1-2. Tiheeni nniikohaahu vooloca sa mavekelo ahu?

 MOHINTOKO wiikoha waakhanle wi Yehova onnaakhula mavekelo anyu? Waakhanle wi ti hiihaa, hamuri mukhatiinyu. Anna ni arokora ancipale aaloca wi yaaniikoha tho vooloca sa yeela, xaxaxa vaavaa yaahoolelaaya makacamiho. Wakhala wi ninnahooxeya, akhweya onamukhala woovila wa hiyo woona mukhalelo Yehova onaakhuleiye mavekelo ahu.

² Vano hankooni noone ntakhara heeni nnaroromelaahu wi Yehova onnaakhula mavekelo a alapeli awe. (1 Yoh. 5:15) Nnahaala tho othokororya makoho ala: Ntakhara heeni ilukuluku ikina ninnoona wi Yehova hanaakhula mavekelo ahu? Mmikhalelo taani Yehova onaakhuleiye mavekelo ahu olelo?

3. Ntakhara heeni Yehova onachuneiye wi nivekeleke wa yoowo?

³ Soorepa sinnaniroromeliha wi Yehova onnanisivela vancipale nave wi hiyaano na achu asisapo wa yoowo. (Axeu. 2:7; 1 Yoh. 4:10) Ti nthowa nene owo onaniwopeiye wi nimvekeke nikhaviheryo nawe mu nivekelo. (1 Pet. 5:6, 7) Owo onachuna onikhaviherya wi ntitelele okhala awaacameleya wa yoowo ni ovilela makacamiho ahu.

4. Nnasuwela hai wi Yehova onnaakhula mavekelo a alapeli awe? (Moone tho eruku.)

⁴ Mpiipiliyani, wiiliwiili ninnaalakhanya wi Yehova aahaakhula mavekelo a alapeli awe. Apwanne munnuupuwela yootakiherya emoha? Hanka vooloca sa Mwene Tavite? Owo aahikhalano amwiicani ancipale awoopiha variyari va okumi awe, nave mu ikwaha soothene aanaveka nikhaviheryo na Yehova mu nivekelo. Mu ekwaha emoha, owo aahivekela: “Apwiya, wiriyanani ovekela waka, mwiiwe yooveka aka. Kaakhuleeni ntakhara mwa  oororomeleya ni awookololowa!” (Sal. 143:1, PMM) Yehova aahaakhula mavekelo a Tavite ntakhara woopoliwa. (1 Sam. 19:10, 18-20; 2 Sam. 5:17-25) Tavite aanwerya oloca moororomeleya: ‘Yehova ori vakhiviru wa yaale anamwiichana.’ Hiyaano tho nnanwerya ororomela yeela.—Sal. 145:18, NN.

5. Apwanne ilukuluku soothene alapeli a Yehova akhalai mavekelo aya yaanaakhuliwa mmukhalelo yoowo yaaweheryaaya? Mvahe yootakiherya. (Moone tho eruku.)

⁵ Akhweya Yehova hanaakhula mavekelo ahu mmukhalelo nnaweheryaahu. Ti yeeyo yeeren’ye ni murummwa Paulo. Owo aahimveka Muluku wi aviihe “mwiiwa mmwiilini.” Mu ikwaha raru Paulo aahivekela mooluluwanya vooloca sa nikacamiho nenla noovila. Apwanne Yehova aahaakhula mavekelo yaawo? Aai, nyenya ohiya mmukhalelo Paulo aaweheryeiye. Ohiya oviihavo nikacamiho, Yehova aahimvaha ikuru seiho owo aachuneiye wi atitelele omurumeela Yoowo moororomeleya.—2 Ako. 12:7-10.

6. Ntakhara heeni onakhalaaya ntoko wi Yehova hanaakhula mavekelo ahu mu ikwaha ikina?

⁶ Hiyaano tho mu ikwaha ikina ninnaakhuliwa mmukhalelo yoowo nahaaweheryaahu. Nnanwerya tho ororomela wi Yehova oosuwela phaameene mukhalelo wa onikhaviherya. Ophiyerya tho wi owo onanwerya “opaka sincipale opwaha mummo nnavekaahu naari nnaanyiheryaahu.” (Aef. 3:20) Nthowa na yeela, maakhulo a mavekelo ahu ananwerya ophiya mu elukuluku naari mmukhalelo yoowo nahaaweheryaahu.

