1-2. Ti mwawiihai akina anoonaaya vooloca sa ompwana?

 OMPWANA onanwerya okhala elukuluku yoohakalaliha ni yootikhiniha. Waakhanle wi hiihaano nyuwaano munnapaka ompwana, moohikhwa minikhwa munnachuna wi okhumelele phaama. Nave wa atheli ancipale, eri elukuluku yoohakalaliha. Tsion, a murokora mmoha onakhala o Etiyopiya oloca: “Ilukuluku soohakalalihaxa mu okumi aka waari vaavaa miyaano ni aiyaka naapakaahu ompwana. Naanakhalano ovaanela weeparipari nave tho naanatheya. Kaahikhala oohakalala vaavaa kiwexeenxaaka wi kaahimpwanya yoowo kaamusivelaka ni yoowo tho aakisivela.”

² Mwawiihiha, Alessio munna yoowo onakhala o Olanta, ooloca: “Yaari yoohakalaliha omusuwela mwaaraka vaavaa naapankaahu ompwana, nyenya ompwanaahu tho waahikhalano makacamiho.” Mu yoohuserya yeela, nnahaala othokororya sa makacamiho yaawo anakhalavo ni soorepa ikina sa Mpiipiliyani seiyo sini saakhaviherye yaawo yaakamelanne okhalano ompwana yoowo onahaala okhumelela phaama. Nave tho nnahaala othokororya mukhalelo achu akina a mmulokoni eneeraaya ewerye waakhaviherya yaale yaakamelanne.

YOOLAKELELA YA OMPWANA

3. Teevi eri yoolakelela ya ompwana? (Masiposipo 20:25)

³ Naamwi ompwana okhalaka woohakalaliha, ti woochuneya wuupuwelela wi owo mwaha mutokweene nave onnakeriha woothelanani. Mu nihiku na othela, annalipela variyari va Yehova wi anamusivelanaka ni ocicimihana mukina ni mukhwaawe vaavaa awo anahaalaaya okhala akumi. Nihaakumve opaka nlakano vyakala, nnaphwanela othokororya mwaha yoola ni ekaasoope etokweene. (Mwaalakhanye Masiposipo 20:25.) Opaka nlakano ntakhara othela, chiryene echu yeeparipari. Ompwana onnaweeriha alipa awaakamelana osuwelana phaama ni opaka yoolakelela ya miruku.  Vakina vaya yoolakelela yeela ori othela; naari omaliha ompwana. Wakhala wi alipa awaakamelana aahiyana, eyo henataphulela wi aapaka yoonanara. Moohiyana ni yeeyo, ompwana wookhaviherya yoolakelelaaya—wohaakhaviherya yaawo ophiyerya makuchuwelo a opaka yoolakelela aya ya miruku.

4. Ntakhara heeni nnaphwanelaahu okhalano moonelo woophwanelela vooloca sa ompwana?

⁴ Ntakhara heeni ti woochuneya okhalano moonelo woophwanelela vooloca sa ompwana? Wakhala wi aciye aakhalano moonelo woophwanelela, awo hanapaka ompwana ni muchu yoowo ohirino yoolakelela ya othela. Mwawiihiiha, tahi wi pahiru aciye tanaphwanela okhalano moonelo yoola woophwanelela. Oothene ahu ninnaphwanela wunnuwiha. Ntoko yootakiherya, achu akina anuupuwela wi achu yaawo yaakamelanne awo anaphwanela othelana. Ti mwawiihai mooneelo yoola onaavolowelaaya Akristu yaawo ari aciye? Melissa murokora mmoha yoowo onakhala Ostatu Unitu ooloca: “Vaavaa munna ni murokora anapakaaya ompwana, Anamoona akina enaweherya wi awo ethelane. Ntoko yookhumelela akina a yaawo yaakamelanne ennasepa omaliha ompwana aya yoowo ohinakhumelela phaama. Aciye akina moomalela annakhooca opaka ompwana. Okhinyererya onanwerya oruuha wuukhuwa otokweene.”

