Kiyariwe o Olanta mu 1948. Mu eyaakha yoocharela, emusi aka yaathaamela mu epooma São Paulo, o Prasili. Asitiithi aka yaanayawo okerexa moohihiyererya, nave ntoko emusi naanamwaalakhanya Piipiliya vamoha. Mu 1959, naathaama o Prasili niya o Estatu Unitu nave weiwo naakhala mu epooma ya Massachusetts.

Atiithi aka yaanalapa mwakuru wi ekhapelele emusi ahu yeeyo yaari ya achu 8. Awo yaanalapa miteko soohiyanahiyana ntoko mulipa a nakoso aweeceeca, mulipa oopaka mixewe, ni mutokweene a empresa ya maceeke a elapo yoothene. Emusi ahu yoothene yaanasiveliwa vaavaa awo yaalapaaya mu empresa ya maceeke woona wi eyo yaananeeriha opaka mikwaha sincipale.

Vaavaa kaaryaaka mu exikola ya vasulu, wiiliwiili kaaniikoha: ‘Tiheeni kinahaalaaka weera kinnuwa?’ Akina a asinthamwene aka yaathanlile o exikola ya vasulu, nyenya akina yaathanlile okhala anakhoco. Nyenya miyaano nkaachuna okhala mukhoco nthowa nawi nkaasiveliwa waakhulana ni akina nave nkaachuna owana ekhoco. Kaalakelela oya o exikola ya vasulu wi kisepe okhala mukhoco. Nyenya kaanachuna vancipale waakhaviherya achu nthowa nawi kuupuwela wi eyo yaahaala weeriha wi okumi aka okhaleno yootaphulela.

O exikola ya vasulu, kaatikitheryen’ye mu ohuserya vooloca sa okumi wa achu, mukhalelo wa achu, ni sookhovelela, ovinyerya vaavaa kaanachuna osuwela vooloca sa mapacereryo a okumi. Hiyaano naahusihiwa vooloca sa othatuwa nave ahusiha yaachuna wi neemereryeke yeela wi ela eparipari. Nyenya wa miyaano ela hiyaari eparipari nave nkaachuna weemererya ehirivo mathipelo.

Mu ekalaasi kaaryaakamo, hinaahusihiwa malakiheryo aphaama vooloca sa yaphaama ni yoonanara. Moohiyana, hiyaano naahusihiwa weera echu vyakala yeeyo yaahaala weeriha wi nikhaleno sookhumelela saphaama o exikola ya vasulu. Kaanahakalala vaavaa kaamalihaaka elukuluku ni asinthamwene mu ifesta ni vaavaa neereryaahu olya mirece, nyenya ohakalala owo hiwaalekela. Kaaniikoha: ‘Apwanne ola okumi weeparipari yoowo orino yootaphulela?’

Mu elukuluku yeele, kaathamela mu epooma yo Boston nave kaapacerya oya o exikola ya vasulu. Kaapacerya olapa wi kiliveleke mahusiheryo a oxikola, nave omuteko weiwo, kaamusuwela mmoha a Anamoona a Yehova mu ekwaha aka yoopacerya. Nthamwene aka a omutekoni aakileela vooloca sa yooloherya ya “ilukuluku thanu napiili” enaphwanyeya mu Taniyeli ekapitulu 4 nave aathariha wi nnakhala mu elukuluku yookuchula. (Dan. 4:13-17, TNM) Mwawaakuveya kaahoona wi wakhala wi kootitelela ovaanela ni yoowo vooloca sa Piipiliya nave wakhala wi koheemererya yeeyo kinahuseryaaka, kahaala opaka matorokelo mookumini mwaka. Mwawiihiiha kaanapaka soothene kaaweryaaka wi kimusepe yoowo.

