1. Vaavaa murokora onuupuweleiye sa muchu onakhweleiye othelanano, makoho taani onaphwaneleiye wiipakela?

AKRISTU oothene ari vathi va ohoolela woophaameya wa Yesu Kristu. Mwawiihiiha, vaavaa muthiyana ori Mukristu onatheliweiye, onnakhala vathi va ohoolela wa mulopwana oohiphaameya. Nlo nnanwerya okhala nikacamiho. Mwawiihiiha, vaavaa onamuupuweleiye oothelana awe, muthiyana owo onamweerano phaama wiipakela makoho ala: ‘Tiheeni enakilekecha wi munna ola, onahaala okhala muru waphaama wa echoko? Apwanne onnakuha va nipuro noopacerya omulapela Yehova mookumini mwawe? Waakhanle wi hooye, apwanne ookhala onahaala onikhaviherya olipiha onthamwene ahu ni Yehova nimanle opaka othela?’ Navetho, murokora onamweerano phaama wiipakela makoho ntoko: ‘Mikhalelo taani kiryaakano inahaala okhaviherya mu othela wahu? Apwanne ka muchu oopisa murima ni oovaha? Apwanne kookhalano onthamwene woolipa ni Yehova?’ (Ekle. 4:9, 12) Wakhala wi muthiyana oopaka soolakelela saphaama ahaakumve otheliwa, iho inahaala okhaviherya othela wawe okhumelela phaama ni okhala oohakalala.

2. Tiheeni nnahaalaahu othokororya mmwaha yoola?

² Mamilyawu a arokora ahu, aavaha yootakiherya yaphaama ya owiiwelela asiiyaya. Chiryene, awo annaphwanela othamaleliwa! Ninnahakalala omurumeela Yehova vamoha ni athiyana yaala oororomeleya! Mmwaha yoola, nnahaala othokororya maakhulo a makoho mararu: (1) Makacamiho taani athiyana atheliwe eneeraaya ehoolele? (2) Ntakhara heeni muthiyana otheliwe onnathanla omwiiwelela iyawe? (3) Anna athenle ni arokora atheliwe eni ehuserye hai vooloca sa wiiwelela orweela wa yootakiherya ya Yesu, Apikayeli, ni Mariya mwaara a Yosefe, amannya Yesu?

3. Makacamiho taani atheli oothene anakumanaayano?

³ Othela yamahala yasisapo enarweela wa Muluku, nyenya achu toohiphaameya. (1 Yoh. 1:8) Tinthowa nene Masu a Muluku anaalopolaaya  atheli wi anahaala okumanano makacamiho, yaawo analociwa ntoko “sawuukhula mookumini mwaya.” (1 Kor. 7:28) Nnahaala othokororya ichu savakhaani seiyo sinahaala okhala soovila wa muthiyana otheliwe.

4. Ntakhara heeni muthiyana otheliwe onamuupuwela wi ti yawuuliha muru omwiiwelela iyawe?

⁴ Akhweya nthowa na mukhalelo muthiyana ophwiiweiye onamuupuwela wi omwiiwelela iyawe ti yawuuliha muru. Murokora mmoha awiichaniwa Marisol, yoowo onakhala o Estatu Unitu ooloca: “Mmukuma kinnunwaakawo, hiyo athiyana ninnaleeliwa wi nnaphwanela olikanaka ni alopwana mmukhalelo woothene. Koosuwela wi Yehova omvaha murici mulopwana wi amuhooleleke mwaariye nave wi mwaariye onaphwanela omwiiwelelaka ni omvaha ncicimiho. Nyenya enakhala yoovila ocicimiha murici wa iyaka nthowa nawi elapo enaloca wi nkinaphwanela weerano yeeyo.”

