Aefesu 2:1-22
2 Opwaha yeeyo, Muluku ohoovahaani okumi, naamwi mwaari ookhweene wa nthowa na soohesa sanyu ni soocheka,
2 elukuluku yeeyo mweecaanyu mwawiiwanana ni mukhalelo wa ichu wa* elapo yeela, muhooleliwaka ni mulamuleli a owerya wa echeku, munepa yoowo vano onalapa mwa anamwane oohiiwelela.
3 Aa, mwa yaawo oothene ahu khalai neeca mwawiiwanana ni soochuna sa mwiili ahu, naakhwaniheryaka yookhwela ya mwiili ni muupuwelo ahu, nave naari anamwane a esara oyariwa wooyariwa, hiiha ntoko akina aryaaya.
4 Nto Muluku tawaaca ikharari nave wa nthowa na osivela wawe otokweene owo onisivenleiye,
5 owo oonivaha okumi vamoha ni Kristu, naamwi naari ookhweene wa nthowa na soohesa sahu nave moorweela wa mahala matokweene nyuwo moovulusiwa.
6 Ohiya yeeyoru, Muluku ooniviiha vamoha ni yoowo nave anikiraathiha vamoha ni yoowo wiirimurimu mwawiiwanana ni Kristu Yesu,
7 wi mmukhalelo wa ichu onoorwa* owo ooniherye waaca woopwahaxa wa mahala awe matokweene mu oreera wawe murima wa hiyo mwawiiwanana ni Kristu Yesu.
8 Moorweela wa mahala yaala matokweene nyuwo moovulusiwa moorweela wa nroromelo, nave ela henarweela wa nyuwo; moohiyana, ela eri yamahala ya Muluku.
9 Hooye, eyo henarweela wa miteko, wi ahikhalevo oni akhaleno mathowa a wiirumiha.
10 Hiyo nri miteko sa matata a Muluku* nave nipatusiwe mwawiiwanana ni Kristu Yesu ntakhara miteko saphaama, seiyo Muluku aalakelenleiye woosiilo ntakhara hiyo wi neeceke mwa seiyo.
11 Mwawiihiiha, muupuwele wi nyuwo, achu a maloko moorweela wa mwiili, khalai mweeriwa “oohithikiliwa” ni yaale aweeriwa “oothikiliwa,” yoowo oneeriwa mmwiilini moorweela wa matata a achu.
12 Elukuluku yeele himwaarino Kristu, mwaarakamelana ni muloko wa Isarayeli, himwaapaka makupa a waataana waaroromelihiwe; nyuwo himwaarino ewehereryo nave himwaarino Muluku mweelaponi.
13 Nyenya vano mwawiiwanana ni Kristu Yesu, nyuwo khalai mwaari ocai wene, vano muri vakhiviru moorweela wa nikhami na Kristu.
14 Tiwi owo ti murecele ahu, yoowo eerinhe wi makhuuru meeli ekhale nimoha nave amwaryavo exiri yeeyo yaamwalanya.
15 Moorweela wa mwiili awe owo ooviihavo wiicana, Nlamulo na ikano mmukhalelo wa mathoriheryo, wi eerihe wi makhuuru meeli ari mwawiiwanana ni yoowo ekhale muchu mmoha muvyaani ni opaka murecele,
16 nave wi aataanihe mwawaakhwanela maloko oomeeli mmwiili mmoha wa Muluku moorweela wa mwiri woohooxiwavo,* woona wi owo ohiipha wiicana moorweela wa yoowo mwaneene.
17 Nave owo aarwa, alaleya michaka saphaama sa murecele wa nyuwo mwaari ociiwene, ni murecele wa yaale yaari vakhiviru,
18 woona wi moorweela wa yoowo, hiyaano, maloko oomeeli, nookhalano otaphuwa wa ophiya wa Atiithi moorweela wa munepa mmoha.
19 Mwawiihiiha, nyuwo hamuri tho aleco naari anamarwa, nto muri anamurala akhwaaya a aweela murima nave muri achu a emusi ya Muluku,
20 nave nyuwo mootekiwa vasulu va mathipelo a arummwa ni alipa a miririmu, aniiha Kristu Yesu mwaneene ari nluku noopharelano empa na mathipelo.
21 Mwawiiwanana ni yoowo, empa yoothene, eluceleliwe phaama makupa oothene vamoha ennannuwa ekhala empa yaweela ya Yehova.
22 Mwawiiwanana ni yoowo nyuwo tho munnatekiwa vamoha, wi mukhale nipuro wi Muluku akhalevo mwa munepa.
Inoota
^ Naari: “meecelo a.”
^ Naari: “mu ilukuluku soomwaahiyu.” Moone Masu Atharihiwe.
^ Naari: “Hiyo nri muteko Awe.”
^ Moone Masu Atharihiwe.
