathola ni orepela ichu soothene seeren’ye, seiho hiyaano tho nneemereryaahu,*
2 hiiha ntoko naaleeliwaahu ni yaale ovinyerya woopaceryani yeerenle onamoona wa ichu seiha, vamoha ni yaale yaalalenrye michaka.
3 Hiihaa tho, kimanle otholathola ichu soothene mwawaakhwanela ovinyerya woopaceryani, kaalakelela woorepelaani mmukhalelo wooreheryeya, nyuwo atokweene oocicimiheya Teyofilu.
4 Koheerano yeela wi muroromele wi ichu soothene mwaahusihiwaanyu moorweela wa wiiwa, ti seeparipari.
5 Mmahiku a Heroti,* mwene o Yuteya, aakhalavo mulipa a mukucho awiichaniwa Sakariya, yoowo aari a nikhuuru na Apiya. Mwaariye aari a nihimo na Aroni, nsina nawe eeriwa Elisapeti.
6 Oopiili yaari eekhaikhai vamiithoni va Muluku, nave yaaneeca mwawookololowa mwawiiwanana ni malamulo ni malakiheryo oothene a Yehova.
7 Nyenya hiyaarino anamwane, nthowa nawi Elisapeti haayara, nave oopiili yaahuuluvala.
8 Sakariya aarumeela ntoko mulipa a mukucho vamiithoni va Muluku, ntoko nikhuuru nawe naakaweliwaaya,
9 nave mwawiiwanana ni meerelo* yaatikitheryiwe a onamukucho, yaaphiya elukuluku awe wi avolowe mu nipuro naweela na Yehova wi aveleele soovaha sawunkhela.
10 Nave muloko woothene wa achu waari vaate ovekelaka, mu elukuluku ya ovaha sawunkhela.
11 Aahooneya wa yoowo munkeelo a Yehova eemenle omoono woolopwana wa altare.
12 Nyenya vaavaa Sakariya aamoonneiye, aatuthuwa, nave aasareya woova.
13 Nto, munkeelo aahi wa yoowo: “Ohoove Sakariya, woona wi Muluku ohiiwa mavekelo aa; mwaaraa Elisapeti, onamooyarela mwaana, nave onarwa omuchuwa nsina nawi Yohani.
14 Weyo onarwa ochapa ni ohakalala otokweene, nave ancipale enarwa ehakalala ni oyariwa wawe,
15 woona wi onamukhala mutokweene vamiithoni va Yehova. Owo hanaphwanela owurya eviinyu, naari yoowurya ekina yoohapaliha, onarwa asareya munepa waweela naamwi ahaakumve oyariwa,*
16 nave onarwa aakhaviherya anamwane ancipale a Isarayeli omukookela Yehova Muluku aya.
17 Nave tho, onarwa aya ohoolo wa Muluku, ni munepa ni ikuru ntoko sa Eliya, eerihaka wi mirima sa asitiithi ikhale ntoko sa anamwane, ni oweeriha oohiiwelela ochariha miruku sa awookololowa, wi aarehererye achu omulapa Yehova.”
18 Sakariya aaloca wa munkeelo: “Kini kiroromele hai yeeyo? Miyaano kohuuluvala, nave miyakha sa amwaaraka sohaaca.”
19 Munkeelo aamwaakhula ii: “Miyaano ka Kapriyele, kinakhala vamiithoni va Muluku, nave kirummwale oloca ni weyaano ni wooleela michaka iha saphaama.
20 Vano, onarwa omaala nave hokawerya oloca ophiyerya nihiku nenlo ineeraaya saakhwanele ichu seiha, woona wi hororomenle masu aka, yaawo anahaala waakhwanela mu elukuluku aya.”
21 Yeereyaka yeela, achu yaatitelela onweherya Sakariya nave yaatikhiniheya nthowa na olekela wawe o nipuro naweela.
22 Aakhummeiye, owo haawenrye oloca ni yaawo, mwawiihiiha awo yaasuwela wi aahoona samalavi* o nipuro naweela. Ovinyerya vaavale owo haawerya oloca, nto aapharihela ineneeryo.
23 Yaamanlaaya mahiku a muteko awe, owo aarowa.
24 Evinrevo elukuluku, Elisapeti mwaara a Sakariya aarupala, nave aaniisiipithiha ophiyerya miyeeri mithanu, ariki:
25 “Ti hiiha Yehova okeerenleiye mmahiku yaala. Owo ookuupuwela wi amalihe wuuliwa waka muru vamiithoni vaachu.”