MUSUWELANE PHAAMA

5-6. Ntakhara heeni alipa awaakamelana anaphwanelaaya wiilipixerya ohuserya vooloca sa mukina ni mukhwaawe? (1 Petru 3:4)

⁵ Wakhala wi nyuwaano munnapaka ompwana, tiheeni enahaala wookhaviheryaani olakelela waakhanle wi munahaala othelana naari hooye? Musuwelane phaama. Akhweya nyuwaano moovarerya ichu ikina vooloca sa muchu yoowo muhipacenrye ompwana. Vano nyuwaano mookhalano ekari ya osuwela ‘omuchu awe wa mpuwa.’ (Mwaalakhanye 1 Petru 3:4.) Eyo ennavolowela ohuserya vancipale vooloca sa makupa oomunepani, omuchu ni muupuwelo a oothelana anyu a muhoolo. Mu elukuluku aya, nyuwaano munaphwanela waakhula makoho ntoko: ‘Apwanne muchu yoola onahaala okhala oophwanelela mu othela waka?’ (Mas. 31:26, 27, 30; Aef. 5:33; 1 Tim. 5:8) ‘Apwanne ninnaphwanela wooniherya osivela ni opwacha wa mmuupuweloni wa mukina ni mukhwaawe? Apwanne nnanwerya okhalaka moohipwacha soohesa sa mukina ni mukhwaawe?’ b (Aro. 3:23) Vaavaa munasuwelanaanyu muupuwele ela: Wiiwanana otokweene orivovo tahi onarweela wa ichu seiyo munalikanaanyuno, nyenya onarweela mwa wiikhoveleliha ohiyana yoowo orivovo wa mukina ni mukhwaawe.

⁶ Ichu taani ikina nyuwaano munaphwanelaanyu  ohuserya vooloca sa muchu mukina elukuluku ya ompwana? Muhaakumve wunnuwiha nchuno, nyuwaano munaphwanela othokororya miyaha soochuneya ntoko soolakelela sa muchu mukina. Hanka vooloca sa makacamiho a muchu mukhateiye ntoko makacamiho a okumi, othoiwa ikhorowa, naari makacamiho akhalai? Tahi wi ichu soothene inaphwanela ovaaneliwa omapacereryo wa ompwana. (Mulikanyihe ni Yohani 16:12.) Wakhala wi munnoona wi ti wawaakuveya waakhula makoho a muchu mukhateiye, mmuleele muchu mukina. Nyenya moovira wa elukuluku, muchu mukina onahaala ochuna osuwela michaka seiho wi apake yoolakelela yoophwanelela. Nyuwaano munaphwanela oloca ichu soothene moororomeleya.

7. Ti mwawiihayi alipa awaakamelana eneeraya esuwelane phaama? (Moone tho ekaaxa “ Ompwana wa Achu Arakameelanne.”) (Moone tho iruku.)

⁷ Ti mwawiihai nyuwaano muneeraanyu musuwele omuchu awe wa mpuwa? Mukhalelo mmoha wa omusuwela ori moorweela wa oloca mootaphuwa ni moororomeleya, opakelana makoho ni owiriyanana. (Mas. 20:5; Tiy. 1:19) Mwa yeeyo, munanwerya woona okhala echu yoochuneya wiivoliiherya mmiteko seiho sinahaala wookhaviheryaani ovaanelaka, ntoko olya vamoha, weeca vamoha mmapuro awaaciwamo ni olaleerya vamoha. Nyuwaano tho munanwerya ohuserya vooloca sa muchu mukina vaavaa munamalihaanyu elukuluku ni asinthamwene ni amusi. Ohiya yeeyoru, mulakelele miteko seiho sinahaala omooniherya muchu mukina mukhalelo oneereiyeno ichu mmikhalelo soohiyanahiyana naari ni achu oohiyanahiyana. Moone yeeyo Aschwin yoowo onakhala o Olanta eerenryeiye opaka. Owo ooloca sa ompwana awe ni Alisia: “Naahaavya miteko seiho saanikhavihenrye ovareryana mukina ni mukhwaawe. Ikwaha sincipale saari sookhweya, ntoko orehererya yoolya vamoha naari opaka ichu ikina vamoha. Variyari va miteko seiya, naanawerya woona mikhalelo saphaama ni ohiphaameya wa mukina ni mukhwaawe.”

