1 Akorintu 16:1-24
16 Vano vooloca sa yooveleela wa aweela murima, nyuwo munanwerya ochariha ohoolela kivaherenryaaka miloko so Kalatiya.
2 Nihiku noopacerya na esumana, mmoha ni mmoha a nyuwo iikuheryeke makupa aya yooveleela awe, mwawiiwanana ni mikhalelo sawe; wi sooveleela iho ihipakiwe miyo kirwiile.
3 Nyenya vaavaa kineeraaka kiphiye weiwo, kinamwaarumiha alopwana yaawo munaweemereryaanyu mu ikaarata sanyu wi ekuxe yoovaha anyu yaphaama ekerihaka o Yerusalemu.
4 Mwawiihiiha, wakhala waweemereryeya wi miyo tho kiyewo, awo anamuyawo ni miyaano.
5 Nto kinahaala orwa wooxekuryaani kimanle ovira o Maketoniya, woona wi kinaya ovira o Maketoniya;
6 nave akhweya kinamulekela vakhaani naari omaliha elukuluku ya nakhutu* kiri ni nyuwo, wi nwerye okihoola vakhaani makupa kinayaakawo.
7 Tiwi nkinachuna owoonaani pahiru kirikimvira, woona wi kinnaweherya omaliha elukuluku ni nyuwo, Yehova eemererya.
8 Nto kinamutitelela okhala o Efesu ophiyerya efesta ya Pentekoste,
9 ntakhara woohuleya mulako mutokweene wa miyo wi kilape, nto ahaaca alipa oovaanya.
10 Vano wakhala wi Timotiyu oophiya weiwo, mmwaakhele phaama wi ahooveke echu ari ni nyuwo, woona wi owo onaphara muteko wa Yehova hiiha ntoko miyo.
11 Mwawiihiiha, ahikhale ani amunyemule. Mmuhoole mmureceleni mmukwaha awe, wi arwe akiphwanye, woona wi miyaano ni anna ninnanweherya.
12 Vooloca sa munnihu Apolu, koomveka mwa nthiti wi arwe ooxekuryeeni vamoha ni anna. Owo hanakhwela orwa weiwo hiihaano, nto onahaala orwa akhalano elukuluku yoophwanelela.
13 Mukhale oovinya, mutitelele wiithipela mu nroromelo, mukhale oolipa murima,* mukhale akuru.
14 Ichu soothene muneeraanyu, mweerekeno ni osivela.
15 Vano kinnooceenyeryaani anna: Nyuwaano moosuwela wi a veechoko ya Estefana ari sawiima soopacerya o Akaya nave awo ahiiveleela wi yaarumeeleke aweela murima.
16 Nyuwo tho mutitelele owiiwelela achu ntoko yaawo ni oothene anakhala awiiwanana ni analapa mwakuru.
17 Nto kinnahakalala ophiya wa Estefana, Fortunatu ni Akayiko, woona wi awo aatepa okikhaviherya mu nipuro nanyu.
18 Vawi aakurumuxa murima aka ni wawinyu.* Mwawiihiiha, mwaathamaleleke alopwana si yaawo.
19 Miloko so Asiya sinnoovonyeryaani mooni aya. Akila ni Priska, vamoha ni muloko onathukumana owannyaya annoovonyeryani mooni aya woosivela mwa Apwiya.
20 Anna oothene annoovonyeryani mooni. Muvahaneke mooni mukina ni mukhwaawe ni epeexu yaweela.
21 Miyo Paulo, kinnoorepelaani mooni aka.
22 Akhalavo mukina ohinaasivela Apwiya, uulumeliwe. Khwoo Apwiya, rwaani!
23 Mahala matokweene a Apwiya Yesu ekhale ni nyuwo.
24 Osivela waka okhale ni nyuwo oothene mwawiiwanana ni Kristu Yesu.