Mu exikola ya vasulu, kaapaka ekursu yeeyo yaakireherenrye ntakhara muteko wawiiveleela wa Amerika Oohico. Kuupuwela wi waakhaviherya akina moorweela wa opaka ichu saphaama wa yaawo yaachuna nikhaviheryo waahaala weeriha wi okumi aka okhaleno yootaphulela. Nyenya voocharela kaahoona wi ela tho hiyaahaala okeeriha okhalano okumi orino yootaphulela. Kaaceecheya, nave kaahiya oya o exikola ya vasulu.

Mu Maiyu a 1970, kaathaamela o Amsterdam, o Olanta, wi kalape mu empresa emohamoha ya maceeke yeeyo atiithi aka yaalapaaya. Nthowa na muteko yoola, kaanapaka mikwaha mitokweene kiyaaka mu ilapo sa Afrika, Amerika, Europa, ni Asiya. Moohilekela kaahoona wi moohipwacha elapo taani kaaviraakamo, yaakhalamo makacamiho matokweene, nave haarivoru muchu mmoha aawerya oreherya yaawo. Nlelo kaanachuna waakhwaniherya echu yoochuneyaxa mu okumi aka, mwawiihiiha kaalakelela okookela o Estatu Unitu nave kaapacerya ohuserya wanaawiili mu exikola ya vasulu emohamoha yo Boston.

Nyenya mwawaakuveya kaahoona wi mahusiheryo a exikola ya vasulu hiyaakikhaviherya ophwanya maakhulo a makoho aka vooloca sa okumi. Kihaleenle echu yaweera, kaamveka mmoha a ahusiha aka miruku. Owo aakitikhiniha vaavaa aalonceiye: “Ntakhara heeni otitelenlaa ohuserya? Onaphwanela ohiya ohuserya hiihaano.” Owo aakikhaviherya chiryene. Mwawiihiiha kaahiya ohuserya nave nkaantonko okookelawo.

Woona wi nlelo kaaniisoona wi okumi aka hiwaarino yootaphulela, kaavolowa mu nikhuuru nenlo niica sookhovelela sa vanipuroni nave naakhala wi nno naanaceenyerya murecele ni osivela. Miyaano ni asinthamwene aka 7 naavinyawo o Estatu Unitu nave niya mu epooma yo Acapulco, o Mexiko. Hiyaano naakhala ni achu yaawo yaakaaha malamulo a vamucecheni  nave okumi ahu waakhala wi hiwaarino makacamiho naari sawuukhula. Nyenya vaavaa kaakhalaaka ni yaawo, kaahoona wi mukhalelo aya wa okumi hiwaarino yootaphulela naari hiwaaruuhela ohakalala woohimala. Moohiyana, kaahoona wi ancipale a achu yaala hiyaari aphaama naari oororomeleya.

Variyari va elukuluku yeele, kaapacerya wuupuwela wanaawiili echu yeeyo kaachunaaka weera vaavaa kaaryaaka mwaana. Kaanachuna weeca ni mwaaceya, ohiya ntoko mulipa oomweeciha, nyenya muhooleli. Nyenya mukhalelo mmoha kaahaalaaka owerya weerano yeela waari okhalano mulipa oomweeciha. Woona wi nthamwene aka mmoha awiichaniwa Tom aanachuna weera echu emohamoha, naalakelela weeca mu eniya orukurerya elapo yoothene vamoha. Kaanachuna ophwanya evilivili yooreera ntoko parataiso weiwo kaahaalaakawo okhala ootaphuwa wa malamulo a achu.

