1. Tiheeni nihusenryaahu va muthukumano wa vayaakhani wa 2023?

 MMUTHUKUMANO wa vayaakhani wa 2023, a naahaakhela wiiwexexa woohakalaliha vooloca sa soororomela sahu nave tho naahiiwa soolokoha ikina soohakalaliha vooloca sa muteko ahu woolalerya. Naahihuserya, ntoko yootakiherya, achu akina ananwerya okhalano ekari ya okhala mmakupa a achu a Yehova naamwi amanle otoloxiwa Papulo Mutokotoko. Nave tho naasuwela wi, ovinyerya mu Novempuru a 2023, alaleeryi a Omwene hiyaahaala orepelaka iwora saya elampaaya mmuteko woolaleerya. Apwanne matorokelo yaala aheeriha muteko ahu okhala woohichuneyaxa naari woohaakuvaxa opwaha khalai? Mweeparipari hooye!

2. Ntakhara heeni muteko ahu woolaleerya onamvira okhalaka wawaakuveya nihiku ti nihiku nnavira? (Marku 13:10)

² Nihiku ti nihiku nnavira, muteko ahu woolaleerya onamvira okhalaka wawaakuveyaxa. Ntakhara heeni? Nthowa nawi elukuluku enammala. Muthokororye yeeyo Yesu aalohenryeiye vooloca sa muteko woolaleerya mmahiku ookuchula. (Mwaalakhanye Marku 13:10.) Mwawiiwanana ni masu a Mateyu, Yesu aahiloca wi michaka saphaama saahaala olaleiwa veelaponi yoothene ya vathi “makuchuwelo” ehaakumve ophiya. (Mat. 24:14) Masu yaala enaahiwa sa makuchuwelo oomalela a elapo yeela ya Satana. Yehova ootikitherya “nihiku nenlo ni elukuluku ene” ntakhara saweereya seiho inahaala weereya moohilekela. (Mat. 24:36; 25:13; Saw. 1:7) Nihiku ti nihiku ninnanaacameliha nihiku nikina ophiyerya hiihano. (Aro. 13:11) Niweheryaka, nnaphwanela otitelela oweherya ophiyerya makuchuwelo ephin’ye.

3. Tiheeni enanceenyerya olaleerya?

 ³ Vaavaa nnuupuwelaahu vooloca sa muteko ahu woolaleerya, ninneerano phaama othokororya makoho vooloca sa okumi: Ntakhara heeni ninnalaleerya michaka saphaama? Nikhweihaka, osivela onnanceenyerya olaleerya. Yeeyo nnapakaahu mmuteko woolaleerya ennooniherya osivela wahu—osivela wahu ntakhara michaka saphaama, osivela wahu ntakhara achu nave opwaha soothene, osivela wahu ntakhara Yehova ni nsina nawe. Nnahaala othokororya mmoha ti mmoha wa mikhalelo seiya.

NINNALALEERYA NTHOWA NAWI NINNASIVELIWA NI MICHAKA SAPHAAMA

4. Nnaakhulela hai vaavaa nnaakhelaahu muchaka waphaama?

⁴ Apwanne nyuwaano munnawerya wuupuwelela mukhalelo mwiisoonnaanyu vaavaa mwaakhenlaanyu muchaka waphaama—akhweya oyariwa wa mwaana mu emusi anyu naari muchu yoowo oovanheeni muteko yoowo mwaachunaayu? Moohikhwa minikwa nyuwaano mwaakhalano nchuno nawaaleela asinthamwene ni amusi anyu vooloca sa muchaka yoowo waphaama. Mmukhalelo mmohamoha, apwanne yoheereya echu yoolikana vaavaa mwiiwalaanyu muchaka woochuneya wa michaka soothene—michaka saphaama sa Omwene wa Muluku?

5. Mwiisoonne hai vaavaa mwaahusenryaanyu eparipari ya Masu a Muluku mu ekwaha anyu yoopacerya? (Moone tho iruku.)

⁵ Muupuwele mukhalelo mwiisoonnaanyu vaavaa mwaahusenryaanyu eparipari ekwaha yoopacerya Masu a Muluku. Nyuwaano mwahoona wi Tiithi anyu a wirimu oosivela, onnachuna wi nyuwaano mpake makupa mu emusi ya alapeli awe, nave wi owo oororomeliha omaliha wiicela ni makacamiho, wi nyuwaano munanwerya owehererya owoona oosiveliwa anyu akhwile, ekookelaka okhala akumi mu elapo evyaani—ni ichu sincipale. (Mar. 10:29, 30; Yoh. 5:28, 29; Aro. 8:38, 39; Wup. 21:3, 4) Iparipari seiya saahitannya murima anyu. (Luka 24:32) Nyuwaano mwaanasivela yeeyo mwaahuseryaanyu, nave himwaawerya ovitha iparipari seiya soochuneya wa nyuwo mukhatiinyu!—Mulikanyihe ni Yeremiya 20:9.

