1. Murici taani Yehova aavanheiye asitiithi?

YEHOVA aahimpatusa mutheli oopacerya ni nchuno na okhalano anamwane. Piipiliya onnaloca mooluluwanya: “Anamwane ti yamahala yoorweela wa [Yehova].” (Sal. 127:3) Ela enataphulela eheeni? Mwaanyiherye wi nthamwene anyu awaacameleya ohoovekani wi mukhapeleleke ikhorowa sawe sawaaca. Mwaahaala woona hai? Woonaru, nyuwo mwaamukhala oocicimiheya nthowa nawi ohoororomelani. Akhweya mwaamukhala awuukhuwa vooloca sa mukhalelo muneeraanyu mukhapelele ikhorowa iho. Yehova yoowo ori Nthamwene ahu awaacameleya, ohaavaha asitiithi echu yasisapo opwaha ikhorowa wi ekhapelele. Owo ohaavaha asitiithi murici wa waakhapelela ni oweeriha anaaya okhala oohakalala.

2. Makoho taani nnahaalaahu othokororya?

² Taani onaphwanela olakelela waakhanle wi mutheli onnaphwanela okhalano anamwane ni elukuluku ya okhalano? Nave tiheeni asitiithi anaphwanelaaya opaka wi yaakhaviherye anaaya okhalano ekumi yoohakalala? Muthokororye malakiheryo makina anaphwanyeya mu Masu a Muluku yaawo anahaala waakhaviherya atheli Eekristu opaka soolakelela mwa miruku.

3. (1) Taani onaphwanela olakelela waakhanle wi mutheli onahaala okhalano anamwane? (2) Nlakiheryo taani na Piipiliya asinthamwene ni amusi a mutheli anaphwanelaaya wuupuwela?

³ Mu sookhovelela ikina, atheli avyaani annaweheryiwa wi anahaala opacerya okhalano anamwane mwawaakuveya wakhala wooweryeya. Awo anamphiyerya okhinyereryiwa ni amusi aya ni akina wi echarihe sookhovelela seiyo. Yetro, munna o Asiya, ooloca: “Mmulokoni, akina yaawo arino anamwane annaakhinyererya atheli yaawo ahirino anamwane wi epacerye waayara anamwane.” Yeffrey, munna mukina o Asiya, ooloca:  “Akina annaaleela atheli yaawo ahirino anamwane wi heni ekhaleno muchu onahaala waakhapelela yuuluvala.” Mwawiihiiha, mutheli ti mutheli onaphwanela olakelela waakhanle wi onnaphwanela okhalano anamwane. Yoolakelela eyo ti yawaya, owo murici aya. (Gal. 6:5) Mweeparipari, asinthamwene ni amusi anachuna wi mutheli muvyaani akhale oohakalala. Nyenya oothene anaphwanela wuupuwela wi mutheli torino yoolakelela ya okhalano anamwane naari hooye.—1 Tes. 4:11.

4-5. Makoho taani meeli atheli anaphwanelaaya othokororya, nave elukuluku taani eri yoophwanelela opaka yoolakelela yeela? Mutharihe.

⁴ Mutheli yoowo olakelenle okhalano anamwane onamweerano phaama othokororya makoho meeli oochuneya: Noopacerya, ti liini awo anachunaaya okhalano anamwane? Nanaawiili, anamwane akavi anachunaaya okhalano? Elukuluku taani eri yoophwanelela wi mutheli avaanele mwaha yoola? Nave ntakhara heeni makoho ala meeli aryaaya oochuneyaxa?

