Liivuru Oopacerya a Matharihelo 27:1-34
-
Ahooleli yaalapa miteko sa mwene (1-34)
27 Vooloca sa waaca wa Aisarayeli, ahooleli a imusi sa makholo, ahooleli a makhuuru macikhwi ni ahooleli a makhuuru masana, vamoha ni asitokweene aya yaawo yaalapa muteko wa mwene mmiyaha soothene sa makhuuru yaawo yaarwa ni orowa mweeri ti mweeri, mu miyeeri soothene sa vayaakhani, nikhuuru ti nikhuuru naakawanyiwe yaanakhalavo alopwana macikhwi makhumi meeli naxexe.*
2 Muhooleli a nikhuuru noopacerya, mweeri woopacerya aari Yasopiyamu mwaana a Sapatiyeli, nave mu nikhuuru nawe yaakhalavo alopwana macikhwi makhumi meeli naxexe.*
3 Wa anamwane a Peresi, owo taari muhooleli a asitokweene oothene a makhuuru yaathanleliwe orumeela variyari va mweeri woopacerya.
4 Mu nikhuuru na mweeri woopacerya aakhalavo Totai Muhohiti, nnikhuuru nawe; nave Mikoloti aari muhooleli, mu nikhuuru nawe yaakhalavo alopwana macikhwi makhumi meeli naxexe.*
5 Muhooleli a nikhuuru naneeraru, aathanliwe wi alapeke variyari va mweeri waneeraru, aari Penaiya mwaana a namukucho mutokweene Yehoyata, nave mu nikhuuru nawe yaakhalavo alopwana macikhwi makhumi meeli naxexe.*
6 Penaiya yoola aari mmoha a anakhoco makhumi mararu oowerya nave aari muhooleli a makhuuru makhumi mararu. Nave muhooleli a nikhuuru nawe aari mwanawe Amisapati.
7 Muhooleli aneexexe, mweeri waneexexe, aari Asayeli, munnawe Yowapi nave ohoolo waya aari mwanawe Sepatiya. Mu nikhuuru nawe yaakhalawo alopwana macikhwi makhumi meeli naxexe.*
8 Muhooleli aneethanu, mweeri waneethanu, aari Samuti Musaraita, nave mu nikhuuru nawe yaakhalawo alopwana macikhwi makhumi meeli naxexe.*
9 Muhooleli aneethanu nammoha mweeri waneethanu nammoha, aari Ira mwaana a Ikesi, Mutekoita nave mu nikhuuru nawe yaakhalawo alopwana macikhwi makhumi meeli naxexe.*
10 Muhooleli aneethanu nawiili, mweeri waneethanu nawiili aari Helesi, Mupelonita a nihimo na a Efraimu, nave mu nikhuuru nawe yaakhalawo alopwana macikhwi makhumi meeli naxexe.*
11 Muhooleli aneethanu nararu, mu mweeri waneethanu nararu aari Sipekai, Muhusatita a emusi ya Aseraita, nave mu nikhuuru nawe yaakhalawo alopwana macikhwi makhumi meeli naxexe.*
12 Muhooleli aneethanu naxexe, mu mweeri waneethanu naxexe aari Apiyeseri, o Anatoti, a nihimo na Penxami, nave mu nikhuuru nawe yaakhalawo alopwana macikhwi makhumi meeli naxexe.*
13 Muhooleli aneekhumi, mweeri waneekhumi, aari Maharai o Netofa, a emusi ya Aseraita, nave mu nikhuuru nawe yaakhalawo alopwana macikhwi makhumi meeli naxexe.*
14 Muhooleli aneekhumi nammoha, mweeri waneekhumi nammoha, aari Penaiya Mupironita a anamwane a Efraimu, nave mu nikhuuru nawe yaakhalawo alopwana macikhwi makhumi meeli naxexe.*
15 Muhooleli aneekhumi napiili, mweeri waneekhumi napiili, aari Heltai, o Netofa, a emusi ya Otiniyeli, nave mu nikhuuru nawe yaakhalawo alopwana macikhwi makhumi meeli naxexe.*
16 Ahooleli a mahimo a Isarayeli yaari ala: Wa nihimo na Rupeni, Eliyeseri mwaana a Sikiri taari muhooleli; wa nihimo na Simiyone, Sefatiya mwaana a Maka;
17 Hasapiya mwaana a Kemuwele; wa nihimo na Aroni Satoki;
18 wa nihimo na Yuta, aari Elihu mmoha a asinna a Tavite; wa nihimo na Isakari aari Omiri mwaana a Mikayeli;
19 a nihimo na Sepuloni, aari Isimaiya mwaana a Opatiya, a nihimo na Nafitali aari Yeremoti mwaana a Asiriyeli;
20 a nihimo na Efraimu aari Oseya mwaana a Asasiya; a eriyari ya nihimo na Manase aari Yoweli mwaana a Petaiya.
