1. Ti mwawiihai nnaphwanelaahu woonaka ekari ya ovekela wa Yehova?

 MPATUXA a erimu ni elapo yavathi oonivaha yamahala ya vameekhaaya. Owo onnaneemererya wi nivekeleke wa yoowo. Pahiru muupuwele: Hiyaano nnanwerya ohula murima ahu wa Yehova mu elukuluku eri yoothene ni elocelo eri yoothene, nihiwehenrye othanliwa. Nnanwerya ovekela wa yoowo nri va ekaama ya osipitaale naari niwaleliwe mukariposo, nroromelaka wi Tiithi ahu oosivela onahaala oniwiriyana. Ninnathamalela vancipale ntakhara yamahala yeela.

2. Ti mwawiihai Mwene Tavite oonihenryeiye wi aanavaha esisapo ekari ya ovekela?

² Mwene Tavite aanavaha esisapo ekari ya ovekela. Owo aahiipa wa Yehova: “Nivekelo naka n’ryeheryiwe ntoko yotchuwiha va mithoni vanyu.” (Sal. 141:1, 2, NN) Mu elukuluku ya Tavite, mikucho saweela saaphariheliwa mu malapelo eeparipari orweela wa alipa a mikucho, saanarehereryiwa moopwacha. (Muk. 30:34, 35) Tavite aanachuna wuupuwelela moopwacha vooloca sa yeeyo owo aahaaleiye oloca vaavaa aavekeleiye wa Yehova, hiiha ntoko yaale yaarehererya mukucho yeeraayano. Ela tho yoochuna ahu. Nnachuna wi mavekelo ahu emuhakalaliheke Yehova.

3. Moonelo taani nnaphwanelaahu okhalano vaavaa nnamwaacamelaahu Yehova mu nivekelo, nave ntakhara heeni?

³ Vaavaa nnavekelaahu wa Yehova, nnaphwanela wooniherya ncicimiho nawiiseela. Muupuwele vooloca sa sawoona sootikhiniha seiho Isaiya, Esekiyeli, Taniyeli ni Yohani yonnaaya. Sawoona seiha saari soohiyana, nyenya iho saakhalano echu emoha yoolikana. Iho saamooniherya Yehova ntoko Mwene oocicimiheya. Isaiya ‘aamoona Pwiya akilanthe omunyukhuni woomwene awe woosulu ni woocicimiheya.’ (Isa. 6:1-3) Esekiyeli aamoona Yehova akiranthe va  ekaaro awe ya wirimu, arukureryiwe ni “waarya . . . ntoko ekhwi.” (Ezek. 1:26-28) Taniyeli aamoona “mutokweene awaaca mahiku” awanre soowara saweela nave munyukhu Awe ovarelaka mooro. (Dan. 7:9, 10) Nave Yohani aamoona Yehova akiranthe vamunyukhuni arukureryiwe ni echu ntoko ekhwiini yooreera ya esmeralda. (Wup. 4:2-4) Vaavaa nnuupuwelaahu sa otokweene woohilikanyiheya wa Yehova, ninnathamalela ekari yavameekhaaya ya omwaacamela yoowo mu nivekelo ni ochuneya waya weerano yeeyo ni ncicimiho. Nyenya ti mwawiihai nnaphwanelaahu ovekelaka?

4. Tiheeni nnahuseryaahu orweela mmasu oopacerya a nivekelo na ntakiheryo anaphwanyeya mu Mateu 6:9, 10?

⁴ Mwaalakhanye Mateu 6:9, 10. Mmwaha awe wa Vamwaako, Yesu aahaahusiha oomuchara awe mukhalelo wa ovekela waahaala omuhakalaliha Muluku. Amanle oloca “nyuwo muvekeleke hiiha” Yesu aahithariha ichu soochuneyaxa vaavaa owo aavekeleiye. Owo aavekela ntakhara weelihiwa wa nsina na Yehova; orwa wa Omwene awe, yoowo onahaala waatoloxa amwiicani oothene a Muluku ni ichu saphaama seiho Owo onahaaleiye opaka ntakhara elapo ni achu omwaahiyu. Moorweela wa ophitaanyerya ichu seiho mmavekelo ahu, ninnooniherya wi yookhwela ya Muluku ti yoochuneya wa hiyaano.

