WAAKHANLE wi mooxekurya evilivili ekhaani yo Sanxir Pesar, o Intonesiya mu iyaakha savakhaani muculi, nyuwaano akhweya mwaahaala owoona arokora ahu araru ophareya. Weiwo awo aatepa osuweliwa nthowa na waakhaviherya achu omusuwela Piipiliya. Nyenya mu ekwaha yeela, awo yaapaka echu yoohiyana.

Voopaceryani awo yaanaya mphareya wi ephwanye maluku oolimela ni oteexerya omokoni. Maluku makina a yaawo yaari matokweenexa ntoko poola. Voocharela, awo yaanakiraathi va mpaco mukhaani nave yaanampharihela martelu wi epwexeno maluku yaawo wi ekhale makhaani opwaha mooce a mwanakhu. Voocharela, yaanahela maluku yaawo mu ipalti nave yaaphwanela owela isikata eteenxe ipalti seiho ophiyerya owannyaya. Wookuchulani, awo yaanahela maluku yaawo mu isaakhu itokweene wi iteexiwe ni ikamiyawu nave ohoolo waya iphariheliwe ntoko ikaruma sootekano misewe.

Mmoha a arokora yaawo aari Hulda. Owo aanawerya okhalano elukuluku yincipale wi apake muteko yoowo. Wiiliwiili, owo aapharihela ikhorowa seiyo aaphwanyeiye wi akhaviherye echoko awe. Nyenya mu ekwaha yeela, owo aakhalano yoolakelela ekina. Owo aachuna omuthuma tapleti wi amphariheleke aplikativo JW Library^®. Hulda aahisuwela wi ixilema ni soothene seiyo saaphwanyeya mu aplikativo yoowo saahaala omukhaviherya vancipale mmuteko woolaleerya ni mu yoohuserya awe ya muchu mukhateiye.

Hulda aanalapa iwora piili wooxiixelo ori woothene variyari va mweeri mmoha ni emeya wi awerye opwexa maluku awaakhwanela wi asareihe ekaaro ekhaani. Moohakalaliha, aahiwerya ophwanya ikhorowa sawaakhwanela wi amuthumeno tapleti.

Hulda onnathariha: “Eparipari wi kaanakhala oovelavelaxa ni ootakuteryeya nthowa na opwexa maluku. Nyenya moohilekela, kaahicuwala wiicela woothene yoole vaavaa kaapacenryaaka ompharihela tapleti nave ookikhaviherya okhalano sookhumelela saphaama mmuteko woolaleerya ni wiirehererya phaama ntakhara mithukumano. Owo tho oothariha wi tapleti aahimukhaviherya variyari va koronaviru, vaavaa miteko soothene sa muloko saapacenryaaya opakiwa mu interneti. Hiyaano tho nri oohakalala vancipale woona wi Hulda oowerya waakhwaniherya yoolakelela awe.