5. Moonelo taani wooheseya alopwana aryaayano vooloca sa athiyana?

⁵ Mmukhalelo mukina, muthiyana onanwerya otheliwa ni mulopwana yoowo onuupuwela wi athiyana tahi asisapo waapwaha alopwana. Murokora oniichaniwa Ivon, onakhala o Amerika Oohico ooloca: “Mmukuma nnakhalaahuwo, alopwana tanapacerya olya nave voocharela athiyana. Asimwali tanaapeya ni orapiha iparatho nave amiravo anarumeeliwa ni asimamaaya ni arokora aya, nave annaleeliwa wi awo tookhweleyasa veemusini.” Murokora oniichaniwa Yingling, yoowo onakhala o Asiya, ooloca: “Mu elocelo aka, aakhalavo masu analoca wi athiyana hanaphwanela okhalano mavyakelo naari masuwelelo. Murici aya ori olapa miteko soothene sa vaate nave awo haneemereryiwa oloca moonelo aya wa asiiyaya.” Mulopwana yoowo ovoloweliwe ni muupuwelo yoola wa ohooniherya osivela nave ohinapaka yeeyo Piipiliya onaloceiye, onneeriha okumi wa mwaariye okhala woovila, hanachariha yootakiherya ya Yesu, nave onnamuhiciha Yehova.—Éfe. 5:28, 29; 1 Ped. 3:7.

6. Tiheeni athiyana atheliwe anaphwanelaaya weera wi elipihe onthamwene aya ni Yehova?

⁶ Ntoko elociwaaya mmwaha ovirale, Yehova onaweherya wi alopwana Eekristu yaawo athenle, evakulele echoko aya ni soothowa soomwiilini ni soomunepani sa emusi aya. (1 Tim. 5:8) Nyenya, arokora yaawo atheliwe anaphwanela omalihaka elukuluku nihiku ti nihiku yaalakhanyaka Masu a Muluku ni wuupuwelela yaawo, navetho ovekela wa Yehova okhumela vathi va murima. Weerano yeela enanwerya okhala yoovila. Arokora atheliwe annatepa oweiwa, mwawiihiiha anamwiisoona wi haanono ikuru wi epake ichu seiya, nyenya omaliha elukuluku emwaalakhanyaka Piipiliya echu yoochuneya. Ntakhara heeni? Nthowa nawi Yehova onaweherya wi mmoha ti mmoha a hiyo, innuwihe nave akhapelele onthamwene ni yoowo.—Saw. 17:27.

7. Tiheeni enahaala weeriha okhala wookhweya muthiyana omwiiwelela iyawe?

⁷ Mweeparipari muthiyana otheliwe onaphwanela wiilipiserya wi amwiiweleleke iyawe oohiphaameya. Nyenya enamukhala yookhweya okhwaaniherya murici yoowo Yehova omvanheiye, wakhala wi ohiiwexexa mathowa anarweela mu Soorempwa, yaawo anamweeriha owiiwelela aiyawe.

8. Hiiha ntoko elociwaaya mu Éfeso 5:22-24, ntakhara heeni muthiyana otheliwe, yoowo ori Mukristu, onathanleiye omwiiwelela iyawe?

⁸ Muthiyana ori Mukristu, yoowo otheliwe onnathanla omwiiwelela iyawe, nthowa nawi ti yeeyo Yehova onamvekeiye. (Mwaalakhanye Éfeso 5:22-24.) Owo onnamuroromela Tiithi awe awirimu asuwelaka wi onnamusivela nave wi haahaala omveka opaka echu ehiri yaphaama wa yene.—Malam. 6:24; 1 Yoh. 5:3.

9. Tiheeni enahaala weereya vaavaa muthiyana otheliwe onamwiiweleleiye Yehova moorweela wa ocicimiha murici wa iyawe?

 ⁹ Elapo enaaceenyerya athiyana wi ehiiweleleke malamulo a Yehova nave woona wiiwelela ntoko echu yawuuliha muru. Mweeparipari, yaawo anavuwiha moonelo ntoko yoola hamusuwenle Muluku ahu oosivela. Yehova haahaala waavaha anaawe oosiveliwa aasithiyana nlamulo naahaala owuulihaka muru. Murokora yoowo oniilipiserya omwiiwelela Yehova moorweela wa okhala awiiwelela wa iyawe, onnaakhaviherya achu a veechokoni vawe okhalano murecele. (Sal. 119:165) Iyawe onnaphura, yene onnaphura, navetho anaawe annaphwanyavo mphurelo.

