Anna akina annapharihela ikhankoonya wi elocihaneke ni amusi ni anna akina. Nyenya Mukristu awiichwelavo omunepani onaphwanela okhalano mmuupuweloni miruku iha: “Awiisuumaaliha, oona yawoopiha, onnasepa; nto oolosowa oona, onnapwaheryawo iisoonela meekheiye.”—Masi. 27:12.

Ninnasuwela wi Yehova onachuna onikhapelela. Mwawiihiiha, hannalocihana ni achu yaawo anachuna waamwalanya akina, yiikariwe mmulokoni naari anakhoromanya mahusiheryo a Mpiipiliyani. (Aro. 16:17; 1 Kor. 5:11; 2 Yoh. 10, 11). Ohiya yeeyo, akina anaphiya mmithukumano sahu akhweya haniiwelela malamulo a Yehova. (2 Tim. 2:20, 21) Nave onamukhala woovila waathanla phaama asinthamwene ahu, wakhala wi nnalocihana ni yaawo pahiru orweela mu aplikativo anavonya michaka.

Nnaphwanela okhalano ekaasoope xaxaxa wakhala wi nikhuuru nnavonya michaka ntokweene. Akina aavolowa mmakhuuru ntoko yaala, nyenya sookhumelela tahi soohakalaliha. Mu nikhuuru nrino achu ancipale, onamukhala woovila osuwela phaama mukhalelo woomunepani wa muchu ti muchu a yaawo. Munoona wi muchu yoowo onapaka makupa a nikhuuru ntoko nenla onniikasopa? Salumu 26:4 oni: “Nkineeca ni yaawo aneera itheru sene naari waataana ni oowoka.” Yoorepa yeela ennooniherya wi enamukhala yamiruku waavonyerya michaka pahiru achu yaawo naasuwenlaahu phaama.

Naamwi nikhuuru na achu anavonyeryana michaka nri nikhaani Mukristu onaphwanela wiikoha: Tiheeni achu a munikhuuru nenla anasiveliwaayano oloca? Elukuluku taani kinamalihaakano yeela? Michaka iha sinanwerya olocaka miyaha soohiyanahiyana nyenya nyuwaano hamunaphwanela okhala ookhinyereryeya opakano makupa wa emoha ti emoha wa seiha. Paulo aahimulopola Timoteo vooloca sa achu yaawo yaahaala okhala ‘òrakama nlumi, ni òsuwela sa mwanene.’ (1 Tim. 5:13) Emohamoha enanwerya weereya olelo moorweela wa ikhankoonya.

Haavo Mukristu awiichwelavo omunepani aahaala omulocaka moonanara munna naari wuupulula ichu soovitheya vooloca sa yoowo, naari tho owiriyana ichu ntoko seiya. (Sal. 15:3; Masi. 20:19) Owo tho haahaala wuuluulelaka oloca miyaha sawootha naari sihirino mathipelo. (Éfe. 4:25) Mweeparipari mu esaiti ahu mu jw.org ni aprokrama a vamweerini a JW Broadcasting^® aakhalano miyaha sincipale vooloca sa Piipiliya ni soolokoha ivyaani.

Anna akina annaapharihela aplikativo a michaka wi evahererye muteko naari waapaka anakoso ni anna akina. Ichu seiha siri miyaha iniiwanana ni anakoso nave hisinapaka makupa mu omulapela wahu Yehova. Mukristu yoowo ‘ohinachuna osivela ikhorowa’ harwa achuna waapuherya asinnawe.—Ahe. 13:5.

Mpwanne naahaala okhala nikacamiho waapharihela aaplikativo anavonya michaka wi niveke ikhorowa ntakhara annihu oothoiwa naari anahoolela ipahu sa maphacuwelo? Ninnaasivela annihu nave ninnachuna waakhaviherya awo wakhala wi annachuna nikhaviheryo. (Tiy. 2:15, 16) Nyenya weererya weerano yeela moorweela mu waapharihela aaplikativo anavonya michaka enanwerya waakanyerya yeeyo efiliyale ni muloko anapakaaya. (1 Tim. 5:3, 4, 9, 10, 16) Nave mweeparipari, hannachuna wiisuwanyeiha wi nrimuthanliwa wi naakhaviherye annihu.

Nnachuna weerano yeeyo enamucicimiha Yehova. (1 Kor. 10:31) Mwawiihiiha, nihaakumve ompharihela aplikativo onavonya michaka naari ekhankoonya ekina nnaphwanela wuupuwelela sawoopiha sene ni okhalano ekaasoope.