Liivuru Anaawiili a Matharihelo 34:1-33
34 Yosiya aarino iyaakha thanu nararu vaava aakhanleiye mwene, nave aahilamulela iyaakha makhumi mararu nammoha o Yerusalemu.
2 Owo aaheera yeeyo yaari yawookololowa vamiithoni va Yehova, nave aahichariha meecelo a Tavite, nikholo nawe. Haahuwenleru ayaaka omoono woolopwana naari omoono woothiyana.
3 Mu eyaakha yaneethanu nararu ya olamulelo awe, vaavaa nlelo aareiye mmiravo, aapacerya omwaavya Muluku a Tavite, nikholo nawe; nave mu eyaakha yaneekhumi napiili aapacerya omweeliha Yuta ni Yerusalemu mmapuro oocukhuwa, mu apoco aweeliheya,* mu iruku soopachiwa ni iruku sa emetaale.*
4 Ohiya yeeyoru, yaahaamwarya a altare a Pala vamiithoni vawe, nave owo aahaakumula a altare a sawunkhela yaawo yaari vasulu vaya. Aahaanyaanya tho apoco aweeliheya,* iruku soopachiwa ni iruku sa emetaale.* Aahichupula ethatuwa nchupi nave aahimwaramwaxela nchupi va mahiye a yaale yaakhovelenlaaya ovahavo mikucho.
5 Aaheeyela makhuva a alipa mukucho mu a altare aya. Mwawiihiiha, aahimweeliha Yuta ni Yerusalemu.
6 Mu ipooma sa Manase, sa Efraimu ni sa Siimiyoni, ophiyerya o Nafitali mmilepe saya soorukurerya,
7 owo aahaakumula a altare nave aanyaanyerya apoco aweeliheya* vamoha ni iruku soopachiwa, achupula ithatuwa nchupi; owo aahaakumula a altare oothene a sawunkhela mu elapo yoothene yo Isarayeli, voocharela, aakookela o Yerusalemu.
8 Mu eyaakha yaneethanu nararu ya olamulelo awe, amanle weeliha elapo ni empa ya Muluku, Yosiya aahimurumiha Safani mwaana a Asaliya, Maseya muhooleli a epooma ni mulipa oorepa Yowa, mwaana a Yehowakasi, wi arehererye empa ya Yehova, Muluku awe.
9 Awo yaaya wa Hilikiya, namukucho mutokweene nave yaahimvahererya ikhorowa seiho saaruuhiwe mu empa ya Muluku. Alevi yaawo yaarumeela ntoko alipeleli a milako yaahithukumanya ikhorowa seiha orweela mu nihimo na Manase, na Efraimu ni achu akina a Isarayeli, ophitaanyerya Yuta, Penxami ni achu o Yerusalemu.
10 Voocharela, yaahivahereryiwa ikhorowa yaale yaavareryela muteko wa empa ya Yehova. Nave anamuteko a empa ya Yehova yaapharihela wi elipihe ni orehererya empa.
11 Yaahivahereryiwa ikhorowa alipa oohana ni alipa ooteka, wi ethumeno maluku oosemmwa vamoha ni ithaapwa wi ipakiweno iparoti ni ivika wi itekiweno ipa seiho mamwene o Yuta yaahin’yaaya ikhala milepe.
12 Nave achu yaalapa muteko aya moororomeleya. Mwa yaawo yaathanliwa Alevi: Xati ni Opatiya o Merari, Sakariya ni Mexulami o Kowati wi erumeeleke ntoko ahooleli. Nave Alevi oothene yaawo yaarino mavyakelo a wiipa,
13 yaanaavareryela anamuteko vyakala* nave yaari ahooleli a oothene yaaphara miteko soohiyanahiyana; Alevi akina yaari alipa oorepa, ahooleli ni alipeleli a milako.
14 Vaavaa yaaviihaayamo ikhorowa seiho saakerihiwe o empa ya Yehova, Hilikiya mulipa a mukucho, aamphwanya liivuru a Nlamulo na Yehova naavahiwe moorweela* wa Mose.
15 Mwawiihiiha, Hilikiya aaloca wa Safani mulipa oorepa: “Koomphwanya liivuru a Nlamulo mu empa ya Yehova.” Mwa yeeyo, Hilikiya aahimwinnyererya liivuru Safani.
16 Voocharela, Safani aamukeriha liivuru wa mwene nave aloca ariki: “Anamuteko anyu anneerano soothene athanleliwaaya.
17 Awo aakusa* ikhorowa seiho saari mu empa ya Yehova nave yaavahererya ahooleli ni yaawo analapa muteko.”
18 Safani Mulipa oorepa, aaloca tho wa mwene: “Hilikiya mulipa a mukucho, ookivahererya liivuru.” Nave Safani aapacerya omwaalakhanya vamiithoni va mwene.
