1-2. (1) Ntakhara heeni oohuserya akina a Piipiliya annoovelela opaka yoolakelela ya okhala Namoona a Yehova? (2) Tiheeni nnahaalaahu othokororya mmwaha yoola?

 APWANNE sookhala ichu muukhuwaanyuno seiho saaweerihaani woovelela okhala Namoona a Yehova? Akhweya nyuwaano mwaanoova wi asinthamwene anyu oomutekoni, asinthamwene naari amusi anyu woorukunuwelaani. Naari akhweya nyuwaano mwaanoova wi himwaahaala okhalaka mwawiiwanana ni malakiheryo a Muluku. Waakhanle wi nyuwaano mwiisoona hiiha, moosuwela mukhalelo oohuserya akina a Piipiliya aniisoonaaya nave ntakhara heeni onakhalaaya woovila wa yaawo opaka soolakelela sa okhala Anamoona a Yehova.

² Yesu aahisuwela wi woova wuuwu waanwerya okhala wookhweya waakanyerya wunnuwa woomunepani. (Mat. 13:​20-22) Nyenya owo aahititelela weererya waakhaviherya yaawo. Wi eereno yeeyo, owo aahaakhaviherya oohuserya awe (1) osuwela ntakhara heeni waaryaaya woovila wa yaawo othanla omurumeela Yehova, (2) aahaakhaviherya omusivelaka Yehova, (3) aahaakhaviherya omukuha Yehova mu nipuro noopacerya mu okumi aya nave (4) aahaahusiha echu yaweera wakhala wi akina ennawaakaaha. Nni nipharihele hai yeeyo Yesu aalonceiye wa oohuserya awe vaavaa nnampharihelaahu liivuru Mpuhe Okumi Okhala Wookhala! wi naakhaviherye oohuserya a Piipiliya othanla omurumeela Yehova?

MMUKHAVIHERYE OOHUSERYA ANYU OSUWELA YEEYO ENAMUHIIHA OMURUMEELA YEHOVA

3. Tiheeni yaamuhiiha Nikotemu okhala oohuserya a Yesu?

³ Nikotemu, muhooleli a Ayuta aahihoolela nikacamiho wi akhale mmoha a oomuchara a Yesu. Ivinrevo miyeeri mithanu nammoha Yesu apacenrye muteko awe, Nikotemu aasuwela wi Yesu aamweemelela Yehova. (Yoh. 3:​1, 2) Mwawiihiiha, Nikotemu aahithanla okumana ni Yesu moovitheya nthowa na “owoova Ayuta.” (Yoh. 7: 13; 12:42) Akhweya owo uupuwela wi aahaala oyeleela ichu sincipale nthowa na okhala oohuserya a Yesu. a

4. Yesu aamukhavihenrye hai Nikotemu wiiwexexa yeeyo Muluku aaweheryeiye wi owo apake?

⁴ Nikotemu aakhalano masuwelelo a malamulo, nyenya aanachuna nikhaviheryo wi iiwexexe yeeyo Yehova aaweheryeiye wa yoowo. Yesu aamukhavihenrye hai? Yesu aari ooreheryeya oloca ni Nikotemu naamwi waari eriyari ya ohiyu. Nave Yesu aahiloca mookwakwaleya echu yaweera wi akhale omuchara a Yesu: Acharuwe soocheka sawe, apatisiwe mmaahini nave ooniherye nroromelo wa Mwaana a Muluku.—Yoh. 3:​5, 14-21.