⁵ Mmikhalelo mikina, ehaakumve opaka othela, anamweerano phaama othokororya mwaha wa okhalano anamwane. Ntakhara heeni? Nthowa nawi ti yookhweleya wi oopiili yuupuwele mmukhalelo mmoha vooloca sa mwaha yoola. Navetho, oopiili anaphwanela othokororya waakhanle wi ari ooreheryeya ntakhara murici yoola. Atheli akina annalakelela oweherya wi evirevo eyaakha emoha naari piili ehaakumve okhalano anamwane, nthowa nawi okhala asitiithi onnamaliha elukuluku ni ikuru sincipale. Eyo ennaweeriha okhalano elukuluku ya okhovelelana ntoko mutheli ni okhala awaacamelana mukina ni mukhwaawe.—Éfe. 5:33.

6. Nthowa na elukuluku nnakhalaahu, tiheeni atheli akina alakelenlaaya?

⁶ Akristu akina annalakelela ochariha yootakiherya ya anamwane araru a Nowa ni asaaraya. Atheli yaala araru yaahilakelela ohikhalano anamwane mwawaakuveya. (Map. 6:18; 9:18, 19; 10:1; 2 Ped. 2:5) Yesu aahilikanyiha mahiku ahu ni “mmahiku a Noowa,” nave hisaavo minikwa wi nnakhala mu “ilukuluku sa sookacamiha.” (Mat. 24:37; 2 Tim. 3:1) Wa nthowa na yeela, atheli akina annalakelela ohikhalano anamwane mwawaakuveya wi ewerye opaka sincipale mmuteko wa Yehova.

7. Malakiheryo anaphwanyeya mu Luka 14:28, 29 ni Masiposipo 21:5 eni emukhaviherye hai mutheli?

⁷ Vaavaa analakelelaaya okhalano anamwane nave anamwane akavi, atheli amiruku ‘annacokocela.’ (Mwaalakhanye Luka 14:28, 29.) Atheli a mavyakelo, annasuwela wi waaphuwa anamwane tahi wi onamaliha ikhorowa pahiru nyenyatho ennamaliha elukuluku ni ikuru.  Mwa yeeyo, ti woochuneya mutheli othokororya makoho ntoko ala: ‘Apwanne oopiili ahu ninnaphwanela olapaka wi nikuleke ichu seiyo siri soochuneya veechokoni vahu? Apwanne ninnasuwela ichu siri sookhweleya veechokoni vahu? Wakhala wi oopiili ahu nnahaala olapaka, taani oni aakhapeleleke aniihu? Muchu taani nnachunaahu wi avolowele muupuwelo ni meerelo a aniihu?’ Elukuluku mutheli onathokororyeiye makoho yaala moomaaleleya onapharihela masu anaphwanyeya mu Masiposipo 21:5.—Mwaalakhanye.

8. Makacamiho taani atheli Eekristu eneeraaya ehoolele, nave tiheeni mulopwana oosivela othenle onahaaleiye opaka?

⁸ Mwaana onnachuna wi tiithi ni mai emalihe elukuluku ni ikuru soophwanelela ni yoowo. Mwa yeeyo, wakhala wi mutheli onnaayara anamwane moocharelana, anahaala okhalano nikacamiho na omuthokororya mwaana ti mwaana. Atheli akina yaawo yaarino anamwane akhaani awaaca alonce wi hiyaasuwela yeeyo yaaphwanelaaya oloca naari opaka. Wiiliwiili mai onahaala okhalaka awuukhuwa. Apwanne owo onahaala okhalaka awuukhuwa ophiyerya ohiwerya ohuserya, ovekela, ni oya mmuteko woolaleerya? Onamukhala tho woovila wa yoowo okhala oomaaleleya mmithukumano Seekristu ni okumiha mphurelo. Mweeparipari, mulopwana oosivela othenle onahaala opakaka seiyo onaweryeiye wi amukhaviheryeke mwaariye elukuluku anamwane anachunaaya othokororyiwa, mmakupa oomeeli, mmithukumano naari owaani. Ntoko yootakiherya, owo onanwerya omukhaviherya mwaariye olapa miteko sa vaate. Owo onahaala olapaka moowetha wi aroromele wi oothene annaphura orweela wa marehereryo a Malapelo Eechoko. Nave tiithi Eekristu onahaala okhumaka moohihiyererya vamoha ni emusi awe mmuteko woolaleerya.