5. Apwanne ti woochuneya ovekela vooloca sa soochuna sa muchu mukhateiye?

⁵ Mmakupa oocharela a nivekelo, Yesu aahooniherya wi ti woochuneya ovekela vooloca sa soochuna sa muchu mukhateiye. Nnanwerya omveka Yehova wi anivahe yoolya ahu ya nihiku, anikhurumuwele soocheka sahu, onikhapelela wa saweeha ni onivuluxa wa oonanara. (Mat. 6:11-13) Vaavaa nnamvekaahu Yehova ichu seiha, ninnooniherya wa yoowo wi noosuwela wi ninnachuna nikhaviheryo nawe ni omuhakalaliha.

6. Apwanne nnaphwanela ovekela pahiru ntakhara ichu seiho ilociwe mu nivekelo na ntakiheryo? Mutharihe.

⁶ Yesu hanachuna wi oomuchara awe echariheke hiiha yene masu a mu nivekelo na ntakiheryo. Mmavekelo makina Yesu aapankeiye, owo aahithariha ichu soohiyana seiho saari soochuneya wa yoowo mu elukuluku yeele. (Mat. 26:39, 42; Yoh. 17:1-26)  Moolikana, hiyaano nnanwerya ovekela vooloca sa echu vyakala yeeyo enanuukhula. Vaavaa nnakhalaahuno yoolakelela wi nipake, nnanwerya ovekela nivekaka miruku ni oroora. (Sal. 119:33, 34) Vaavaa nnaakhelaahu murici woovila, nnanwerya ovekela nivekaka miruku ni osuwela. (Masi. 2:6) Asitiithi ananwerya ovekela ntakhara anaaya, anamwane ananwerya ovekela ntakhara asitiithi aya ni oothene ahu nnanwerya nave nnaphwanela ovekela ntakhara oohuseryaahu a Piipiliya ni yaale nnaaphwanyaahu mmuteko woolaleerya. Nyenya vaavaa nnavekelaahu, hannaphwanela pahiru omveka Yehova ichu.

7. Ntakhara heeni nnaphwanelaahu omucicimiha Yehova mu nivekelo?

⁷ Nnaphwanela omucicimiha Yehova mmavekeloni mwahu. Haavo muchu onaphwanela ocicimihiwa ompwaha Muluku ahu. Owo ‘taphaama ni oolevelela.’ Owo tho ta “ikharari, a mahala, oohaakuva onanariwa, oosivelasha ni oororomeleya.” (Sal. 86:5, 15) Mweeparipari, nookhalano mathowa aphaama a omucicimiha Yehova ntakhara mukhalelo awe ni yeeyo owo onapakeiye.

8. Ichu taani ikina nnaphwanelaahu omuthamalela Yehova? (Salumu 104:12-15, 24)

⁸ Mwawaaceererya va omucicimiha Yehova mmavekelo ahu, ninnaceenyeryeya omuthamalela yoowo wa ichu sootikhiniha onavahereryeiye. Ntoko yootakiherya, nnanwerya omuthamalela yoowo ntakhara ikoore sootikhiniha nnoonaahu sa ithutu, soolya soohiyana-hiyana soosiva ni opuha onthamwene waphaama. Tiithi ahu oosivela, onnanivaha seiha ni sincipale, pahiru wi anihakalalihe. (Mwaalakhanye Salumu 104:12-15, 24.) Echu yoochuneyaxa, ninnamuthamalela Yehova ntakhara yoolya yawaaca yoomunepani onanivahereryeiye ni ewehereryo yootikhiniha nryaahuno ya omwaahiyu.

9. Tiheeni enahaala onikhaviherya wuupuwela omuthamalelaka Yehova? (1 Tesalónika 5:17, 18)

⁹ Onanwerya okhala wookhweya ocuwala omuthamalela Yehova wa ichu soothene seiyo owo onanipakeleiye. Tiheeni enahaala wookhaviheryaani wuupuwela? Munanwerya opaka elista vooloca sa ichu seiho mvenkaanyu nave voocharela mwaalikhele yeeyo mwaarempaanyu wi moone mukhalelo Yehova  aakhunleiye mavekelo anyu. Voocharela mvekele mmuthamalelaka ntakhara nikhaviheryo nawe. (Mwaalakhanye 1 Tesalónika 5:17, 18.) Muupuwele ela: Hiyaano ninnahakalala ni osiveliwa vaavaa akina ananthamalelaaya. Moolikana, vaavaa nnamuthamalelaahu Yehova ntakhara waakhula mavekelo ahu, eyo ennamuhakalaliha. (Kol. 3:15) Nyenya, nookhalavo nthowa nikina na omuthamalela Muluku ahu.