26 Elisapeti aakhwanihaka mweeri wa neethanu nammoha, munkeelo Kapriyele aarummwa ti Muluku wi aye epooma yo Kalileya, yawiichaniwa Nasareti,
27 wa mwali aakameliwe* ni mulopwana awiichaniwa Yosefe a emusi ya Tavite, nave mwali owo iichaniwa Mariya.
28 Munkeelo aavolonweiye, aamulocela ariki: “Mooni, weyo waakhenle mahala a Muluku, Yehova ori ni weyo.”
29 Nyenya Mariya aatuthuwa ni masu a munkeelo nave aaneererya wiiwexexa yootaphulela ya oloceliwa iwo.
30 Mwawiihiiha, munkeelo aahi wa yoowo: “Ohoove Mariya, woona wi wohaakhela mahala a Muluku.
31 Onahaala orupala* ni omuyara mwaana amwaamulopwana, nave onarwa omuchuwa nsina nawi Yesu.
32 Yoowo onarwa akhala mutokweene, nave onamwiichaniwaka Mwaana a Muluku Aikuru Soothene; Yehova Muluku onarwa amvaha munyukhu wa Tavite, atiithi awe,
33 onarwa alamulela ntoko Mwene a veechokoni ya Yakopo okhala wookhala, nave Omwene awe horwa omala.”
34 Nyenya Mariya aahi wa munkeelo: “Eyo eni yeereye hai, woona wi nkintonko okumanela ni mulopwana?”
35 Munkeelo aamwaakhula ii: “Munepa waweela onarwa wookhuruwela, nave owerya wa Muluku Aikuru Soothene onarwa woohuruwela. Mwawiihiiha, yoowo onahaala oyariwa oni iichaniweke aweela, Mwaana a Muluku.
36 Mmusi aa Elisapeti, yoole eeriwa oohiyara, naamwi uuluvanle, oomurupala mwaana amwaamulopwana nave ola mweeri waneethanu nammoha;
37 woona wi haavo masu a Muluku eni ehaakhwanele.”*
38 Nave Mariya aahi: “Miyo ka kapuro a Yehova! Yeereye wa miyo ntoko muloncaanyu.” Voocharela, munkeelo aapwahavo.
39 Mmahiku yaale, Mariya aacimula mwawaakuveya ayaaka elapo ya miyaako, epooma yo Yuteya,
40 aaphiya vaate va Sakariya nave amulocela* Elisapeti.
41 Vaavaa Elisapeti iiwaleiye olocela wa Mariya, mwaana aari mmirimani mwawe aacupha, nave Elisapeti aasareya munepa waweela
42 analoca moovuwa ariki: “Ooreelihiwa ti weyo mwa athiyana oothene, nave yooreelihiwa yawiima ya erukulu aa!
43 Miyaano kaani wi keeceleliwe ni maayi a Apwiya aka?
44 Vaavaa kiiwalaaka nsu na olocela waa, mwaana ori mmirimani mwaka oocupha moohakalala.
45 Oohakalala tho muthiyana yoowo eemerenrye, woona wi ichu aaleeliweiye ni Yehova inarwa saakhwanela moomalela.”
46 Mariya aaloca: “Okumi* aka onnamucicimiha Yehova,
47 nave munepa aka onnasareya ohakalala mwa Muluku, Mvuluxa aka,
48 ntakhara wi ohuupuwela ohaawa wa mwali awe. Woona wi, ovinyerya olelo oya muhoolo, maloko oothene enarwa ekeera oohakalala.
49 Vawi Muluku oowerya, ookeerela ichu itokotoko, nave nsina nawe ti naweela,
50 wa yaawo anamoova, owo onanwooniherya ikharari sawe soohimala.
51 Owo oheerano miteko sakuru ni moono awe; ohaamwarya yaawo arino muupuwelo wa wiisunnuwiha mmurimani mwaya.
52 Ohaakuruxa mminyukhuni achu arino olamulelo nave ohaaweliha awiiyeviha;
53 ohaavoniha oovoliwa ni ichu saphaama nave ohaarowiha siiyo ene achu ooreela.
54 Owo oorwa wi amukhaviherye Isarayeli, kapuro awe, uupuwelaka ikharari sawe
55 wa Aparahamu ni wa muyareriwo* awe okhala wookhala, ntoko aaroromelinheiye wa makholo ahu.”
