1-2. Ocikinya taani woosiphela yoowo waaloheryiwe wi waahaala weereya mmahiku ahu?

“MU AMINUTU vakhaani, ilooxa ni ipreetiyu saapacerya omora ntoko ipapeli.” “Achu oothene yaari awuukhuwa . . . Achu ancipale yaaloca wi mwaacikinye owo aahaala omaliha aminutu eeli. Wa miyaano, kuupuwela wi owo hi amale.” Ala masu a achu akina yaawo yooponwe mu mwaacikinye yoowo eeren’ye o Nepal mu 2015. Waakhanle wi mwaari va yaweereya yeela yawoopiha, himwaahaala ocuwala.

² Mmahiku ahu ninnahoolela ocikinyeya woohiyana, yoowo oneereya elapo yoothene ohiya elapo emoha. Yehova onnacikinya maloko oothene a veelaponi yavathi nave owo onneerano yeela mu iyaakha sincipale. Ocikinya yoola waaloheryiwa moorweela wa mulipa a miririmu Ageu. Owo aarepa: “Apwiya mwaneene a ikuru soothene tanaloca. Ekwaha ekina, kinarwa kicikinya erimu ni elapo, ephareya ni echaya.”—Ageu 2:6.

3. Ti mwawiihai ocikinyeya woosiphela ohinalikanaaya ni mwaacikinye awooneya?

³ Ocikinya yoowo Ageu olonceiye tahi mwaacikinye awooneya, yoowo onaruuha otoloxa. Moohiyana, owo onnakumiherya sookhumelela saphaama. Yehova mwaneene onnanleela: “Kinarwa kicikinya maloko oothene nave anamuruuha sookhweleya saya soothene. Empa ela kinarwa kisareiha ncicimiho.” (Ageu 2:7) Yooloherya ela yaataphulela eheeni wa yaale yaakhala mu elukuluku ya Ageu? Nave enataphulela eheeni wa hiyo mmahiku ahu? Nnahaala othokororya maakhulo a makoho yaala nave tho nnahaala ohuserya mukhalelo nneeraahu nipake makupa mu ocikinya yoola wa maloko olelo.

4. Ntakhara heeni Yehova aamurumiha mulipa a miririmu Ageu wa achu Awe?

⁴ Yehova aahimvaha mulipa a miririmu Ageu muteko woochuneya wi apake. Muthokororye yeeyo yeeren’ye ehaakumve weereya yeela. Mu 520 E.E.K., nikhuuru na Ayuta naakookela o Yerusalemu nikhumaka wookapuroni o Papulu. Ti yawooneya wi Ageu aari vamoha ni yaawo. Emanle ophiya, akapuro yaala oororomeleya, mwawaakuveya yaapacerya oteka empa ya Yehova. (Esd. 3:8, 10) Nyenya vahilekenle, echu yootikhiniha yaaheereya. Awo yaahiya oteka empa ya Muluku nthowa nawi achu akina yaakhala mmukuma aya yaanawaakaaha yaawo. (Esd. 4:4; Ageu 1:1, 2) Mwawiihiiha mu 520 E.E.K., Yehova aamuleela Ageu wi aakhaviherye Ayuta okhala amvai wanaawiili ni waaceenyerya wi ekwaaxe empa ya Muluku. *—Esd. 6:14, 15.

5. Ti mwawiihai muchaka wa Ageu waalipinhaaya achu a Muluku?

⁵ Yoolakelela ya michaka ya Ageu yaari olipiha nroromelo na Ayuta mwa Yehova. Mulipa a miririmu moolipa murima aaloca wa Ayuta oocecheya: “Olipe murima muloko woothene wa mweelaponi. Mulapeke, miyo kiri ni nyuwo, Apwiya mwaneene a ikuru soothene tanaloca.” (Ageu 2:4) Masu awi “Apwiya mwaneene a ikuru soothene” yaari oolipiha wa yaawo. Nave Yehova ookhalano anakhoco oowerya yaawo ari Ankeelo onaalamuleleiye, mwawiihiiha Ayuta yaanaphwanela omuroromela yoowo wi ekhumelele phaama.