Tom ni miyaano naahiya o Arenas do Mar, waacamela o Parselona, o Espanya. Weiwo naamukula mwaaceya oorakama a meeturu 9.4 awiichaniwa Llygra. Naahipacerya ompaka mwaaceya mukhaani wi anikhaviheryeke wakhala wi yoheereya echu vyakala mu eniya. Woona wi hinaachuna waakuvela waakhwaniherya yoolakelelaahu, naakuxa maakina yaawo naapharihelaahu wi nikhapelelemo maahi mancipale oowurya. Wi niweryeke omweemesa mwaaceya mmapuro makhaani aweemelamo amwaaceya, naahikula maremo meeli orakama waya a meeturu 5. Vookuchula, naahipacerya mukwaha ahu wooya o Seychelles, a Oseyano Intiku. Yoolakelelaahu waari oya makupa onaneela nsuwa o Afrika ni orukurerya o Cabo da Boa Esperança, o Afrika Oohico. Hiyaano naapharihela itheneeri, maapa, aliivuru, ni ikaruma sookhweya wi sinikhaviherye ochara ephiro yoophwanelela. Kaanakhala ootikhiniheya ni mukhalelo naasuwelaahu weiwo naayaahuwo.

Moohilekela naahoona wi mwaaceya ahu yoowo aapakiwe ni ithaapwa haahaala owerya weeca mu eniya. Yaanavolowamo maahi awaakhwana iliitru 22 mu ewora emoha! Ntoko elociwaaya woopaceryani, variyari va echeku kaahipacerya woova nave kaavekela mu ekwaha aka yoopacerya mu iyaakha sincipale, kimuroromelihaka Muluku wi wakhala wi koovuluwa, kaahaala weererya omusuwela yoowo. Echeku yaahimaala, nave nlelo kaanuupuwela yoororomeliha aka.

Kaahipacerya omwaalakhanya Piipiliya vaavaa kaaryaaka mu eniya. Mwaanyiherye mukhalelo yaaraaya yoohakalaliha kikiranthe mmwaaceya mwaka veeri va ephareya Metiteraniyu kiwehaka ihopa soohiyanahiyana ni oneela wa nsuwa. Ohiyu, kaanatikhiniheya ni itheneeri seiho koonaaka nave kaalekecheya wi ookhalavo Muluku yoowo onaathokororya achu.

Isumana ohoolo waya nri mu eniya, naahiphiya nipuro oneemelavo amwaaceya na Alikante, o Espanya, weiwo naanachuna omukuliha mwaaceya ahu akhalai wi numukule mukina aphaama. Moohikhwa minikwa, hiwaari wookhweya omphwanya muchu yoowo aahaala omukula mwaaceya akhalai, oomalavo ene nave yoowo aathoronwe! Nyenya, ela yaari elukuluku yaphaama ya omwaalakhanya Piipiliya aka.

Vaavaa kaamwaalakhanyaaka Piipiliya, kaapacerya woona wi mahusiheryo a liivuru yoola yaahaala okikhaviherya okhala oohakalala mu okumi aka. Kaatikhiniheya ni mukhalelo Piipiliya onaloceiye mookwakwaleya vooloca sa okhala aweela, okhalano meecelo aphaama ni ntakhara heeni achu ancipale—ophitaanyerya miyaano—anniiseera wi Akristu nyenya ekhoocaka yeeyo Piipiliya onaloceiye.

Kaalakelela opaka matorokelo matokweene wi keelihe okumi aka, mwawiihiiha kaahiya olya mirece. Kaahuupuwela  wi aakhalavo achu ancipale anakhala mwawiiwanana ni meecelo a vasulu a Mpiipiliyani nave kaanachuna okumana ni yaawo. Mu ekwaha yanaawiili, kaahivekela, kimvekaka Muluku wi akikhaviherye waaphwanya yaawo.

Wa miyaano, yaakhala wi yaari yamiruku othokororya malapelo ti malapelo mu ekwaha aya ophiyerya kiphwannye malapelo eeparipari. Vaavaa keecaka mu iphiro sa wa Alikante, kaanoona ikerexa sincipale itekiwe. Nthowa nawi iho saanakhalano soophwaniherya sincipale, kaanasuwela wi hiyaari malapelo eeparipari.

