1-2. Tiheeni Piipiliya onaloceiye vooloca sa mamwene makina o Isarayeli?

 PIIPILIYA onnaaloca alopwana opwaha 40 yaawo yaalamulenle ntoko mamwene o Isarayeli. a Saweereya sa Mpiipiliyani ti soororomeleya xaxaxa vaavaa saalocaka vooloca sa alopwana yaawo nave sinnuupulula mikhalelo saphaama vooloca sa akina a yaawo. Ntoko yootakiherya, ophiyerya tho mamwene aphaama yaahipaka ichu seiyo saari soonanara. Muthokororye sa Mwene aphaama, Tavite. Yehova aahi: “Namuteko aka Tavite . . . aanakichara ni murima awe woothene, eerakano pahiru yeeyo eri yawookololowa wa miyo.” (1 Mam. 14:8, PMM) Nyenya muupuwele wi mulopwana yoola aahipaka mararuwo ni muthiyana ootheliwa ene nave apaka marehereryo wi aiyawe yiiphiwe okhoconi.—2 Sam. 11:4, 14, 15.

² Mmakupa makina, mamwene mancipale yaawo yaari oohiroromeleya yaahipaka ichu ikina saphaama. Muthokororye yaweereya ya Rehopowamu. Vamiithoni va Yehova, owo “aaheera yeeyo yaari yoonanara.” (2 Math. 12:14) Mwawiihiiha, Rehopowamu aahiiwelela nlamulo na Yehova wi mahimo khumi emwalamwale mu omwene awe. Owo tho aaheeriha wi nloko nawe niphurevo moorweela wa olipiha ipooma saya, aakhaviheryaka achu a Muluku wiikhapelela wa amwiicani aya.—1 Mam. 12:21-24; 2 Math. 11:5-12.

 3. Minikwa taani nnahaalaahu okhalano, nave tiheeni nnahaalaahu othokororya mmwaha yoola?

³ Vaavaa nnaalakhanyaahu vooloca sa mamwene o Isarayeli, nnanwerya okhalano minikwa. Waakhanle wi mamwene o Isarayeli yaahipaka ichu saphaama ni soonanara, ti mwawiihai Yehova aalakeleleiye waakhanle wi mwene mmoha aari oororomeleya naari hooye vamiithoni  vawe? Naakhulo na nikoho nenla nnahaala onikhaviherya wiiwexexa yeeyo mmoha ti mmoha a hiyaano onaphwaneleiye weera wi amuhakalalihe Yehova. Mmwaha yoola, nnahaala othokororya mikhalelo miraru seiyo Yehova akhweya aathokoronryeiye awaalikhelaka mamwene yaala o Isarayeli: Yeeyo awo yaaryaayano va murimani, ocharuwa waya nave waakhanle wi awo yaamulapela Yehova mwawookololowa.

OMUSIVELA YEHOVA NI MURIMA WOOTHENE

 4. Ohiyana taani waarivovo variyari va mamwene oororomeleya ni oohiroromelya?

⁴ Mamwene yaawo yaamuhakalalinhe Yehova yaanamulapela yoowo ni murima woothene. b Mwene aphaama Yehosafati “aamwaamvye Yehova ni murima woothene.” (2 Math. 22:9) Nlocaka sa Yosiya, Piipiliya onii: ‘Ahaakumve okhala mwene Yoshiya haarivovo mwene mukina si yoowo, aahaala orukunuwela wa Yehova ni murima awe woothene.’ (2 Mam. 23:25, PMM) Hanka vooloca sa Solomoni, yoowo opanke ichu soonanara omakuchuwelo wa okumi awe? Piipiliya onii: “Murima awe woothene hiwaari mwa Apwiya Muluku awe.” (1 Mam. 11:4, PMM) Nave vooloca tho sa Apiya mwene mukina oohiroromela, Piipiliya onii: “Murima awe woothene hiwaari mwa Apwiya Muluku awe.”—1 Mam. 15:3, PMM.

