1-2. Mwawiiwanana ni Salmu 25:14, tiheeni nnaphwanelaahu weera wakhala wi ninnachuna okhalano onthamwene woolipa ni Yehova?

 MIKHALELO taani munoonaanyu okhala soochuneyaxa mu onthamwene? Akhweya mwaahaala wi asinthamwene aphaama ti yaale anasivelana ni okhaviheryana mukina ni mukhwaawe. Mwawooneya, waamukhala woovila wa nyuwaano oloca wi woova, mukhalelo woochuneya mu onthamwene. Nyenya, ntoko enooniheryaaya yoorepa eri mathipelo a mwaha yoola, yaale anachuna okhalano onthamwene woolipa ni Yehova, anaphwanela ‘omoovaka yoowo.’—Mwaalakhanye Salmu 25:14, PMM.

² Moohipwacha elukuluku nimalinhaahu nimurumeelaka Yehova, oothene ahu nnaphwanela omoovaka mmukhalelo woophwanelela. Omoova Muluku onataphulela eheeni? Ti mwawiihai nneeraahu nihuserye omoova Yehova? Nave tiheeni nnahaalaahu ohuserya vooloca sa omoova Muluku orweela wa muhooleli Opatiya, Mulipa Mukucho Mutokotoko Yehoyata ni Mwene Yowasi?

3. Mutharihe mukhalelo woova onanikhapelelaaya.

³ Akhweya ninnakhala awoova vaavaa nnuupuwelaahu wi echu yoonanara enanwerya weereya. Woova ntoko yoola ti wamphurelo nthowa nawi onnanikhaviherya opaka soolakelela saphaama. Ntoko yootakiherya, woova omora onneeriha wi nikhaleno ephoole vaavaa nneecaahu waacamela muxerexere wa miyaako. Woova ophoreihiwa onnaneeriha osepa mapuro awoopiha. Nave woova oyeleela onthamwene ni muchu yoowo nnamusivelaahu, onnanikhaviherya ohiloca naari opaka echu yaahaala omphoreiha.

4. Omoova Muluku wa mukhalelo taani Satana onachuneiye wi nikhaleno?

⁴ Satana onachuna wi hiyaano nimooveke Yehova mmukhalelo  woohiphwanelela. Satana onachuna oneeriha wuupuwelaka hiihaa ntoko Elifasi, yoowo uupuwela wi Yehova ilukuluku soothene onakhala oonyeenyeya, tookuha mathowa nave wi tahi wookhweya omuhakalaliha. (Yupu 4:18, 19) Yoolakelela ya Satana ti yawi hiyaano nimooveke vancipale Yehova, nave wookuchulani nihiye omurumeela Yoowo. Wi nsepe muraakho yoola, nnaphwanela wunnuwiha mukhalelo waphaama wa omoova Yehova.

5. Omoova Muluku onataphulela eheeni?

⁵ Omoova Yehova onataphulela omusivela vancipale Yene ni ohipaka echu vyakala yaahaala onanariha onthamwene ahu ni Yoowo. Ntoko yootakiherya, Yesu aahikhalano mukhalelo yoowo wa “omoova . . . Muluku.” (Ahe. 5:7) Owo haamoova Yehova mmukhalelo woohiphwanelela. (Yes. 11:2, 3) Ohiya yeeyo, owo aanamusivela vancipale Yehova nave aanachuna omwiiwelela. (Yoh. 14:21, 31) Hiihaa ntoko Yesu, hiyaano ninnamucicimiha ni omutikhina vancipale Yehova, woona wi noosuwela wi owo toosivela, tamiruku, tawookololowa ni toowerya. Hiyaano tho noosuwela wi Yehova onnanisivela vancipale nave wi soothene nnapakaahu inanwerya omuhiciha naari omuhakalaliha.—Sal. 78:41; Mas. 27:11.