Namurunku mmoha othana, kaakiraathi vachu voocukhuwavo mu nipuro nenlo eneemexiwavo amwaaceya, kimwaalakhanyaka Tiyako 2:1-5, yoowo onaloca wi ti yoonanara waapwacha achu ooreela. Vaavaa kaakokelaaka mmwaaceyani mwahu, keecaka kaahoona nipuro ntoko na malapelo nenlo naarino eneneeryo vasulu va mulako: Empa ya Omwene ya Anamoona a Yehova.

Kaahuupuwela, ‘Kinahaala oweererya achu yaala nave koone mukhalelo anahaalaaya okikhaliha.’ Mwawiihiiha kaahivolowa mu Empa ya Omwene kihiwanre isapatu, kihikhapelenle miihi, nave kinwanre ciimisi. Muthoonyeryi aakithoonyerya okiraathi vamoha ni murokora awunnuwelavo yoowo mooreera murima aakikhaviherya ophwanya soorepa seiho saromoliwa nnamaloca a mwaha. Simanle mithukumano, kaahitikhiniheya vancipale nthowa na oreera murima wa oothene yaawo yaarwa okixeliha. Mulopwana mmoha aakiwopa wi niye owannyawe nachekule, nyenya woona wi nkaammalinhe omwaalakhanya Piipiliya, kamuleela owo, “kinamooleelaani kiirehererya.” Opacerya elukuluku ene yeele, kaapacerya ophiya mmithukumanoni soothene.

Isumana sincipale ohoolo waya, kaaya omuxekurya mulopwana yoole owannyawe nave owo aahaakhula makoho aka a Mpiipiliyani. Esumana emoha ohoolo waya, owo aahikivaha murupa osaren’yemo soowara saphaama. Owo aahikileela wi mwaneene a soowara seihe ari mukariposo nthowa na wiiwelela malamulo a Mpiipiliyani a osivelana mukina ni mukhwaawe nave haachuna ohuserya owaniha ekhoco. (Isa. 2:4; Yoh. 13:34, 35) Vano kaalekecheya wi koophwanya yeeyo kaavyaaka—achu yaawo aniiwelela mookwakwaleya yeeyo Piipiliya onaloceiye vooloca sa okhala aweela ni okhalano meecelo aphaama! Yoolakelela aka yaatorokeya nave tho hiwaari waavya evilivili ntoko parataiso nyenya omwiiwexexa Piipiliya mwawaakhwanela. Mwawiihiiha kaakookela o Olanta.

Kaamalinhe mahiku 4 va mukwahani wi kaphiye mu epooma yo Kroninge, o Olanta. Kaanachuna ophwanya muteko wi kiikhaviheryeke. Kaahiphwanya muteko, nave kaahinnyiwa epapeli yeeyo yaarino makoho mancipale, nave nimoha na yaawo naari vooloca sa ekerexa aka. Kaahirepa, “Namoona a Yehova.” Vaavaa mwaneene a muteko aawaalakhannyeiye, kaahoona wi ethoi awe yaahitorokeya. Owo aahiloca, “Kinahaala owiichana.” Nyenya owo haantonko weerano yeeyo.

 Kaaya va kalapinteero mukinaku, kimukoha mwaneene waakhanle wi aanachuna nikhaviheryo. Owo aakiveka itukumento vooloca sa mahusiheryo aka ni mavyakelo aka a olapa muteko. Kaahimutharihela wi muteko aka waari waareherya amwaaceya a ithaapwa. Mootikhiniha, owo aahiloca, “Onahaala opacerya olapa othana yoola nyenya weemererya echu emoha yeeyo kinahaalaaka wooleela. Nkinachuna wi otannye makacamiho mmuteko aka woona wi ka mmoha a Anamoona a Yehova nave kinakhala mwawiiwanana ni malakiheryo a Mpiipiliyani.” Kaahinweha yoowo mootikhiniheya nave kaahaakhula, “Mi tho ka Namoona!” Moohikhwa minikwa, nthowa na miihi aka oorakama ni ipweto saka, owo aahisuwela wi miyo nkaari Namoona. Mwawiihiiha owo aaloca, “Vano, nnahaala omuhuseryaka Piipiliya vamoha!” Kaahihakalala ni yoovaha awe. Vano kaahiiwexexa ntakhara heeni mwaneene a muteko ole oopacerya ahaakichanneiye wanaawiili. Yehova aakhula mavekelo aka. (Sal. 37:4) Miyaano kaanalapa vamoha ni munna yoole eyaakha emoha. Variyari va elukuluku yeele, owo aanakihusiha Piipiliya, ohoolo waya kaahipatisiwa mu Yaneru a 1974.