6. Tiheeni nyuwaano muhusenryaanyu mu yaweereya ya Ernesto ni Rosa?

 ⁶ Muthokororye yaweereya emoha. Munna mmoha awiichaniwa Ernesto b yoowo aarino variyari va iyaakha khumi sa oyariwa vaavaa apapaawe yaakhwilaaya. Ernesto ooloca: “Kaanuupuwelela wi: ‘Apwanne awo ekele wirimu? Naari enahaala okhala ookhweene okhala wookhala?’ Kaanaakhalela nrima anamwane akina yaawo yaarino apapaaya.” Wiiliwiili Ernesto aanaya omahiye, akokhoraka waacamela va nihiye na apapaawe nave aanavekela: “Khwoo, Muluku, kinnachuna osuwela weiwo eriwo apapaaka.” Variyari va iyaakha 17 apapaawe emanle okhwa, Ernesto aahaakhela yoohuserya ya Piipiliya, yeeyo owo eemerenryeiye. Owo aahikhala oohakalalaxa osuwela wi alipa ookhwa hanasuwela echu, ari ntoko wi eri mu ikhove sawiixeela nave wi Piipiliya onnaroromeliha waaviha yaawo mookhwani omwaahiyu. (Ekl. 9:5, 10; Saw. 24:15) Vookuchulani, owo aaphwanya maakhulo a makoho yaawo yaamuukhula mu iyaakha sincipale! Ernesto aanasiveliwano vancipale iparipari sa Mpiipiliyani seiyo aahusenryeiye. Amwaariye Rosa, yaahikhala vamoha ni yoowo mu yoohuserya nave yaakawana muchaka woosivela wa Omwene. Mu 1978 awo yaahipatisiwa. Ni nchuno ntokweene awo yaanalokoha soororomela saya soochuneya wa amusi, asinthamwene ni wa achu vyakala yaawo yaachuna wiiwa. Ntoko yookhumelela, Ernesto ni mwaariye Rosa yaahaakhaviherya achu opwaha 70 oya vahoolo ophiyerya opatisiwa.

7. Tiheeni eneereya vaavaa osivela eparipari ya Mpiipiliyani oniithipelaaya mmurimani mwahu? (Luka 6:45)

⁷ Vaavaa nnasivelaahu yeeyo nihusenryaahu Mpiipiliyani, ninniisoona wi nnaphwanela waaleela akina soothene vooloca sa yeeyo nihusenryaahu. (Mwaaalakhanye Luka 6:45.) Ninniisoona ntoko oohuserya a Yesu a mu nasna noopacerya yaawo yaalonce: “haniwerya omaala oloca ichu noonnaahu ni niiwalaahu.” (Saw. 4:20) Hiyaano ninnasivela vancipale eparipari nave ninnachuna olokoha wa achu ancipale.

NINNALALEERYA NTHOWA NAWI NINNAASIVELA ACHU

8. Tiheeni enanceenyerya waaphwanyiha akina michaka saphaama? (Moone ekaaxa “ Waasivela Achu—Waapaka Oohuserya .”) (Moone tho eruku.)

⁸ Ntoko Yehova ni Mwanawe, hiyaano ninnaasivela achu. (Mas. 8:31; Yoh. 3:16) Ninnakhalano niphwanya ntokweene wa yaale ‘ehirino Muluku’ ni yaale ehirino “ewehereryo.” (Aef. 2:12) Nthowa na makacamiho aya, awo enniisoona ntoko wi eri mu ehime yawiixa nave hiyaano nookhalano mukoi yoowo onahaala waakumiherya vaate—michaka saphaama sa Omwene wa Muluku. Osivela wahu nniphwanya wa yaawo onnanceenyerya opaka owetha wahu wi naaphwanyihe michaka saphaama. Michaka seiya soochuneya inanwerya osareiha mmurimani mwaya ewehereryo, inamwaakhaviherya okhalano okumi waphaama hiihano ni waavaha ewehereryo ya  “ekumi yeeparipari.”—ekumi yoohimala—mu elapo evyaani ya Muluku.—1 Tim. 6:19.

