2 Akorintu 1:1-24
1 Miyaano Paulo, murummwa a Kristu Yesu moorweela wa okhwela wa Muluku, ni Timotiyu munnihu, wa muloko wa Muluku yoowo ori o Korintu, ophitaanyerya aweela murima oothene yaawo ari o Akaya woothewene:
2 Mahala matokweene ni murecele wa Muluku, Atiithi ahu vamoha ni a Apwiya Yesu Kristu ekhale ni nyuwaano.
3 Acicimihiwe Muluku ni Tiithi a Apwiya ahu Yesu Kristu, Tiithi a ikharari ni Muluku a ohakararya woothene,
4 yoowo onanihakararya* mu saweeha* sahu soothene wi niwerye waahakararya akina mu yaweeha* ya mukhalelo woothene, ni ohakararya yoowo nnaakhelaahu wa Muluku.
5 Vawi, hiihaa ntoko makacamiho yaancaaya wa hiyo ntakhara Kristu, ti nawaaca tho nihakararyo nnaakhelaahu moorweela wa Kristu.
6 Vano waakhanle wi ninnakumanano saweeha,* ori wa nthowa na ohakararya ni ovuluxiwa wanyu; nave waakhanle wi ninnahakararyiwa, ori wa nthowa na ohakararyiwa wanyu, yoowo oneereya wi wookhaviheryeeni ovilela makacamiho mamohamoha yaawo nnahooxeyaahu tho.
7 Nave ewehereryo ahu vooloca sa nyuwo ti yoohicikinyeya, woona wi hiyaano noosuwela wi hiiha ntoko nyuwo munuukaanyu makacamiho, munarwa muuka tho ohakararya.
8 Anna, hinnachuna wi nyuwaano muhisuwele sa ohooxeya yoowo nikumannaahuno o eprovinsiya yo Asiya. Naahooseya vancipale opwaha ikuru sahu, ophiyerya wi naanoova oyeleela ikumi sahu.
9 Mweeparipari, noona wi naathoriheliwa okhwa. Ela yaaheereya wi nihiiroromeleke hiyo aneene, nto Muluku yoowo onaaviiha alipa ookhwa.
10 Mu yawoopiha yeele etokweene ya okhwa owo aanoopola nave onarwa anoopola; nave nookhalano ewehereryo mwa yoowo wi onahaala otitelela onoopola.
11 Nyuwo tho munanwerya onikhaviherya moorweela wa mavekelo anyu a vathi va murima ntakhara hiyo; hiihaa, ancipale enarwa ethamalela wa nthowa nahu wa mahala naakhenlaahu mu waakhuliwa wa mavekelo a achu ancipale.*
12 Mathowa ahu a wiirumiha taala: Yawuupuxerya-ya-murima ahu enneerela onamoona wi nookhalano meecelo aphaama mweelaponi, nave xaxaxa vooloca sa nyuwo, ni weeliheya vamoha ni eparipari enarwa wa Muluku, ohiya ni miruku sa achu, nyenya ni mahala matokweene a Muluku.
13 Vawi hiyaano chiryene hannoorepelaani vooloca sa echu vyakala voohikhala yeeyo munaweryaanyu waalakhanya* ni wiiwexexa, nave kinnaweherya wi munahaala otitelela wiiwexexa ichu seiha mwawaakhwanela,*
14 hiiha ntoko tho nyuwo mwiiwexenxaanyu ophiyerya mweeryo nikhanlaahu mathowa a wiirumiha wanyu, hiihaa tho ntoko hiyo nneeraahu niirumihe wa nthowa na nyuwo mu nihiku na Apwiya ahu Yesu.
15 Mwawiihiiha, ni ororomela yoola, voopacerya kaanachuna orwa wooxekuryaani, wi mukhaleno nthowa nanaawiili na ohakalala;*
16 Woona wi miyaano kaanachuna wooxekuryaani kiviraka kiyaaka o Maketoniya, nave okookela wa nyuwo kirwaaka o Maketoniya, nave voocharela ohooliwa vakhaani ni nyuwo kiyaaka o Yuteya.
17 Phaama ene, vaavaa kaalakelenlaaka yeela, apwanne keenreno mooyere? Naari wi kaalakelenle weerano ichu mmukhalelo woomwiilini, mwawiihiiha kiloca “aa, aa” nave voocharela “hooye, hooye”?
18 Nto hiihaa ntoko Muluku oreiye oororomeleya, yeeyo nnalocaahu wa nyuwo tahi “aa” nave mu elukuluku emohamoha “hooye.”
19 Tiwi Mwaana a Muluku, Yesu Kristu, yoowo nimulalenryaahu variyari vanyu, ela tiwi, moorweela wa miyo, Silvanu* ni Timotiyu, hakhanle “aa” nave mu elukuluku emohamoha “hooye,” nyenya “aa” ookhala “aa” vooloca sa yoowo.
20 Vawi, moohipwacha waaca wa soororomeliha sa Muluku, iho sinnakhala “aa” moorweela wa yoowo. Mwawiihiiha, moorweela tho wa yoowo ennalociwa “Aamen” wa Muluku, nave ela ennaruuha ncicimiho wa yoowo moorweela wa hiyo.
21 Nto yoole onaroromeliha wi hiyo ni nyuwo nri awawe Kristu, nave onithanlile, ti Muluku.
22 Owo tho ooneeyerya eneneeryo nave anivaha mweemexeryo wa yeeyo enoorwa,* ela tiwi, munepa, mmurimani mwahu.
23 Kinnamwiichana Muluku ntoko namoona aka,* wi vaavaa nlelo kihirwiilaaka o Korintu ori wi kiwuureleeni.
24 Tahi wi nrimukhala aneene a nroromelo nanyu, nto nri anamuteko akhwiinyu ntakhara ohakalala wanyu, woona wi ori wa nthowa na nroromelo nanyu muryaanyu aweemela.
Inoota
^ Naari: “onanlipiha.”
^ Naari: “soohooxa.”
^ Naari: “yoohooxa.”
^ Naari: “soohooxa.”
^ Naari: “naakhenlaahu wa nthowa na ithoi sincipale saavekela.”
^ Naari akhweya: “yeeyo mmanlaanyu osuwela phaama.”
^ Mu Ekriki, “ophiyerya wookuchulani.”
^ Naari akhweya: “wi mphurevo ikwaha piili.”
^ Awiichaniwa tho Sila.
^ Naari: “eneneeryo ya nlivelo (ikhorowa); yoororomeliha ya yeeyo enoorwa.”
^ Naari: “a okumi aka.”