8. Ti mwawiihayi alipa awaakamelana eneeraaya ephurevo moorwela wa ohuserya vamoha?

⁸ Nyuwaano tho munanwerya osuwelana moorweela wa ohuserya Masu a Muluku vamoha. Wakhala wi moothelana, onamuchuneya waavya elukuluku ntakhara malapelo a echoko, wi Muluku akhale mmakupa oochuneya mu othela wanyu. (Ekl. 4:12) Vano munoona hai otikitherya elukuluku wi muhuseryeke vamoha, variyari va ompwana? Mweeparipari achu awaakamelana nlelo tahi emusi, nave tho munna nlelo tahi muru wa murokora. Mwawiihiiha, ohuserya vamoha moohihiyererya, munanwerya ovarerya vooloca sa wunnuwa omunepani wa mukina ni mukhwaawe. Makisi ni Layisa mutheli mmoha Ostatu Unitu, yaahiphwanya mphurelo mukina. Owo ooloca: “Ovinyerya omapacereryo wa ompwana ahu, naahipacerya  ohuserya soolaleeryiwa seiyo saarino miyaha vooloca sa ompwana, othela ni ekumi ya emusi. Moorweela wa ohuserya soolaleeryiwa seiho, naanawerya oloca sa ichu soochuneya seiho waahaalaaya okhala woovila wiimoona opacerya oloca.”

ICHU IKINA INAPHWANELA OTHOKORORYIWA

9. Mikhalelo taani alipa awaakamelana anaphwanelaaya othokororya vaavaa analakelelaaya wa taani anayaaya omuleela vooloca sa ompwana aya?

⁹ Taani munaphwanelaanyu omuleela vooloca sa ompwana anyu? Eyo yoolakelela anyu ntoko alipa awaakamelana. Vaavaa munapaceryaanyu ompwana, munanwerya olakelela waaleela achu avakhaani. (Mas. 17:27) Munanwerya osepa makoho mancipale vooloca sa ompwana ni okhinyereryiwa opaka yoolakelela. Mwawiihiiha, wakhala wi nyuwaano hammuleenle muchu, munanwerya ophiyerya makuchuwelo a wiisoona okhala mukhatiinyu ni awoova wi akina anahaala osuwela. Eyo enanwerya okhala yawoopiha. Mwawiihiiha, yaamukhala ya miruku waaleela yaale anahaala ovahererya miruku saphaama ni woovareryakaani. (Mas. 15:22) Ntoko yootakiherya, nyuwaano munanwerya waaleela achu avakhaani a mweemusini, asinthamwene awiichelavo naari atokweene a muloko.

10. Tiheeni alipa awaakamelana anaphwanelaaya weera wi ompwana aya okhale woocicimiheya? (Masiposipo 22:3)

¹⁰ Muni mweerihe hai ompwana anyu otitelela okhala woocicimiheya? Vaavaa miyooneelo sanyu sinannuwaaya nyuwaano munampacerya ochunanaka vancipale mukina ni mukhwaawe. Tiheeni enahaala wookhaviheryaani osepa echu vyakala yeeyo yaahaala omuhiciha Yehova? (1 Ako. 6:18) Musepe ochekulela sa ocapaheya, okhala vamoha apiiliru ni owurya vancipale. (Aef. 5:3) Ichu seiha inanwerya otannya nchuno noohiphwanelela ni oceecheiha yoolakelela anyu ya opaka yeeyo eri yaphaama. Munoona hai ovaanela vamoha moohihiyererya wa mikhalelo seiho munahaalaanyu otikitherya wi mweerihe wi ompwana anyu okhale woocicimiheya? (Mwaalakhanye Masiposipo 22:3.) Moone yeeyo emukhavihenrye Dawit ni Almaz o Etiyopiya. Awo aaloca: “Naanamaliha elukuluku yincipale vamoha mmapuro awaaciwamo naari ni asithamwene ahu akina. Hanintonko okhala mukhatiihu mu ekaaro naari mpa. Mwawiihiiha naanasepa mikhalelo seiho saahaala okhala saweeha.”

11. Ichu taani alipa awaakamelana anaphwanelaaya othokororya vaavaa analakelelaaya vooloca sa mikhalelo sa wooniheryana osivela?

