1. Echu taani nnaroromelaahu nave ntakhara heeni?

 APWANNE onakhala woovila wa nyuwo weemererya wi ichu sinahaala okhala phaama vaavaa munoonaanyu makacamiho oothene a mweelaponi olelo? Achu a veemusini hanasivelana mukina ni mukhwaawe. Achu ancipale olelo anamvira ekhalaka a nlala, oowali ni anrima. Ancipale annoona okhala woovila waaroromela yaale arino olamulelo. Nyenya mikhalelo seiha inanwerya woolekechaani wi ichu inahaala okhala phaama. Ntakhara heeni? Nthowa nawi achu aneerano ichu hiihaa ntoko Piipiliya aalonceiye mwa miririmu vooloca sa ‘mahiku ookuchula.’ (2 Tim. 3:1-5) Haavo muchu oororomeleya onawerya okhooca wi masu yaala a miririmu aapacerya waakhwanela. Nave waakhwanela waya yawooniherya yawi Kristu Yesu oopacerya olamulela ntoko Mwene a Omwene wa Muluku. Nyenya ala pahiru mamoha a masu a miririmu mancipale analoca sa Omwene. Wuuluulela masu a miririmu anaakhwanela mmahiku ahu, enahaala olipiha nroromelo nahu.

2. Tiheeni nnahaalaahu othokororya mmwaha yoola, nave ntakhara heeni? (Mwaakhule mwawiiwanana ni eruku va ekaapa.)

² Mmwaha yoola, nnahaala othokororya (1) masu a miririmu yaawo ananikhaviherya osuwela ti liini Omwene wa Muluku waatikitheryiwaaya, (2) masu a miririmu yaawo ananikhaviherya wiiwexexa wi Yesu Mwene a Omwene wa Muluku, nave (3) masu a miririmu yaawo anuupulula mukhalelo amwiicani a Omwene wa Muluku eneeraaya etoloxiwe. Nnahaala woona wi masu yaala a miririmu anniiwanana vamoha ntoko ocopaanyerya makupa a eruku ekawanyiwe wi yooniherye mookwakwaleya ti woowi hiyaano nryaahuvo mu saweereya sa elukuluku ya Yehova.

3. Yoororomeliha taani enanivahaaya masu a miririmu enaphwanyeya mu Daniyeli 7:13, 14 vooloca sa Mwene a Omwene wa Muluku?

³ Masu a miririmu anaphwanyeya mu Daniyeli 7:13, 14 annanroromeliha wi Kristu Yesu onahaala okhala Mulamuleli oophwanelela a Omwene wa Muluku. Achu a maloko oothene eni “enamulapa” moohakalala nave owo harwa araceeliwa ntoko Mulamuleli. Masu makina a miririmu mu liivuru a Daniyeli yaahiloca wi Yesu aahaala waakhela Omwene awe omakuchuwelo wa ilukuluku thanu napiili. Apwanne ti wooweryeya osuwela ti liini yaweereya yeela yoohakalaliha yeeren’yaaya?

4. Mutharihe mukhalelo Daniyeli 4:10-17 onanikhaviheryeiye osuwela eyaakha yeeyo Kristu aahaaleiye opacerya olamulela. (Moone tho enoota.)

⁴ Mwaalakhanye Daniyeli 4:10-17. “Ilukuluku thanu napiili” inathoonyerya elukuluku ya iyaakha 2.520. Elukuluku yeeyo yaapacenrye mu 607 E.E.K. vaavaa Apapulu yaamviihalaayavo mwene ookuchula va munyukhuni va Yehova o Yerusalemu. Eyo yaakuchunwe mu 1914 E.K. vaavaa Yehova aamweenreiye Yesu ntoko “ole orino ophwanelela” wa okhala Mwene a Omwene wa Muluku. *—Ezek. 21:25-27, TNM.

5. Mmukhalelo taani nnaphuraahu orweela wa masu a miririmu vooloca sa “ilukuluku thanu napiili”?

⁵ Ti mwawiihai masu yaala a miririmu ananikhaviheryaaya? Osuwela vooloca sa “ilukuluku thanu napiili” onnanroromeliha wi Yehova onnaakhwaniherya soolaiherya sawe mweelukuluku yoophwanelela. Yehova aahilakelela wi aahaala omweera Yesu ntoko Mwene mu elukuluku yoophwanelela. Nave vaavaa yaaphin’yaaya elukuluku yeeyo, Yehova aaheerano. Mwawiihiiha, ninnasuwela wi owo onahaala waakhwaniherya tho masu a miririmu oothene mu elukuluku yeeyo owo olakelenleiye. Chiryene, nihiku na Yehova ‘hinsheleliwa.’—Hab. 2:3.