6. Mmukhalelo taani nneeraahu niwerye ohuserya omoova Yehova? (Salmu 34:11)

⁶ Hiyaano haniyariwe nsuwelaka mukhalelo waphaama wa omoova Yehova, mwawiihiiha, ti woochuneya ohuserya weerano yeeyo. (Mwaalakhanye Salmu 34:11.) Mukhalelo mmoha wa weerano yeela ori moorweela wa ovarerya soopatuxiwa. Vaavaa nnavareryaahu “ichu sipatuxiwe” ni Yehova, ninnoona miruku, owerya ni osivela wawe otokweene ntakhara hiyo. Nave eyo ennaaceererya osivela ni ncicimiho nahu mwa yoowo. (Aro. 1:20) Murokora mmoha awiichaniwa Adrienne, ooloca: “Vaavaa kinavareryaaka ichu soothene Yehova opankeiye ni mukhalelo owo oreiye amiruku, ennakeeriha wiiwexexa wi owo chiryeene oosuwela yeeyo eri yaphaama wa miyo. Vano, waakhanle wi owo Mpatuxa aka, ntakhara heeni kaahaalaaka opaka echu yeeyo yaahaala onanariha onthamwene aka ni yoowo? Miyaano nkinachuna opaka echu vyakala enahaala onanariha onthamwene aka ni Yehova.” Munoona hai ovinyerya esumana yeela waavya elukuluku wi muupuwelele ichu savakhaani Yehova opatunxeiye? Weerano yeela onahaala wookhaviheryaani waaceererya ncicimiho ni osivela wanyu ntakhara Yehova.—Sal. 111:2, 3.

7. Ti mwawiihai nivekelo nnanikhaviheryaaya omoova Yehova?

⁷ Echu ekina enahaala onikhaviherya wunnuwiha woova ntakhara Muluku ori moorweela wa ovekela moohihiyererya. Vaavaa nnavekelaahu wiiliwiili, Yehova onnakhala eeparipari wa hiyaano. Vaavaa nnavekelaahu wa Yehova nivekaka ikuru wi nivilele, ninnoona nikhaviheryo nawe nave ninnuupuxeryeya wi owo toowerya. Vaavaa nnamuthamalelaahu Yehova ntakhara mukucho wa Mwanawe, ninnuupuxeryeya mukhalelo owo onansiveleiye. Nave vaavaa nnahoolelaahu nikacamiho nave nimveka Yehova wi anikhaviherye, ninnuupuxeryeya mukhalelo owo oreiye amiruku. Mavekelo ntoko yaala, annaaceererya omucicimiha wahu Yehova nave annalipiha yoolakelela ahu ya ohipaka echu yeeyo yaahaala onanariha onthamwene ahu ni yoowo.

8. Tiheeni enahaala onikhaviherya ohiyeleela omoova wahu Yehova?

⁸ Wi nihiyeleele omoova wahu Yehova, nnaphwanela omuhuserya Piipiliya wi niphure orweela wa sootakiherya saphaama ni soonanara. Hankooni nloce sa alapeli eeli oororomeleya a Yehova—Muhooleli a empa ya Mwene Akape, Opatiya ni Mulipa mukucho Mutokweene Yehoyata. Voocharela, nnahaala ohuserya vooloca sa yootakiherya ya Mwene Yowasi o Yuta, yoowo aapacenrye phaama, nyenya voocharela, ahiya omurumeela Yehova.

9. Ti mwawiihai omoova Yehova waamukhavihenryaaya Opatiya? (1 Mamwene 18:3, 12)

⁹ Mu ekwaha yoopacerya Piipiliya onaloceiye sa Opatiya b, owo oni: ‘Opatiya aanamoova vancipale Yehova.’ (Mwaalakhanye 1 Mamwene 18:3, 12, PMM.) Ti mwawiihai omoova Yehova mmukhalelo woophwanelela waamukhavihenryaaya Opatiya? Noosuwela wi owo aari mulopwana oororomeleya. Ti nthowa nene mwene aamuthanlileiye ntoko muhooleli a empa awe. (Mulikanyihe ni Nehemiya 7:2.) Waari woova yoola wamvanhe Opatiya olipa murima otokweene, nave mweeparipari, owo aahaala ochuna mukhalelo yoowo. Ntakhara heeni? Nthowa nawi mu elukuluku yeele, Mwene Akape taalamulela. Owo “aahaachekela Apwiya waapwaha [mamwene] oothene yaarivovo ahikhanle.” (1 Mam. 16:30, PMM) Ohiya yeeyo, mwaara a Akape, Yesapeli, aamulapela Paala, nave owo aanamwiica vancipale Yehova, ophiyerya wi aaheererya omaliha moomalela malapelo eeparipari a mahimo khumi a Isarayeli. Owo aahiphiyerya owiipha alipa a miririmu ancipale a Yehova. (1 Mam. 18:4) Moohikhwa minikwa, Opatiya aamulapela Yehova mu elukuluku yoovilaxa.