9-10. Tiheeni asitiithi anaphwanelaaya opaka wi yaakhaviherye anaaya?

⁹ Ichu taani ikina asitiithi eneeraaya epake wi yaakhaviherye anaaya ohuserya omusivela Yehova? Awo eni yaakhapelele hai anaaya wa sawoopiha sa elapo yeela yoonanara? Muthokororye meerelo makina yaawo asitiithi eneeraaya echarihe.

¹⁰ Mveke nikhaviheryo na Yehova. Moone yootakiherya yeeyo etikitheryiwe ni Manowa vamoha ni mwaariye, yaawo yaari asitiithi a Samsoni. Elukuluku Manowa ni mwaariye yaasuwenlaaya wi yaahaala okhalano mwaana, Manowa aahimveka Yehova ohooleela mmukhalelo yeeraaya emphuwe mwanaya.

11. Asitiithi eni echarihe hai yootakiherya ya Manowa, yeeyo elociwe mu Amuthoriha 13:8?

¹¹ Nihad ni Alma o Bosnia ni Herzegovina, yaahihuserya  orweela wa yootakiherya ya Manowa. Awo aathariha: “Moolikana ni Manowa, naahimveka Yehova wi anihusihe mukhalelo neeraahu nikhale asitiithi aphaama. Nave Yehova aahaakhula mavekelo ahu mmikhalelo soohiyanahiyana—orweela mu Soorempwa, soolaleeryiwa sa Piipiliya, mithukumano sa muloko, ni mithukumano sa muceche.”—Mwaalakhanye Amuthoriha 13:8.

12. Yootakiherya taani Yosefe ni Mariya yaatikithenryaaya wa anaaya?

¹² Muhusihe orweela wa yootakiherya. Yeeyo munalocaanyu ti yoochuneya, mwawiihiiha, ichu munapakaanyu inamwaavolowela vatokotoko aniinyu. Nnanwerya ororomela wi Yosefe ni Mariya yaahitikitherya yootakiherya yaphaamaxa wa anaaya, ophitaanyerya Yesu. Yosefe aanalapa mwakuru wi akhaviherye emusi awe. Mwawaaceererya, Yosefe aanaaceenyerya aveechokoni vawe osivelaka ichu soomunepani. (Malam. 4:9, 10) Naamwi Nlamulo nahaaloca wi Yosefe akuseke emusi awe ayaakano o Yerusalemu “eyaakha ni eyaakha” wi yamulye Paskha, owo aaneerano. (Luka 2:41, 42) Akhweya asitiithi akina mmahiku awe yuupuwela wi okusa emusi yoothene mmikwaha ntoko seiyo waari woovilaxa, yaanamaliha elukuluku yincipale ni ikhorowa sawaaca. Naamwiihiiha, Yosefe aanacicimiherya ichu soomunepani nave aahaahusiha anaawe weerano emohamoha. Navetho Mariya aanasuwela phaama Soorempwa. Orweela mmasu ni meerelo awe, moohikhwa minikwa aahaahusiha anaawe osivela Masu a Muluku.

13. Mmukhalelo taani mutheli mmoha aacharinheiye yootakiherya ya Yosefe ni Mariya?

¹³ Nihad ni Alma yaawo aromoliwe woopaceryani, yaahilakelela ochariha yootakiherya yeeyo etikitheryiwe ni Yosefe vamoha ni Mariya. Eyo yaakhavihenrye hai omphuwa mwanaya wi amusiveleke ni omurumeela Yehova? Awo aaloca: “Orweela wa mukhalelo wa ekumi ahu, naaheererya omooniherya mwanihu okhweleya waya, okhalaka mwawiiwanana ni malakiheryo a Yehova.” Nihad ohaaceererya: “Mwaninyu aariki akhale ooreera murima, nyuwotho munaphwanela okhala ooreera murima.”