9. Olopola taani nnalokohaahu vooloca sa omwaahiyu, nave ntakhara heeni? (Esekiyeli 33:7, 8)

⁹ Osivela wahu ntakhara achu onnanceenyerya tho waalopola vooloca sa waacamela wa makuchuwelo a elapo yeela yoonanara. (Mwaalakhanye Esekiyeli 33:7, 8.) Ninnakhalano niphwanya wa achu oothene ophitaanyerya ni amusi ahu yaawo ahinamurumeela Yehova. Ancipale anachariha okumi aya wa nihiku ti nihiku ehisuwelaka tiheeni enarwa muhoolo—“yoohooxa etokotoko, yeeyo ehitonko weereya ovinyerya omapacereryo wa elapo ophiyerya hiihaano, nave herwa tho yeereya wanaawiili.” (Mat. 24:21) Nnachuna wi esuwele yeeyo enahaala weereya variyari va elukuluku ya othoriha—voopacerya malapelo oothene atheru anahaala otoloxiwa nave voocharela mukhalelo woonanara wa ichu onahaala otoloxiwa moomalela va Armaketo. (Wup. 16:14, 16; 17:16, 17; 19:11, 19, 20) Ninnaavekelela achu ancipale wi yeemererye olopola yoola wi ephitaane ni hiyaano mu malapelo aweela hiihano. Hanka vooloca sa yaale ahinawiriyana olopola mmahiku ahu yaala, ophitaanyeryavo amusi oosiveliwa?

10. Ntakhara heeni ti woochuneya otitelela waalopola achu vooloca sa yeeyo enahaala weereya moohilekela?

¹⁰ Ntoko etharihiwaaya mmwaha ovirale, enamukhala yoolakelela ya Yehova waavuluxa achu yaawo enahaala otoroka murima aya vaavaa enahaalaaya woona otoloxiwa wa Papulo Mutokotoko. Wakhala wi tihiiha, ti woochuneyaxa otitelela waaleela vooloca sa yeeyo hiihaano. Muupuwele ela: Yeeyo nnaaleelaahu hiihaano, mu elukuluku yeeyo enanweeriha wuupuwela yeeyo yiiwalaaya. (Mulikanyihe ni Esekiyeli 33:33.) Akhweya awo ananwerya wuupuwela vooloca sa olopola yiiwalaaya wa hiyaano ni oceenyeryeya okhala vamoha mu omurumeela Yehova makuchuwelo ehaakumve ophiya. Ntoko yeeren’yaaya ni mulipa oowehererya mukhora wa ekariposo yo Filipi, yoowo aatoronke murima awe amanle ‘weereya mwaacikinye mutokotoko’, akhweya tho akina ahineemererya hiihaano anamutoroka mirima saya amanle otoloxiwa Papulo Mutokotoko, yoowo osaren’ye elapo yoothene.—Saw. 16:25-34.

NINNALALEERYA NTHOWA NAWI NINNAMUSIVELA YEHOVA NI NSINA NAWE

11. Ti mwawiihai nnamvahaahu Yehova ovuwa, ncicimiho ni owerya? (Wupulula 4:11) (Moone tho iruku.)

¹¹ Mathowa oochuneya ananeeriha olaleerya muchaka waphaama tiyawi ninnamusivela Yehova Muluku ni nsina nawe naweela. Ninnoona muteko ahu woolaleerya ntoko mukhalelo wa omucicimiha Muluku yoowo nnamusivelaahu. (Mwaalakhanye Wupulula 4:11.) Ninneemererya moomalela ni yeela, Yehova Muluku toophwanela waakhela ovuwa, ncicimiho, ni owerya wa alapeli awe oororomeleya. Ninnamvaha owo ovuwa ni ncicimiho vaavaa nnaleelaahu akina sawooniherya sawooneya wi owo ‘topatunxe ichu soothene’ nave wi hiyaano nikhanle nthowa nawi owo tonivanhe okumi. Ninnamvaha yoowo  owerya—owerya wahu—vaavaa nnapharihelaahu elukuluku, ikuru ni sookhalano sahu wi nikawane ni akina michaka saphaama mwawaakhwanela vaavaa mikhalelo sahu sinaneemereryaaya. (Mat. 6:33; Luka 13:24; Ako. 3:23) Nikhweihaka, hiyaano ninnasiveliwa oloca sa Muluku yoowo nnamusivelaahu. Nave tho ninniisoona okhala ooceenyeryeya waaleela akina vooloca sa nsina nawe ni yeeyo nneemelelaaya. Ntakhara heeni?