10. Olipa murima wa Opatiya waamuceenyenrye opaka eheeni?

¹⁰ Olipa murima wa Opatiya waamuceenyenrye opaka eheeni? Vaavaa Yesapeli aapacenryeiye owiikara ni owiipha alipa a miririmu a Muluku, Opatiya aahaavitha alipa a miririmu a Yehova awaakhwana 100 mmakhukuni meeli, ‘nikhuku nene makhumi mathanu, nikina tho makhumi mathanu anaavaha yoolya ni maahi.’ (1 Mam. 18:13, 14, PMM) Waakhanle wi Yesapeli aasuwela yeeyo, mweeparipari, Opatiya aahaala wiiphiwa. Akhweya Opatiya aari awoova, nthowa nawi owo haachuna okhwa. Nyenya osivela owo aareiyeno ntakhara Yehova ni alapeli awe waari otokweenexa, ophiyerya wi owo aari ooreheryeya oyeleela okumi awe waakhanle woochuneya.

11. Ti mwawiihai alapeli a Yehova a mmahiku ahu anamutakiheryaaya Opatiya? (Moone tho eruku.)

¹¹ Mmahiku ahu yaala, alapeli ancipale a Yehova anakhala mmapuro yaawo muteko ahu owatiihiwaaya. Hiihaa ntoko Opatiya, anna yaala oosiveliwa annatitelela wooniherya ncicimiho wa alamuleli, nave awo annamvaha Yehova yeeyo  onaphwaneleiye—annamulapela pahiru yoowo. (Mat. 22:21) Awo annooniherya wi annamoova Muluku moorweela wa omwiiwelela yoowo ohiya owiiwelela achu. (Saw. 5:29) Awo annatitelela olaleerya ni othukumana moovitheya. (Mat. 10:16, 28) Ohiya yeeyo, awo annapaka soothene anaweryaaya wi anna ni arokora ekhaleno yoolya yoomunepani anachunaaya. Moone yootakiherya ya Henri. Owo onakhala mu elapo emoha yo Afrika yeeyo muteko ahu waawatiihiwaaya mweelukuluku aya. Variyari va elukuluku yeeyo, Henri aahiivaha wi aavahereryeke anna soolaleeryiwa. Owo ooloca: “Miyaano ka muchu oomaala, nthowa na yeeyo, kinnaroromela wi ncicimiho naka ntokweene ntakhara Yehova ti waakikhavihenrye okhalano olipa murima wawaakhwanela.” Apwanne munnoona wi munanwerya okhalano olipa murima ntoko yoowo Henri aareiyeno? Mweeparipari aai, wakhala wi munnamoova Yehova mmukhalelo woophwanelela.

12. Ti mwawiihai Yehoyata ni mwaariye yoonihenryaaya wi yaari oororomeleya wa Yehova?

¹² Mulipa mukucho Yehoyata aanamoova vancipale Yehova, nave ti woova yoola waamukhavihenrye okhala oororomeleya ni waakiha malapelo aweela. Ela yaahikhala yookwakwaleya vaavaa mwaana a Yesapeli, Ataliya, aapacenryeiye olamulela o Yuta ahirinono ophwanelela. Ni mathowa aphaama, achu yaanamoova Ataliya. Owo aari a nlala ni anrima nave aanachuna vancipale okhala mwene amwaamuthiyana ophiyerya wi aahiwiipha asisulwaawe wi awerye waakhwaniherya yoochuna awe! (2 Math. 22:10, 11) Nyenya mmoha a asisulwaawe, Yowasi, aahiwerya okophola nthowa nawi mwaara a Yehoyata, Yehosapati, aahimvitha. Owo ni iyawe yaahimvitha mwaana nave yaahimukhapelela yoowo. Waari mukhalelo yoola Yehoyata ni Yehosapati yaakhavihenryaaya okhapelela muyareriwo wa mamwene yoowo waahaala orwa wa Tavite. Yehoyata aahikhala oororomeleya wa Yehova nave heemerenrye wi woova omuhiihe opaka yeeyo yaari yaphaama.—Mas. 29:25.