5. Nni nimukhaviherye hai oohuserya a Piipiliya osuwela yeeyo enamuhiiha oya wawe vahoolo?

⁵ Naamwi oohuserya a Piipiliya iiwexexaka phaama soorempwa, akhweya owo onamuchuna nikhaviheryo wi asuwele yeeyo enamuhiiha oya wawe vahoolo. Muteko wa nihiku ti nihiku, waakaaha wa emusi, inanwerya omweeriha owo ohikhalano soolakelela soomunepani. Mwawiihiiha, mwiikuhe mu nipuro na oohuserya anyu. Munanwerya onwopa wi munwurye chaaya vamoha naari ochekula ni yoowo. Wakhala wi nyuwaano munnapaka ichu ntoko seiha vamoha, akhweya owo onamooleelani sa okumi awe nave nyuwaano munanwerya woona makacamiho yaawo owo oreiyeno. Mmuceenyerye oohuserya anyu opaka matorokelo oochuneya, ohiya wi oohakalaliheni nyenya wi ooniherye osivela wawe wa Yehova.

6. Muni mmukhaviherye hai oohuserya okhala oolipa wi apharihele yeeyo onahuseryeiye? (1 Akorintu 16:13)

⁶ Vaavaa oohuserya a Piipiliya onaroromeleiye wi Yehova onahaala omukhaviherya okhalaka mwawiiwanana ni malakiheryo a Mpiipiliyani, owo onahaala okhala oolipa murima wi apharihele yeeyo onahuseryeiye. (Mwaalakhanye 1 Akorintu 16:13.) Murici anyu onanwerya olikanyihiwa ni muhusiha ooxikola. Taani aari muhusihaanyu oosiveliwa vaavaa mwaahuseryaanyu oxikola? Akhweya aari muhusiha yoowo ookhavihenryeeni moopixa murima wunnuwiha ororomela mavyakelo anyu. Mmukhalelo mmohamoha, muhusiha a Piipiliya aphaama hanahusiha pahiru yeeyo Muluku onachuneiye wi nipake, nyenya tho onnamuroromeliha oohuserya awe wi nnikhaviheryo na Yehova owo onanwerya opaka matorokelo oochuneya mu okumi awe. Muni mweereno hai yeeyo?

MMUKHAVIHERYE OOHUSERYA ANYU WUNNUWIHA OSIVELA WAWE NTAKHARA YEHOVA

7. Yesu aakhavihenrye hai alipa oowiriyana awe waaceererya osivela waya wa Yehova?

⁷ Yesu aahisuwela wi omusivela Muluku waahaala waaceenyerya oohuserya awe opharihela yeeyo yaahusenryaaya. Owo ikwaha sincipale aanahusiha ichu seiho saahaala waakhaviherya oohuserya awe wunnuwiha osivela waya ntakhara Tiithi aya a wirimu. Ntoko yootakiherya, owo aahimulikanyiha Yehova ni muchu yoowo onamvaha mwana awe ichu saphaama. (Mat. 7:​9-11) Alipa oowiriyana akina a Yesu, akhweya hiyaarino asitiithi oosivela. Mwaanyiherye mukhalelo awo yiisoonnaaya vaavaa Yesu aalonceiye niphwanaphwaniho na tiithi aniphwanya aamwaakhenle mwana awe yoowo aapanke ichu soonanara. Yesu aahaakhaviherya achu woona wi Yehova onnaasivela vancipale nave wi onnachuna waakhaviherya.—Luka 15:​20-24.

8. Muni mmukhaviherye hai oohuserya anyu a Piipiliya wunnuwiha osivela wawe wa Yehova?

⁸ Nyuwaano tho munanwerya omukhaviherya oohuserya a Piipiliya wunnuwiha osivela wawe ntakhara Yehova, moorweela wa ocicimiherya mikhalelo saphaama sa Muluku mu ohusiha wanyu. Variyari va nikupa ti nikupa na yoohuserya, mmukhaviheryeke wiiwananiha yeeyo onahuseryeiye ni osivela wa Yehova. Vaavaa munathokororyaanyu vooloca sa woopola, mucicimiherye mukhalelo eyo enaphariheleyaaya wa yoowo.  (Aro. 5:8; 1 Yoh. 4:10) Ti yawooneya wi oohuserya onamuceenyeryeya omusivelaka Yehova vaavaa onuupuweleleiye vooloca sa osivela wa Yehova ntakhara yene mukhateiye.—Aka. 2:20.