6. Teevi yaari yookhumelela ya ocikinya yoowo waaloheryiwe ni Ageu?

⁶ Yehova aamurumiha Ageu wi aaleele Ayuta wi owo aahaala ocikinya maloko oothene. Yawoona yeela yaahaalipiha Ayuta yaawo yaari ooceecheya nave yaahin’ye oteka empa ya Muluku. Yawoona yeela yaahooniherya wi Yehova aahaala omucikinya Persiya, yeeyo yaari elapo yoowerya mu elukuluku yeele. Nave teevi yaari yookhumelela ya ocikinya yoola? Yoopacerya, achu a Muluku yaahaala owerya omaliha oteka empa ya Muluku. Voocharela, ophiyerya tho yaale yaahaari Ayuta yaahaala omulapela vamoha Yehova mu empa yeeyo yaatekiwe wanaawiili. Muchaka yoola waari woolipiha chiryene wa achu a Muluku!—Zak. 8:9.

7. Muteko taani wa ocikinya nnakhaviheryaahu olelo? Mutharihe.

⁷ Yooloherya ya Ageu enataphulela eheeni wa hiyaano olelo? Wanaawiili Yehova onnacikinya maloko oothene, nave ekwaha ela hiyaano ninnakhaviherya muteko yoola. Muupuwele ela: Mu 1914, Yehova aamuthanla Yesu Kristu ntoko Mwene a Omwene Awe wa wirimu. (Sal. 2:6) Otikitheryiwa wa Omwene yoola waari muchaka muvyaani woonanara wa ahooleli a elapo. Eyo yaataphulela wi ‘mahiku aya a amalapo’ yaavira. Mmasu makina, elukuluku yeeyo aahaareiyevo mwene aamweemelela Yehova yaamala. (Luka 21:24) Mwawiiwanana ni yeela, xaxaxa ovinyerya mu 1919, achu a Yehova yaanalaleya Omwene wa Muluku wi pahiru owo tori ewehereryo ya achu. Olaleerya yoola wa “michaka yeela ya Omwene” onnacikinya elapo yoothene.—Mat. 24:14.

8. Mwawiiwanana ni Salumu 2:1-3, maloko mancipale anaakhulela hai muchaka yoola?

⁸ Ti mwawiihai achu anaakhulelaaya muchaka yoola? Ancipale annakhooca. (Mwaalakhanye Salumu 2:1-3.) Maloko ari oohaleeliheya. Awo annakhooca weemererya wi Yehova oomuthanla Mulamuleli. Awo hanoona michaka ya Omwene seiho nnalaleeryaahu  ntoko ‘michaka yaphaama.’ Mweeparipari alamuleli akina annakhwatiiha muteko woolaleerya! Naamwi alamuleli ancipale a mahiku yaala elocaka wi annamurumeela Muluku, awo hanachuna ohiya olamulelo aya. Hiihaa ntoko alamuleli a mmahiku a Yesu, alamuleli olelo annamwaakaaha oothanliwa a Yehova moorweela wa waahiphela alapeli awe oororomeleya.—Saw. 4:25-28.

9. Yehova onoona hai vaavaa maloko ahinaakhulelaaya phaama michaka?

⁹ Yehova onoona hai vaavaa maloko ahinaakhulelaaya phaama michaka? Salumu 2:10-12 onnaakhula: “Vano, wiriyanani nyuwo mamwene, huseryani, alipa oolamula a vathi. Mwaalapeeni Apwiya muwoovaka, nto hakalalani muthukumelaka. Mukokhoreleeni mwaana owo wi ahinanariwe, nave muhitholowe ntakhara olekela wa esara awe. Ooreeriwa ti yaawo anamuroromela yoowo.” Yehova tamahala nave onnaavaha awo elukuluku wi epake yoolakelela yaphaama. Awo ananwerya otoroka moonelo aya ni weemererya Omwene wa Yehova. Nyenya, hehanlevo elukuluku yawaaca. Hiyaano nnakhala “mmahiku ookuchula” a mukhalelo yoola wa ichu. (2 Tim. 3:1; Isa. 61:2) Ela elukuluku yeeyo achu anaphwanelaaya osuwela eparipari ni othanla omurumeela Yehova.