6. (1) Tiheeni nnoonaahu veelaponi enooniherya wi Kristu onnalamulela wirimu? (2) Ti mwawiihai yawooniherya ela eniiwananaaya ni masu a miririmu anaphwanyeya mu Wupulula 6:2-8?

⁶ Omakuchuwelo wa muteko awe veelaponi yavathi, Yesu aaloherya saweereya sa veelaponi seiho saahaala waakhaviherya oomuchara awe osuwela wi owo oopacerya olamulela wirimu. Ichu ikina seiho owo aalonceiye saari ikhoco, etala, ni amwaacikinye. Owo tho aahiloherya wi saahaala okhalavo ipahu naari ireca, ‘mmakupa mancipale’ ntoko yootakiherya epahu ya hiihaanoru ya koronaviru. Saweereya seiha makupa a seiho Piipiliya oniichaneiye “eneneeryo” ya orwa wa Kristu. (Mat. 24:3, 7; Luka 21:7, 10, 11) Ivinre iyaakha opwaha 60 amanle okhwa ni okookela wirimu, Yesu aahimvaha murummwa Yohani yawooniherya yawi saweereya seiho saahaala okhwaanihereya. (Mwaalakhanye Wupulula 6:2-8.) Saweereya soothene iha sinnaakhwanela opacerya vaavaa Yesu aakhanleiye Mwene mu 1914.

7. Ntakhara heeni olamulelo wa Yesu waakumihenryaaya makacamiho mancipale veelaponi?

⁷ Ntakhara heeni mikhalelo veelaponi sinaamviraaya sinanaraka ovinyerya vaavaa Yesu aakhanleiye Mwene? Wupulula 6:2 onnanivaha yooleeliherya yoochuneya. Echu yoopacerya Yesu eenreiye amanle okhala Mwene a Omwene wa Muluku waari owaniha ekhoco. Aawanne naani? Aawanne  ni Musaserya vamoha ni masololo awe. Mwawiiwanana ni Wupulula ekapitulu 12, Satana aavoothiwa nave owo vamoha ni masololo awe yaavonyeryiwa veelaponi yavathi. Ntoko yookhumelela, wookhalavo ‘otakhaliwa veelaponi’ woona wi Satana ootepa onyeenyeya nave onnaahiphela achu.—Wup. 12:7-12.

8. Nnaphuravo hai vaavaa nnoonaahu waakhwanela wa masu a miririmu vooloca sa Omwene?

⁸ Nnaphuravo hai orweela wa masu yaala a miririmu? Saweereya sa elapo ni otorokeya wa meecelo a achu onnanikhaviherya osuwela wi Yesu, Mwene. Mwawiihiiha, ohiya okhala oonyeenyeya vaavaa nnawoonaahu achu yeeraka ichu mwa nrima ni moonanara, ninnasuwela wi saweera saya sinnaakhwaniherya masu a miririmu a Mpiipiliyani. Omwene wa Muluku onnalamulela hiihaano! (Sal. 37:1) Nave nnaphwanela oweherya wi makacamiho a elapo ekaamwaaceereryeya vaavaa Armaketo onaacameleiye. (Mar. 13:8; 2 Tim. 3:13) Ninnamuthamalela vancipale Tiithi ahu oosivela a wirimu nthowa na onikhaviherya wiiwexexa ntakhara heeni aakhalavo makacamiho mancipale veelaponi.

9. Ti mwawiihai yooloherya enaphwanyeya mu Daniyeli 2:28, 31-35, enatharihaaya sa omwene wookuchula wa elapo nave ti liini owo waakhanlaaya?

⁹ Mwaalakhanye Daniyeli 2:28, 31-35. Ninnoona masu yaala a miririmu yaakhwanelaka mmahiku ahu. Yooloha ya Napukotonosori yooniherya yeeyo yaahaala weereya “mmahiku ookuchula,” omanle opacerya olamulelo wa Kristu. Amwiicani a veelaponi a Yesu yaahaala ophitaanyerya olamulelo woowerya wookuchula waalociwe Mpiipiliyani, yoowo oneemelela “inaani . . . sa muthipo ni sa oloko.” Olamulelo yoola woowerya ti yoowo onalamulela hiihaano. Owo waapacenrye  olamulela variyari va Ekhoco Etokweene Yoopacerya vaavaa Krapretanya ni Estatu Unitu yaapacenryaaya waataana ni Ankolo Amerikana. Eruku mu yooloha ya Napukotonosori yaanooniherya tho ichu piili vooloca sa omwene yoola woowerya wa veelaponi wi waahaala okhala woohiyana ni mamwene ale oopacerya.