7. Ntakhara heeni akhweya ninnaphwanela otoroka yeeyo nnavekaahu mu nivekelo? Mvahe yootakiherya.

⁷ Akhweya onamuchuneya otoroka yeeyo nnavekaahu mmavekelo vaavaa nniiwexexaahu phaameene yookhwela ya Yehova. Muthokororye yootakiherya ya Martin Poetzinger. Elukuluku vakhaani amanle othela, munna Martin aahikerihiwa mu nipuro na alipa oophariwa o Nasi. Voopaceryani, owo aahimveka Yehova wi eerihe wi ataphuliwe mu nipuro na alipa oophariwa, wi amukhapeleleke mwaariye ni okookela olaleerya. Nyenya, imanle ovira isumana piili, hoona ineneeryo sawi Yehova aahaala omukhaviherya wi ataphuliwe. Mwawiihiiha owo aahipacerya ovekela: “Yehova, khoo, mukikhaviherye woona yeeyo munachunaanyu wi keere.” Mwawiihiiha, owo aahipacerya wuupuwela vooloca sa yeeyo yaahoolelaaya anna akina yaawo yaari mu nipuro nenlo na alipa oophariwa. Ancipale a yaawo yaanuukhuwa vancipale ni asaaraya vamoha ni anaaya. Voocharela, Munna Martin aahivekela: “Yehova, kinnathamalela ntakhara murici aka muvyaani. Mukikhaviherye wi kiwerye  waalipiha ni waahakararya annaka.” Mu iyaakha thanu naxexe soocharela ari mu nipuro na alipa oophariwa, owo aapharihela elukuluku awe eerakano yeeyo ene!

8. Ichu taani nnaphwanelaahu wuupuwelela vaavaa nnavekelaahu?

⁸ Nnaphwanela osuwela wi Yehova ookhalano yoolakelela, nave onahaala waakhwaniherya yeeyo mu elukuluku olakelenleiye. Yoolakelela yeeyo ennaphitaanyerya omaliha moomalela makacamiho oothene ananihooxa olelo—makacamiho ntoko ipahu sa maphacuwelo, ireca ni okhwa. Yehova onahaala waakhwaniherya yookhwela awe moorweela wa Omwene awe. (Tan. 2:44; Wup. 21:3, 4) Nyenya, ophiyerya elukuluku yeeyo, Yehova onneemererya wi Satana alamuleleke. b (Yoh. 12:31; Wup. 12:9) Waakhanle wi Yehova oomaliha makacamiho oothene olelo, waahaala okhala ntoko wi Satana onnalamulela phaama elapo. Mwawiihiiha, vaavaa nnanweheryaahu Yehova waakhwaniherya yoororomeliha vyakala, eyo henataphulela wi Owo hananikhaviherya ni makacamiho ahu a mutano. Vano hankooni nthokororye ichu savakhaani Yehova onaphariheleiye wi anikhaviherye.

9. Ti mwawiihai Yehova onanikhaviheryeiye vaavaa nnachunaahu opaka yoolakelela? Mvahe yootakiherya.

⁹ Owo onnanivaha miruku. Yehova ooniroromeliha onivaha miruku nnachunaahu wi nipakeke soolakelela saphaama. Ninnachuna miruku soorweela wa Yehova xaxaxa vaavaa nnapakaahu soolakelela seiho sinahaala otoroka okumi ahu, ntoko yootakiherya, vaavaa nnalakelelaahu waakhanle wi nnahaala otitelela okhala aciye naari hooye. (Tiy. 1:5) Muthokororye yaweereya ya murokora ori muciye awiichaniwa Mariya. c Owo aari oohakalala arumeelaka ntoko piyoneera ookilaatheya vaavaa aamusuwenleiye munna mmoha. Owo ooloca: “Vaavaa onthamwene ahu waakhalaaya woolipa naanachunana vancipale. Kaahoona wi kaaphwanela opaka yoolakelela. Kaahivekela vancipale vooloca sa yeeyo. Kaanachuna ohoolela wa Yehova, nyenya kaahisuwela wi owo haahaala opaka yoolakelela wa miyo.” Owo ahoona wi Yehova aahaakhula mavekelo awe ntakhara miruku. Mwawiihai? Owo aahipaka otholathola mu soolaleeryiwa sahu nave aahiwerya ophwanya miyaha sooluluwanya seiho saamukhavihenrye ophwanya maakhulo a makoho awe. Owo tho aahiwiriyana ikano sa miruku sa amannya. Miruku seiho saahimukhaviherya Mariya waalikhela miyoonelo sawe. Wookuchulani, owo aari ooreheryeya opaka yoolakelela mwa miruku.

10. Mwawiiwanana ni Afilipi 4:13, tiheeni Yehova onahaaleiye weera wi aalipihe alapeli awe? Mvahe yootakiherya. (Moone tho eruku.)