10. Mwawiiwanana ni 1 Pedro 2:21, ntakhara heeni nookhalano mathowa a omuthamalela Yehova ntakhara omurumiha Yesu veelaponi?

¹⁰ Mwaalakhanye 1 Pedro 2:21. Nnaphwanela omuthamalela Yehova ntakhara omurumiha Mwanawe oosiveliwa wi anihusihe. Ninnahuserya sincipale vooloca sa Yehova ni mukhalelo wa omuhakalaliha yoowo moorweela wa ohuserya okumi wa Yesu. Vaavaa nnooniheryaahu nroromelo mwa mukucho wa Kristu, ninnakhalano onthamwene wawaacameleya ni Yehova Muluku ni opuha murecele ni Yoowo.—Aro. 5:1.

11. Ntakhara heeni nnavekelaahu mu nsina na Yesu?

¹¹ Ninnamuthamalela Yehova wi ninnawerya ovekela wa yoowo orweela wa Mwanawe. Yehova onnampharihela Yesu wi anivahe yeeyo nnamvekaahu. Yehova onnawiriyana ni waakhula mavekelo nnapakaahu mu nsina na Yesu. Yesu oothariha: “Soothene muneeraanyu muveke mu nsina naka, kinarwa keerano, wi Atiithi ecicimihiwe mwa mwaana.”—Yoh. 14:13, 14.

12. Nthowa taani nikina nryaahuno na omuthamalela Yehova ntakhara Mwanawe?

¹² Yehova onnakhurumuwela soocheka sahu orweela wa mukucho wa Yesu. Soorepa sinnamuthariha Yesu ntoko “mulipa a mukucho [ahu] mutokotoko, okilaanthe vamoha ni Mutokotoko wirimu.” (Ahe. 8:1) Yesu “mulipa a waakiha [ahu] vamiithoni wa Atiithi.” (1 Yoh. 2:1) Ninnamuthamalela vancipale Yehova ntakhara onivaha namukucho mutokotoko oniiwexexa ohiphaameya wahu ni yoowo ‘onanivekelela hiyo!’ (Aro. 8:34; Ahe. 4:15) Hiyaano na achu ohiphaameya, mwawiihiiha wahikhanle mukucho wa Yesu hini niwerye omwaacamela Yehova mu nivekelo. Moohikhwa minikwa nyuwaano munneemererya wi hanni niwerye omuthamalela Yehova mwawaakhwanela wa yamahala yoochuneya onivanheiye—yamahala ya Mwanawe oosiveliwa!

13. Mu ohiyu ahaakumve okhwa, ti mwawiihai Yesu oonihenryeiye wi aanaasivela oomuchara awe?

¹³ Mu ohiyu ahaakumve okhwa, Yesu aavekela ntakhara oomuchara awe, avekaka wi Atiithi awe ‘yaakhapelele awo wa oonanara owo.’ (Yoh. 17:15) Ela yaahooniherya wi Yesu aanaasivela vancipale yaawo! Naamwi owo aasuwela wi aahala ohooxeya vancipale; nlelo aanuukhuwa ntakhara oomuchara awe.

14. Ti mwawiihai nneeraahu nooniherye wi ninnaasivela anna ni arokora ahu?

¹⁴ Nimutakiheryaka Yesu, hiyaano hannatikitheryeya pahiru mu soochuna sahu. Ohiya yeeyo, wiiliwiili ninnavekela ntakhara anna ni arokora ahu. Vaavaa nneerahuno yeela, ninniiwelela nlamulo na Yesu na osivelana mukina ni mukhwaawe nave ninnamooniherya Yehova wi ninnaasivela vancipale alapeli akhwiihu. (Yoh. 13:34) Ovekela ntakhara anna ni arokora ahu tahi oyeleela elukuluku. Masu a Muluku annaloca wi “nivekelo na awookololowa murima ninnawerya sincipale.”—Tiy. 5:16.

15. Ntakhara heeni alapeli akhwiihu annachuna mavekelo ahu?

 ¹⁵ Alapeli akhwiihu annachuna mavekelo ahu nthowa nawi annahoolela makacamiho mancipale. Nnanwerya omveka Yehova wi aakhaviherye ovilela ni wiiciwa, wiiceliwa, ipahu sa maphacuwelo, ekhoco naari makacamiho makina. Hiyaano nnanwerya ovekela ntakhara anna ni arokora ahu aniilipixerya waakhaviherya yaale ari oothoiwa. Akhweya nyuwaano moomusuwela muchu yoowo onahoolela makacamiho ntoko yaala. Nyuwaano munanwerya oromola masina aya mmavekeloni mwanyu. Hiyaano ninnooniherya osivela weeparipari wa onna ahu moorweela wa omveka Yehova wi aakhaviherye yaawo ovilela.

