Aroma 15:1-33
15 Nto hiyo nri akuru,* nnaphwanela ovilelakano sooceecheya sa yaale ahiri akuru,* nave ohiya wiihakalaliha hiyo aneene.
2 Mmoha ti mmoha a hiyo amuhakalaliheke mwaacamani awe nave amweereleke yeeyo eri yaphaama wi amulipihe.
3 Tiwi, naari Kristu hiihakalalinhe meekheiye, nyenya, hiihaa ntoko erempwaaya: “Oruwana wa yaale anooruwana wookimorela miyo.”
4 Ichu soothene sirempwe khalai, saarempwale wi inihusihe, wi moorweela wa ovilela wahu nave moorweela wa nihakararyo na mu Soorempwa, nikhaleno ewehereryo.
5 Muluku yoowo onavaha ovilela ni nihakararyo oovaheeni nyuwo muupuwelo mmohamoha yoowo Kristu Yesu aareiyeno,
6 wi mwawiiwanana ni nsu nimoha,* mmucicimihe Muluku ni Tiithi a Apwiya ahu Yesu Kristu.
7 Mwawiihiiha, mwaakhelaneke* mukina ni mukhwaawe, hiihaa ntoko Kristu tho owaakhenleiyeni, wi Muluku acicimihiwe.
8 Kinnooleelaani wi Kristu aahikhala kapuro a yaale oothikiliwa, wi ooniherye ororomeleya wa Muluku ni ocicimiherya soolaiherya owo aapankeiye wa makholo aya.
9 Nave wi maloko emucicimihe Muluku ntakhara ikharari sawe. Hiihaa ntoko erempwaaya: “Wanthowa nenla kinarwa koocicimihaani veeri va maloko nave wa nsina nanyu kinarwa kiipa macipo a woocicimihaani.”
10 Nave tho owo onnaloca: “Nyuwo maloko, muhakalaleke ni achu awe.”
11 Nave tho: “Maloko oothene, emucicimihe Yehova, nave achu oothene emucicimihe yoowo.”
12 Yesaya tho onnaloca: “Onarwa okhalavo mutathari wa Yese, yoowo oni arwe alamulele maloko; mwa yoowo maloko enarwa etikitherya ewehereryo aya.”
13 Muluku yoowo onavaha ewehereryo oosareiheeni ni ohakalala woothene ni murecele moorweela wa omuroromela wanyu, wi mukhaleno mwawaaca ewehereryo anyu moorweela wa owerya wa munepa waweela.
14 Asinnaka, miyo kinnaroromela ni murima woothene wi nyuwo tho moosareyano ichu saphaama, moosareyano masuwelelo oothene, nave wi munanwerya olopolana* mukina ni mukhwaawe.
15 Nyenya, kihoorepelaani mookwakwaleya miyaha seiha mikina wi kiwuupuseryeeni; kineerano yeela wanthowa na mahala matokweene kivahiwaaka ni Muluku
16 wi kikhale kapuro a Kristu Yesu wa maloko. Kiri ooweiwa mmuteko waweela wa omwaramwaxa michaka saphaama sa Muluku, wi maloko yaala ekhale yoovaha yaweemereryeya, yaweeliheya ni munepa waweela.
17 Mwawiihiiha, kookhalano mathowa a wiirumiha mwa Kristu Yesu mu ophara muteko wa Muluku.
18 Woona wi nkaahaala weererya oloca echu ekina voohikhala yeeyo Kristu enreiye moorweela wa miyo wi maloko ekhale awiiwelela. Owo oheerano moorweela wa masu aka ni miteko,
19 moorweela wa ineneeryo ni sootikhiniha, ni owerya wa munepa wa Muluku; hiihaa, ovinyerya o Yerusalemu ophiyerya makupa oothene a elapo yo Iliriku, koolaleerya mwawaakhwanela michaka saphaama vooloca sa Kristu.
20 Mmukhalelo yoola, kohiilipixerya ohilaleerya michaka saphaama mmapuro yaawo nsina na Kristu nsuweliwaayawo, wi kihiteke vasulu va mathipelo a muchu mukina;
21 nyenya hiihaa ntoko erempwaaya: “Yaale ahintonko oleeliwa sa yoowo enarwa emoona, nave yaale ahintonko wiiwa enarwa yiiwexexa.”
22 Ti nthowa na yeela ikwaha sincipale kaahihiwaaka wooxekuryaani.
23 Nto vano nkaano ekulucu evyaani mmakupa yaala a wenno, nave mu iyaakha sincipale kinnanlela orwa wooxekuryaani.
24 Mwawiihiiha, vaavaa kinayaaka o Espanya, kinnaweherya owoonaani ni ohooliwa vakhaani ni nyuwo, kimanle opuha onthamwene mu elukuluku vakhaani ni nyuwo.
25 Nto vano, kinacimula kiyaaka o Yerusalemu wi kaakhaviherye* aweela murima.
26 Tiwi, anna o Maketoniya ni o Akaya moohakalala aapaka yooveleela wa oohaawa variyari va aweela murima o Yerusalemu.
27 Mweeparipari, awo yenreno yeela moohakalala, woona wi yaakhalano mankaawu ni yaawo; vawi anna a o Yerusalemu yaahuuka ichu saya soomunepani ni achu a maloko, mwawiihiiha, achu a maloko annaphwanela tho wuukano ichu saya soomwiilini ni yaawo.
28 Mwawiihiiha, kimalinhe yeela ni operekha yoovaha ela* wa yaawo, kinamucimula kiyaaka o Espanya nave kinamooxekuryaani mphironi.
29 Ohiya yeeyo, koosuwela wi karwa wooxekuryaani, kinahaala ophiya ni mareeliho mancipale oorweela wa Kristu.
30 Vano anna, kinnooceenyeryaani mwa Apwiya ahu Yesu Kristu ni mwa osivela wa munepa, wi vamoha ni miyo mwiilipixerye okivekelela wa Muluku,
31 wi koopoliwe mmatani mwa Ayuta yaawo yahaamweemerenrye Yesu, nave wi yoovaha ela kinakerihaaka wa aweela murima o Yerusalemu yaakheliwe phaama weiwo.
32 Mwawiihiiha, Muluku eemererya, kinamurwa kooxekuryeeni moohakalala wi kiichuuwihiwe ni nyuwo.
33 Muluku onavaha murecele akhale ni nyuwo oothene. Aamen.
Inoota
^ Naari: “oolipa.”
^ Naari: “oolipa.”
^ Mu Ekriki, “eyano emoha.”
^ Naari: “mweemereryaneke.”
^ Naari: “ohusihana.”
^ Naari: “kaarumeele.”
^ Mu Ekriki, “yawiima ela.”