9. Tiheeni yaamukhavihenrye mulopwana awiichaniwa Michael opaka matorokelo mu okumi awe?

⁹ Moone yaweereya ya Michael, yoowo onakhala o Intonesiya. Owo ophwiiwale ni amusi awe eri mu eparipari, nyenya owo hapatisiwe. Vaavaa aareiyeno iyaakha 18, owo aaya elapo ekina wi alapeke ntoko motorista. Voocharela, owo aahithela o Intonesiya nyenya aahititelela olapa mu elapo ekina yeeyo yaari ocai ni amwaariye vamoha ni mwana awe. Mu elukuluku yeele, amwaariye ni mwana awe yaahipacerya omuhuserya Piipiliya nave yaanaya vahoolo. Amama awe emanle okhwa, Michael aahilakelela okookela owannyawe wi aakhapeleleke apapa awe nave aaheemererya okhalano yoohuserya ya Piipiliya. Vaavaa yaathokororyaaya makupa a “Ohuserya Mwawiiseela” mmwaha woohuserya 27 wa liivuru Mpuhe Okumi Okhala Wookhala!, Michael aahitepa otannyeya murima. Vaavaa owo uupuwelenleiye mukhalelo Yehova iisoonneiye va omoona Mwana Awe ahooxeyaka, Michael aahimoriha miithori. Nave vaavaa owo iiwexenxeiye mukhalelo Yehova ni Yesu yaamusivelaaya, owo aahithamalela nave aahipaka matorokelo mu okumi awe ni apatisiwa.

MMUKHAVIHERYE OOHUSERYA ANYU OMUKUHA YEHOVA MU NIPURO NOOPACERYA

10. Tiheeni Yesu aapankeiye wi aakhaviherye oohuserya awe opaka matorokelo wi emurumeele vancipale Yehova? (Luka 5:​5-11) (Moone tho eruku.)

¹⁰ Akina a yaawo Yesu aalalenryeiye, yaahisuwela mwawaakuveya wi owo aari Mesiya, naamwiihiiha, nlelo yaanachuna nikhaviheryo wi yiiwexexe wi omurumeela Yehova, waanachuneya olaleerya mwa mvai michaka saphaama. Petru ni Antreya yiiha eri oohuserya vaavaa Yesu aawompeiye wi emuchareke elukuluku yoothene. (Mat. 4:​18, 19) Awo vamoha ni Tiyaku ni Yohani, yaalapa ntoko alipa oototha ihopa nave yaahikhalano nakoso yoowo aakhumelela phaama. (Mar. 1:​16-20) Vaavaa Petru ni Antreya ‘yaahin’yaaya milapa saya,’ ti yawooneya wi yaahipaka marehereryo a ovakulela emusi aya eniiha emucharaka Yesu. Ntakhara heeni awo yaaryaaya ooreheryeya omuhiya nakoso  aya? Masu enaphwanyeya mu Luka ennanleela wi Yesu aahipaka yootikhiniha yeeyo yaalipinhe ororomela waya mu owerya wa Yehova wa waakhapelela yaawo.—Mwaalakhanye Luka 5:​5-11.

11. Nni nipharihele hai saweereya sahu wi nlipihe nroromelo na oohuserya ahu?

¹¹ Hannawerya opaka sootikhiniha hiiha ntoko Yesu eenreiye, nyenya nnanwerya okawana saweereya vooloca sa mukhalelo Yehova onaakhaviheryeiye yaale enamukuha Owo mu nipuro noopacerya. Ntoko yootakiherya, apwanne munnuupuwela mukhalelo Yehova ookhavihenryeiyeni vaavaa mwaapacenryaanyu ophiya mmithukumano? Akhweya nyuwaano mwaahimuleela patarawu anyu ni omutharihela ntakhara heeni mwaahihaalaanyu tho olapaka iwora sawaaceererya waakhanle wi eyo yaanaakanyerya ophiya wanyu mmithukumano. Mmutharihele oohuserya anyu mukhalelo eyo elipinhaaya nroromelo nanyu vaavaa nyuwaano moonnaanyu mukhalelo Yehova ookhavihenryeiyeni vaavaa mwaalakelenlaanyu omukuha mu nipuro noopacerya mu okumi anyu.