19 Vaavaa mwene iiwaleiye masu a Nlamulo, aahaahula yoowara awe.
20 Voocharela, mwene aavahererya nlamulo wa Hilikiya, Ahikami mwaana a Safani, Apitoni mwaana a Mika, Safani mulipa oorepa ni Asaiya namuteko a mwene ariki:
21 “Haweni, mwamukohe Yehova sa miyo ni wa yaale nlelo ahanle o Isarayeli ni Yuta vooloca sa liivuru ophwanyiwe; tiwi, esara ya Yehova eni eyeeheryiwe wa hiyo etokotoko, woona wi makholo ahu hiyaacharinhe masu a Yehova naari weerano soothene irempwe mu liivuru yoola.”
22 Mwawiihiiha, Hilikiya, vamoha ni yaale yaarummwe ni mwene yaaya wa Hulta mulipa a miririmu a mwaamuthiyana. Owo aari mwaara a Salumi mwaana a Tikiva mwaana a Harasi. Owo aakhala muceche wanaawiili wo Yerusalemu, nave awo yaahilocano weiwo.
23 Owo aaloca ariki: “Hiihaa, Yehova Muluku a Isarayeli oni: ‘Mwamuleele mulopwana yoowo oorummeeni wa miyo muriki:
24 “Hiihaa Yehova ooloca ariki: ‘Kinamuruuhela epahu nipuro nenla vamoha ni achu aya, wuulumela woothene orempwe mu liivuru yoowo aalakhanyiwe vamiithoni va mwene o Yuta.
25 Woona wi awo aakinyanyala nave enapaha mikucho wa amuluku akina wi ekinyeenyeihe, ni miteko soothene sa matata aya, esara aka enamuyeeheriwa nipuro nenla nave hexipha.’”
26 Nto echu munaphwanelaanyu omuleela mwene o Yuta yoowo oorummeeni omukoha Yehova ti ela: “Echu Yehova Muluku a Isarayeli olonceiye tiila: ‘Vooloca sa masu wiiwalaawe,
27 woona wi murimaa woheemererya nave wiiyeviha vamiithoni va Muluku vaavaa wiiwalaawe masu awe vooloca sa nipuro nenla, vamoha ni achu aya nave wiiyeviha vamiithoni vaka waahula yoowaraa nave winla vamiithoni vaka, miyaano tho koowiiwa,’ Yehova tonaloca.
28 Ti nthowa nene kinahaalaaka wookuha vamoha ni makholo aa,* nave onahaala wiichuuwa mu nihiye naa mmureceleni; miitho aa heni yoone ipahu soothene seiho kinahaalaaka oruuhela nipuro nenla vamoha ni achu aya.’”’”
Voocharela, awo yaaveleela naakhulo wa mwene.
29 Mwawiihiiha, mwene aahiwiichaniha asitokweene o Yuta ni o Yerusalemu.
30 Voocharela, mwene aawela ayaaka o empa ya Yehova vamoha ni alopwana oothene o Yuta, achu o Yerusalemu, alipa a mukucho, Alevi ni nloko noothene, atokweene ni akhaani. Owo aahiwaalakhanyerya masu oothene a liivuru a waataana yoowo aaphwanyiwe mu empa ya Yehova.
31 Mwene aaheemela mu nipuro nawe nave apaka waataana* vamiithoni va Yehova, aroromelihaka omwiiwelela Yehova ni okhapelela malamulo awe, sawuupuxerya* sawe ni mathoriheryo awe ni murima* woothene wi yaakhwaniherye masu a waataana yaarempwe mu liivuru.
32 Ohiya yeeyoru, owo aaheeriha wi oothene yaari o Yerusalemu ni o Penxami yeemererye waataana. Nave achu o Yerusalemu yaaheerano mwawiiwanana ni waataana wa Muluku, Muluku a makholo aya.
33 Vahoolo vaya, Yosiya aahiviihamo ichu soothene soothanyeya* mu ilapo soothene sa Aisarayeli nave aaheeriha wi Aisarayeli oothene emurumeeleke Yehova, Muluku aya. Yosiya ari mukumi,* hiyaahin’ye omuchara Yehova, Muluku a makholo aya.
Inoota
^ Moone Masu Atharihiwe.
^ Naari: “iruku soohaniwa.”
^ Moone Masu Atharihiwe.
^ Naari: “iruku soohaniwa.”
^ Moone Masu Atharihiwe.
^ Naari: “alipa ooteexa.”
^ Mu Ehepiri, “mmatani mwa.”
^ Mu Ehepiri, “ahiicha.”
^ Masu ala anataphulela okhwa.
^ Naari: “aahuuluula waataana.”
^ Naari: “mahusiheryo.”
^ Moone Masu Atharihiwe.
^ Naari: “soophwaniherya soothene.”
^ Mu Ehepiri, “mmahiku awe oothene.”
