2 Akorintu 13:1-14
13 Ela ekwaha yaneeraru kinarwaaka wi kooxekuryeeni. “Ni onamoona wa* achu apiili naari araru, mwaha woothene onnaphwanela omalihiwa.”
2 Naamwi vano kihiryaaka ni nyuwo, eri ntoko wi kiri ni nyuwo ekwaha yanaawiili, nave kinnaalopola yaale achenke khalai, ni oothene akina, wi wakhala wi koorwa weiwo ekwaha ekina, nkooceela waalaka yaawo,
3 woona wi nyuwo munnaavya sawooniherya wi Kristu, yoowo ohiri ooceecheya wa nyuwo, nto ori akuru variyari vanyu, onnaloca chiryene moorweela wa miyo.
4 Tiwi mweeparipari, owo ohiiphiwa va mwiri wa nthowa na sooceecheya, nto ori mukumi wa nthowa na owerya wa Muluku. Eparipari wi hiyo tho nri ooceecheya ni yoowo, nyenya nnarwa nikhala akumi vamoha ni yoowo wa nthowa na owerya wa Muluku mwa nyuwo.
5 Mutitelele wiivarerya mwaari mu nroromelo; mutitelele wiisaalikhela nyuwo aneene. Naari apwanne hamunasuwela wi Yesu Kristu ori mwawiiwanana ni nyuwo? Voohikhala wi hamuri aweemereryiwa.
6 Mweeparipari, kinnaweherya wi nyuwo munahaala osuwela wi hiyo hanri ooheemereryiwa.
7 Ninnavekela wa Muluku wi nyuwo muhipake yoonanara, ohiya wi nikhale ntoko aweemereryiwa, nyenya wi nyuwo mweerekeno yeeyo eri yaphaama, naamwi nikhalaka ntoko wi hanri aweemereryiwa.
8 Tiwi, hannawerya opaka echu ehiniiwanana ni eparipari, nyenya pahiru ntakhara eparipari.
9 Chiryene ninnahakalala vaavaa nnakhalaahu ooceecheya nyenya nyuwo muri oowerya. Nave echu nnavekelaahu, ti yawi mukhale oorehereryiwa.
10 Ti nthowa nene kinoorepelaakaani ichu seiha vaavaa kihiryaaka weiwo, wi wakhala wi koophiya, kihikhale oowali kipharihelaka owerya Apwiya akivanhaaya, wi kiteke nave ohiya wi kimwarye.
11 Vookuchulani anna, mutitelele okhala oohakalala, oorehereryiwa, oohakararyiwa, mwiiwananeke, khalani mmureceleni; nave Muluku a osivela ni a murecele oni akhaleke ni nyuwo.
12 Muvahaneke mooni mukina ni mukhwaawe ni epeexu yaweela.
13 Aweela murima oothene annoovonyeryaani mooni aya.
14 Mahala matokweene a Apwiya Yesu Kristu, osivela wa Muluku ni munepa waweela yoowo nnaphuraahu vamoha, ikhaleke ni nyuwo oothene.
Inoota
^ Mu Ekriki, “iyano sa.”