Mweeri mmoha ohoolo waya, kaahipacerya orumeela ntoko piyoneero nave eyo yaanakihakalaliha vancipale. Mweeri woocharela, kaahithaamela o Amsterdam wi kakhaviherye nikhuuru nivyaani naatikitheryiwe na elocelo ya Espanyola. Kaanatepa ohakalala vaavaa keecihaaka soohuserya sa Piipiliya mu elocelo ya Espanyola ni ya Ekunya! Mu Maiyu a 1975, kaahaakhela ekari ya orumeela ntoko piyoneero a vameekheiye.

Nihiku nimoha, murokora yoowo aari piyoneera a vameekheiye awiichaniwa Ineke aarwa mmithukumano ni oohuserya awe a Piipiliya a Opoliviya yoowo aachuna waasuwela anna ni arokora yaawo yaaloca Espanyola. Ineke ni miyaano naalakelela osuwelana phaama mukina ni mukhwaawe moorweela wa orepelana ikaarata, nave iho saahooniherya wi naakhalano soolakelela imohamoha. Naathelanne mu 1976 nave naahititelela orumeela ntoko mapiyoneero a vameekhaaya ophiyerya mu 1982 vaavaa naawompwaahu wi navolowe mu eturuma 73 ya o Kiliyati. Naahikhala ootikhiniheya ni oohakalala vancipale vaavaa naarumiheliwaahu o Afrika. Naahirumeela iyaakha 5 o Mombasa, o Keniya! Mu 1987, naahithaamiheryiwa o Tansaniya, weiwo muteko ahu waamanlaaya wiiciwa. Naakhala weiwo iyaakha 26 nave voocharela nikookela o Keniya.

Waakhaviherya achu arino nchuno na ohuserya eparipari ya Mpiipiliyani waahinivaha yootaphulela yeeparipari ya okumi. Ntoko yootakiherya, oohuserya aka oopacerya a Piipiliya o Mombasa aari mulopwana yoowo kaamusuwenlaaka vaavaa kaapakaaka onamoona wa vanlakani. Kaahimvaha soolaleeryiwa piili, nave owo aahiloca: “Kamala waalakhanya soolaleeryiwa iha, tiheeni kinaphwanelaaka weera?” Mu esumana yoocharela, naahipacerya omuhuserya Piipiliya ni liivuru Poderá Viver Para Sempre no Paraíso na Terra, yoowo aamanle ovonyiwa mu Esuwayili. Mu eyaakha emoha ohoolo waya owo aahipatisiwa nave aahikhala piyoneero ookilaatheya. Vano, owo ni amwaariye ahaakhaviherya achu waacamela 100 ophiyerya wiiveleela ni opatisiwa.

Vookuchulani vaavaa kiiwexenxaaka yootaphulela ya okumi, kaahiisoona ntoko mulipa a maroca aweeceeca yoowo aaphwannye nluku nimoha nookhweleyaxa nave ahihiyaru. (Mat. 13:45, 46) Kaalakelela opharihela okumi aka wi kaakhaviherye achu akina ophwanya tho okumi yoowo orino yootaphulela yeeparipari. Nave vamoha ni mwaaraka oosiveliwa, ninnoona vakhiviru ni vakhiviru mukhalelo Yehova onaareeliheiye alapeli awe ni okumi yoowo orino yootaphulela yeeparipari.