1 Timotiyu 5:1-25
5 Ohimusamele moowali mulopwana awuuluvala. Moohiyana, omvahe miruku mwaphaama ntoko tiithi, wa amiravo ntoko asinnaa,
2 wa athiyana awuuluvala ntoko asimaayi, wa asimwali ntoko arokoraa, ni weela murima woothene.
3 Wooniherye wi onnaathokororya* anaamukhwele yaawo chiryene ari anaamukhwele.*
4 Nto wakhala wi naamukhwele ookhalano anamwane naari asisulwaawe, yaala ehuserye toko omulapa Muluku veechokoni vaya ni waaliva alipa awaayara aya ni asivovo aya yeeyo enaaphwanela, woona wi ela ennamuhakalaliha Muluku.
5 Muthiyana yoowo ori chiryene naamukhwele ni ohirino naakiho atikitherye ewehereryo awe mwa Muluku nave atitelele opaka mavekelo a vathi va murima ni ovekela othana ni ohiyu.
6 Nyenya yoole oniiveleela wa soochunachuna* ori ookhweene, naamwi ari mukumi.
7 Mwawiihiiha, otitelele ovaha mahusiheryo yaala* wi awo ehikhaleno nthowa na osameliwa.
8 Mweeparipari, wakhala wi muchu hanaakhwaniherya* soothowa sa amusi awe nave xaxaxa a veechokoni vawe, ookhooca nroromelo nave toonanara murima ompwaha muchu ohirino nroromelo.
9 Naamukhwele arepeliwe mu nikhuuru, aakhwaninhe miyakha makhumi mathanu nammoha,* yoowo aari muthiyana a mulopwana mmoha,
10 aari oosuweliwa ni miteko saphaama, wakhala wi ohaaphuwa phaama anamwane, aari oowaakhela aleco, oorapiha inaani sa aweela murima, ohaakhaviherya yaale yaari awuukhuwa, nave wakhala wi aari awiiveleela mmiteko soothene saphaama.
11 Nyenya ohaarepele anaamukhwele yaawo ahuuluvanle, tiwi nchuno naya na okonihiwa naarweela yaawo ni omurumeela waya Kristu, awo anachuna otheliwa.
12 Nave awo anahaala othorihiwa nthowa na ohaakhwaniherya masu aya oopacerya a nroromelo.*
13 Mu elukuluku emohamoha, awo tho anniikhoveleliha ohiphara echu, yeeceecaka mmavaate; nave ohiya pahiru ooheera echu, nyenya tho eelavilavi ni awiivoliiherya mmiyaha sa akina, elocaka ichu seiho yahaaphwanelaaya oloca.
14 Mwawiihiiha, kinakhwela wi anaamukhwele ahuuluvanle etheliwe, ekhaleno anamwane nave ethokororyeke sa vaate vaya wi ehimvaheru mwiicani ekari wi anyemule.
15 Mweeparipari, akina aahiya ephiro yaphaama enamuchara Satana.
16 Wakhala wi muthiyana oororomela ookhalano anaamukhwele veemusini vawe, yoola aakhaviheryeke, wi ohihiyeriwe muloko murici yoola. Voocharela, muloko onanwerya waakhaviherya yaale chiryene ari anaamukhwele.*
17 Atokweene yaawo anahoolela phaama annaphwanela ocicimihiwa wiili, xaxaxa yaale analapa moowetha mmasu ni ohusiha.
18 Tiwi soorepa sinnaloca: “Ohimake eyano ya emope eniipicha,” nave tho: “Namalapa onnaphwanela waakhela nlivelo nawe.”
19 Oheemererye osomeliwa wa mutokweene voohikhala ni onamoona wa achu eeli naari araru.
20 Waasamele vamiithoni va achu oothene yaale anapaka soocheka, wi ekhale yoolopola wa akina.*
21 Miyo kinnoolamulela vamiithoni va Muluku, va Kristu Yesu ni va ankeelo oothanliwa, wi okhapelele ichu seiha kiloncaaka ohithanlenle, nave oheereno mwa nthalu.
22 Ohaakuveleke omukuherya matata muchu;* ohuuke soocheka sa akina; otitelele okhalano meecelo aweela.
23 Ohiwurye tho maahi,* nyenya owuryeke eviinyu vakhaani wa nthowa na wiiceliwa waa mmirimani wiiliwiili.
24 Soocheka sa achu akina sinnasuweliwa ni achu oothene nave sinaakeriha woothorihiwani; nto sa achu akina inasuweliwa muhoolo mwaya.
25 Moolikana tho, miteko saphaama sinnasuweliwa ni achu oothene nave mikina tho sookhuweya inarwa sooneya.
Inoota
^ Mu Ekriki, “onnaacicimiha.”
^ Naari: “anaamukhwele yaawo chiryene ari oothoiwa”; ela tiwi, yaale ahirino muchu awaakhaviherya.
^ Akhweya nnaahiwa nchuno na okonihana.
^ Naari: “malamulo yaala.”
^ Naari: “hanavakulela.”
^ 60
^ Naari: “ohaakhwaniherya yoororomeliha yaapankaaya.”
^ Naari: “anaamukhwele yaawo chiryene ari oothoiwa”; ela tiwi, yaale ahirino muchu awaakhaviherya.
^ Mu Ekriki, “wi akina awo yooveke.”
^ Ela tiwi, ohaakuvele omuthanla muchu wi aakhele murici.
^ Naari: “Ohiye owurya maahiru.”