 5. Enataphulela eheeni omurumeela Yehova ni murima woothene?

⁵ Vanonto, enataphulela eheeni omulapa Yehova ni murima woothene? Muchu onamurumeela Yehova ni murima woothene haneerano yeeyo mookhinyereryeya naari mu ilukuluku saphaama. Moohiyana ni yeeyo, owo onamurumeela Yehova aceenyeryiwaka ni osivela ni ncicimiho ntakhara yoowo. Nave owo onnatitelela okhalano mikhalelo seiha moolipa ntakhara Yehova mu okumi awe woothene.

 6. Nni nikhapelele hai murima ahu? (Masiposipo 4:23; Mateyu 5:29, 30)

⁶ Nnii naatakiherye hai mamwene oororomeleya o Isarayeli ni omurumeela Yehova ni murima woothene? Moorweela wa osepa ovolowela woonanara yoowo onahaala weeriha oceecheiha osivela wahu wa Yehova. Ntoko yootakiherya, mathatelo ahu ni yeeyo nnapakaahu inanwerya okawanya murima ahu. Nnaphwanela tho wiikasoopa wa asinthamwene nnaathanlaahu ni ohikhalano muupuwelo wawi ikhorowa naari oreela, ichu soochuneyaxa mu okumi. Noona wi yookhala echu vyakala enaceecheiha osivela wahu wa Yehova, nnaphwanela weeravo echu mwawaakuveya wi nikhale ootaphuwa wa yawoopiha.—Mwaalakhanye Masiposipo 4:23; Mateyu 5:29, 30.

 7. Ntakhara heeni ti woochuneya osepa ovolowela woonanara?

⁷ Hannaphwanela weemererya wi murima ahu okawanyeye. Wakhala wi hinaano ekaasoope, nnanwerya wiiwoka nuupuwelaka wi woona wi ninnapaka ichu sincipale soomunepani, ovolowela woonanara hotannya nikacamiho mwa hiyo. Muupuwele sa niphwanaphwaniho nla: Mwaanyiherye wi nyuwaano muri vaate va empa anyu variyari va nihiku nooriiryaxa. Voocharela, munnavolowa mpa nave munnamulikaara aare kontisiyonaatu wi mpa ovihekemo. Tiheeni yaahaala weereya waakhanle wi muhin’ye nsele noohuleya nene? Mwawaakuveya echeku yooriirya yaahaala ovolowa ni osareya mpa. Tiheeni nnahuseryaahu? Mmakupa oomunepani, nnaphwanela opaka sincipale ohiya pahiru wiilyiha omunepani wi nikhapelele onthamwene ahu ni Yehova. Nnanwerya tho oloca wi, nnaphwanela owala mukhora ntakhara ovolowela woonanara, mwaweerano hiiha “echeku” yooriirya ya elapo yeela ni mikhalelo seiho Yehova ohineemereryeiye hasivolowa mmurimani mwahu ni onikawanya.—Aef. 2:2.

OCHARUWA WEEPARIPARI WA SOOCHEKA

8-9. Tiheeni mwene Tavite ni mwene Esekiya yaapankaaya vaavaa yaasuwenlaaya wi Yehova haahakalanle ni yeeyo awo yeenraaya? (Moone ekaapa.)

⁸ Ntoko noonnaahu woopaceryani, Mwene Tavite aapaka soohesa itokweene. Nyenya vaavaa mulipa  a miririmu Natani aalonceiye ni yoowo vooloca sa mukhalelo Yehova ooneiye soocheka sawe, Tavite aahicharuwa mwawiiyeviha. (2 Sam. 12:13) Orweela wa masu awe anaphwanyeya mu Salmu 51, ninnoona wi chiryene owo aahicharuwa mweeparipari wa yeeyo eenreiye. Tavite tahi aarimwiipaka wi oocharuwa akhweya achunaka onwoka Natani naari osepa olakiwa .—Sal. 51:3, 4, 17, masu oohulela.