¹¹ Hanka vooloca sa mikhalelo sawooniheryana osivela? Mikhalelo mikina sinanwerya okhala soophwanelela mwawiiwanana ni oya vahoolo wa ompwana. Mwawiihiiha, wakhala wi nchuno nanyu na okonihana nootannyeya nave nikhala noolipa, onamukhala woovila opaka yoolakelela ya miruku. (Nci. 1:2; 2:6) Ohiya yeeyoru vaavaa nyuwaano munooniheryanaanyu osivela onanwerya okhala wookhweya oyeleela wiivareryela ni opaka echu yeeyo enahaala omuhiciha Yehova. (Mas. 6:27) Mwawiihiiha, omapacereryo wa ompwana anyu mvaanele wa ichu seiho muhinahaalaanyu weerakano mwawiiwanana ni malakiheryo a Mpiipiliyani. c (1 Ate. 4:3-7) Ntoko alipa awaakamelana mwiikohe: ‘Ti mwawiihai achu nnakhalaahuwo yaahaalaaya woona sawooniherya sa osivela wa hiyaano? Meerelo yaala yaahaala otannya nchuno noohiphwanelela wa mmoha ti mmoha a hiyo?’

12. Tiheni alipa awaakamelana anaphwanelaaya osuwela vooloca sa makacamiho ni ohiiwanana variyari va ompwana?

¹² Muni mvilele hai makacamiho ni ohiiwanana? Hanka wakhala wi munnakhalano ohiiwanana ikwaha ikina? Apwanne eyo yaahaala wooniherya wi ompwana anyu honeeca phaama? Mweeparipari hooye; atheli oothene ikwaha ikina annakhalano ohiiwanana. Othela woolipa ori wa achu eeli yaawo analapa vamoha mwakuru wi emalihe ohiiwanana waya. Mwawiihiiha, mukhalelo munavilelaanyu makacamiho hiihaano, enanwerya wooniherya wi  othela wanyu onamukhumelela phaama. Hiiha ntoko alipa awaakamelana, mwiikohe: ‘Ninnawerya ovaanela miyaha sahu moomaaleleya ni mwa ncicimiho? Ninneemererya mwawaakuveya soohesa sahu nave neererya opaka matorokelo? Naachu a waakuvela oleva, oveka nikhurumuwelo ni olevelela?’ (Aef. 4:​31, 32) Mwawiihiiha wakhala wi nyuwaano hamuniiwanana naari ovaanela moohihiyererya variyari va ompwana, mweeparipari mikhalelo sanyu hasireera mmanle othelana. Wakhala wi nyuwaano mohiiwexexa wi muchu mukina tahi oophwanelela wa nyuwo, omaliha ompwana enamukhala yoolakelela ya miruku wa oopiili anyu. d

13. Mikhalelo taani inahaala waakhaviherya alipa awaakamelena, olakelela elukuluku enahaalaya omaliha epakaka ompwana?

¹³ Ophiyerya elukuluku taani ompwana onaphwanelaaya omaliha? Wakhala wi hinaano elukuluku yawaakhwanela wi nuupuwele wa yoolakelela yoophwanelela, ikwaha sincipale ichu hasineeca phaama. (Mas. 21:5) Mwawiihiiha, ompwana anyu onaphwanela olekela wi nyuwaano musuwelane phaama ni muchu yoowo. Nyenya hamunaphwanela omaliha elukuluku yincipalexa mpakaka ompwana opwaha vaavaa onachuneleyaayavo. Piipiliya oni: “Owehererya woolekela waakhela, wiiceliha murima.” (Mas. 13:12, PMM) Ohiya yeeyoru, wakhala wi moomaliha elukuluku yincipale mpakaka ompwana onanwerya okhala woovila ovootha yaweeha ya okonihana. (1 Ako. 7:9) Ohiya omaliha elukuluku mutikitheryeyaka mu elukuluku enavira mpakaka ompwana, nyuwaano munanwerya wiikoha: ‘Tiheeni nlelo kinachunaaka wi kihuserye vooloca sa muchu mukina kihaakumve opaka yoolakelela?’

TI MWAWIIHAI AKINA ENEERAAYA YAAKHAVIHERYE ACHU YAAWO YAAKAMELANNE?

