Estra 7:1-28
7 Imanle ichu seiha, variyari va olamulelo wa Artaxerxe mwene o Persiya, Estra aakookela o Yerusalemu akhumaka o Papulu. Owo aari mwaana a Seraiya, mwaana a Asariya, mwaana a Hilikiya;
2 mwaana a Salumi, mwaana a Satoki, mwaana a Ahitupi;
3 mwaana a Amariya, mwaana a Asariya, mwaana a Merayoti;
4 mwaana a Serahiya, mwaana a Usi, mwaana a Puki;
5 mwaana a Apisuwa, mwaana a Fineya, mwaana a Eliyasare, mwaana a Aroni, muhooleli a alipa a mukucho.
6 Estra yoola aarwenle o Papulu. Owo aari Mulipa oorepa yoowo aarino masuwelelo matokweene* a Nlamulo na Mose, nlamulo nenlo naavahiwe ni Yehova, Muluku a Isarayeli. Mwene aamvaha ichu soothene owo aavenkeiye, woona wi ntata na Yehova, Muluku awe naari ni yoowo.
7 Aisarayeli akina, alipa a mukucho, Alevi, alipa a wiipa, alipeleli a milako, ni anamuteko a empa ya Muluku* yaawela o Yerusalemu mu eyaakha yaneethanu napiili ya mwene Artaxerxe.
8 Nave Estra aaphiya o Yerusalemu mu mweeri waneethanu, mu eyaakha yaneethanu napiili ya mwene.
9 Mu nihiku noopacerya na mweeri woopacerya, owo aacimula o Papulu nave aaphiya o Yerusalemu mu nihiku noopacerya na mweeri waneethanu, woona wi ntata naphaama na Muluku awe naari ni yoowo.
10 Estra aarehererya murima awe* wi ahuserye Nlamulo na Yehova ni opharihela muteko nave ahusihe ikano ni mathoriheryo yaala o Isarayeli.
11 Ela ekaarata yeeyo Mwene Artaxerxe aamunnyaleiye Estra, mulipa a mukucho ni mulipa oorepa aarino mavyakelo a ohuserya* malamulo a Yehova ni ikano sawe wa Isarayeli:
12 * “Miyo Artaxerxe, mwene a mamwene, wa Estra mulipa a mukucho, ni mulipa oorepa Nlamulo na Muluku a wirimu: Murecele okhale ni weyo. Nave vano
13 kootikitherya nlamulo, kilamulelaka nloko noothene na Aisarayeli ophitaanyerya alipa a mukucho aya ni Alevi yaawo anachuna woochara o Yerusalemu, epwaheke.
14 Woona wi onarummwa ni mwene ni anamiruku awe athanu napiili wi watholathole waakhanle wi Nlamulo na Muluku aa nenlo oryaaweno, ninnacharihiwa o Yuta ni o Yerusalemu.
15 Nave tho okuxe eparata ni ooru seiho mwene ni anamiruku awe amvanhaaya moolakelela Muluku a Isarayeli yoowo empa we eri o Yerusalemu.
16 Okuxe tho eparata yoothene ni ooru seiho waakhenlaawe* mu iprovinsiya soothene so Papulu vamoha ni samahala seiho achu ni alipa a mukucho avanhaaya moolakelela ntakhara empa ya Muluku aya, yeeyo eri o Yerusalemu.
17 Ikhorowa seiho othumeno imope, ipucepuche ni asaana a ipucepuche, vamoha ni soovaha sa soolya ni soowurya, nave oveleele seiho va altare mu empa ya Muluku aa o Yerusalemu.
18 “Nave eparata ni ooru yoowo oni ahale, weyo ni asinnaa mmweerele yeeyo munoonaanyu okhala yaphaama, mwawiiwanana ni yookhwela ya Muluku anyu.
19 Nave ikaruma soothene seiho mvahiwaanyu ntakhara muteko wa empa ya Muluku anyu mwaperekhe vamiithoni va Muluku o Yerusalemu.
20 Nave ichu ikina soochuneyaxa oneeraawe ovahereryeke mu empa ya Muluku aa, onaya olivaka ni ikhorowa sa mwene.
21 “Miyaano, mwene Artaxerxe, kinnaalamulela oothene yaale anakhapelela muhakhu a makupa makina a muhice Eufrate* wi yaakhwaniheryeke mwawaakuveya sooveka sa Estra mulipa a mukucho ni mulipa oorepa nlamulo na Muluku a wirimu,
22 ophiyerya italentu* sa eparata nsana, ikooru* nsana sa tiriku, ipaatu* nsana sa eviinyu, ipaatu nsana sa makhurwa ni waaca wa maakha eni enachuneya.*
23 Ichu soothene Muluku a wirimu oneereiye alamulele vooloca sa empa ya Muluku a wirimu seeriwekeno mwamvai, wi esara awe ehinyahuwele olamulelo wa mwene ni anamwane awe.
24 Musuwele tho wi honeemereryiwa oveka musokho, yooveleela naari mano musokho wa vamphironi wa alipa a mukucho, wa Alevi, wa alipa a wiipa, wa alipeleli a vamulako, wa anamuteko a empa ya Muluku* naari anamalapa a empa yeele ya Muluku.
25 “Nave weyaano, Estra, mwawiiwanana ni miruku seiho Muluku aa oovanheiye,* waathanle alipa oolamula ni athoriha wi yaathoriheke achu a makupa makina a muhice Eufrate,* ela tiwi oothene yaale esuwenle malamulo a Muluku aa; nave mwaahusiheke oothene yaawo ahisuwenle yaawo.
26 Nave oothene yoole oni ahiiwelele nlamulo na Muluku aa ni nlamulo na mwene onaphwanela othorihiwa mwawaakuveya ni olakiwa, akhweya moorweela wa wiiphiwa, okerihiwa wookapuroni, olivihiwa naari owaleliwa.”
27 Acicimihiwe Yehova, Muluku a makholo ahu, yoowo eerinhe murima wa mwene ochuna oreeriha empa ya Yehova o Yerusalemu!
28 Owo ookooniherya osivela woororomeleya vamiithoni va mwene ni anamiruku awe ni va asitokweene oothene oowerya a mwene. Mwawiihiiha kaari oolipa murima,* woona wi ntata na Yehova Muluku aka naari ni miyo, nave kaahaathukumanya ahooleli a* Isarayeli wi nipwahe vamoha.
Inoota
^ Naari: “owo aari mulipa oorepa a mavyakelo.”
^ Naari: “Anetineu.” Mu Ehepiri, “Yaawo yaavahiwe.”
^ Naari: “aalakelela mmurimani mwawe.”
^ Naari: “aarino masuwelelo a vasulu.”
^ Estra 7:12-26 aarempwe mu aramaiku.
^ Mu Ehepiri, “ophwannyaawe.”
^ Naari: “ekhopela ekina ya muhice.”
^ Etalentu emoha enaakhwana ikiilo 34.2 Mmoone apentisi 2.14.
^ Naari: “mwiinyu oni onachuneya.”
^ Epaatu emoha enaakhwana iliituru 22. Mmoone apentisi 2.14.
^ Ekooru emoha enaakhwana iliituru 220. Mmoone apentisi 2.14.
^ Naari: “Anatineu.” Mu Ehepiri, “Yaawo evahiwe.”
^ Mu Ehepiri, “mwawiiwanana ni miruku sa Muluku aa, seiho iri mmatani mwaa.”
^ Naari: “ekhopela ekina ya muhice.”
^ Naari: “kaahilipiheya.”
^ Mu Ehepiri, “miru sa ichoko sa.”
