2 Apwanne Nookhalano Nthowa wa Makacamiho Ahu?
Ntakhara Heeni ti Woochuneya Osuwela Naakhulo?
Wakhala wi naakhulo ti nawi aai, eyo enooniherya wi nookhalano owerya wa ovukula makacamiho ahu.
Wi Muupuwelele
Apwanne achu aakhalano mathowa vaavaa ichu soonanara sineereyaaya? Moone sootakiherya sinacharela.
-
Weereliwa Yoonanara.
Nikhuuru na Marehereryo a Ekumi Eelapo Yoothene nooloca wi mu nikhuuru na achu atokweene axexe, mmoha oheereliwa yoonarara oomwiilini variyari va omiravo awe nave tho wi nikhuuru na athiiyana araru, mmoha oheereliwa yoonanara omwiilini naari ophareliwa weera samwiikho (naari weereliwa ichu soopiili) mu okumi awe.
-
Wiiphiwa.
Mwawiiwanana ni yoolokoha ya 2018 ya Nikhuuru na Marehereryo a Ekumi Eelapo Yoothene, enaalakhanyeryiwa wi achu 477.000 ahiiphiwa mu elapo yoothene mu 2016. Achu akina 180.000 aakhwa mu ikhoco ni owanawana mu eyaakha emohamoha.
-
Makacamiho a Ekumi.
Mmwaha olokohiwe mu erevista National Geographic, namarepa Fran Smith ooloca: “Achu opwaha pilyawu mmoha annamulya soona, nave soona onnatannya makacamiho anakeriha wuukhwani, ntoko ala: ireca soovihiha vachirima, naaruryu, makacamiho a omumula, ereca ya masasu ni kanser a masasu.”
-
Ohiyana wa Makhalelo.
Namaalikhela muupuwelo Jay Watts ooloca: “Ohaawa, ohiyana wa makhalelo, ohiyana wa ikore, ohooxiwa nthowa na okhala muthiyana naari mulopwana, mukhalelo wa anamarwa ni ovirelana wa mahimo, soothene seiha sinneeriha waaceereryeya wa makacamiho aachu ntoko wuukhuwa ni ereca ya mmuupuweloni.”
WI MUSUWELE SINCIPALE
Moone exilema Ntakhara Heeni Muluku Opatunxeiye Elapo Yavathi? mu jw.org.
Yeeyo Piipiliya onahusiheiye
Achu tanatannya makacamiho mancipale arivovo olelo.
Makina a yaawo anatannyiwa ni alamuleli oonanara murima, anakacamiha okumi wa achu yaawo yaaphwanelaaya waakhapelelaka.
“Muchu mukina onamulamulela muchu mukhweiye amweerelaka yoonanara.”—EKLESIYASTE 8:9.
Nnanwerya ovukula makacamiho ahu.
Malakiheryo a Mpiipiliyani annanikhaviherya okhalano ekumi yoophwanelela ni waakhalihaka phaama achu akina.
“Okurunusha murima, okumi mmwiilini, nto nrima, wuuciha mmakhuvani.”—MASIPOSIPO 14:30.
“Muhiye masu oothene oowaawa, esara, onanariwa, mawoowo, munyemu ni soonanara soothene.”—ÉFESO 4:31.