12. Nneeliha hai nsina na Yehova mmuteko woolaleerya?

¹² Osivela wahu ntakhara Yehova onnanceenyerya wi neelihe nsina nawe. (Mat. 6:9) Eyo enataphulela wi nnachuna waaleela akina wi ichu soonanara seiyo Satana onaloceiye vooloca sa Yehova tahi seeparipari. (Map. 3:1-5; Yupu 2:4; Yoh. 8:44) Mmuteko ahu woolaleerya, nri oolakelela omwaakiha Muluku ahu nlocaka eparipari vooloca sa yoowo wa oothene yaawo ananiwiriyana. Nnachuna oothene esuwele wi mukhalelo awe mutokotoko ori osivela ni wi olamulela wawe ti wawookololowa, nave tho wi Omwene awe moohilekela onahaala omaliha makacamiho oothene nave tho onahaala oruuha murecele ni ohakalala wa emusi ya achu. (Sal. 37:10, 11, 29; 1 Yoh. 4:8) Vaavaa nnaakihaahu mukhalelo wa Yehova mmuteko woolaleerya, ninneeliha nsina nawe. Hiyaano ninnakhala oohakalala nthowa nawi ninnapaka yeeyo naaphwanelaahu opaka ntoko Anamoona a Yehova. Mwawiihai?

13. Ntakhara heeni ninniirumiha vaavaa nniichaniwaahu Anamoona a Yehova? (Yesaya 43:10-12, PMM)

¹³ Yehova oonithanla wi nikhale ‘anamoona awe.’ (Mwaalakhanye Yesaya 43:10-12, PMM.) Mu iyaakha sa muculi, ekaarata ya Nikhuuru Noolamulela yaahiloca: “Ncicimiho ntokweene mmoha ti mmoha a hiyaano aaphwaneleiye opuha waari wiichaniwa ntoko mmoha a Anamoona a Yehova.” c Ntakhara heeni? Muthokororye  niphwanaphwaniho nla. Mwaanyiherye wi nyuwaano mohootheryiwa wi moopaka echu yooheseya, vano munnamuchuna muchu wi aaleele akina wi mwaha owo munamootheryiwa, nyenya tho aloce wi nyuwaano mwa muchu aphaama nave wi himwenreno yeeyo. Taani mwaahaalaanyu omuthanla? Mweeparipari muchu yoowo munamusuwelaanyu ni munamuroromelaanyu nyenya tho yoowo orino meecelo aphaama enahaala weeriha wi akina emuroromele. Moorweela wa onithanla wi nikhale Anamoona awe, Yehova ohooniherya wi onnansuwela phaama nave tho onnanroromela hiyaano wi nimuhelele onamoona wi owo ti Muluku mmoharu eeparipari. Ninnacicimiheya moorweela wa okhala Anamoona awe nave ninnapharihela ikari soothene wi nsuwelihe nsina nawe ni wooniherya wi ichu soothene sawoopiha inalociwa vooloca sa owo tahi seeparipari. Mwaweerano yeeyo, ninnakhala mwawiiwanana ni nsina nenlo nniirumihaahuno vancipale, Anamoona a Yehova!—Sal. 83:18; Aro. 10:13-15.

NNAHAALA OTITELELA OLALEERYA OPHIYERYA OMAKUCHUWELO

14. Ewehereryo taani yoohakalaliha nryaahuno omwaahiyu?

¹⁴ Nookhalano ewehereryo yoohakalaliha omwaahiyu! Ni mareeliho a Yehova, ninnawehererya owoona achu ancipale yeemereryaka iparipari yoohooxa etokotoko ehaakumve opacerya. Nave tho, ninnahakalala wi naamwi variyari—va yoohooxa etokotoko—elukuluku yoovilaxa achu ancipale ananwerya ohiya okumi yoowo onahooleliwa ni Satana ni ophitaana ni hiyaano wi emucicimiheke Yehova!—Saw. 13:48.

15-16. Tiheeni nnaphwanelaahu opaka, nave ophiyerya liini?

¹⁵ Mwa hiihaano, nookhalano muteko wa opaka. Nookhalano ekari ya opaka makupa mu yoolokoha ehinahaala wuuluuleliwa—olaleerya michaka saphaama sa Omwene wa Muluku veelaponi yoothene ya vathi. Mu elukuluku emohamoha nnaphwanela otitelela waalopolaka achu sa yeeyo enahaala weereya omwaahiyu. Achu anaphwanela osuwela wi makuchuwelo a mukhalelo yoola wa ichu annakhuveela mwawaakuveya. Mwawiihiiha, vaavaa elukuluku ya othoriha enahaalaaya ophiya, awo anahaala osuwela wi michaka naalaleeryaahu saarweela wa Yehova Muluku.—Ese. 38:23.

¹⁶ Tiheeni nlakelenlaahu weera? Nceenyeryiwaka ni osivela—osivela ntakhara michaka saphaama, waasivela achu ni opwaha soothene omusivela Muluku ni nsina nawe—nnahaala olaleerya mwa mvai ni moolucuwa ophiyerya Yehova alonce: “Muteko woolaleerya woomala!”