21 a eriyari ya Manase o Kiliyati aari Itu mwaana a Sakariya; a nihimo na Penxami aari Yasiyeli mwaana a Apineri;
22 a nihimo na Tani, aari Asareli mwaana a Yerohamu. Ala yaari asitokweene a mahimo a Isarayeli.
23 Tavite haakontanre yaale yahaakhwaninhe iyaakha makhumi meeli, woona wi Yehova aamuroromeliha Isarayeli wi aahaala waaca ntoko itheneeri sa wirimu.
24 Yowapi mwaana a Seruya aapacerya waakontaara achu, nyenya haawaakwaanxe; wa nthowa na okontaara wuuwu esara ya Muluku yaamurweela Isarayeli* nave numero nene hinaarepeliwe mu yaweereya ya elukuluku ya Mwene Tavite.
25 Muhooleli a muhakhu wa mwene aari Asimaveti, mwaana a Atiyeli. Yonata mwaana a Usiya aari muhooleli a mapuro ookhapelelamo* mu imaca, mu ipooma, mmicecheni ni mu miconco.
26 Muhooleli a anamuteko yaawo yaalima omaca aari Isiri mwaana a Kelupi.
27 Simei Muramatita aari muhooleli aavareryela miri. Nave muhooleli aavareryela sawiima sa miri seiho wi ikuhiweke mmapuro ookhapelelamo a eviinyu aari Sapati o Sifimi.
28 Muhooleli a oliveira ni a miri sa sikoomoro o Selefi aari Palihanani, Mukeretita; nave muhooleli a mapuro ookhapelelamo makhurwa aari Yowasi.
29 Muhooleli a imope saalya o Saroni aari Sitrai Musaroni; nave Safati mwaana a Atalai aari muhooleli a imope sa ompopa.*
30 Muhooleli a akamelu aari Opil Musimayeli: muhooleli a apuuru* aari Yetaiya; o Meroti.
31 Muhooleli a ipucepuche aari Yasisi o Karenu. Oothene yaala yaari ahooleli a sookhalano sa Mwene Tavite.
32 Yonata musulwa a Tavite, aari namiruku, mulopwana a wiiwexexa ni mulipa oorepa, nave Xehiyeli mwaana a Hakimoni aathokororya anamwane a mwene.
33 Aitofeli aari namiruku a mwene; nave Usai mu Arkita aari nthamwene a mwene.
34 Yaamuracenle Aitofeli yaari Yehoyata mwaana a Penaiya, ni Apiyatare, nave Yowapi aari muhooleli a anakhoco a mwene.
Inoota
^ 24.000.
^ 24.000.
^ 24.000.
^ 24.000.
^ 24.000.
^ 24.000.
^ 24.000.
^ 24.000.
^ 24.000.
^ 24.000.
^ 24.000.
^ 24.000.
^ 24.000.
^ Mu Ehepiri, “nave esara yaari o Isarayeli.”
^ Naari: “muhakhu.”
^ Naari: “nipuro nawaataleleya.”
^ Mu Ehepiri, “apuuru aasiithiana.”