12. (1) Ntakhara heeni nnaphwanelaahu waawopa alaleeryi oohiyanahiyana weeciha yoohuserya ya Piipiliya? (2) Muni mpharihele hai ixilema wi mmuhusihe oohuserya anyu mmukhalelo woophwanelela? Mvahe yootakiherya.

¹² Ennakhala phaama tho vaavaa anna ni arokora analocaaya wa oohuserya anyu mukhalelo atoronkaaya okumi aya wi emukuhe Yehova mu nipuro noopacerya. Mwawiihiiha, mwaawopeke anna ni arokora amavyakelo oohiyanahiyana wi yoohooleeni mu yoohuserya anyu ya Piipiliya. Mwaaveke wi etharihe mukhalelo yeemerenryaaya eparipari ni tiheeni epankaaya wi yeerihe muteko wa Yehova okhala mu nipuro noopacerya mu okumi aya. Ohiya yeeyoru, mviriheke elukuluku ni oohuserya anyu wi moone ixilema vyakala sa makupa a “Ohuserya Mwawiiseela” naari mu “Otholathola” mu liivuru Mpuhe Okumi Okhala Wookhala!. Wi mphwanaphwanihe, vaavaa munathokororyaanyu mwaha 37, nyuwaano munanwerya othariha malakiheryo a exilema Yehova Onahaala Onivaha Ichu Seiho Sinanthowa.

MMUKHAVIHERYE OOHUSERYA ANYU MUKHALELO WA OVILELA MAKACAMIHO

13. Yesu aareherenrye hai oohuserya awe ntakhara waakaahiwa?

¹³ Yesu aahiloca mwawuuluulela wa oohuserya awe wi awo yaahaala waakaahiwa ni akina, ophiyerya tho amusi. (Mat. 5:11; 10:​22, 36) Ahalaka vakhaani okhwa, Yesu aahiloca wa oohuserya awe wi awo yaahaala ohoolela okhwa nthowa na omulapela Yehova. (Mat. 24:9; Yoh. 15:20; 16:2) Owo ahaaceenyerya okhala oovyaka mmuteko aya woolaleerya. Ntoko yootakiherya, owo aahaaleela awo wi ehaakhulaneke ni muchu yoowo aaloca moovaanyihana ni soororomela saya nave wi ekhaleno ekaasoope wa yeeyo yaalocaaya ni yaapakaaya.

14. Nni nimukhaviherye hai oohuserya wiirehererya ntakhara waakaahiwa? (2 Timotiyu 3:12)

¹⁴ Hiiha ntoko Yesu, nnanwerya omutharihela oohuserya yeeyo asinthamwene awe akina oomutekoni, asinthamwene naari amusi anahaalaaya oloca naari opaka nthowa na omuhuserya Piipiliya. (Mwaalakhanye 2 Timotiyu 3:12.) Asinthamwene akina ananwerya omutheyaka nthowa nawi vano owo onneererya okhala mwawiiwanana ni mahusiheryo a Mpiipiliyani. Ophiyerya tho amusi akina ananwerya omwaakaahaka wa yeeyo onahuseryeiye Mpiipiliyani. Ti waphaama oloca woosiilo ene vooloca sa waakaahiwa. Mmukhalelo yoola, oohuserya hakhala ootikhiniheya ni yeeyo enahaala weereya nave onanwerya osuwela phaama echu ya oloca ni yaweera vaavaa akina anamwaakaahaaya.