10. Sookhumelela taani saphaama muteko wa ocikinya otharihiwe mu Ageu 2:7-9 oryaayano?

¹⁰ Ocikinya woosiphela yoowo Ageu aalohenryeiye waakhalano sookhumelela saphaama wa achu akina. Owo onnanleela wi ntoko yookhumelela ya ocikinya yoola, ‘maloko oothene yaahaala oruuha sookhweleya saya soothene’ [achu a murima waphaama] wi emurumeeleke Yehova. * (Mwaalakhanye Ageu 2:7-9.) Isaiya ni Mikeya yaahiloherya wi ela yaahaala weereya “mmahiku ookuchula.”—Isa. 2:2-4; Mik. 4:1, 2.

11. Ti mwawiihai munna mmoha aakhulenleiye vaavaa iiwaleiye muchaka wa Omwene mu ekwaha yoopacerya?

¹¹ Muupuwele yeeyo munna oniichaniwa Ken, yoowo vano onarumeela o nipuro ntokweene na Anamoona a Yehova, enreiye  vaavaa iiwaleiye muchaka yoola. Owo nlelo onnuupuwela vaavaa iiwaleiye mu ekwaha yoopacerya michaka ya Omwene iyaakha 40 ivirale. Ken ooloca: “Vaavaa kiiwalaaka mu ekwaha yoopacerya eparipari Mmasu a Muluku, kaahithamalela vancipale osuwela wi nnakhala mmahiku ookuchula a mukhalelo yoola wa ichu. Kaahoona wi, wi kikhale aweemereryiwa ni Muluku ni okhalano ekumi yoohimala, kaaphwanela ohipaka makupa a elapo ni okhala aweemeleleya mmakupa a Yehova. Kaahivekela wa Yehova mwawaakuveya. Kaahiya opaka makupa a elapo nave mwawaakuveya kaaheemererya opaka makupa a Omwene wa Muluku yoowo oni ohiviihiwevo.”

12. Ti mwawiihai empa yoomunepani ya Yehova esaren’yaaya ni ncicimiho variyari va mahiku yaala ookuchula?

¹² Ti yawooneya wi Yehova onnaareeliha achu awe. Variyari va mahiku yaala ookuchula, ninnoona waaceereryeya wa achu yaawo anamulapela yoowo. Mu 1914 naarivo pahiru macikhwi a vakhaani. Olelo nookhalavo Anamoona opwaha amilyawu 8 anamulapela Muluku mwamvai, ni amilyawu ancipale yaawo anakhala vamoha ni hiyaano va mukonelo mu eyaakha ti eyaakha. Mmukhalelo yoola, empa ya Muluku yoomunepani naari wi marehereryo a malapelo aweela aasareya ni “ichu sookhweleya sa maloko oothene.” Nsina tho na Yehova ninnacicimihiwa moorweela wa matorokelo yaawo anapakiwa ni yaawo ananwara muchu ahiihaano.—Éfe. 4:22-24.