14. Ntakhara heeni asitiithi annaphwanela waasuwela asinthamwene a anaaya?

¹⁴ Mwaakhaviherye aniinyu waathanla asinthamwene aphaama. Oopiili mai ni tiithi anaphwanela waasuwela achu yaawo ari asinthamwene a anaaya ni yeeyo awo anapakaaya. Ela enataphulela wi asitiithi anaphwanela waasuwela achu yaawo analoca ni anaaya mu isaiti sa makhuuru naari mu telefoni aya. Asinthamwene awo ananwerya ovolowela mukhalelo anamwane anuupuwelaaya ni mukhalelo anapakaaya ichu.—1 Kor. 15:33.

15. Tiheeni asitiithi anahuseryaaya orweela wa yootakiherya ya Yessie?

¹⁵ Tiheeni asitiithi eneeraaya epake wakhala wi hanasuwela sincipale vooloca sa ikhankoonya? Yessie tiithi o Filipina ooloca: “Nnasuwela savakhaani pahi vooloca sa ikhankoonya. Nave eyo hiyeerinhe wi nimaale waahusiha aniihu vooloca sa sawoopiha sa ikhankoonya.” Tahi wi Yessie aahaahiiha anaawe opharihela ikhankoonya woona wi haasuwela sincipale vooloca sa ikhankoonya. Owo oothariha: “Kaahaaleela anaaka wi ti yaphaama opharihela ikhankoonya saya wi ehuserye elocelo ekina, orehererya mithukumano, ni omuhuseryano Piipiliya nihiku nnihiku. Waakhanle wi mwa tiithi, apwanne mohaavaha aniinyu ikano soophimelela vooloca sa ovonya michaka ni iruku sinaphwanyeya mu makupa “Adolescentes” mu jw.org^®? Apwanne mohoona nave moothokororya vamoha ixilema, Nyuwaano ni Ekhankoonya Anyu—Taani Onamulamula Mukhweiye? ni Mukhale Oovyaka Vaavaa  Munampharihelaanyu Interneti? * Miyaha seiya inamukhala sasisapo vaavaa munaahusihaanyu aniinyu mukhalelo wa opharihela ikhankoonya mwa miruku.—Masi. 13:20.

16. Tiheeni asitiithi ancipale apankaaya, nave ni yookhumelela taani?

¹⁶ Asitiithi ancipale anniilipiserya waavya ikari wi anaaya epakeke onthamwene ni yaale arino yootakiherya yaphaama ya omurumeela Muluku. Ntoko yootakiherya, N’Déni ni Bomine mutheli o Costa do Marfim, wiiliwiili yaananwopa ooweherya ekulucu wi akhaleke veechokoni vaya. N’Déni ooloca: “Ela yaahimvolowela mwaphaama mwanihu amwaamulopwana. Owo aahipacerya opiyoneero nave hiihaano onarumeela ntoko ooraceela a ooweherya ekulucu.” Apwanne mwanwerya omwaavyerya mwaninyu nthamwene ntoko yoola?

17-18. Elukuluku taani asitiithi anaphwanelaaya opacerya waavyakiha anaaya?

¹⁷ Mpacerye waavyakiha anamwane eri akhaani wakhala wooweryeya. Asitiithi yaawo anapacerya waavyakiha anaaya eri akhaani, anneerano phaama. (Masi. 22:6) Mmuupuwele Timoteo yoowo aapaka mikwaha ni Murummwa Paulo vaavaa unnunweiye. Amannya Timoteo, Yunike, ni amunna awe Loisi, yaahimuvyakiha ‘ovinyerya ayenve.’—2 Tim. 1:5; 3:15.