10. (1) Tiheeni nnoonaahu olelo mu olamulelo wa elapo yoothene wa Ankolo Amerikana yeeyo Taniyeli aalohenryeiye? (2) Yawoopiha taani nnaphwanelaahu osepa? (Moone ekaaxa “ Musuwele sa Oloko!”)

¹⁰ Yoopacerya, moohiyana ni olamulelo woowerya onalociwa mu yawoona, wiiwanana wa Ankolo Amerikana, honeemelela metaale oolipa ntoko ooru naari muchove, nyenya waakanyeryana wa muthipo ni oloko. Oloko oneemelela “maloko,” naari achu vyakala. (Dan. 2:43) Olelo, ninnawerya woona mookwakwaleya wi ovolowela wa achu mu namuthanle, owanawana ntakhara ophwanelela, namvutuka ni ohiiwanana wa maloko enneeriha okhala woovila wa alamuleli oowerya a elapo yeela waakhwaniherya yeeyo anachunaaya.

11. Ti mwawiihai olamulelo woowerya wa Ankolo Amerikana onalipihaaya nroromelo nahu wi nnakhala mu ilukuluku sookuchula?

¹¹ Yanaawiili, ntoko enooniheryiwaaya moorweela wa inaani sa eruku etokweene, Ankolo Amerikana olamulelo woowerya wookuchula waalociwe mwa miririmu Mpiipiliyani. Owo horaceeliwa tho ni olamulelo okina woowerya wa achu. Moohiyana, owo onahaala ophiyerya makuchuwelo aya mu Armaketo vaavaa Omwene wa Muluku oneeraaya otoloxe owo vamoha ni olamulelo okina woothene wa achu. *—Wup. 16:13, 14, 16; 19:19, 20.

12. Masu a miririmu a Taniyeli ananivaha hai nihakararyo ni ewehereryo?

¹² Nnaphuravo hai orweela wa masu yaala a miririmu? Masu a miririmu a Taniyeli annavahererya sawooniherya sawaaceererya wi nnakhala mu elukuluku yookuchula. Opwaha iyaakha 2.500 ivirale, Taniyeli aahiloca mwa miririmu wi omanle olamulelo wa Papulu, alamuleli axexe oowerya yaahaala waavolowela achu a Muluku. Mwawaaceererya, owo aahiloca wi Olamulelo Woowerya wa Ankolo Amerikana, waahaala okhala wookuchula wa alamuleli yaawo axexe. Ela ennanivaha nihakararyo ni ewehereryo wi moohilekela Omwene wa Muluku onahaala oviihavo olamulelo vyakala wa achu nave toni olamuleleke elapo yavathi.—Dan. 2:44.

13. Tiheeni “mwene aneethanu nachaaru” ni “mamwene khumi,” anaromoliwa mu Wupulula 17:9-12, enasiphelaaya, nave masu yaala a miririmu yaakhwanenle hai?

¹³ Mwaalakhanye Wupulula 17:9-12. Otoloxa waatannyiwe ni Ekhoco Yoopacerya ya Elapo Yoothene, waahaakhwaniherya masu a miririmu makina a Mpiipiliyani vooloca sa mahiku ookuchula. Ahooleli a elapo yaanachuna wi muhoolo okhalevo murecele veelaponi. Mwawiihiiha mu Yaneru a 1920, awo yaatikitherya Waataana wa Maloko, yoowo waaraceeliwe ni Maloko Awiiwanana mu Otupuru a 1945. Marehereryo yaala aniichaniwa “mwene aneethanu nachaaru.” Nyenya owo tahi mulamuleli oowerya a elapo yoothene. Owo toowerya pahiru nthowa na alamuleli yaawo anamukhaviherya. Moosiphela Piipiliya onawiichana alamuleli yaala oowerya ntoko “mamwene khumi.”

14-15. (1) Tiheeni Wupulula 17:3-5 onaloceiye vooloca sa “Paapulu Mutokotoko”? (2) Tiheeni eneereya ni akhaviheryi a malapelo atheru?