10. Tiheeni nnaweryaahu ohuserya orweela wa masu alociwe ni Karol?

¹⁰ Muthiyana yoowo onamucicimiha iyawe oohiphaameya, onnooniherya wi onnamusivela ni onnamucicimiha Yehova yoowo aavaherenrye mirici achu akina. Murokora awiichaniwa Karol, yoowo onakhala o Amerika Oohico oriye: “Kinnasuwela wi iyaka onanwerya ohesa. Kinnasuwela tho wi mukhalelo kinamukhalihaaka iyaka vaavaa onapakeiye soohesa onnooniherya ophiyerya mweeryo taani kinavahaaka esisapo onthamwene aka ni Yehova. Mwawiihiiha kinneererya otitelela okhala awiiwelela nthowa nawi kinnachuna omuhakalaliha Tiithi aka awirimu.”

11. Tiheeni enamukhaviherya murokora awiichaniwa Aneese okhala oolevelela, nave tiheeni nnahuseryaahu orweela wa masu olonceiye?

¹¹ Onamukhala woovila wa muthiyana otheliwe omwiiwelela iyawe wakhala wi mulopwana hanapwacha moonelo ni sawuukhula sawe. Nyenya moone yeeyo murokora awiichaniwa Aneese aapankeiye vaavaa ela yeeren’yaaya. Owo oriye: “Kaaneererya ohikuha mathowa. Kinnuupuwela wi oothene ahu ninnacheka. Yoolakelelaaka ori okhurumuwela moomalela, hiiha ntoko Yehova. Vaavaa kinakhurumuwelaaka kinnakhalano murecele wanaawiili mmuupuweloni mwaka.” (Sal. 86:5) Wakhala wi muthiyana tookhurumuwela onamukhala wookhweya wa yoowo okhala awiiwelela.

12. Sootakiherya taani inalociwa Mpiipiliyani?

¹² Akina ananwerya wuupuwela wi muchu awiiwelela tooceecheya. Nyenya ela tahi eparipari. Piipiliya onnaloca sootakiherya sa achu ancipale yaawo yaari awiiwelela nave yoonihenrye okhala oolipa murima. Vano nnahaala othokororya  yootakiherya ya Yesu, Apikayeli ni Mariya.

13. Ntakhara heeni Yesu onnamwiiwelela Yehova? Mutharihe.

¹³ Yesu onnamwiiwelela Yehova. Nyenya eyo henooniherya wi haano masuwelelo naari mavyakelo. Mahusiheryo awe ookhweya ni ookwakwaleya annooniherya wi owo ta masuwelelo. (Yoh. 7:45, 46) Yehova aahicicimiha mavyakelo a Yesu, ophiyerya wi aahimweemererya olapa vamoha, vaavaa Yehova aapatuseiye ichu wirimu ni veelaponi yavathi. (Masi. 8:30; Ahe. 1:2-4) Nave Yehova amanle omviiha Yesu mookhwani, aahimvaha ‘owerya wirimu ni veelaponi yavathi.’ (Mat. 28:18) Naamwi Yesu arino mavyakelo mancipale owo onnamuroromela Yehova wi amuhoolele. Ntakhara heeni? Nthowa nawi onnamusivela Tiithi awe.—Yoh. 14:31.

14. Tiheeni alopwana athenle anahuseryaaya orweela (1) mmukhalelo Yehova Onaakhaliheiye athiyana? (2) mmasu anaphwanyeya mu Masiposipo 31?

¹⁴ Nihusiheryo wa alopwana athenle. Tahi wi Yehova onaaleela athiyana wi ewiiweleleke asiiyaya nthowa nawi awo tahi echu enevo waapwaha alopwana. Yehova ohooniherya yeela moorweela wa waathanla alopwana vamoha ni athiyana wi yalamulele vamoha ni Yesu. (Gal. 3:26-29) Yehova ohooniherya wi onnamuroromela Mwanawe moorweela wa omvaha olamulelo. Moolikana, mulopwana othenle a miruku onanwerya omvaha mwaariye mirici mikina. Elocaka sa muthiyana otheliwe oophwanelela, Masu a Muluku alonce wi owo onnahoolela opakiwa wa miteko sa vaate, onnathuma emaca ni ikhorowa sawe nave onneesiha maroca awe avareryaka mphurelo aya. (Mwaalakhanye Masiposipo 31:15, 16, 18.) Owo tahi kapuro ohineemereryiwa oloca moonelo awe. Ohiya yeeyo, iyawe onnamuroromela nave onnawiriyana moonelo awe. (Mwaalakhanye Masiposipo 31:11, 26, 27.) Vaavaa mulopwana onamukhaliheiye mwaariye mmukhalelo yoola wa ncicimiho, owo onnamwiiwelela iyawe moohakalala.