¹⁸ Mutheli mukina o Costa do Marfim, Jean-Claude ni mwaariye, yaahiwerya waaphuwa anaaya athanu nammoha wi emusiveleke ni omurumeela Yehova. Tiheeni yaakhavihenrye okhumelela phaama? Awo yaacharinhe yootakiherya ya Yunike ni Loisi. Awo aaloca: “Naapacenrye waahusiha aniihu Masu a a Muluku ovinyerya eyemve, mu elukuluku vakhaani emanle oyariwa.”—Malam. 6:6, 7.

19. Waahusiha aniinyu Masu a Muluku onavolowela eheeni?

¹⁹ Enataphulela eheeni “waahusiha” aniinyu Masu a Yehova? Mu Malamulo 6:7, Nsu na Ehepiri nnaraceela nsu nawi ‘ohusiha’ nnataphulela “ohusiha ni wuupuxerya mwawuuluulela.” Wi yeereno eyo, asitiithi anaphwanela omaliha elukuluku ni anaaya. Mu ilukuluku ikina anamukhala ooceecheya nthowa nawi aahuuluulela mahusiheryo awo wa anaaya. Mwawiihiiha, asitiithi anaphwanela weererya nave yoone eyo ntoko ekari ya waakhaviherya anaaya wiiwexexa Masu a Muluku ni opharihela yaawo.

20. Mutharihe mukhalelo Salumu 127:4 onaweryeiye ophariheleya mu waaphuwa anamwane.

 ²⁰ Mwaasuwele phaama aniinyu. Salumu 127 onaalikanyiha anamwane ni mavaka. (Mwaalakhanye Salumu 127:4.) Hiiha ntoko mavaka anapakiwaaya orweela mu ikaruma soohiyanahiyana navetho oohiyana mannuwelo aya, mwaana ti mwaana toohiyana. Mwa yeeyo asitiithi anaphwanela olakelela mukhalelo wa omuvyakiha mwaana ti mwaana. Mutheli a mmahiku ahu o Isarayeli yoowo aakhumelenle phaama mu waaphuwa anaawe eeli wi emurumeele Yehova, ooloca echu yaamukhavihenrye, “Naanamuhusiha Piipiliya mwaana ti mwaana vameekheiye.” Mweeparipari, muru wa emusi ori woothene onahaala olakelela waakhanle wi ohuserya mmukhalelo yoola ti woochuneya naari wooweryeya.

21. Nikhaviheryo taani nnarweela wa Yehova asitiithi anaphwanelaaya oweherya?

²¹ Mu ilukuluku ikina asitiithi anamoona okhala woovila waahusiha anaaya, nyenya anamwane yamahala enarweela wa Yehova. Ilukuluku soothene owo ori ooreheryeya waakhaviherya asitiithi. Owo tooreheryeya owiriyana mavekelo a asitiithi. Nave owo onnaakhula mavekelo orweela mu Piipiliya, soolaleeryiwa sahu, ni sootakiherya vamoha ni ikano sa asitiithi akina a mavyakelo mmulokoni.

22. Ichu taani saphaama opwaha soothene asitiithi eneeraaya yaavahe anaaya?

²² Achu alonce wi sinnamala iyaakha makhumi meeli wi muchu amphuwe mwaana, nyenya murici wa asitiithi honamalela vaava. Ichu saphaama opwaha soothene asitiithi eneeraaya yaavahe anaaya ti osivela, elukuluku, ni ovyakiha onarweela Mpiipiliyani. Mwaana ti mwaana onahaala waakhulela moohiyana. Mwawiihiiha, ancipale a yaawo yaaphuiwe ni asitiithi yaawo anamusivela Yehova, annoona hiiha ntoko Yowana Mae, murokora o Asiya: “Kaawuupuwelaka ovyakiha yoowo kaakhenlaaka ni asitiithi aka, kinnatepa othamalela wi awo yaahikilaka nave yaahikihusiha omusivela Yehova. Tahi wi yaakivanhe pahiru ekumi, nyenya yaakivaha tho ekumi ya mphurelo.” (Masi. 23:24, 25) Amilyawu awaaca a anna ni arokora ahu annoona mmukhalelo woolikana.