¹⁰ Owo onnanivaha ikuru wi nivilele. Hiihaa ntoko aapankeiye ni murummwa Paulo, Yehova  onahaala onivaha ikuru seiho nnachunaahu wi nivilele makacamiho ahu. (Mwaalakhanye Afilipi 4:13.) Muthokororye mukhalelo Yehova aamukhavihenryeiye munna awiichaniwa Penxami ovilela ni ilukuluku soovila. Mu iyaakha sincipale variyari va omiravo awe, Penxami vamoha ni echoko awe yaakhala mu mapuro a alipa oochawa o Afrika. Penxami ooloca: “Kaanavekela wa Yehova kimvekaka wi akivahe ikuru wi kipake yeeyo enamuhakalaliha yoowo. Yehova aahaakhula mavekelo aka moorweela wa okivaha murecele wa mmuupuweloni, olipa murima wi kititelele olaleerya, ni soolaleeryiwa wi kititelele okhala oolipa omunepani.” Owo onnatitelela othariha: “Waalakhanya saweereya sa Anamoona a Yehova akhwaaka ni woona mukhalelo Yehova aakhavihenryeiye ovilela, yaalipiha nchuno naka na otitelela okhala oororomeleya.”

11-12. Ti mwawiihai Yehova onathanleiye opharihela emusi ahu yoomunepani wi aakhule mavekelo ahu? (Moone tho eruku.)

¹¹ Owo onnapharihela emusi ahu yoomunepani. Mu ohiyu Yesu ahaakumve okhwa, owo aahivekela moohihiyererya. Owo aahimveka Yehova wi aheemererye wi achu yuupuweleke wi owo aananariha nsina na Muluku ni emuthorihele okhwa nthowa na yeeyo. Ohiya weerano yeeyo, Yehova aahimukhaviherya moorweela wa omuruma munkeelo wi amulipihe yoowo. (Luka 22:42, 43) Yehova onanwerya onikhaviherya tho moorweela wa omuceenyerya munna naari murokora wi anxekurye naari onlikaarela wi anilipihe. Oothene ahu nnaphwanela waavyaka ikari wi nipharihele“masu aphaama” wi naalipihe akhwiihu a munroromeloni.—Mas. 12:25, PMM.

¹² Muthokororye yaweereya ya murokora awiichaniwa Miriyamu. Isumana vakhaani amanle omuyeleela iyawe mookhwani, Miriyamu aari owannyawe iisoonaka wi haarino ewehereryo ni awuukhuwa. Owo haamaala wunla nave aanachuna ochekula ni muchu. Owo ooloca: “Miyaano nkaarino ikuru sa omulikaarela muchu, mwawiihiiha, kaanavekela wa Yehova. Vaavaa kaatitelelaaka wunla ni ovekela, telefoni aka aahiichana. Aari mutokweene a muloko yoowo tho aari nthamwene awaacameleya.” Miriyamu aahihakararyiwa ni mutokweene yoole vamoha ni mwaariye. Nave aahilekecheya wi Yehova aahimpharihela mutokweene yoole wi amuhakararye.

13. Mvahe yootakiherya vooloca sa mukhalelo Yehova onaaphariheleiye achu yaawo ahinamurumeela wi aakhule mavekelo ahu.

 ¹³ Owo akhweya onanwerya waapharihela achu ahinamulapela yoowo wi aakhule mavekelo ahu. (Mas. 21:1) Mu ikwaha ikina, Yehova onnaakhula mavekelo a achu awe moorweela wa waapharihela achu ahinamulapela yoowo wi yaakhaviherye. Ntoko yootakiherya, owo aahimuceenyerya Mwene Artaxerxe wi eemererye yooveka ya Nehemiya ya okookela o Yerusalemu wi awerye okhaviherya muteko wa oteka wanaawiili epooma. (Neh. 2:3-6) Olelo tho, Yehova onanwerya waapharihela achu yaawo ahinamurumeela wi enikhaviherye vaavaa nnachunaahu.