15. Muthiyana otheliwe oni ahuserye hai orweela wa yootakiherya ya Yesu?

¹⁵ Nihusiheryo wa athiyana atheliwe. Naamwi Yesu aapanke miteko mitokweene, owo huupuwenle wi omwiiwelela Yehova tahi echu yoophwanelela. (1 Kor. 15:28; Fil. 2:5, 6) Moolikana, muthiyana oophwanelela yoowo onachariha yootakiherya ya Yesu, hani uuliheye muru moorweela wa omwiiwelela iyawe. Onahaala omukhaviherya iyawe ohiya pahiru nthowa na omusivela, nyenya nthowa noochuneya, woona wi onnamusivela ni omucicimiha Yehova.

16. Mwawiiwanana ni 1 Samuwele 25:3, 23-28, nikacamiho taani Apikayeli aakumanneiyeno? (Moone eruku ya ekaapa.)

¹⁶ Apikayeli aahikhalano iyawe iichaniwa Napali. Owo aari mulopwana awiirumiha, a nthalu ni oohithamalela. Naamwiihiiha, Apikayeli, honne othela wawe ntoko echu ehirino esisapo. Owo anwerya omaala ni omweemererya Tavite wi amwiiphe iyawe. Aahipaka soothene ophiyerya aweryeleiyevo wi amukhapelele iyawe vamoha ni achu oothene a veechokoni vawe. Mwaanyiherye mukhalelo Apikayeli aareiye oolipa murima vaavaa aawaacamenleiye anakhoco ale masana masese, ni othokororya mwaha ole mwancicimiho ni Tavite. Ophiyerya wi aahiveka nikhurumuwelo ntakhara soocheka sa iyawe. (Mwaalakhanye 1 Samuwele 25:3, 23-28.) Mwawaakuveya, Tavite aasuwela wi Yehova aahimpharihela muthiyana ole oolipa murima wi amvahe ekano ni omuhiiha opaka yoocheka etokotoko.

17. Alopwana athenle tiheeni anahuseryaaya orweela wa yaweereya ya Apikayeli ni Tavite?

¹⁷ Nihusiheryo wa alopwana athenle. Apikayeli aari muthiyana a miruku. Mwa miruku Tavite aahiwiriyana ekano awe. Ntoko yookhumelela, aahisepa yoocheka etokweene ya owiipha achu yahaarino yoocheka. Moolikana, mulopwana othenle a miruku onahaala owiriyana moonelo wa mwaariye vaavaa onapakeiye yoolakelela yoochuneya. Akhweya moonelo wa mwaariye  onahaala omukhaviherya mulopwana opaka yoolakelela mwa miruku.

18. Tiheeni athiyana atheliwe anahuseryaaya orweela wa yootakiherya ya Apikayeli?

¹⁸ Nihusiheryo wa athiyana atheliwe. Muthiyana otheliwe yoowo onamusivela ni omucicimiha Yehova, onanwerya oruuha mphurelo wa emusi awe. Moohiphwacha waakhanle wi mulopwana onnamurumeela Yehova naari onnachariha malamulo awe. Muthiyana ntoko yoowo hani aavyaavye omaliha othela wawe ehirivo mathipelo a Mpiipiliyani. Moohiyana, moorweela wa wooniherya ncicimiho ni wiiwelela owo onahaala weererya omuceenyerya iyawe ohuserya vooloca sa Yehova. (1 Ped. 3:1, 2) Naamwi iyawe ahipanke yoolakelela ya omurumeela Yehova, owo onahaala ohakalala omoona muthiyana amwiiwelelaka iyawe ni okhala oororomeleya wa Yoowo.