14. Mikhalelo taani soophara muteko seiho achu akina eneeraaya yaakhaviheryeno alipa awaakamelana? (Moone tho eruku.)

¹⁴ Wakhala wi nohaasuwela achu yaawo yaakamelanne, nni niwerye hai waakhaviherya? Nnanwerya waawopa wi nlye vamoha, opaka malapelo a echoko vamoha naari othata vamoha. (Aro. 12:13) Mmikhalelo seiha, awo ananwerya osuwelana vancipale. Apwanne awo annachuna nikhaviheryo na mulipa awaahoola, nikhaviheryo na transporti anahaalaya ompharihela, naari nipuro weiwo eneeraaya ewerye ochekulawo mukhataaya? Wakhala wi tihiiha, nnanwerya wiivaha wi naakhaviherye? (Aka. 6:10) Alisia yoowo olociwe woopaceryani onnuupuwela owo ni Aschwin yaasiveliwaaya. Owo ooloca: “Naahoona okhala echu yootikhiniha vaavaa anna yaaloncaaya wi naanwerya waaxekurya waakhanle ninnachuna nipuro wi  nikhalewo vamoha, nyenya ohiya oovalaanyeya.” Wakhala wi ahoovekaani wi mwaahoole, munoona hai woona yeeyo okhala ekari? Mukhaleno ephoole wi muhaahiye alipa awaakamelana mukhataaya, nyenya tho mukhale oophimelela vaavaa awo anachunaaya elukuluku wi ewerye ochekulawo mukhataaya.—Afi. 2:4.

15. Ichu taani ikina asinthamwene anaphwanelaaya opaka wi yaakhaviherye yaale yaakamelanne? (Masiposipo 12:18)

¹⁵ Nave tho nnanweerya waakhaviherya yaawo yaakamelanne wa yeeyo nnalocaahu naari wa yeeyo nihinalocaahu. Akhweya ilukuluku ikina, nnamuchuna wiivareryela. (Mwaalakhanye Masiposipo 12:18.) Ntoko yootakiherya, nnanwerya okhalano nchuno na waaleela akina wi achu ala ahaakamelana, nyenya alipa awaakamelana anamuchuna waaleela mukhataaya. Hannaphwanela owaapaka achu yaawo yaakamelanne naari waasamela vooloca sa nyaha saya. (Mas. 20:19; Aro. 14:10; 1 Tim. 4:11) Ohiya yeeyo, hannaphwanela oloca ichu naari opaka makoho yaawo anahaala oweeriha alipa awaakamelana wiisoona okhala ookhinyereryeya othelana. Murokora mmoha awiichaniwa Elise ni aiyawe annuupuwela: “Naanoona okhala woovila vaavaa achu akina yaanikohaaya vooloca sa soolakelela sahu sa othela neeraka nihaakunve ovaanela.”

16. Tiheeni nnaphwanelaahu opaka wakhala wi yaale yaakamelanne aamaliha ompwana aya?

¹⁶ Hanka waakhala wi alipa awaakamelana aalakelela omaliha ompwana aya? Musepe ompakela makoho mmoha ti mmoha naari omukhupanya mmoha a yaawo nthowa na omaliha ompwana. (1 Pet. 4:15) Murokora mmoha awiichaniwa Leia oloca: “Kaahiiwa wi achu akina yaaniikoha ntakhara heeni miyaano ni munna mukina naamalinhaahu ompwana. Nthowa na yeeyo kaatepa osooseya mmurimani.” Ntoko nthokororyahu wuupaceryani, wakhala wi alipa awaakamelana aalakelela omaliha ompwana aya, hannaphwanela oloca wi awo aapaka yoolakelela yoonanara. Ohiya yeeyo, enataphulela wi ompwana woohaakhwaniherya yoolakelela aya—eyo yohaakhaviherya alipa awaakamelana opaka yoolakelela yaphaama. Mwawihiha, yoolakelela yeela enanwerya otanya wiicela otokweene nave enanwerya wiisoona okhala mukhataaya. Mwawiihiiha, nnaphwanela waavya mikhalelo sa waakhaviherya yaawo.—Mas. 17:17.

17. Tiheeni yaale yaakamelanne anaphwanelaaya otitelela weera?

¹⁷ Ntoko noonnaahu, ompwana onanwerya okhalano makacamiho aya, nyenya tho onanwerya okhala woohakalaliha. Jessica onnuupuwela: “Mweeparipari, ompwana waahinivaha muteko muncipale. Kahihakalala nthowa na opharihela elukuluku ni ikuru wi nsuwelane phaama.” Wakhanle wi mohaakamela naari waakameliwa, Mwiilipixerye opaka sincipale wi musuwelane phaama. Nave wakhala wi moheerano yeeyo, nyuwaano munamukhumelela phaama mu ompwana anyu—yoowo oni wookhaviheryeni opiili opaka yoolakelela ya miruku.