15. Tiheeni enahaala omukhaviherya oohuserya a Piipiliya ovilela waakaaha wa amusi?

¹⁵ Wakhala wi oohuserya anyu onnaakaahiwa mu emusi, mmukhaviherye wuupuwelela ntakhara heeni amusi awe eryaaya oonyeenyeya. Akhweya amusi awe enuupuwela wi Anamoona a Yehova enahusiha ichu sawootha naari akhweya enuupuwela wi awo achu oonanara murima. Ophiyerya tho achu akina a emusi ya Yesu hiyaahakalala ni yeeyo owo aapakeiye. (Mar. 3:21; Yoh. 7:5) Mmuhusihe oohuserya anyu okhala oopixa murima ni  okhala oovyaka wa akina, ophitaanyeryavo achu a mweemusini.

16. Nni nimukhaviherye hai oohuserya a Piipiliya oloca soororomela sawe mmukhalelo waphaama?

¹⁶ Naamwi vaavaa amusi enooniheryaaya nchuno, oohuserya onnakhala a miruku moorweela wa ohithariha soothene mu elukuluku emoharu. Wakhala wi owo oheerano yeeyo, onanwerya waanyeenyeiha amusi awe, nave ntoko yookhumelela, awo ananwerya ohichuna oloca ni yoowo wanaawiili vooloca sa soororomela saya. Mwawiihiiha, mmuceenyerye oohuserya anyu oloca soororomela sawe mmukhalelo yoowo onahaala weeriha ohiya mukhora woohuleyeene ntakhara ovaanela wa muhoolo. (Ako. 4:6) Akhweya owo onanwerya waawopa amusi wi ewerye oxekurya esaiti jw.org. Mmukhalelo yoola, awo ananwerya ohuserya sincipale vooloca sa Anamoona a Yehova ophiyerya vaavaa enachunelaayavo nave ananwerya othanla sooleeliherya seiho anahaalaaya waalakhanya naari ohuserya.

17. Muni mmuvyakihe hai oohuserya ovootha miyoonelo sooheseya seiho akina aryaayano vooloca sa Anamoona a Yehova? (Moone tho eruku.)

¹⁷ Nyuwaano munanwerya opharihela miyaha soohiyanahiyana sa mu jw.org “Makoho Anapakiwa Wiiliwiili” wi mmukhaviherye oohuserya anyu orehererya maakhulo ookhweya yaawo amusi naari asinthamwene awe oomutekoni anahaalaaya opaka. (2 Tim. 2:​24, 25) Omakuchuwelo wa yoohuserya ti yoohuserya mwaalikhele nikupa nnaloca wi: “Achu Akina Ani” mu liivuru Mpuhe Okumi Okhala Wookhala!. Mmuceenyerye oohuserya anyu wiikhoveleliha waakhula ni masu awe. Muhoovelele omvaha sooleeliherya vooloca sa mukhalelo owo onahaaleiye orehererya maakhulo awe. Mikhalelo seiha soophara muteko, inanwerya omukhaviherya waakiha nroromelo nawe moororomeleya.

18. Muni mmuceenyerye hai oohuserya a Piipiliya okhala mulaleeryi oohipatisiwa? (Mateyu 10:27)

¹⁸ Yesu aahaaceenyerya oohuserya awe olaleerya michaka saphaama vanlakani vene. (Mwaalakhanye Mateyu 10:27.) Vaavaa oohuserya onapaceryeiye olaleeryaka empa ni empa, owo onahaala woona nikhaviheryo na Yehova nave onahaala ohuserya omuroromelaxa Yoowo. Ti mwawiihai munahaalaanyu omukhaviherya oohuserya anyu weerano yeeyo ntoko yoolakelela awe? Vaavaa mukipici woolaleerya onalokohiwaaya mmulokoni, mmuceenyerye oohuserya anyu wuupuwelela mukhalelo owo onahaaleiye weera wi aphwanelele ntoko mulaleeryi. Mmuleele owo wi wiiliwiili onnakhala wookhweyaxa olaleerya elukuluku ya mukipici. Echu ekina enahaala omukhaviherya, ori opacerya opaka makupa aanaxikola yaawo aneereya mmithukumano sa veeri va esumana. Vaavaa owo oneereryeiye ophwanelela operekha miyaha sa anaxikola, owo onnahuserya othariha phaama soororomela sawe.