⁹ Mwene Esekiya tho aahimuchekela Yehova. Piipiliya onii: “Murima awe waakhala wawiirumiha, ekumiheryaka esara ya Muluku ntakhara yene ni ntakhara Yuta vamoha ni Yerusalemu.” (2 Math. 32:25) Ntakhara heeni Esekiya aahikhala awiirumiha? Akhweya owo aaniisoona okhala avasulu nthowa na muhakhu awe, waavootha wawe Asiriya naari moorweela wa openuxiwa ereca awe mootikhiniha. Nave tho akhweya waari nthowa na wiirumiha yoowo owo aamanleiye owooniha muhakhu awe woothene wa Apapulu, nave wanthowa na yeeyo mulipa a miririmu Yesaya aahiloca wa yoowo wi Yehova aananariwa ni yoowo. (2 Mam. 20:12-18) Hiiha ntoko Tavite , Esekiya aahicharuwa mwawiiyeviha. (2 Math. 32:26) Wookuchulani, Yehova aahimoona Esekiya ntoko mwene oororomeleya nave wi “aaneerano yawookololowa vamiithoni va Apwiya.”—2 Mam. 18:3, PMM.

10. Tiheeni Amasiya eenreiye vaavaa ookololiweiye?

¹⁰ Moohiyana, Mwene Amasiya o Yuta aaheerano yeeyo yaari yaphaama “nto ohiya ni murima woothene.” (2 Math. 25:2) Yoohesa taani owo aapankeiye? Yehova amanle omukhaviherya waatoloxa a Etomu, Amasiya aahaakokhorela amuluku aachu yaawo. c Nave vaavaa owo ookololiweiye ni mulipa a miririmu a Yehova vooloca sa yeeyo aapankeiye, mwene mwawiirumiha haachunne onwiriyana nave aahimuleela orowaka.—2 Math. 25:14-16.

11. Mwawiiwanana ni 2 Akorintu 7:9, 11, tiheeni nnaphwanelaahu weera wi nikhurumuweliwe ni Yehova? (Moone tho iruku.)

¹¹ Tiheeni nnahuseryaahu wa sootakiherya seiya? Nnaphwanela ocharuwa soocheka sahu ni opaka soothene nnaweryaahu wi nihikookele opaka soohesa imohamoha. Hanka wakhala wi atokweene a mmulokoni aanivaha ekano yammoori, akhweya naamwi mwaha owo ori mukhaanixa? Hannaphwanela woona wi Yehova hannamusivela naari wi atokweene annanaavyaavya. Ophiyerya tho wi mamwene oororomeleya o Isarayeli ikwaha ikina yaanavahiwa ekano ni wookololiwa. (Ahe. 12:6) Vaavaa nnaakhelaahu ekano, nnaphwanela (1) waakhulela mwawiiyeviha, (2) opaka matorokelo anachuneya, ni (3) ochariha, nimurumeelaka Yehova ni murima woothene. Wakhala wi noocharuwa soocheka sahu, Yehova onahaala onikhurumuwela.—Mwaalakhanye 2 Akorintu 7:9, 11.

OMULAPELA YEHOVA MMUKHALELO WAWOOKOLOLOWA

12. Tuuvi waari mukhalelo woochuneya wa mamwene oororomeleya?

¹² Mamwene yaawo Yehova aawooneiye okhala oororomeleya, yaahikhaviherya malapelo eeparipari. Nave yaahaaceenyerya achu a Yehova weerano emohamoha. Eparipari wi yaakhalano soohesa saya, hiiha ntoko noonnaahu. Nyenya awo yaahiiveleela moomalela wa Yehova nave ophiyerya tho wi yaahiilipixerya omaliha soophwaniherya mulaponi. d

13. Ntakhara heeni Yehova aamweera mwene Akape ntoko oohiroromela?

¹³ Nyenya ntakhara heeni Yehova aatharinheiye mamwene makina ntoko oohiroromeleya? Mweeparipari tahi wi ichu soothene awo yaapankaaya saari soonanara. Ophiyerya tho Mwene Akape yoowo aari oonanaraxa, aahooniherya wiiyeviha ni ocharuwa vaavaa aapankeiye makupa a omwiipha Napoti. (1 Mam. 21:27-29) Owo tho aahiteka ipooma nave tho aahiwana ikhoco ni ovootha ntakhara Aisarayeli.  (1 Mam. 20:21, 29; 22:39) Nyenya Akape aahipaka echu yeeyo yaari yoonanaraxa, wanthowa na ovolowela wa amwaariye owo aahiceenyerya olapeliwa amuluku atheru ni soophwaniherya. Nave owo hantonko ocharuwa moorweela wa weerano yeeyo.—1 Mam. 21:25, 26.