19. Mmikhalelo taani muthiyana otheliwe ohinahaaleiye omwiiwelela iyawe?

¹⁹ Muthiyana otheliwe, yoowo ori Mukristu onamwiiwelela iyawe hani amukhaviherye iyawe wakhala wi onnamuhiiha ochariha malamulo ni malakiheryo a Mpiipiliyani. Mwaanyiherye wi, murokora yoowo iyawe ohiri Namoona onnamuleela wi oothe, iiye, naari opaka echu vyakala ehinamuhakalaliha Yehova. Akristu oothene, ophitaanyerya arokora atheliwe, muchu anaphwanelaaya opacerya omwiiwelela ti Yehova Muluku. Wakhala wi murokora onnaleeliwa ohiiwelela malakiheryo a Mpiipiliyani owo onaphwanela okhooca atharihaka mooreera murima ni moolipa murima mathowa anamweeriha oheerano yeeyo onaleeliweiye opaka.—Saw. 5:29.

20. Nnasuwela hai wi Mariya aahikhalano onthamwene waphaama ni Yehova?

²⁰ Mariya aahikhalano onthamwene wawaacameleya ni Yehova. Mwawooneya, aanasuwela phaama soorempwa. Elukuluku aavaaneleiye ni Elisapeti, amamaawe Yohani Mpatisi, Mariya aahiromola Soorepa sa Ehepiri opwaha ikwaha makhumi meeli. (Luka 1:46-55) Nave muupuwele ela: Naamwi Mariya aakameliwe ni Yosefe, munkeelo a Yehova, haalonce ni Yosefe mu ekwaha yoopacerya. Voopacerya, munkeelo aalonce mooluluwanya ni Mariya nave aahimuleela wi aahaala omuyara Mwaana a Muluku. (Luka 1:26-33) Yehova aanamusuwela phaama Mariya, nave aahiroromela wi owo aahaala omusivela ni omukhapelela Mwanawe. Mweeparipari, Mariya, aahititelela okhalano onthamwene waphaama ni Yehova naamwi Yesu aakhwile ni oviihiwa mookhwani ni oya wirimu.—Saw. 1:14.

21. Tiheeni alopwana athenle anahuseryaaya orweela wa yeeyo Piipiliya onaloceiye sa Mariya?

 ²¹ Nihusiheryo wa alopwana athenle. Mulopwana othenle yoowo ori amiruku, onnahakalala vaavaa mwaariye onasuweleiye phaama Soorepa. Owo hanuuliheya muru naari onyeenyeya ni mwaariye uupuwelaka wi owo onachuna okhala muru wa echoko. Mulopwana onnasuwela wi wakhala wi mwaariye onnamusuwela Piipiliya vamoha ni malakiheryo awe, onahaala okhaviherya echoko aya. Naamwi muthiyana ahusenrye sincipale mu exikola ya mulaponi ompwaha iyawe, mulopwana torino murici wa okhaviherya emusi awe mu omurumeela Yehova, ntoko yootakiherya, orehererya malapelo a echoko.—Éfe. 6:4.

22. Tiheeni athiyana atheliwe anahuseryaaya orweela wa Mariya?

²² Nihusiheryo wa athiyana atheliwe. Muthiyana onaphwanela omwiiwelelaka iyawe, naamwiihiiha, muthiyana torino murici wa olipiha nroromelo na yoowo mwaneene. (Gal. 6:5) Mwawiihiiha, muthiyana onaphwanela omaliha elukuluku wi apake yoohuserya ya muchu mukhateiye ni wuupuwelelaka yeeyo onahusereiye. Weerano hiiha enahaala omukhaviherya otitelela omusivela ni omucicimiha Yehova, nave onahaala okhala oohakalala moorweela wa omwiiwelela iyawe.

23. Muthiyana otheliwe yoowo ori awiiwelela onaphura hai mukhateiye, nave emusi ni muloko awe onaphura hai?

²³ Athiyana atheliwe yaawo anatitelela owiiwelela asiiyaya nthowa na omusivela Yehova, annaphwanya ohakalala wawaacasa ni weeliwa murima waapwaha yaale anakhooca marehereryo a Yehova. Awo tho annatikitherya yootakiherya yaphaama wa amiravo ni asimwali. Annatikitherya osivela ni murecele, ohiya pahiru veechokoni vaya nyenyatho mmulokoni. (Tito 2:3-5) Alapeli ancipale a Yehova anaphitaanyerya athiyana. (Sal. 68:11) Oothene ahu alopwana ni athiyana nookhalano murici woochuneya wa wunnuwiha murecele mmulokoni. Mwaha onacharela, onahaala wooniherya mukhalelo mmoha ti mmoha a hiyo oneereiye aakhwaniherye murici yoola.