56 Mariya aakhala ni yoowo echu ya miyeeri miraru, nave akookela owannyawe.
57 Yaaphiyerya elukuluku wi Elisapeti ayare, nave aamuyara mwaana amwaamulopwana.
58 Amwaacamani ni ahima awe yiiwalaaya wi Yehova ammorela ikharari itokotoko, yaarwa enachapa ni yoowo.
59 Aakhwaninheiye mahiku mathanu nararu, awo yaaya omuthikila mwaana, nave yaachuna omuchuwa nsina na apapa awe, Sakariya.
60 Nyenya amama awe yaahi: “Hooye! Ola oni aniichaniwa Yohani.”
61 Mwa yeeyo, awo yaahi: “Haavo mwa ahima aa orino nsina nenlo.”
62 Voocharela, awo yaahaakoha apapa awe epharihelaka ineneeryo, vooloca sa nsina eereiye iichaneliweke mwaana.
63 Mwawiihiiha, Sakariya aaveka ethaapwa, arepavo: “Nsina nawe ti Yohani.” Hiihaa, achu oothene yaatikhina.
64 Mu elukuluku ene yeele, eyano awe yaahuleya, nlumi nawe naataphuwa nave apacerya oloca amucicimihaka Muluku.
65 Hiihaa, woova waahaarweela amwaacamani aya oothene, nave mwaha ola waanalociwa makupa oothene o miyaakoni so Yuteya.
66 Oothene yaawo yiiwale, yaanakuha yeela mmurima mwaya, elocaka: “Mwaana ola oni akhale awiihai?” Woona wi ntata na Yehova chiri naari ni yoowo.
67 Sakariya, apapa awe mwaana, yaasareya munepa waweela, nave enaloca mwa miririmu eriki:
68 “Acicimihiwe Yehova, Muluku a Isarayeli, ntakhara oowuupuwelela achu awe ni awoopola.
69 Owo ooniruuhela mvuluxa ooweryaxa* a nihimo na Tavite, kapuro awe,
70 ntoko aalonceiye orweela mwa alipa a miririmu awe aweela ovinyerya khalai,
71 wi anivuluxe wa amwiicani ahu ni mmatatani mwa yaale ananiica;
72 akhwaaniheryaka waamorela wawe ikharari makholo ahu, uupuwelaka tho waataana wawe waweela aapankeiye ni yaawo,
73 olipela yoowo owo aapankeiye wa Aparahamu nikholo nahu,
74 wi aneemererye, nimanle woopoliwa mmatani mwa amwiicani ahu, ophara muteko awe waweela nihoovaka echu
75 moororomeleya ni mwawookololowa, vamiithoni vawe, mahiku oothene.
76 Nto weyo mwanaka, onamweeriwa mulipa a miririmu a Muluku Aikuru Soothene, woona wi onarwa oya ohoolo wa Yehova wi orehererye iphiro sawe,
77 wi waavahe achu awe masuwelelo awi enarwa evuluxiwa moorweela wa oleveleliwa soocheka saya,
78 vanthowa na niphwanya na Muluku ahu. Vanthowa na niphwanya nenlo, nnarwa noona omwaleela onarwa wirimu yoowo onaarya ntoko okhuma wa nsuwa,
79 wi waavahe ekamaama yaale akiraanthe mu epiiphi ni mmuuruxini wa okhwa ni weeciha inaani sahu mu iphiro sa murecele.”
80 Nto mwaana aaninnuwa, nave akhala oolipa omunepani. Owo aatitelela okhala mutakhwani ophiyerya nihiku iisoonihaleiye wa Aisarayeli.
Inoota
^ Naari: “nnaroromelaahu.”
^ Moone Masu Atharihiwe.
^ Naari: “yookhovelela.”
^ Naari: “ari mmirimani mwa amama awe.”
^ Naari: “aakhalano yawoona.”
^ Naari: “uuryiwe.”
^ Naari: “wiikhalela.”
^ Naari: “woona wi hiyaavo enamvila Muluku.”
^ Naari: amuxeleliha.
^ Naari: “Omuchu aka woothene.” Moone Masu Atharihiwe, “Okumi.”
^ Mu Ekriki, “mmiso.”
^ Mu Ekriki, “nnyaka na ovuluxa.” Moone Masu Atharihiwe, “Nnyaka.”