14. (1) Ntakhara heeni Yehova aamweera mwene Rohopowamu ntoko oohiroromela? (2) Tuuvi waari mukhalelo wawunlaana wa mamwene oohiroromeleya?

¹⁴ Moone yootakiherya ekina ya mwene oohiroromeleya—Rehopowamu. Ntoko noonnaahu woopaceryani, owo aahipaka ichu sincipale saphaama variyari va olamulelo awe. Nyenya vaavaa olamulelo awe waatikitheryeyaaya ni okhalaka woolipa, owo aahihiya Nlamulo na Yehova nave apacerya waalapela amuluku atheru. (2 Math. 12:1) Opacerya vaavaa, aamwi elukuluku eene amulapele Yehova, elukuluku eene aalapele amuluku atheru. (1 Mam. 14:21-24) Rohopowamu ni Akape, tahi yaari mamwene oopacerya yaawo yaapherunwe mu eparipari. Mweeparipari, nikacamiho na mamwene mancipale oohiroromeleya naari na okhaviherya malapelo atheru mmikhalelo soohiyanahiyana. Ti yawooneya wi, vamiithoni va Yehova okhaviherya malapelo eeparipari yaari echu yoochuneyaxa wi alakelele waakhanle wi mwene aari aphaama naari oonanara.

15. Ntakhara heeni olapela weeparipari ti woochuneya wa Yehova?

¹⁵ Ntakhara heeni mwaha vooloca sa malapelo waari woochuneya wa Yehova? Wi nipacerye, nthowa ti nawi mamwene ti waari murici aya waahoolela achu a Muluku mu malapelo eeparipari. Ohiya yeeyoru, malapelo atheru yaanaweeriha akina opaka soocheka itokweene ni ichu soonanara. (Ose. 4:1, 2) Nave wi nikuchule, mamwene ni achu oothene yaari awiiveleela wa Yehova. Ti nthowa nene Piipiliya onalikanyiheiye wivoliiherya waya mu olapela watheru ni mararuwo. (Yer. 3:8, 9) Vaavaa muchu onapakeiye mararuwo, owo onakhala oohiroromeleya wa muchu yoowo aaphwaneleiye  okhala oororomeleya, wa aiyawe naari amwaariye, nave mararuwo annatepa wiicelihaxa murima wa muchu yoowo ochekeliwe. Mmukhalelo mmohamoha, vaavaa mulapeli awiiveleela wa Yehova onivoliiheryeiye mmalapelo atheru, onamuchekela Yehova mmukhalelo wooluluwanya nave aruuhelaka wiicelaxa wa murima wa Yehova. e—Malam. 4:23, 24.

16. Vamiithoni va Yehova, ohiyana taani orivovo variyari va muchu aphaama ni muchu oonanara murima?

¹⁶ Nihusiheryo taani nnahuseryaahu? Tiyawooneya wi nnaphwanela okhala oolakelela ohiivoliiherya mmalapelo vyakala atheru. Nyenya nnaphwanela okhala mmalapelo eeparipari ni otitelela okhala oolipa, nimurumeelaka Yehova. Mulipa a miririmu Malakiya oothariha phaama ene ohiyana orivovo wa muchu aphaama ni muchu oonanara murima vamiithoni va Yehova. Owo oorepa: “Hiihaa munarwa musuwela tho ohiyana waya wa muchu aphaama ni yoole oonanara murima, wa muchu onaalapa Apwiya ni yoowo ohinaalapa.” (Mal. 3:18, PMM) Mwawiihiiha, hannaphwanela weemererya wi echu vyakala—naari ohiphaameya wahu ni soohesa sahu—siniceecheihe ophiyerya ohiya omurumeela Yehova. Ohiya omurumeela Yehova, yoocheka etokweene.

