Aroma 11:1-36
11 Vano kinnakoha: Apwanne Muluku ookhooca nloko nawe? Chiryene hooye! Woona wi miyo tho ka Muisarayeli, a muyareriwo* wa Aparahamu, a nihimo na Penxami.
2 Muluku haakhoonce nloko nawe, nenlo aasuwenleiye wuupaceryani. Apwanne hamunasuwela yoorepa enaloca sa Eliya, vaavaa aasommeiye wa Muluku wa nthowa na Aisarayeli?
3 “Yehova, awo aawiipha alipa a miririmu anyu, ahaapwexa aaltare anyu, nave kihanle meekhaaka, nave vano, anneererya okiipha.”
4 Nto Muluku aamwaakhunle hai? “Nlelo kookhalano alopwana macikhwi mathanu nameeli* yaawo ahimukokhorenle muluku Pala.”
5 Moolikana, mu elukuluku yeela tho, aakhalavo oohalela, oothanliwa moorweela wa mahala matokweene.
6 Vano, waakhanle wi ori moorweela wa mahala matokweene, othanliwa iwo hori tho mwa miteko; yaari hiihaa, mahala matokweene hiyi tho ekhale mahala matokweene.
7 Vano nni nloceni? Yeeyo Isarayeli aavyeiye vancipale, haphwannye, nto oothanliwa taphwannye. Akina yaahuumiha murima,
8 hiihaa ntoko erempwaaya: “Muluku ohaavaha ikhove sawiixeela,* miitho ahinoona ni maru ahiniiwa ophiyerya olelo vaava.”
9 Tavite tho aaloca: “Meesa aya ekhale muraakho, mulapa, nluku nookwaculiha ni yoolaka wa yaawo.
10 Miitho aya eriipihiwe wi ehiweryeke woona, nave mutitelele waakhoromanyiha muthana aya.”
11 Vano kinnakoha: Apwanne awo akwaculiwe nave yuuwa khuluwi? Chiryene hooye! Nto, wanthowa na ohiiwelela waya nlamulo, achu a maloko makina taphwannyaaya ovuluxa, nave ela yaaweeriha Ayuta winla ehace.
12 Vano, waakhanle wi ohiiwelela waya nlamulo, wooruuha oreela wa elapo, nave ovukuwa waya otaphulelaka oreela wa achu a maloko, mareeliho enarwa yaaca, vaavaa waaca waya oneeraaya waakhwane!
13 Vano kinaloca ni nyuwo muri achu a maloko. Woona wi ka murummwa a maloko, kinnacicimiha* muteko aka
14 wi koone waakhanle wi mwa makhalelo yaala kiwerye waatannyerya ehace achu aka* nave kaavuluxe akina a yaawo.
15 Waakhanle wi okhoociwa waya onataphulela waataanyihiwa wa elapo, apwanne weemereryiwa waya hotaphulela okumi woorweela mookhwani?
16 Opwaha yeeyo, wakhala wi nikupa noopacerya na epaau nnaveleeliwa ntoko mulepulo* ti naweela, epaau yoothene ti yaweela tho; nave waakhanle wi mutathari ti waweela, mirai saya tho ti saweela.
17 Nyenya, waakhanle wi mirai mikina sookwasiwa, nave weyo, naamwi ori murai wa mwiri wa asitona wootakhwani, woomiriheliwa veeri va mirai sikina nave onnuukano mareeliho a mutathari wa mwiri wa asitona.
18 Hiihaa, ohikhalihe mirai mwawiirumiha.* Wakhala wi wookhaliha mwawiirumiha,* wuupuwele wi tahi weyo onapharela mutathari, nto mutathari tonoopharela.
19 Voocharela onarwa oloca oriki: “Mirai sikina sookwasiwa wi miyo kimiriheliwe.”
20 Ela eparipari! Sookwasiwa woona wi hisaarino nroromelo, nto weyo ori aweemela wa nthowa na nroromelo. Ohiirumiheke, nyenya okhaleno woova.
21 Tiwi, waakhanle wi Muluku hahin’ye mirai soophacuwano, harwa tho oohiya.
22 Mwawiihiiha, vareryani phaama mahala ni wuuma murima wa Muluku. Wookhala wuuma murima wa yaale uuwale, nto wa weyo aakhalavo mahala a Muluku, watitelelaru okhala mu mahala awe; moohiyana, weyo tho onarwa okwasiwa.
23 Nave yaawo tho, wakhala wi hatitelenle okhala achu oohikhalano nroromelo, enarwa emiriheliwa, woona wi Muluku onnawerya waakookiherya va mwiri vaya.
24 Tiwi, wakhala wi okwasiwe va mwiri wa asitona woophacuwano, nave omiriheliwa va mwiri wa asitona yoowo waaliwe ori woohiyana ni mwiri woophacuwano, hankanto mirai soophacuwano, chiri onamukhala wookhweya omiriheliwa va mwiri aya wa asitona woophacuwano!
25 Anna, nkinachuna wi muhisuwele yoovitheya yeela yaweela, wi muhiiseere amiruku: Makupa makina a Aisarayeli yaahuumiha murima ophiyerya evolonwe waakhwana wa achu a maloko,
26 nave mmukhalelo yoola Aisarayeli oothene enarwa evuluxiwa. Hiihaa ntoko erempwaaya: “Onamurwa moopoli* o Siyoni nave onamviihavo wa Yakopo saweera soonanara.
27 Nave ola waataana kineeraaka kipake ni yaawo, vaavaa kineeraaka kiviihevo soocheka saya.”
28 Eparipari ti yawi, vooloca sa michaka saphaama, awo amwiicani nave ela ti yamphurelo wa nyuwo; nto awo athanliwe ni Muluku, nave owo onnaasivela yaawo wa nthowa na makholo aya.
29 Woona wi soovaha ni wiichana wa Muluku, ichu seiho owo ohinakhaleiyeno ekeerelani.
30 Tiwi, hiihaa ntoko khalai mwahaamwiwelelaanyu Muluku, vano moomoreliwa ikharari wanthowa na ohiiwelela waya.
31 Mwawiihiiha, awo annakhala oohiiwelela yeerihaka wi munamoreliwa ikharari, wi awo tho, vano ekhalihiwe mwa ikharari.
32 Vawi Muluku ooweera oothene awo alipa oophariwa mu ohiiwelela, wi aakhalihe oothene awo mwa ikharari.
33 Chiri muhakhu, miruku ni osuwela wa Muluku ti sawiixeela! Othoriha wawe ti wootikhiniha, nave hannawerya wiiwexexa iphiro sawe soothene!
34 Tiwi “taani osuwenle muupuwelo wa Yehova, naari taani okhanle namiruku awe?”
35 Naari “taani aapacenrye omvaha echu Muluku, wi Muluku amukookiherye yoowo?”
36 Tiwi ichu soothene inarweela wa yoowo, sineereya mwa yoowo nave mwa yoowo. Owo onnaphwanela ocicimihiwa okhala wookhala. Aamen.
Inoota
^ Mu Ekriki, “mmiso.”
^ 7.000
^ Naari: “itokotoko; sincipale.”
^ Naari: “kinnavuwiha.”
^ Mu Ekriki, “mwiili aka.”
^ Naari: “yawiima yoopacerya.”
^ Naari: “ohikhaleke awiirumiha variyari va mirai.”
^ Naari: “Wakhala wi wohiirumiha variyari vaya.”
^ Naari: “mvuluxa.”