13. Sooloherya taani ikina sinaakhwanela mu waaceereryeya wa alapeli a Yehova? (Moone eruku va ekaapa.)

¹³ Waaceereryeya yoola woohakalaliha onnaakhwaniherya tho sooloherya ikina, ntoko emoha yeeyo enaphwanyeya mu Isaiya ekapitulu ya 60. Eversikulu 22 mu ekapitulu yeela eni: “Echoko ekhaani, ekaamukhalavo achu miili mmoha; achu tonto ekhalaka muloko wawuupa. Miyo ka Apwiya; yaphiyerya elukuluku aya, kinamweerano vahilekenle.” Nthowa nawi achu ancipale annamurumeela Yehova, echu yootikhiniha enneereya. Ichu seiha “sookhweleya” naari achu annaruuha mavyakelo oohiyanahiyana, ni nchuno na olaleerya ‘michaka saphaama sa Omwene.’ Ntoko yookhumelela, achu a Yehova ananwerya opharihela mavyakelo yaawo Isaiya aatharinheiye ntoko “mukaka wa maloko.” (Isa. 60:5, 16) Nnikhaviheryo na alopwana ni athiyana yaala ookhweleya, muteko woolaleerya  onnapakiwa mu ilapo 240 nave soolaleeryiwa sinnataphuleliwa mu ilocelo opwaha 1.000.

14. Yoolakelela taani achu anaphwanelaaya opaka hiihaano?

¹⁴  Mmahiku yaala ookuchula, ocikinyeya wa maloko onnaaceenyerya achu opaka yoolakelela. Apwanne awo anahaala okhaviherya Omwene wa Muluku, naari wi anahaala waakhaviheryaka alamuleli a elapo yeela? Yoothanla yeela yoochuneya, ti ya muchu mukhateiye. Naamwi achu a Yehova yiiwelelaka malamulo a alamuleli a elapo anakhalaaya, awo annatitelela okhala awiivalaanya moomalela mu miyaha sa epoliitika sa elapo yeela. (Aro. 13:1-7) Awo aasuwela wi pahiru Omwene wa Muluku tonahaala omaliha makacamiho a achu. Omwene yoola honapaka makupa a elapo yeela.—Yoh. 18:36, 37.

15. Ti mwawiihai Wuupulula onooniheryeiye wi achu oororomeleya a Muluku anahaala weehiwa?

¹⁵ Liivuru a Wupulula onnathariha weehiwa wa achu oororomeleya a Muluku mmahiku ookuchula. Weehiwa yoola onavolowela wiiciwa ni wiikariwa otokweene. Alamuleli a elapo yeela anahaala osarasareyaka ni malapelo ahu nave anahaala owiikaraka oothene yaale anakhooca okhaviherya olamulelo aya. (Wup. 13:12, 15) Awo anahaala waalamulela achu “oothene, akhaani ni atokotoko, amuhakhu ni oohaawa, ootaphuliwa ni akapuro yeeyeriwe eneneeryo ontatani noolopwana naari vayuuci.” (Wup. 13:16) Mmahiku akhalai akapuro yaanavahiwa eneneeryo yeeyo yooniherya wi awo aakhalano akaneene. Moolikana, oothene mmahiku ahu anahaala waakhela eneneeryo yoosiphela muntatani naya naari vayuuci vaya. Muupuwelo ni saweera saya sinahaala wooniherya wi awo anakhaviherya miyaha sa epoliitika.

16. Ntakhara heeni eryaaya yawaakuveya olipiha ororomeleya wahu wa Yehova hiihaano?

¹⁶ Mpwanne nnahaala weemererya eneneeryo yeela yoosiphela ni waakhaviherya alamuleli? Yaale anahaala okhooca eneneeryo anahaala ohoolela makacamiho nave anahaala okhala va yawoopiha. Liivuru a Wupulula onnathariha: “Ahikhalevo oothuma nari ootumiha ahikhanleno eneneeryo.” (Wup. 13:17) Nyenya achu a Muluku annasuwela yeeyo Muluku onahaaleiye weera ni yaale arino eneneeryo enalociwa mu Wupulula 14:9, 10. Ohiya weemererya eneneeryo yeela, yaamukhala yaphaama waakhanle wi awo aarempwa “miyo kiri a Apwiya” mmatatani mwaya. (Isa. 44:5) Ela ti elukuluku wi niisaalikhele wi noone waakhanle wi nroromelo nahu mwa Yehova ti noolipa. Wakhala wi noheerano yeela, Yehova onahaala ohakalala oloca wi nri mmakupa awe!