17. Ntakhara heeni munaphwanelaanyu okhalano ephoole vaavaa munamuthanlaanyu muchu oothelanano?

¹⁷ Waakhanle wi mwa muciye nave munnamwaavya muchu wi muthelane, apwanne munnawerya woona masu yaala a Malakiya anavolowelaaya mu omuthanla muchu othelanano? Muchu ananwerya okhalano mikhalelo saphaama, nyenya wakhala wi owo hanamurumeela Muluku eeparipari, apwanne muchu owo onanwerya okhala aphaama naari awookololowa vamiithoni va Yehova? (2 Ako. 6:14) Wakhala wi moothelana ni muchu yoowo, apwanne owo onahaala okhala muchu aphaama wa nyuwo mmakupa oomunepani? Muupuwele ela: Asaarawe mwene Solomoni, yaawo yahaamurumeela Yehova,  akhweya yaakhalano mikhalelo saphaama. Nyenya woona wi hiyaamurumeela Yehova, vakhaani vakhaani awo yaahikawanya murima wa Solomoni, ophiyerya wi owo aahiivoliiherya mmalapelo atheru.—1 Mam. 11:1, 4.

18. Tiheeni asitiithi anaphwanelaaya waahusiha anamwane aya?

¹⁸ Asitiithi ananwerya opharihela saweereya sa mamwene o Isarayeli wi yaakhaviherye anamwane aya wunnuwiha nchuno ntokweene na omurumeela Yehova. Mwaakhaviherye awo woona wi wa Yehova, okhala muchu aphaama naari oonanara murima, ori moorweela wa mukhalelo owo oniivoliiheryeiye mmalapelo eeparipari naari hooye. Mwaahusihe anamwane anyu orweela wa masu anyu ni sootakiherya sanyu vooloca sa yookhovelela yoomunepani—omuhuserya Piipiliya, ophiya mmithukumano ni mmuteko woolaleerya inaphwanela—okhala ichu soochuneyaxa mu okumi anyu. (Mat. 6:33) Wakhala wi himweenreno yeela, anamwane anyu ananwerya opacerya wuupuwela wi okhala Namoona a Yehova ori pahiru opaka makupa a “malapelo a emusi.” Ntoko yookhumelela, awo ananwerya okuha mu nipuro nanaawiili olapela weeparipari mu okumi aya naari ophiyerya tho ohiya moomalela omurumeela Yehova.

19. Ntakhara heeni muchu yoowo ohin’ye omurumeela Yehova nlelo ookhalano ewehereryo? (Moone tho ekaaxa “ Munanwerya Omukookela Yehova!”)

¹⁹ Apwanne muchu yoowo ohin’ye omurumeela Yehova haano ewehereryo? Mweeparipari hooye, owo nlelo onanwerya ocharuwa ni okookela omulapela Yehova mmukhalelo wawookololowa. Wi eereno yeeyo, owo onaphwanela ohiya wiirumiha wawe nave tho eemererye nikhaviheryo na atokweene a mmulokoni. (Tiy. 5:14) Mwawiihiiha, hiwaavo wiilipixerya otokweene vyakala onaruuhaaya opwaha orehererya onthamwene ni Yehova!

20. Wakhala wi nohaatakiherya mamwene oororomeleya o Isarayeli, Yehova onahaala onoonaka hai?

²⁰ Mwa mukwasu, tiheeni nnahuseryaahu orweela wa mamweene o Isarayeli? Nnanwerya okhala ntoko mamwene oororomeleya wakhala wi notitelela okhala awiiveleela wa Yehova ni murima woothene. Nnaphwanela ohuseryavo wa soohesa sahu, ocharuwa ni opaka matorokelo oochuneya. Nave ilukuluku soothene wuupuwelaka ochuneya waya okhalano olapela wa Muluku mmoharu eeparipari. Wakhala wi mootitelela okhala oororomeleya wa Yehova mmukhalelo yoola, owo onahaala owoonaani nyuwaano ntoko muchu yoowo onapaka yeeyo eri yawookololowa vamiithoni vawe.