16. Ntakhara heeni nnaphwanelaahu waavekelela yaale ananihoolela?

¹⁶ Yaale anahoolela mmulokoni annathamalela vancipale vaavaa nnaaromolaahu mmavekelo ahu nave mavekelo awo annaakhaviherya. Murummwa Paulo aanasuwela wi owo aanachuna mavekelo a akina. Owo oorepa: “Mukivekeleleke tho miyo, wi voohula iyano saka kivahiwe masu, wi kisuwelihe moohoovelela michaka yaphaama yeeyo yaari yawiiphini.” (Éfe. 6:19) Olelo tho, hiyaano nookhalano anna analapa mwakuru yaawo ananihoolela. Ninnooniherya wi ninnaasivela yaawo moorweela wa omveka Yehova wi aakhaviherye waakhwaniherya muteko aya.

17-18. Vaavaa nnavekiwaahu wi nipake nivekelo wa akina, tiheeni nnaphwanelaahu wuupuwelaka?

¹⁷ Ilukuluku ikina, ninnavekiwa wi nipake nivekelo wa akina. Ntoko yootakiherya, murokora yoowo oneeciha yoohuserya ya Piipiliya onanwerya omveka murokora mukina yoowo omuhoonle wi apake nivekelo. Murokora owompwe onanwerya oohimusuwela phaama oohuserya, mwawiihiiha owo onanwerya ovekiwa wi apake nivekelo nookuchula va yoohuserya. Mmukhalelo yoola, owo onahaala osuwela phaama yeeyo onahaaleiye oloca vaavaa onavekeleiye ntakhara oohuserya.

¹⁸ Munna onanwerya ovekiwa wi apake nivekelo ntakhara muthukumano wa muteko woolaleerya naari muthukumano wa muloko. Anna anavahiwa ekari yeela anaphwanela wuupuwelelaka yoolakelela ya muthukumano.  Nivekelo hannaphariheliwa ntakhara ovaha ekano mmulokoni naari opaka soolokoha. Wa mithukumano mincipale sa muloko aminutu 5 anaphariheliwa ntakhara ncipo nnivekelo, mwawiihiiha munna yoowo onapaka nivekelo hanaphwanela ‘waaceerya masu’ xaxaxa wakhala woopaceryani wa muthukumano.—Mat. 6:7, BNM.

19. Tiheeni enahaala onikhaviherya okhala oorehereya ntakhara nihiku na othoriha na Yehova?

¹⁹ Nnaphwanela weeriha wi nivekelo nikhale echu yoochuneyaxa mu okumi ahu woona wi ninnaacamela nihiku na othoriha na Yehova. Vooloca sa yeela, Yesu oloca: “Mulipeleleke, mvekeleke elukuluku yoothene wi mulipe, moopowe wa soothesene seiyo inahaala weereya.” (Luka 21:36) Wakhala wi ninnavekela moohihiyererya, nroromelo nahu nnahaala okhala noolipa nave nnahaala okhala oorehereya vaavaa nihiku na othoriha na Muluku nnaacamelaaya.

20. Ti mwawiihai mavekelo ahu eneeraaya ekhale ntoko mikucho sawiinkhela?

²⁰ Tiheeni nthokoronryaahu? Ninnavaha esisapo etokweene ekari ahu ya ovekela. Ichu soochuneyaxa nnaphwanelaahu ovekela iri miyaha iniiwanana ni yookhwela ya Yehova. Hiyaano tho ninnathamalela ntakhara Mwaana a Muluku ni olamulelo wa Omwene awe nave ninnavekela ntakhara alapeli akhwiihu. Nave chiryene, hiyaano nnanwerya ovekela ntakhara soochuna sahu soomwiilini ni soomunepani. Vaavaa nnuupuwelelaahu moopwacha vooloca sa yeeyo nnahaalaahu oloca mmavekelo ahu, ninnooniherya wi ninnavaha esisapo ekari yeela yootikhiniha. Masu ahu ananwerya okhala ntoko mikucho sawiinkhela wa Yehova—‘inamuhakalaliha yoowo.’—Masi. 15:8.