NLAMULO na Mose, naanaweemererya achu olipela elocaka masu ntoko ala, “Kinnalipela ya Muluku” naari “Kinnalipela mwa nsina na Yehova.” Nyenya mmahiku a Yesu olipela waahikhala wawunlaana ophiyerya wi Ayuta yaanalipela ntakhara echu vyakala yeeyo yaalocaaya. Awo yaaneera yeela ekhwelaka wi yeemereryiwe yeeyo yaalocaaya, nyenya Yesu aahiwatiiha mukhalelo yoola ikwaha piili. Owo aahihusiha: “Malotxelo anyu ekhale ala: À, à; hoye, hoye.”​—Mateu 5:33-37; 23:16-22.

Mwawiiwanana ni liivuru Tisiyonaariyu a Teyoloxiya a Nlakano Nahiihaano (Mu Enklesi, Theological Dictionary of the New Testament, Talmud) onnanikhaviherya woona mukhalelo olipela waaryaaya wawunlaana wa Ayuta, naari olipela wi masu aya yaari eeparipari. Ti nthowa nene Talmud onathariheiye mookwakwaleya olipela taani waaphwanela okhwaaniheryiwa ni wahaaphwanela okhwaaniheryiwa.

Tahi wi Yesu aari yooworu aawatiiha meerelo yaala oonanara. Ntoko yootakiherya, namarepa a miyaha sa Ayuta Flavius Josephus aahirepa vooloca sa nikhuuru nimoha na Ayuta naasepa olipela. Ahooleli a nikhuuru nenla yaaneemererya wi olipela waari mwaha mutokweene opwaha wootha. Awo yoona wi wakhala wi muchu aaphwanela oolipela achunaka wi akina emweemererye, muchu owo aari nawoothe. Moolikana, liivuru Ayuta osuweliwe ntoko miruku sa Siriyako onnaloca: “Muchu onaamoona olipela wi eemereryiwe toothanyeya vamuceche.” Yesu aahiwatiiha olipela ntakhara miyaha soohisuwanyeya. Wakhala wi ilukuluku soothene ninnaloca eparipari, hannaphwanela olipela wi yeemereryiwe yeeyo nnalocaahu.