¹⁴ Mwaalakhanye Wupulula 17:3-5. Mooveereliwa, murummwa Yohani mu yawoona  aahoonihiwa capaheya, “Paapulu mutokotoko,” yoowo onasiphela malapelo atheru a elapo yoothene. Yawoona ela tiheeni enuupululaaya? Mweelukuluku yincipale, marehereryo a malapelo atheru annalapa vamoha ni ahooleli a epoliitika yaakhaviheryaka yaawo. Moohilekela Yehova onahaala ohela mmurimani mwa ahooleli a epoliitika “muupuwelo awe.” Ni yookhumelela taani? Ahooleli a epoliitika yaawo, “mamwene khumi,” anahaala orukunuwela marehereryo a malapelo atheru ni omwarya yaawo.—Wup. 17:1, 2, 16, 17.

¹⁵ Nnasuwela hai wi makuchuwelo a Papulu Mutokotoko ari vakhiviru? Wi naakhule nikoho nenla, ti yaphaama wuupuwelela wi epooma ya Papulu akhalai yaari yookhapeleleya moorweela wa maahi a Muhice Mutokweene Eufrate. Liivuru a Wupulula onnaalikanyiha amilyawu a akhaviheryi a Papulu Mutokotoko ni “maahi” ookhapelela. (Wup. 17:15) Nyenya tho owo annuupulula wi maahi yaahaala ‘oweleela,’ ethoonyeryaka wi ahooleli a malapelo yaahaala waayeleela ancipale a akhaviheryi aya. (Wup. 16:12) Mu waakhwanela wa masu yaala a miririmu,  achu ancipale annakhuma mmalapelo atheru nave annapacerya waavya mmapuro makina nikhaviheryo ntakhara makacamiho aya.

16. Ti mwawiihai nnaphuraahu orweela mwa wiiwexexa masu a miririmu vooloca sa otikitheryiwa wa Maloko Awiiwanana ni makuchuwelo a Papulu Mutokotoko?

¹⁶ Nnaphuravo hai orweela wa masu yaala a miririmu? Wooneya wa Maloko Awiiwanana ni opwata wa malapelo atheru yawooniherya ekina yawi nnakhala mmahiku ookuchula. Naamwi achu ancipale ehimukhaviheryaka Papulu Mutokotoko, eyo tahi otoloxiwa wa marehereryo a malapelo atheru. Ntoko elociwaaya woopaceryani, Yehova onahaala ohela mmurimani mwa “mamwene khumi” yaawo anaweemelela ahooleli a epoliitika anakhaviherya Maloko Awiiwanana wi ‘yeereno muupuwelo awe.’ Moothananiha, ahooleli a epoliitika anahaala omutoloxa Papulu Mutokotoko nave eyo enahaala waatikiniha achu. * (Wup. 18:8-10) Otoloxiwa wa Papulu Mutokotoko, onahaala ovolowela mwawiiseela elapo yoothene nave onahaala okumiherya wiicela otokotoko, nyenya achu a Muluku anahaala okhalano mathowa meeli a ohakalala. Malapelo atheru, yaawo ari mwiicani a Yehova Muluku mu elukuluku yincipale, anahaala otoloxiwa moomalela, nave moohilekela nnahaala woopoliwa mu elapo yeela yoonanara!—Luka 21:28.

17-18. (1) Nni ntitelele hai olipiha nroromelo nahu? (2) Tiheeni nnahaalaahu othokororya mmwaha onacharela?

¹⁷ Taniyeli aaloca mwa miririmu wi waahaala ‘waaceereryeya osuwela.’ Nave mweeparipari ti yeeyo eneereya! Vano ninniiwexexa masu a miririmu vooloca sa elukuluku ahu. (Dan. 12:4, 9, 10) Waakhwanela wa masu yaala a miririmu onnaneeriha omucicimiha mwawiiseela Yehova vamoha ni Masu awe ooveereliwa. (Isa. 46:10; 55:11) Mwawiihiiha, mutitelele olipiha nroromelo nanyu moorweela wa ohuserya Soorempwa moopwacha ni waakhaviherya akina winnuwiha onthamwene wawaacameleya ni Yehova. Owo onahaala waakhapelela oothene yaale anamuroromela yoowo moomalela nave onahaala waavaha “murecele-murecele.”—Isa. 26:3.

¹⁸ Mmwaha onacharela, nnahaala othokororya masu a miririmu vooloca sa muloko Weekristu mu elukuluku yookuchula. Ntoko nnahaalaahu ohuserya, masu a miririmu yaala annooniherya mookwakwaleya wi nnakhala mmahiku ookuchula. Nnahaala othokororya sawooniherya sawi Yesu, yoowo ori Mwene ahu, onnaahoolela oomuchara awe oororomeleya.