13. Vaavaa Yowasi aareiyeno iyaakha thanu napiili, ti mwawiihai Yehoyata oonihenryeiye wanaawiili ororomeleya wa Yehova?

¹³ Vaavaa Yowasi aareiyeno iyaakha thanu napiili, Yehoyata aahooniherya wanaawiili wi owo aari oororomeleya wa Yehova. Owo aahuupuwela mukhalelo wa omweeriha Yowasi, yoowo aari muyareriwo wa Tavite okhala mwene. Waakhanle wi marehereryo awe hiyaakhumelenle phaama, mweeparipari, Yehoyata aahaala wiiphiwa. Nyenya, ni mareeliho a Yehova, soothene saakhumelela phaama. Nnikhaviheryo na Alevi ni ahooleli akina, Yehoyata aaheeriha wi Yowasi akhale mwene nave Ataliya iiphiwe. (2 Math. 23:1-5, 11, 12, 15; 24:1) Nave Yehoyata aamulipeliha “mwene vamoha ni muloko opaka waataana ni Apwiya wi yaawo ekhale Muloko wa Apwiya,” Yehova. (2 Mam. 11:17, PMM) Yehoyata “aahaathanla tho alipa oolipelela a mikhora ya mu empa ya Apwiya wi ahikhalevo anii avolowemo ari mmwiikhoni” naari ooriipiheya.—2 Math. 23:19, PMM.

14. Ti mwawiihai Yehoyata aareelihiweiye nthowa na omucicimiha Yehova ilukuluku soothene?

¹⁴ Yehova aaloca wi ‘aahaala waacicimihaka yaale yii emucicimiheke.’ Nave ti yeeyo ene enreiye ni Yehoyata. (1 Sam. 2:30, PMM) Ntoko yootakiherya, owo oophitaanyerya yaweereya awe Mpiipiliyani, wi niwerye ohuserya orweela wa yoowo. (Aro. 15:4) Vaavaa Yehoyata aakhwileiye, aahicicimihiwa moorweela wa ovithiwa “mu epooma ya Tavite vamoha ni mamwene wanthowa na ichu saphaama aaweereleiye aIsarayeli sa Muluku ni empa awe ene.”—2 Math. 24:15, 16, PMM.

15. Tiheeni nnahuseryaahu orweela wa yaweereya ya Yehoyata? (Moone tho eruku.)

¹⁵ Yaweereya ya Yehoyata enanwerya onikhaviherya waaceererya omoova wahu Yehova.  Atokweene ananwerya omutakiherya Yehoyata moorweela wa waavya ilukuluku soothene mukhalelo sa okhapelela muloko. (Saw. 20:28) Awunnuwelavo ananwerya ohuseryavo orweela mu yootakiherya ya Yehoyata wi wakhala wi annamoova Yehova ni otitelela okhala oororomeleya, Owo onanwerya waapharihela wi epake yookhwela Awe. Owo harwa aanyanyala. Nave amiravo ananwerya ohuserya orweela wa yootakiherya ya Yehova moorweela wa waakhaliha mwa ncicimiho yaale ari awuuluvala, hiihaa ntoko Owo enreiye ni Yehoyata, xaxaxa yaale anamurumeela Yehova mu iyaakha sincipale. (Mas. 16:31) Nave wookuchulani, oothene hiyo nnanwerya ohuserya nihusiheryo ni Alevi vamoha ni ahooleli akina yaawo yaamukhavihenrye Yehoyata. Hankooni naakhaviheryeke “yaale anahoolela” niwiiwelelaka yaawo.—Ahe. 13:17.

