Aefesu 4:1-32
4 Mwawiihiiha, miyaano, mulipa oophariwa mwa Apwiya, kinnoovekaani wi mweeceke moophwanelela mwawiiwanana ni wiichana yoowo mwiichaneliwaanyu,
2 ni wiiyeviha woothene,* ni wiichacala, ni opisa murima, mvilelanaka mukina ni mukhwaawe moosivela,
3 mwiilipiseryaka vancipale wi mukhapelele omoha wa munepa mu olucelelana wa murecele.
4 Orivo mwiili mmoha, ni munepa mmoha, hiiha ntoko mwiichaneliwaanyu ewehereryo emoha wa wiichaniwa wanyu;
5 orivo Pwiya mmoha, nroromelo nimoha, opatiso omoha;
6 Muluku mmoha ni Tiithi a oothene, yoowo orino owerya wa oothene, onalapa moorweela wa oothene ni mwa oothene.
7 Mmoha ti mmoha a hiyo ohaakhela mahala matokweene mwawiiwanana ni mphimo Kristu ovanheiye yamahala.
8 Woona wi Soorempwa sinnaloca: “Vaavaa owo aawenleiye osulu aahaakusa alipa oophariwa; aavaha alopwana ntoko samahala.”
9 Vano masu awi “owo aawenleiye” anataphulela eheeni? Awo anataphulela wi owo tho aakhuruwela mapuro awiisa ela tiwi, veelaponi yavathi.
10 Yoowo ene aakhurunwe ti yoowo tho owenle osuluwenexa opwaha irimu soothene, wi aakhwaniherye ichu soothene.
11 Nave owo ohaavaha akina ntoko arummwa, akina ntoko alipa a miririmu, akina ntoko alaleeryi,* akina ntoko akukhula ni ahusiha,
12 ni yoolakelela ya waarehererya* aweela murima, ntakhara muteko woorumeela, ni otikitheryiwa wa mwiili wa Kristu,
13 ophiyerya oothene ahu naakhwanihenrye omoha* wa nroromelo ni wa masuwelelo awaakhwanela a Mwaana a Muluku, wi nikhale muchu awiichwelavo,* niphwanyaka mphimo wa mannuwelo awaakhwanela a Kristu.
14 Mwawiihiiha hannaphwanela tho okhala makwiya, nikakhiwaka ntoko ni macumuxa nave nikusiwaka ti echeku ya mahusiheryo oothene nikerihiwaka wu ni wu, moorweela wa ovyaka wa achu ni ohuweliha wa mawokano aya.
15 Nto, nnaphwanela olocaka eparipari ni wooniherya osivela, wi niwerye okhala awiichwelavo mmikhalelo soothene wi neeceke mwawiiwanana ni Kristu, ori muru.
16 Mwa yoowo, mwiili woothene ori woocopaanyeriwa vamoha mwawiiwanana ni woolucelelana mmasikhani ovahaka yeeyo enachuneya. Vaavaa makupa a mwiili analapaaya moophwanelela, eyo enneeriha wi mwiili wunnuwe ni otikitheryeya meekhaaya mu osivela.
17 Mwawiihiiha ti yeela kinalocaaka ni weerela onamoona mwa Apwiya, wi hamunaphwanela weecaka hiiha ntoko achu a maloko aneecaaya, echarihaka muupuwelo aya woohiphuriha echu.*
18 Muupuwelo aya ori mweepiiphini nave aarakamelana ni okumi onarwa wa Muluku, wa nthowa na ohisuwela ori mwa yaawo, ni oturuwa wa murima aya.
19 Eyeleenle makhalelo oothene aphaama, awo ahiiveleela aneene wa meecelo awuuliha muru* wi yeerekeno sootakhala sa mukhalelo woothene mwa nrima.
20 Nto nyuwo moohuserya wi Kristu hari mmukhalelo yoola,
21 yooniheryaka wi nyuwo mohiiwa nave moohusihiwa mwawiiwanana ni eparipari Yesu ohusinheiye.
22 Nyuwo moohusihiwa wi munaphwanela orula omuchu wa khalai yoowo ori mwawiiwanana ni meecelo anyu akhalai, nave yoowo onapahuwa mwawiiwanana ni soochuna soowoka.
23 Nave nyuwo munaphwanela otitelela orehererya mukhalelo anyu wa wuupuwela,*
24 nave munaphwanela owara omuchu ovyaani yoowo opatuxiwe mwawiiwanana ni yookhwela ya Muluku, mu wookololowa weeparipari ni woororomeleya.
25 Mwawiihiiha, woona wi moohiya wootha muloceke eparipari mukina ni mukhwaawe, woona wi mmoha ti mmoha nri makupa a mwiili mmoha.
26 Munanariweke, nto muhicheke; muhihiye wi nsuwa nneele nlelo muri oonyeenyeyeene;
27 Muhimvahe nipuro* Musaserya.
28 Yoole oniiya, ahiiye tho; moohiyana, alapeke moowetha, apharaka muteko waphaama ni matata awe, wi akhaleno echu ya okawana ni yoole onathoiwa.
29 Mwaano mwanyu ehikhumekemo masu oopwaalu, nyenya pahiru yaawo ari aphaama wi etikitherye ntoko enakhweleyaaya nave wi ekhale a mphurelo wa yaale anawiriyana.
30 Nave tho muhithananihe* munepa waweela wa Muluku, yoowo nyuwo mweeyeriwaanyuno eneneeryo ntakhara nihiku na otaphuliwa moorweela wa woopola.
31 Muhiye mukhalelo woothene wa okuha mathowa, esara, onanariwa, waakhulana, masu oophuca, ni mukhalelo woothene wootakhala.
32 Nyenya mukhaleke ooreera murima mukina ni mukhwaawe, oomorelana ikharari, oolevelelana mukina ni mukhwaawe ni murima woothene, hiiha ntoko Muluku oolevelenleiyeeni tho ni murima woothene moorweela wa Kristu.
Inoota
^ Naari: “wiiyeviha woothene wa mmuupuweloni.”
^ Naari: “anamalaleya a michaka saphaama.”
^ Naari: “waavyakiha.”
^ Naari: “wiiwanana.”
^ Naari: “awinnuwa mwawaakhwanela.”
^ Naari: “wasiiyo; watheru.”
^ Mu Ekriki, aselxeiya. Moone Masu Atharihiwe.
^ Naari: “ikuru inaphara muteko mmuupuwelo anyu.” Mu Ekriki, “munepa wa muupuwelo anyu.”
^ Naari: “nlaka.”
^ Naari: “muhiinihe murima.”
