Mary ni aiyawe John, a enakhala mu elapo yeeyo michaka saphaama sinaweryaaya olaleeryiwa wa anamuteko ancipale yaawo eri anamarwa o Filipina. Variyari va epahu ya Koronaviru, Mary aahipaceryiha mwaphaama soohuserya sa Piipiliya ohiya pahiru mu elapo yeeyo aakhaleiyewo, nyenya tho mu ilapo ikina. Ti mwawiihai owo eenreiyeno yeeyo?

Mary aanaakoha oohuserya awe a Piipiliya ariki: “Apwanne moomusuwela muchu mukina yoowo aahaala osiveliwa omuhuserya Piipiliya?” Wakhala wi awo aaloca wi aai, owo aanaakoha: “Mwaanwerya okisuweliha yaawo?” Opaka nikoho nenla nookhweya mweeparipari ninnaruuhela sookhumelela saphaama. Ntakhara heeni? Nthowa nawi achu yaawo enawiriyana Masu a Muluku, mweeparipari annachuna okawana yeeyo ahusenryaaya ni amusi ni asinthamwene yaawo enaasivelaaya. Teevi enakhala yookhumelela wa opaka nikoho nenla?

Jasmin oohuserya a Piipiliya a Mary, aahimusuweliha achu axexe yaawo tho yaachuna omuhuserya Piipiliya. Mmoha a yaawo aari Kristine, aanasiveliwa ni yoohuserya awe ophiyerya aahimveka Mary wi ahuseryeke ni yoowo ikwaha piili va esumana. Vaavaa Mary aamukonheiye waakhanle wi owo oomusuwela muchu mukina aahaala osiveliwa omuhuserya Piipiliya, Kristine aahi: “Aai, kinahaala woosuwelihaani asinthamwene aka.” Mu isumana sa vakhaani, Kristine aahimusuweliha Mary asinthamwene awe axexe yaawo yaachuna ohuserya. Moovira wa elukuluku, Kristine aahimusuweliha tho asinthamwene akina yaawo akhweya yaarino nchuno na omuhuserya Piipiliya.

Kristine aanachuna tho wi emusi awe o Filipina yaahusenrye vooloca sa Piipiliya. Mwawiihiiha, owo aaloca ni mwanawe, Andrea. Woopaceryani, Andrea aahuupuwela: Anamoona a Yehova Malapelo pahi, awo hanamweemererya Yesu nave enapharihela Nlakano Nakhalai. Emanle pahiru ohuserya ekwaha emoha, owo aahiiwexexa wi yeeyo owo uupuweleiye vooloca sa Anamoona a Yehova yaari echu yooheseya. Variyari va yoohuserya awe, owo aanaloca: “Woona wi Piipiliya tonaloca yeeyo, enaphwanela okhala yeeparipari!”

Woovira wa elukuluku, Andrea aahimusuweliha Mary asinthamwene awe apiili ni nthamwene awe mmoha oomutekoni yaawo yaapacenrye ohuserya. Ohiya yeeyoru, Andrea tho aakhalano atitiya awe awiichaniwa Angela. Awo yaari eevaasi nave ilukuluku soothene yaaniiwa vaavaa Mary aahuseryeiye ni Andrea, nyenya Mary haasuwela sa yeeyo. Nyenya nihiku nimoha, Angela aahimukoha Andrea wakhanle wi owo aanwerya omveka Mary wi amuhuseryeke Piipiliya ni yoowo tho. Angela aanasiveliwa ni yeeyo aahuseryeiye. Mu mweeri mmoha, owo aahisuwela soorepa sincipale nave anachuna ohuseryaka ikwaha xexe va esumana! Nnikhaviheryo na Andrea, Angela aahipacerya ophwanyeya mmithukumano  moohihiyererya orweela wa vitiyu konfrensia.

Vaavaa Mary aasuwenleiye wi aiyawe Kristine, Joshua, yaanakhala vakhiviru variyari va yoohuserya ya Kristine, Mary aahimukoha waakhanle wi awo yaahaala osiveliwa okhalaka vamoha. Joshua aahiloca: “Kinahaala pahiru owiriyanaka, nyenya muhikipakeleke makoho; wakhala wi nyuwaano moheerano yeeyo, kinahaala opwahavo.” Mu aminuutu athanu variyari va yoohuserya, owo aahipaka makoho ompwaha Kristine nave owo aanachuna tho omuhuseryaka Piipiliya.

Makoho ookhweya a Mary yaahimweeriha okhalano soohuserya sa Piipiliya soohiyanahiyana. Ni sincipale sa seiho, owo aahipaka marehereryo wi oohuserya akina ehusihiweke ni Anamoona a Yehova akina. Ophitaanyerya soothene, Mary aahipaceriha soohuserya sa Piipiliya sawaakhwana 28 mu ilapo xexe soohiyana.

Jasmin, oohuserya oopacerya a Piipiliya yoowo oromoliwe mu yaweereya yeela, opatisiwe mu Apirili a 2021. Kristine apatisiwe mweeri wa Maiyu a 2022 nave aahikookela o Filipina wi akhale ni amusi awe. Oohuserya akina apiili yaawo Kristine aamusuwelinheiye Mary yaahipatisiwa tho. Angela aahipatisiwa mu miyeeri vakhaani ohoolo waya nave vano onarumeela ntoko piyoneera ookilaatheya. Aiyawe Kristine Joshua, ni mwanaya Andrea, vamoha ni oohuserya akina ennaya vahoolo.

Mu nsana noopacerya, michaka saphaama saahimwaramwaxeya mwawaakuveya variyari wa amusi ni wa asinthamwene. (Yoh. 1:​41, 42a; Saw. 10:​24, 27, 48; 16:​25-33) Munoona hai waakoha oohuserya anyu a Piipiliya wa akina arino nchuno, ntoko: “Apwanne moomusuwela muchu mukina aahaala osiveliwa omuhuserya Piipiliya?” Ntoko yookhumelela, akhweya munanwerya opaceriha soohuserya sa Piipiliya sincipale moorweela wa opaka nikoho nenla nookhweya nenlo muchu vyakala onahaaleiye owerya opaka?