17. Tiheeni nnaphwanelaahu wuupuwela vooloca sa opisa murima wa Yehova?

¹⁷ Yehova onnooniherya opisa wawe murima variyari va mahiku yaala okuchula. Owo hanachuna wi muchu mmoharu mano atoloxiwe. (2 Ped. 3:9) Owo onnaavaha elukuluku achu oothene wi echaruwe ni ethanle omurumeela yoowo. Nyenya opisa wawe murima wookhalano makuchuwelo. Yaale anakhooca ekari yeela anahaala olikana ni Farawo a mmahiku a Mose. Yehova aamuleela Farawo: “Okakikhweelavo owiipha ni achu aa oothene ni ecikopa ya ikuru saka, okaatholowa mu elapo ya vathi. Kaahookhapelela wi kiwooniherye ikuru saka ni wi nsina naka nivuwihiwe mweelapo yoothene.” (Muk. 9:15, 16) Maloko oothene anahaala osuwela wi Yehova tori pahiru Muluku eeparipari. (Ezek. 38:23) Ela eni yeereye hai?

18. (1) Ocikinya taani okina onatharihiwa mu Ageu 2:6, 20-22? (2) Nnasuwela hai wi masu a Ageu anahaala waakhwanela omwaahiyu?

 ¹⁸ Iyaakha sincipale ohoolo waya Ageu amanle okhwa, murummwa Paulo aahaarepela Akristu a wa Ahebri wi masu anaphwanyeya mu Ageu 2:6, 20-22 yaahaala waakhwanela oomwaahiyu. (Mwaalakhanye.) Paulo oorepa: “Vano nroromeliho nawe ti nla: ‘Nivano kinamulula otxikinya, ehikhanle etxhayaru, nto ni erimu ene.’ Vano, masu ala ‘nivano kinamulùla’ annoneiha otatusiwa wa itxhu iri sovira sa elapo yopatusiwa, wi ikhale itxhu iri sohivira.” (Ahe. 12:26, 27, BNM) Ocikinya yoola ti woohiyana ni ocikinya onalociwa mu Ageu 2:7. Ocikinya yoola onataphulela wi oothene yaale moolikana ni Farawo, anakhooca weemererya ophwanelela wa Yehova olamulela, anahaala otoloxiwa moomalela.

19. Tiheeni ehinahaala ocikinyeya, nave nnasuwela hai?

¹⁹ Tiheeni enahaala oohicikinyeya, naari oviihiwavo? Paulo onnaaceererya: “Vaavaa, nnaakhelaahu Omwene woohicikinyeya, nthamaleleke, nave nimulape Muluku ntoko onamureerelaaya, nimucicimihaka ni omoova.” (Ahe. 12:28) Chiryene, vaavaa ocikinya wookuchula onahaalaaya ovira, pahiru Omwene wa Muluku tohinahaala ocikinyeya. Owo onahaala okhala wawiikhalelaru!—Sal. 110:5, 6; Dan. 2:44.

20. Yoothanla taani achu anaphwanelaaya opaka, nave nni naakhaviherye hai?

²⁰ Ela tahi elukuluku ya okona ikhove! Achu oothene anaphwanela othanla: Wakhala wi athanlile okhala makupa a elapo yeela, awo anahaala otoloxiwa. Wakhala wi awo athanlile omurumeela Yehova ni opaka matorokelo oochuneya mu okumi aya wi yeere yookhwela awe anahaala waakhela ekumi yoohimala. (Ahe. 12:25) Moorweela wa muteko ahu woolaleerya, hiyaano nnanwerya waakhaviherya achu opaka yoolakelela yeela yoochuneya. Nnanwerya waakhaviherya achu ancipale oochuneya wi epake makupa mu Omwene wa Muluku. Nave nnaphwanela otitelela wuupuwelela masu a Apwiya ahu Yesu: “Michaka yeela ya omwene enamulaleiwa mweelapo yoothene yookhalamo achu wi iweerele onamoona maloko oothene. Vaavaa teneeraaya ephiye makuchuwelo.”—Mat. 24:14.