16. Tiheeni yoonihenrye wi Yowasi haamoova Yehova mweeparipari?

¹⁶ Yehoyata aamukhaviherya mwene Yowasi okhala muchu aphaama. (2 Mam. 12:2) Ntoko yookhumelela, vaavaa aareiye mmiravo, Yowasi aanachuna omuhakalaliha Yehova. Nyenya Yehoyata amanle okhwa, Yowasi aahipacerya ovoloweliwa ni mamwene yaawo yaahimwiiwelela Yehova. Nthowa na yeeyo, owo ni achu awe ‘yaapacerya waalapa apoco a muluku. . . ni iruku ikina sa amuluku atheru.’ (2 Math. 24:4, 17, 18, PMM) Yehova aahithanana vancipale ni yeeyo. Naamwiihiiha, owo ‘aahaarumihela alipa a miririmu a waalopola ni waakookiherya wa Apwiya, nto achu hiyaakhwenleru owiiwelela.’ Awo hiyaachunneru naari mano vakhaani onwiriyana Sakariya, yoowo aari mulipa a miririmu ni mulipa a mukucho a Yehova ni pirimu a Yowasi. Yahaakhanle  emusi ya Sakariya, Yowasi haki akhale. Nyenya owo hoonihenrye othamalela wa emusi yeeyo yaamukhapelenle nave aahilamulela wi Sakariya iiphiwe.—2 Math. 22:11; 24:19-22.

17. Tiheeni yaamweerenle Yowasi nthowa na ohimoova Yehova?

¹⁷ Yowasi haamoova Yehova mmukhalelo woophwanelela, ti nthowa nene ichu sincipale soonanara seeren’yaaya wa yene. Yehova aaloca: “Yaawo anakinyemula anarwa eyevihiwa.” (1 Sam. 2:30, PMM) Wookuchulani, naamwi owo aarino “anakhoco ancipale,” Yowasi aahivoothiwa nnikhuuru nikhaani na anakhoco o Siriya, yaawo yaamuhiyenrye “makhwaca matokotoko.” Vaavaa Asiriya yaaronwaaya, Yowasi aahiiphiwa ni alapeli awe wanthowa na omwinlela ikuhu Sakariya, yoowo aamwiiphaleiye. Owo aari mwene oonanaraxa, ophiyerya wi “haavithiwe mmahiye a mamwene.”—2 Math. 24:23-25; mmoone “mwaana a Parakiya” mu enoota ya ohuserya ya Mateyu 23:35, a Ekunya.

18. Mwawiiwanana ni Yeremiya 17:7, 8, tiheeni nnaphwanelaahu weera wi nihikhale ntoko Yowasi?

¹⁸ Tiheeni nnahuseryaahu moorweela wa yootakiherya ya Yowasi? Mwiri mmoha orino mitathaari soohilipa, onnachuna nikhaviheryo wi weemele. Wakhala wi wooyeleela nikhaviheryo nenlo, echeku enanwerya wuuwiha. Emohamoha yaaheereya ni Yowasi. Owo aahikhalano nikhaviheryo na Yehoyata, nyenya amanle okhwa, owo aahivoloweliwa ni alipa oomwaryeya, nave aahuuwa omunepani, akhala oohiroromeleya wa Yehova. Niphwanaphwaniho nenla ninnooniherya wi hannaphwanela omwiiwelela Yehova pahiru wakhala wi amusi ahu naari akina mmulokoni annanivaha ntakiheryo ni nceenyeryo wi neereno yeeyo. Wakhala wi ninnachuna okhalano onthamwene woolipa ni Yehova, nnaphwanela wunnuwiha osivela wahu ni omoova wahu yoowo, moorweela wa omuhuserya Piipiliya, wuupuwelela ni ovekela.—Mwaalakhanye Yeremiya 17:7, 8; Ako. 2:6, 7.

19. Tiheeni Yehova onanivekeiye?

¹⁹ Mweeparipari, yeeyo Yehova onanivekeiye henakhala yoovila. Echu yeeyo owo onachuneiye ennatharihiwa mu Eklesiyaste 12:13, PMM, yoowo oni: “Omoova Muluku ni ochariha malamulo awe. Wa muchu, ti yeelaru pahi.” Wakhala wi ninnamoova Yehova, nnanwerya ohoolela yaweeha vyakala naari nikacamiho na omwaahiyu hiihaa ntoko Opatiya ni Yehoyata. Hiyaavo echu enahaala onanariha onthamwene ahu ni Yehova.