14. Ti mwawiihai yaweereya ya Soo Hing enoolipihaayani? (Moone tho eruku.)

¹⁴ Murokora mmoha awiichaniwa Soo Hing ohoona wi Yehova aahimukhaviherya moorweela wa totore awe. Mwanawe anahooxeya nnikacamiho ntokweene na mmuupuweloni. Vaavaa mwanawe aampankeiye asitenti mutokweene, owo ni aiyawe yaahihiya muteko wi yamukhapeleleke yoowo. Ntoko yookhumelela, awo yaahithoiwa ikhorowa. Soo Hing ooloca wi haahaala owerya ovilela nnikacamiho nikina vyakala. Owo aahihula murima awe wa Yehova avekaka nikhaviheryo. Totore aahiphwanya mukhalelo wa okhaviherya emusi awe. Nthowa na yoowo, awo yaahaakhela nikhaviheryo na kuvernu na ophwanya nipuro noophwanelela wi ekhalekevo. Voocharela, Soo Hing ooloca: “Hiyaano nohoona mukhalelo Yehova onikhavihenryeiye. Owo chiryene ‘onniiwa mavekelo.’”—Sal. 65:2, PMM.

15. Tiheeni yaamukhavihenrye murokora mmoha ororomela wi mavekelo awe yaanaakhuliwa?

¹⁵ Mavekelo ahu hanaakhuliwa mmukhalelo wootikiniha. Nyenya maakhulo nnavahiwaahu ti yaawo ene nnachunaahu wi nikhale oororomeleya wa Tiithi ahu a wirimu. Mwa yeeyo mooneke mukhalelo Yehova onaakhuleiye mavekelo anyu. Murokora awiichaniwa Yoko oona ntoko wi Yehova haakhula mavekelo awe, nyenya voocharela, owo aahipacerya orepela ichu seiho aamvenkeiye Yehova. Moovira wa elukuluku owo aahipacerya ovareryela seiho aarepenleiye, nave aahoona wi Yehova aahaakhula mavekelo awe mancipale, ophiyerya tho mavekelo makina aacuwanleiye. Mu elukuluku ti elukuluku nnaphwanela weemela ni ovarerya mukhalelo Yehova aakhunleiye mavekelo ahu.—Sal. 66:19, 20.

16. Ti mwawiihai nnooniheryaahu nroromelo vooloca sa mavekelo ahu? (Ahepri 11:6)

 ¹⁶ Ninnooniherya nroromelo nahu wa Yehova ohiya pahiru moorweela wa ovekela, nyenya tho moorweela wa weemererya maakhulo awe moohipwacha mukhalelo onaakhuleiye. (Mwaalakhanye Ahepri 11:6.) Muthokororye yootakiherya ya Maiki ni mwaariye Krisi. Awo yaahikhalano yoolakelela ya orumeela o Peteli. Maiki ooloca: “Naahirepela ipetisawu ntoko mutheli mu iyaakha sincipale, nave naanavekela wiiliwiili wa Yehova vooloca sa yoolakelela yeela, nyenya hinaawompwaru.” Maiki ni Krisi yaahititelela ororomela wi Yehova aahisuwela phaameene mukhalelo wa waapharihela yaawo mmuteko awe. Awo yaahititelela opaka yeeyo yaaweryaaya, erumeelaka ntoko mapiyoneero ookilaatheya mmapuro waaryaayawo othowa otokweene nave yaanapaka makupa mmuteko wa oteka wa marehereryo a Yehova. Olelo, awo anarumeela mmuteko wa weecelela ikulucu. Maiki ooloca: “Yehova ikwaha sincipale hanaakhula mavekelo ahu mmukhalelo yoowo naaweheryaahu, nave owo onnaakhula yaawo ni mmikhalelo saphaamaxa opwaha vaavaa naanyiheryaahu.”

17-18. Mwawiiwanana ni Salmu 37:4, tiheeni nnaroromelaahu?

¹⁷ Mwaalakhanye Salmu 86:6, 7. Mulipa oomurepa salmu Tavite, aanaroromela wi Yehova aanawiriyana ni waakhula mavekelo awe. Nyuwaano tho munanwerya okhalano nroromelo nimohamoha. Sootakiherya nthokoronryaahu mmwaha yoola sinnaniroromeliha wi Yehova onanwerya onivaha miruku ni ikuru nnachunaahu wi nivilele. Owo onanwerya opharihela emusi ahu yoomunepani ophiyerya tho yaale ahinamurumeela wi enivahe nikhaviheryo nammoori.

¹⁸ Naamwi akhweya Yehova ilukuluku sincipale ahaakhulaka mavekelo ahu mmukhalelo naaweheryaahu, noosuwela wi owo onahaala waakhula yaawo. Owo onahaala ovahererya yeeyo ene nnachunaahu ni mu elukuluku yoophwanelela. Mwawiihiiha, mutitelele ovekela, muroromelaka wi Yehova onahaala wookhapelelaani hiihava nave wi owo onahaala woovahaani ichu soothene ‘seiho munakhwelaanyu’ mu elapo evyaani enoorwa.—Sal. 145:16.