Akalatiya 5:1-26
5 Wa otaphuliwa yoola Kristu tontaphunle. Mwawiihiiha, mukhale ootikitheryeya nave muhikookele mu nipisi na okapuro.
2 Mukiwiriyane! Miyo Paulo, kinooleelaani wi wakhala wi moothikiliwa, Kristu hakhala a mphurelo wa nyuwo.
3 Kinnaloca tho wanawiili wa achu oothene anathikiliwa, wi awo annaphwanela ochariha Malamulo oothene.
4 Nyeenyu muneererya weeriwa okhala eekhaikhai moorweela wa nlamulo, moomwalana ni Kristu; moovinyamo* mu mahala awe matokweene.
5 Wa hiyo, moorweela wa munepa ninnawehererya moochunaxa weeriwa awookololowa onarwa mwa nroromelo.
6 Tiwi, mwawiiwanana ni Kristu Yesu, naari othikiliwa naari ohithikiliwa hiwaano mphurelo, nyenya ti nroromelo nnalapa moorweela wa osivela.
7 Nyuwo mwaanachimaka phaama. Vano taani oohiihaleeni otitelela wiiwelela eparipari?
8 Olekecha wa mukhalelo yoola honarwa wa yoowo owiichanneeni.
9 Yooruruvaliha* vakhaani ennaruruvaliha ephepa yoothene yaweetheiwa.
10 Kinnaroromela wi nyuwaano muri mwawiiwanana ni Apwiya, hamuni muupuwele mmukhalelo mukina; nto yoole onawuukhulaani, moohipwacha muchu ene, onarwa aakhela othoriha onamphwanela.
11 Wa miyaano, anna, waakhanle wi nlelo kinalaleerya othikiliwa, ntakhara heeni nlelo kiniikariwaaka? Yaari hiihaa, nluku nookwaculiha na mwiri woohooxiwavo* nooviihiwavo.
12 Kaanachuna wi alopwana yaawo anawuukhulaani yiikwanse* khuluwi aneene meekhaaya.
13 Anna, mohiichaneliwa otaphuwa; pahiru muhipharihele otaphuwa yoola ntoko ekari ya waavya soochuna sa mwiili; moohiyana, moorweela wa osivela, mulapeke ntoko akapuro wa mukina ni mukhwaawe.
14 Tiwi Malamulo oothene anaakhwaniheryiwa* mu nlamulo nla: “Omusiveleke mwaacamani aa ntoko oniisivelaawe weyo mwaneene.”
15 Wakhala wi nyuwaano, munnatitelela olumana ni okhuurana mukina ni mukhwaawe, mwiikasoopeke wi muhitoloxane mukina ni mukhwaawe.
16 Nto miyo kinnooleelaani: Mutitelele weeca mwa munepa, nave hamuni mwaakhwaniherye soochuna soothene sa mwiili.
17 Woona wi mwiili onnawana ni munepa ni soochuna saya, nave munepa onnawana ni mwiili; seiha sinnavaanyihana mukina ni mukhwaawe, ophiyerya wi muhineera ichu seiho munachunaanyu weera.
18 Ohiya yeeyo, wakhala wi munahooleliwa ni munepa, hamunahooleliwa ni nlamulo.
19 Miteko sa mwiili sinnooneya phaameene, nave tiiha: Ocapaheya,* otakhala, meecelo awuuliha muru,*
20 olapela soophwaniherya, wiisaaciherya,* wiicana, owana, ehace, waaca esara, ohiiwanana, okawanyeya, omwaryeya,
21 nrima, ohapaliwa, ifesta sootakhala* ni ichu ikina ntoko seiha. Miyo kinnoolopolaani vooloca sa ichu seiha, ntoko kooloponlaakaani khalai: Yaawo aneerano ichu seiha herwa yaakhela Omwene wa Muluku.
22 Nto yawiima ya munepa ti ela: Osivela, ohakalala, murecele, opixa murima, oreera murima, osareya saphaama, nroromelo,
23 wiichacala, wiihiiha. Hinaavo nlamulo nnahiiha ichu seiha.
24 Opwaha yeeyo, yaale ari a Kristu Yesu aakhomela va mwiri mwiili vamoha ni minkhela ni soochuna saya.
25 Wakhala wi nnakhala mwa munepa, hankooni ntitelele tho weeca mwawiiwanana ni munepa.
26 Nihikhale awiikusererya, ootannya owanawana mukina ni mukhwaawe, nave nihikhalelaneke nrima mukina ni mukhwaawe.
Inoota
^ Naari: “moomoramo.”
^ Naari: “livirina.”
^ Moone Masu Atharihiwe.
^ Naari: “yiihunle,” nave hiihaa ehikhale oophwanelela waakhwaniherya nlamulo nenlo yaakihaaya.
^ Naari akhweya: “anuuraanyiwa.”
^ Mu Ekriki, porneiya. Moone Masu Atharihiwe.
^ Mu Ekriki, aselxeiya. Moone Masu Atharihiwe.
^ Naari: “okhwiri; onamulosiwe; waavya ehako.”
^ Ifesta seiho muchu onamooneiye weera yeeyo onachuneiye.