 MOONIHERYE WI MUNNAMUROROMELA OOHUSERYA ANYU

19. Yesu oonihenrye hai waaroromela oohuserya awe, nave nni nimutakiherye hai?

¹⁹ Ahaakumve Yesu oya wirimu, owo aahiloca wa oohuserya awe wi awo yaahaala okhala vamoha ni yoowo. Awo hiyaawiiwexenxe wi Yesu aaloca vooloca sa oya wawe wirimu. Naamwiihiiha, owo aatikitheryen’ye mu ororomeleya waya ohiya mu minikwa saya. (Yoh. 14:​1-5, 8) Owo aahisuwela wi yaanachuna elukuluku wi yiiwexexe ichu ikina, ntoko ewehereryo ya wirimu. (Yoh. 16:12) Hiiha ntoko Yesu, nnaphwanela wooniherya wa oohuserya ahu wi noosuwela wi awo annachuna omuhakalaliha Yehova.

20. Ti mwawiihai murokora mmoha o Malawi oonihenryeiye omuroromela oohuserya awe?

²⁰ Munaphwanela ororomela wi oohuserya anyu onahaala opaka echu yaphaama. Moone yootakiherya emoha ya murokora awiichaniwa Chifundo, yoowo onakhala o Malawi. Owo aahipaceryiha yoohuserya ya Piipiliya ni namwali awiichaniwa Alinafe ampharihelaka liivuru Mpuhe Okumi Okhala Wookhala!. Vaavaa yaakwaanxaaya othokororya mwaha 14, Chifundo aahimukoha oohuserya awe yeeyo ooneiye vooloca sa opharihela iruku mmalapelo. Alinafe aahikacamiheya nave aahaakhula: “Ela yoothanla ya muchu!” Voocharela, Chifundo aahuupuwela wi Alinafe aahaala ohiya ohuserya mwawaakuveya. Nyenya moopixa murima aahititelela weeciha yoohuserya ni Alinafe, aweheryaka wi moovira wa elukuluku owo onahaala wiiwexexa mwaha ene. Ivinrevo miyeeri vakhaani, Chifundo aahimpakela nikoho mu mwaha 34: “Ti mwawiihai yoohuserya ya Piipiliya ni ohuserya vooloca sa Muluku eeparipari, Yehova, mphunraanyuvo ophiyerya vano?” Chifundo onnathariha mukhalelo Alinafe aakhunleiye, aahi: “Owo aahiloca ipontu sincipale sootikhiniha, emoha wa seiho yaari wi Anamoona a Yehova hanavolowela saweera seiho Piipiliya onaloceiye wi ti soonanara.” Ohoolo waya, Alinafe aamaala opharihela iruku nave aphwanelela opatisiwa.

21. Nni nlipihe hai nchuno na oohuserya okhalaka mwawiiwanana ni eparipari?

²¹ Naamwi ari Yehova “onannuwiha,” hiyaano nookhalano murici wa omukhaviherya oohuserya a Piipiliya oya vahoolo. (1 Ako. 3:7) Ninnapaka sincipale opwaha ohusiha yeeyo Muluku onachuneiye wi awo epake. Hiyaano ninnaakhaviherya wunnuwiha osivela otokweene wa Yehova. Ninnaaceenyerya tho wooniherya osivela waya wa Yehova emukuhaka Owo mu nipuro noopacerya. Nave ninnaahusiha omuroromela Yehova variyari va makacamiho. Vaavaa nnooniheryaahu wa oohuserya ahu a Piipiliya wi ninnaroromela wi owo onachuna omuhakalaliha Yehova, hiyaano ninnamukhaviherya okhalano olipa murima wi athanle omurumeela Yehova.